Linga 36

Liṅga 36

kka garvvastava bhaktiśca kka pūjā pūjayā phalam
kva cāhaṃ kva ca me bhītiḥ śveta ! baddho'si vai mayā

liṅge'smin saṃsthitaḥ śveta ! tava rudro maheśvaraḥ
niśceṣṭo'sau mahādevaḥ kathaṃ pūjyo maheśvaraḥ

tataḥ sadāśivaḥ svayaṃ dvijaṃ nihantumāgatam
nihantumantakaṃ smayan smarāriryajñahā haraḥ

tvaran vinirgataḥ paraḥ śivaḥ svayaṃ trilocanaḥ
triyambako'mbayā samaṃ sanandinā gaṇeśvaraiḥ

sasarja jīvitaṃ kṣaṇādbhavaṃ nirīkṣya vai bhayāt
papāta cāśu vai balī munestu sannidhau dvijāḥ !

nanāda cordhvamuccairdhornirīkṣya cāntakāntakam
nirīkṣaṇena vai mṛtaṃ bhavasya viprapuṅgavāḥ !

vineduruttamottarāḥ sureśvarā maheśvaram
praṇemurambikāmumāṃ muniśvarāstu harṣitāḥ

sasarjurasya mūrdhni vai munerbhavasya khecarāḥ
suśobhanaṃ suśītalaṃ supuṣpavarṣamambarāt

aho nirīkṣya cāstakaṃ mṛtaṃ tadā suvismitaḥ
śilāśanātmajo'vyayaṃ śivaṃ praṇamya śaṅkaram

uvāca bāladhīrataḥ prasīda ceti vai muneḥ
maheśvara maheśvarasya cānugo gaṇeśvaraḥ

tato viveśa bhagavānanugṛhya dvijottamam
kṣaṇād gūr̤haśarīraṃ hi dhvastaṃ dṛṣṭāntakaṃ kṣaṇāt

tasmān mṛtyuñjayañcaiva bhaktyā sampūjayed dvijāḥ !
muktidaṃ bhuktidañcaiva sarveṣāmapi śaṅkaram

bahunā kiṃ pralāpena samyaksāmyarcya vai bhavam
bhaktyā cāparayā tasmin viśokā vai bhaviṣyatha

śailādiruvāca
evamuktāstadā tena brahmaṇā brahmavādinaḥ
prasīda bhaktirdevaśe bhave rudre pinākini

kena vā tapasā deva ! yajñe nāpyatha kena vā
vratairvā bhagavadbhaktā bhaviṣyanti dvijātayaḥ

pitāmaha uvāca
na dānena muniśreṣṭhāstapasā ca na vidyayā
yajñai homeśca tairvedairyyogaśāstrairnirodhanaiḥ

prasādenaiva sā bhaktiḥ śive paramakāraṇe
atha tasya vacaḥ śrutvā sarve te paramarṣayaḥ

sadāratanayāḥ śrāntāḥ praṇemuśca pitāmaham
tasmāt pāśupato bhaktirdharmakāmārthasiddhidā

munervijayadā caiva sarvamṛtyuñjayapradā
dadhīcaśca purā bhaktyā hariṃ jitvāmarairvibhum

nṛpaṃ jaghāna pādena vajrāsthiścakṣa labdhavān
mayāpi nirjito mṛtyurmahādevasya kīrttanāt

śvetenāpi gatenākhyaṃ mṛtyormu nivareṇa tu
mahādevaprasādena jitomṛtyuryathā mayā

iti śrīlaiṅge triṃśo'dhyāyaḥ samāptaḥ

Linked texts (2)