Linga 186
Liṅga 186
- Language
- Sanskrit
186.1
ṛṣaya ūcuḥ
nigrahaḥ kathitastena śivavaktreṇa śūlinā
kṛtāparādhināṃ tantu vaktu marhasi suvrata !
186.2
tvayā na viditaṃ nāsti laukikaṃ vaidikaṃ tathā
śrautaṃ smārttaṃ mahābhāga ! romaharṣaṇa ! suvrata !
186.3
sūta uvācaṃ
purā bhṛgusutenokto virūpākṣāya suvratāḥ !
nigraho ghoraśiṣyeṇa śakropākhyānatejasā
186.4
tasya prasādāddevendro hiraṇyākṣaḥ pratāpavān
trailokyamakhilaṃ jitvā sadevāsuramānuṣam
186.5
utpādya putraṃ gaṇapañcāndhakañcoruvikramam
rarāja loke devena varāheṇa niṣūditaḥ
186.6
strībādhāṃ bālabādhāñca gavāmapi viśeṣataḥ
kurvvato nāsti vijayo mārgenānena bhūtale
186.7
tena daityena sā devī dharā nītā rasātalam
tenāghoreṇa devena niṣphalo nigrahaḥ kṛtaḥ
186.8
samvatsarasahasrānte varāheṇa ca sūdataḥ
tasmādaghorasiddhārthaṃ brāhmaṇācaiva bādhayet
186.6-2
strīṇāmapi viśeṣeṇa gavāmapi na kārayet
guhyād guhyatamaṃ gopyamatiguhyaṃ vadāmi vaḥ
186.10
ātatāyinaruddiśya karttavyaṃ nṛpasattamaiḥ
brāhmaṇebhyo na karttavyaṃ svarāṣṭrasya vā punaḥ
186.11
atīvadurjjaye prāpte bale sarve niṣūdite
adharmayukte samprāpte kuryyādvidhimanuttamam
186.12
aṣṭayenaiva karttavyo hyaṣṭayenaiva kārayet
kṛtamātre na sandeho nigrahaḥ samprajāyate
186.13
lakṣamātraṃ pumān japtvā aghoraṃ ghorarūpiṇam
daśāṃśaṃ vidhinā hutvā tilena dvijasattamāḥ !
186.14
sampūjya lakṣapuṣpe ṇa sitena vidhipūrvakam
bāṇaliṅge 'thavā vahnau dakṣiṇāmūttimāśritaḥ
186.15
siddhamantro'nyathā nāsti dṛṣṭā siddhādayaḥ punaḥ
siddhamantraḥ svayaṃ kuryyāt pretasthāne viśeṣataḥ
186.16
mātṛsthāne'pi vā vidvān vedavedāṅgapāragaḥ
kevalaṃ mantrasiddhau vā brāhmaṇaḥ śivabhāvitaḥ
186.17
kuryyādvidhimimaṃ dhīmānātmano'rthe nṛpasya vā
śūlāṣṭakaṃ nyasedvidvān pūrvādauśānakāntakam
186.18
viśikhañca triśūlañca caturviṃśacchikhāyataḥ
aghoravigrahaṃ kṛtvā sañjīvitavigrahaḥ
186.18-2
sarvanāśakaraṃ dhyātvā sarvakarmāṇi kārayet
kālāgnikoṭisaṅkāśaṃ svadehamapi bhāvayet
186.20
śūlaṃ kapālaṃ pāśañca daṇḍañcaiva śarāsanam
bāṇaṃ ḍamarukaṃ khaḍgamaṣṭāyudhamanukramāt
186.21
aṣṭahastaśca varado nīlakaṇṭho digambaraḥ
padmatattvasamārūḍho arddhacandradharaḥ prabhuḥ
186.22
daṃṣṭrākarālavadano raudradṛṣṭirbhayaṅkaraḥ
huṃ phaṭkāramahāśabdatrasitākhiladisu khaḥ
186.23
trinetraṃ nāgapāśena subaddhasukuṭaṃ svayam
sarvābharaṇasampannaṃ pretabhasmāvaguṇṭhitam
186.24
bhūtaiḥ pretaiḥ piśācaiśca ḍākinībhiśca rākṣasaiḥ
saṃvṛtaṃ gajacarmeṇa sarpabhūṣaṇabhūṣitam
186.25
vṛścikābharaṇaṃ devaṃ nīlanīradanisvanam
nīlāñjanādrisaṅkāśaṃ siṃhacarmottarīyakam
186.26
dhyāyedevamaghoreśaṃ ghoraghorataraṃ śivam
ṣaṭtriṃśaduttamālābhiḥ prāṇāyāmena suvrataḥ !
186.27
mahāmudrāsamāyuktaḥ sarvakarmāṇi kārayet
siddhamantraścitāgnau vā pretasthāne yathāvidhi
186.28
sthāpayenmadhyadeśe tu aindre yāmye ca vāruṇe
kauberyyāṃ vidhivat kṛtvā homakuṇḍāni śāstrataḥ
186.28-2
ācāryo madhyakuṇḍe tu sādhakāśca diśāsu vai
parikīyya vilomena pūrvavacchūlasambhṛtaḥ
186.30
kālāgnipīṭhamadhyasthaḥ svayaṃ śiṣyaiśca tādṛśaiḥ
dhyātvā ghoramaghoreśaṃ dvātriṃśākṣarasaṃyutam
186.31
vibhītakrena vai kṛtvā dvādaśāṅgulamānataḥ
pīṭhe nyasya nṛpendrasya śatru maṅgārakeṇa tu
186.32
kuṇḍasyādhaḥ khanecchatu brāhmaṇaḥ krodhamūrcchitaḥ
adhomukhordhvapādantu sarvvakuṇḍe ṣu yatnataḥ
186.33
śmaśānāṅgāramānīya tuṣeṇa saha dāhayet
tatrāgni' sthāpayettūrṇaṃ brahmacaryyaparāyaṇaḥ
186.34
māyūrāstreṣa nābhyāntu jvalanaṃ dīpayettataḥ
kañcukaṃ tuṣasaṃyuktaiḥ kārpāsāsthisamanvitaiḥ
186.35
raktāvastrasamaṃ miśra homadravyairviśeṣataḥ
hastayantrodbhavaistailaiḥ saha homantu kārayet
186.36
aṣṭottarasahasrantu homayedanupūrvvaśaḥ
kṛṣṇapakṣe catuddaśyāṃ samārabhya yathākramam
186.37
aṣṭamyantaṃ tathāṅgāramaṇḍalakṣānavarjitaḥ
evaṃ kṛte nṛpendrasya śatravaḥ kulajaiḥ saha
186.38
sarvvaduḥkhasamopetāḥ prayānti yamasādanam
śarvva pānena cādāya mūtkapālena kha' tathā
186.38-2
keśaṃ tṛṇāṃ tathāṅgāraṃ tuṣa' kañca kamiva ca
corakaṇṭāṃ rājadhūlīṃ gṛhasaṃmārjanasya vā
186.40
viṣasarpasya dantāni vṛṣadantāni yāni tu
gavāñcaiva krameṇaiva vyāghradantanakhāni ca
186.41
tathā kṛṣṇamṛgāṇāñca vir̤ālasya ca pūrvvavat
nakulasya ca dantāni varāhasya viśeṣataḥ
186.42
daṃṣṭrāṇi sādhayitvā tu mantreṇānena suvratāḥ !
japedaṣṭottaraśataṃ mantrañcāghoramuttamam
186.43
tat kapālaṃ nakhaṃ kṣetre gṛhe vā nagare'pi vā
pretaśayyāgne'pi vā rāṣṭre mṛtavastreṇa veṣṭayet
186.44
śatroraṣṭamarāśau vā pariviṣṭe divākare
some vā pariviṣṭe tu mantreṇānena suvratāḥ !
186.45
sthānanāśo bhavettasya śatrornāśaśca jāyate
śatruṃ rājñaḥ samālikhya gamane samavasthite
186.46
bhūtale darpaṇaprakhye vitānopari śobhite
catustoraṇasaṃyukte darbhamālāsamāite
186.47
vedādhyayanasampanne rāṣṭre dṛṣṭiprāśake
dakṣiṇena tu pādena mūrdhni santār̤ayet svayam
186.48
evaṃ kṛte nṛpendrasya śatrunāśo bhaviṣyati
svarāṣṭrapatimuddiśya yaḥ kuryyādabhicārikam
186.48-2
sa ātmānaṃ nihatyaiva svakulaṃ nāśayet kudhīḥ
tasmāt svarāṣṭragoptāraṃ nṛpatiṃ pālayet sadā
186.50
mantrauṣadhikriyādyaiśca sarvayatnena sarvvadā
etadrahasyaṃ kathitaṃ na deyaṃ yasya kasyacit
Linked texts (2)
- Liṅgapurāṇa — Vyāsa, Sanskrit
- Tristhalīsetu (Nārāyaṇa) — Nārāyaṇa (Mahiṣamaṅgalam) 1513, Sanskrit