Linga 23: atha ekonaviṃśo'dhyāyaḥ

Liṅga 23

sūta uvāca
athovāca mahādevaḥ prīto'haṃ surasattamau !
paśyatāṃ māṃ mahādevaṃ bhayaṃ sarvaṃ vimucyatām

yuvāṃ prasūtau gātrābhyāṃ mama pūrvaṃ mahābalau
ayaṃ me dakṣiṇe pārśve brahmā lokapitāmahaḥ

vāme pārśve ca me viṣṇurviśvātmā hṛdayodbhavaḥ
prīto'haṃ yuvayoḥ samyagvaraṃ dadmi yathepsitam

evamuktvā tu taṃ viṣṇuṃ karābhyāṃ parameśvaraḥ
pasparśa subhagābhyāntu kṛpayā tu kṛpānidhiḥ

tataḥ prahṛṣṭamanasā praṇipatya maheśvaram
prāha nārāyaṇo nāthaṃ liṅgasthaṃ liṅgavarjitam

yadi prītiḥ samutpannā yadi deyo varaśca nau
bhaktirbhavatu nau nityaṃ tvayi cāvyabhicāriṇī

devaḥ pradattavān devāḥ! svātmanyavyabhicāriṇīm
brahmaṇe viṣṇave caiva śraddhāṃ śītāṃśubhūṣaṇaḥ

jānubhyāmavanīṃ gatvā punarnārāyaṇaḥ svayam
praṇipatya ca viśveśaṃ prāha mandataraṃ vaśau

āvayordevadeveśa ! vivādamatiśobhanam
ihāgato bhavān yasmādvivādaśamanāya nau

tasya tadvacanaṃ śrutvā punaḥ prāha haro harim
praṇipatya sthitaṃ mūrdhnā kṛtāñjalipuṭaṃ smayan

śrīmahādeva uvāca
pralayasthitisargāṇāṃ karttā tvaṃ dharaṇīpate !
vatsa ! vatsa ! hare ! viṣṇo ! pālayaitaccarācaram

tridhā bhinno hyahaṃ viṣṇo ! brahmaviṣṇubhavākhyayā
sargaṃrakṣālayaguṇairniṣkallaḥ parameśvaraḥ

sammohaṃ tyaja bho viṣṇo ! pālayainaṃ pitāmaham
pādme bhaviṣyati sutaḥ kalpe tava pitāmahaḥ

tadā drakṣyasi māmnaivaṃ so'pi drakṣyati padmajaḥ
evamuktvā sa bhagavāṃstatraivāntaradhīyata

tadāprabhṛti lokeṣu liṅgārttā supratiṣṭhitā
liṅgavedī mahādevī liṅgaṃ sākṣānmaheśvaraḥ

layanālliṅgamityuktaṃ tattraiva nikhilaṃ surāḥ
yastu laiṅgaṃ paṭhennityamākhyānaṃ liṅgasannidhau

sa yāti śivatāṃ vipro nātra kāryā vicāraṇā

iti śrīlaiṅge viṣṇaprabodhe ekonaviṃśo'dhyāyaḥ || 18

Linked texts (4)