Linga 44: atha aṣṭatriṃśo'dhyāyaḥ

Liṅga 44

śailādiruvāca
gate maheśvare deve tamuddiśya janārddanaḥ
paśya bhagavān prāha padmayonimajodbhavaḥ

śrīviṣṇuruvāca
parameśo jagannāthaḥ śaṅkarastveṣa sarvagaḥ
āvayorakhilasyeśaḥ śaraṇañca maheśvaraḥ

ahaṃ vāmāṅgajo brahman ! śaṅkarasya mahātmanaḥ
bhavān bhavasya devasya dakṣiṇāṅgabhavaḥ svayam

māmāhustvaṃ dhayaḥ prekṣya pradhānaṃ prakṛtiṃ tathā
avyaktamajamiyevaṃ bhavantaṃ puruṣastviti

evamāṅarmahādevamāvayorapi kāraṇam
īśaṃ sarvasya jagataḥ prabhumavyayamīśvaram

so'pi tasyāmareśasya vacanāddhārijodbhavaḥ
vareṇyaṃ varadaṃ rudramastuvat prapanāma ca

athāmbhasā mrutāṃ bhūmiṃ samādāya janārddanaḥ
pūrvavat sthāpayāmāsa vārāhaṃ rūpamāsthitaḥ

nadīnadasamudrāṃśca pūrvavaccākarot prabhuḥ
kṛtvā corvī prayatnena nimnonnatavivarjitām

dharāyāṃ so'cinot sarvvān bhūdharān bhūdharākṛtiḥ
bhūrādyāṃścaturo lokān kalpayāmāsa pūrvavat

sraṣṭuñca bhagavān cakre matiṃ matimatāṃ varaḥ
mukhyañca tairyagyonyañca daivikaṃ mānuṣaṃ tathā

vibhuścānugrahaṃ tatra kaumārakamadīnadhīḥ
purastādasṛjaddevaḥ sanandaṃ sanakaṃ tathā

sanātanaṃ satāṃ śreṣṭha naiṣkarmyeṇa gatāḥ param
marīcibhṛgvaṅgirasaṃ pulastyaṃ pulahaṃ kratum

dakṣamatriṃ vasiṣṭhañca so'sṛjad yogavidyayā
saṅkalpañcaiva dharmañca hyadharmaṃ bhagavān prabhuḥ

dvādaśaivaṃ prajāsvetā brahmaṇo'vyaktajanmanaḥ
ṛbhuṃ sanatkumārañca sasarjādau sanātanaḥ

tau cordhvaretasau divyau cāgrajau brahmavādinau
kumārau brahmaṇastulyau sarvajñau sarvabhāvinau

evaṃ mukhyādikān sṛṣṭvā padmayoniḥ pitāmahaḥ
yugadharmmānaśeṣaṃāśca kalpayāmāsa viśvasṛk

iti mahāpurāṇe śrīlaiṅge vaiṣṇavakathanaṃ nāmāṣṭatriṃśo'dhyāyaḥ || 38

Linked texts (4)