Linga 43: atha saptatriṃśo'dhyāyaḥ
Liṅga 43
- Language
- Sanskrit
Contents
- 43.40 — 1 part
atha saptatriṃśo'dhyāyaḥ
43.1
sanatkumāra uvāca
bhavān kathamanuprāptaḥ mahādevamumāpatim
śrotumicchāmi tatsarvaṃ vaktumarhasi me prabho !
43.2
śailādiruvāca
prajākāmaḥ śilādo'bhūtpitā mama mahāmune !
so'napatyaḥ suciraṃ kālaṃ tapastepe suduścaram
43.3
tapatastasya tapasā santuṣṭo vajrabhṛka prabhuḥ
śilādamāha tuṣṭo'smi varayasva varāniti
43.4
tataḥ praṇamya deveśaṃ sahasrākṣaṃ sahāmaraiḥ
provāca muniśārdūla ! kṛtāñjalipuṭo harim
43.5
śilāda uvāca
bhagavan ! devatārighna ! sahasrākṣa ! varaprada !
ayonijaṃ mṛtyuhīnaṃ putramicchāmi suvrata !
43.6
śakra uvāca
putraṃ dāsyāmi viprarṣe ! yonijaṃ mṛtyusaṃyutam
anyathā te na dāsyāmi mṛtyuhīnā na santi vai
43.7
na dāsyati sutaṃ te'tra mṛtyuhīnamayònijam
pitāmaho'pi bhagavān kimutānye mahāmune !
43.8
so'pi devaḥ svayaṃ brahmā mṛtyuhīno na ceśvaraḥ
yonijaśca mahātejāścāṇḍajaḥ padmasaṃbhavaḥ
43.6-2
maheśvarāṅgajayaivai bhavānyāstanayaḥ prabhuḥ
tasyāpyāyuḥ samākhyātaṃ parārddhadvayasammitam
43.10
koṭikoṭisahasrāṇi aharbhūtāni yāni vai
samatautāni kalpānāṃ tāvaccheṣāḥ paratra ye
43.11
tasmādayonije putre mṛtyuhīne prayatnataḥ
parityajāśāṃ viprèndra ! gṛhāṇātmasamaṃ sutam
43.12
śailādiruvāca
tasya tadvacanaṃ śrutvā pitā me lokaviśrutaḥ
śilāda iti puṇyātmā punaḥ prāha śacīpatim
43.13
śilāda uvāca
bhagavannaṣṭayonitvaṃ pañcayonitvameva ca
maheśvarāṅgayonitvaṃ sutaṃ vai brahmaṇo mayā
43.14
purā mahendradāyādāddattasyāsya pūrvajāt
nāradārhe mahābāho ! kathamatrāśu no vada
43.15
dākṣāyaṇī sā dakṣo'pi devaḥ padmodbhavatmajaḥ
pautrau kanakagarbhasya kathaṃ tasyāḥ suto vibhuḥ
43.16
śakra uvāca
sthāne saṃśayituṃ vipra ! tava vakṣyāmi kāraṇam
kalpe tatpuruṣe vṛttaṃ brahmaṇaḥ parameṣṭhinaḥ
43.17
sasarja sakalaṃ dhyātvā brahmāṇaṃ parameśvaraḥ
janārddano jagannāthaḥ kalpe vai meghavāhane
43.18
divyaṃ varṣasahasrantu megho bhūtvāvahaddharam
nārāyaṇo mahādevaṃ bahumānena sādaram
43.16-2
dṛṣṭvā bhāvaṃ mahādeveo hareḥ svātmani śaṅkaraḥ
pradadau tasya sakalaṃ sraṣṭuṃ vai brahmaṇā saha
43.20
tadā taṃ kalpamāhurvai meghavāhanasaṃjñayā
hiraṇyagarbhastaṃ dṛṣṭvā tasya dehodbhavastadā
43.21
janārddanasutaḥ prāha tapasā prāpya śaṅkaram
tava vāmāṅkajo viṣṇurdakṣiṇāṅgabhavo hyaham
43.22
mayā saha jagat sarvaṃ tathāpyasṛjadacyutaḥ
jagamayo'vahad yasmān megho bhūtvā divāniśam
43.23
bhavantamavahadviṣṇurdevadevaṃ jagadgurum
nārāyaṇādapi vibho ! bhakto'haṃ tava śaṅkara !
43.24
prasīda dehi me sarvaṃ sarvātmatvaṃ tava prabho !
tadātha labdhvā bhagavān bhavāt sarvātmatāṃ kṣaṇāt
43.25
tvaramāṇo'tha saṅkramya dadarśa puruṣottamam
ekārṇavālaye śubhre tvandhakāre sudāruṇe
43.26
hemaratnacite divye manasā ca vinirmite
duṣprāpye durjanaiḥ puṇyaiḥ sanakādyairagocare
43.27
jagadāvāsahṛdayaṃ dadarśa puruṣaṃ tvajaḥ
anantabhogaśayyāyāṃ śayinaṃ paṅkajekṣaṇam
43.28
śaṅkhacakragadāpadmaṃ dhārayantaṃ caturbhujam
sarvābharaṇasaṃyuktaṃ śṛṃgimaṇḍalasannibham
43.29
śrīvatsalakṣaṇaṃ devaṃ prasannāsyaṃ janārdanam
ramāmudakarāmbhojasparśaraktapadāmbujam
43.30
paramātmānamīśānaṃ tamasā kālarūpiṇam
rajasā sarvalokānāṃ sargalīlāpravarttakam
43.31
sattvena sarvabhūtānāṃ sthāpakaṃ parameśvaram
sarvātmānaṃ mahātmānaṃ paramātmānamīśvaram
43.32
kṣīrārṇave'mṛtamaye śayinaṃ yoganidrayā
taṃ dṛṣṭvā prāha vai brahmā bhagavantaṃ janārdanam
43.33
grasāmi tvāṃ prasādena yathāpūrvaṃ bhavānaham
suyamānastu bhagavān pratibudhya pitāmaham
43.34
udaikṣata mahābāhuḥ smitamauṣañcakāra saḥ
viveśa cāṇḍajaṃ tantugrasastena mahātmanā
43.35
tatastaṃ cāsṛjad brahmā bhuvormadhye na cācyutam
sṛṣṭastena hariḥ prekṣya sthitastasyātha sannidhau
43.36
etasminnantare rudraḥ sarvadevabhavodbhavaḥ
vikṛtaṃ rūpamāsthāya purā dṛptavarastayoḥ
43.37
āgacchad yatra vai viṣṇurviśvātmā parameśvaraḥ
prasādamamulaṃ karttuṃ brahmaṇasya hareḥ prabhuḥ
43.38
tataḥ sametya tau devau sarvvadevabhavodbhavam
apaśyatāṃ bhavaṃ devaṃ kālāgnisadṛśaṃ prabhum
43.39
tau taṃ tuṣṭuvatuścaiva śarvvamugraṃ kapardinam
praṇematuśca varadaṃ bahumānena dūrataḥ
43.40
bhavo'pi bhagavān devamanugṛhya pitāmaham
janārddanaṃ jagannāthastatraivāntaradhīyata
43.40.p1
iti mahāpurāṇe śrīlaiṅge brahmaṇo varapradānaṃ nāma saptatriṃśo'dhyāyaḥ || 37
Linked texts (3)
- Liṅgapurāṇa — Vyāsa, Sanskrit
- Liṅgapurāṇa — Ativīrarāma Pāṇṭiyar 1500, Sanskrit
- Viśvabrahmakulotsāha — Nārāyaṇa Raujī, Sanskrit