Pramāṇa · Search · About · API

Linga 185

Liṅga 185

Language
Sanskrit

Contents

185.1

ṛṣaya ūcuḥ
aghoreśasya māhātmyaṃ bhavatā kathitaṃ purā
pūjāṃ pratiṣṭhāṃ devasya bhagavan ! vaktumarhasi

185.2

sūta uvāca
aghoreṇāṅgayuktena vidhivacca viśeṣataḥ
pratiṣṭhāliṅgavidhinā nānyathā munipuṅgavāḥ !

185.3

tathāgnipūjāṃ vai kuryyādyathā pūjā tathaiva ca
sahasraṃ vā tadarthaṃ vā śatamaṣṭottarantu vā

185.4

tilairhomaḥ prakarttavyo dadhimadhvājyasaṃyutaiḥ
ghṛtasaktu madhūnāñca sarvvaduḥkhapramārjjanam

185.5

vyādhīnāṃ nāśanañcaiva tilahomastu bhūtidaḥ
sahasreṇa mahābhūtiḥ śatena vyādhināśanam

185.6

sarvvaduḥkhavinirmukto japena ca na saṃśayaḥ
aṣṭottaraśatenaiva trikāle ca yathāvidhi

185.7

aṣṭottarasahasreṇa ṣaṇmāsājjāyate dhruvam
siddhayo naiva sandeho rājyamaṇḍalināmapi

185.8

sahasreṇa jvaro yāti kṣīreṇa ca juhoti yam
trikālaṃ māsamekantu sahasraṃ juhuyāt payaḥ

185.6-2

māsena sidhyate tasya mahāsaubhāgyamuttamam
siddhyate cābdahomena kṣaudrājyadadhisaṃyutam

185.10

yavakṣīrājyahomena jātitaṇḍulakena vā
prīyeta bhagavānīśo hyaghoraḥ parameśvaraḥ

185.11

danā puṣṭirnṛpāṇāñca kṣīrahomena śāntikam
ṣaṇmāsantu ghṛtaṃ hutvā sarvvavyādhivināśanam

185.12

rājayakṣmā tilairhomānnaśyate vatsareṇa tu
yavahomena cāyuṣyaṃ ghṛtena ca jayassadā

185.13

sarvvakuṣṭhakṣayārthañca madhunāktaiśca taṇḍulaiḥ !
juhuyādayutaṃ nityaṃ ṣaṇmāsānniyataḥ sadā

185.14

ājyaṃ kṣīraṃ madhuñcaiva madhuratrayamucyate
samastaṃ tuṣyate tasya nāgayedvai bhagandaram

185.15

kevalaṃ ghṛtahomena sarvarogakṣayaḥ smṛtaḥ
sarvvavyādhiharaṃ dhyānaṃ snāpanaṃ vidhinārcanam

185.16

evaṃ saṃkṣepataḥ proktamaghorasya mahātmanaḥ
pratiṣṭhāyāṃ janaṃ sarvaṃ nandinā kathitaṃ purā

185.17

brahmaputrāya śiṣyāya tena vyāsāya suvratāḥ !

185.17.p1

ityādi mahāpurāṇe śrīlaiṅge uttarārddhe ekonapañcāśattamo'dhyāyaḥ || 49

Linked texts (1)