Linga 38

Liṅga 38

ṛṣaya ūcuḥ
namo digvāsase nityaṃ kṛtāntāya triśūline
vikaṭāya karālāya karālavadanāya ca

arūpāya surūpāya viśvarūpāya te namaḥ
kaṭaṅkaṭāya rudrāya svāhākārāya vai namaḥ

sarvapraṇatadehāya svayañca praṇatātmane
nityaṃ nīlaśikhaṇḍāya śrīkaṇṭhāya namo namaḥ

nīlakaṇṭhāya devāya citābhasmāṅgadhāriṇe
tvaṃ brahmā sarvadevānāṃ rudrāṇāṃ nīlalohitaḥ

ātmā ca sarvabhūtānāṃ sāṅkhyaiḥ puruṣa ucyate
parvvatānāṃ mahāmerurnakṣatrāṇāñca candramāḥ

ṛṣīṇāñca vaśiṣṭhastvaṃ devānāṃ vāsavastathā
oṅkāraḥ sarvavedānāṃ śreṣṭhaṃ soma ca sāmasu

āraṇyānāṃ paśūnāñca siṃhastvaṃ parameśvaraḥ
grāmyāṇāmṛṣabhañcāsi bhagavān lokapūjitaḥ

sarvvathā varttamāno'pi yo yo bhāvo bhaviṣyati
tvāmeva tatra paśyāmo brahmaṇā kathitaṃ yathā

kāmaḥ krodhaśca lobhaśca viṣādo mada eva ca
etadicchāmahe boddhu prasīda parameśvara !

mahāsaṃharaṇe prāpte tvayā deva ! kṛtātmanā
karaṃ lalāṭe saṃvidhya vahnirutpāditastvayā

tenāgninā tadā lokā arccirbhiḥ sarvvato vṛtāḥ
tasmādagnisamā hote bahvo vikṛtāgnayaḥ

kāmaḥ krodhaśca lobhaśca moho dambha upadravaḥ
yāni cānyāni bhūtāni sthāvarāṇi carāṇi ca

dahyante prāṇinaste tu tvat samutthena vahninā
asmākaṃ dahyamānānāṃ trātā bhava sureśvara !

tvañca lokahitārthāya bhūtāni pariṣiñcasi
maheśvara ! mahābhāga ! prabho ! śubhanirīkṣaka !

ājñāpaya vayaṃ nātha ! karttārau vacanaṃ tava
bhūtakoṭisahasreṣu rūpakoṭiśateṣu ca

antaṃ gantuṃ na śaktāḥ sma devadeva ! namo'stu te

ityādi śrīlaiṅge dvātriṃśo'dhyāyaḥ || 32

Linked texts (4)