Linga 177

Liṅga 177

ekacatvāriṃśattamo'dhyāyaḥ
sanatkumāra uvāca
hiraṇyavṛṣadāmañca kathayāmi samāsataḥ
vṛṣarūpaṃ hiraṇyena sahasreṇātha kārayet

tadarddhāṅghena vā dhīmān tadarddhāṅghena vā punaḥ
aṣṭottaraśatenāpi vṛṣabhaṃ dharmarūpiṇam

lalāṭe kārayet puṇḍramarddhacandrakalāvṛtim
sphaṭikena tu karttavyaṃ khurantu rajatena vai

grīvāntu padmarāgeṇa kakud gomedakena ca
grīvāyāṃ ghāṇṭavalayaṃ ratnacitrantu kārayet

vṛṣāṅgaṃ kārayettatra kiṅkiṇīvalayāvṛtam
pūrvoktadeśakāle tu vedikopari maṇḍale

vṛṣendraṃ sthāpayettatra paścimāmukhamagrataḥ
īśvaraṃ pūjayedbhaktyā vṛṣārūḍhaṃ vṛṣadhvajam

vṛṣendraṃ pūjya gāyatryā namaskṛtya samāhitaḥ
tīkṣṇaśṛṅgāya vidmahe dharmapādāya
dhīmahi tanno vṛṣaḥ pracodayāt

mantreṇānena sampūjya vṛṣaṃ dharmavivṛddhaye
homayecca ghṛtānnādyai ryathā vibhavavistaram

vṛṣabhaḥ pūjya dātavyo brāhmaṇebhyaḥ śivāya vā
dakṣiṇā caiva dātavyā yathā vittānusārataḥ

etad yaḥ kurute bhaktyā vṛṣadānamanuttamam
śivasyānucaro bhūtvā tenaiva saha modate

iti mahāpurāṇe śrīlaiṅge uttarārddhe suvarṇavṛṣadānaṃ nāmaikacatvāriṃśattamo'dhyāyaḥ || 41

Linked texts (4)