Linga 53: atha saptacatvāriṃśo'dhyāyaḥ| •
Liṅga 53
- Language
- Sanskrit
Contents
- 53.25 — 1 part
atha saptacatvāriṃśo'dhyāyaḥ| •
53.1
sūta uvāca
āgnīdhraṃ jyeṣṭhadāyādaṃ kāmyaputraṃ mahābalam
priyavrato'bhyaṣiñcaddai jambūddīpeśvaraṃ nṛpaḥ
53.2
so'tīva bhavabhaktaśca tapasvī taruṇaḥ sadā
śavārcanarataḥ śrīmān gomān dhīmān dvijarṣabhāḥ !
53.3
tasya putrā babhūvuste prajāpatisamā nava
sarve māheśvarāścaiva mahādevaparāyaṇāḥ
53.4
jyeṣṭho nābhiriti khyātastasya kimpuruṣo'nujaḥ
harivarṣastṛtīyastu caturtho vai lilāvṛtaḥ
53.5
ramyastu pañcamastatra hiraṇvān ṣaṣṭha ucyate
kurustu saptamasteṣāṃ bhadrāśvastvaṣṭamaḥ smṛtaḥ
53.6
navamaḥ ketumālastu teṣāṃ deśānnibodhata
nābhestu dakṣiṇaṃ varṣaṃ hemāhvyantu pitā dadau
53.7
hemakūṭantu yad varṣaṃ dadau kimpuruṣāya saḥ
naiṣadhaṃ yat smṛtaṃ varṣe haraye tat pitā dadau
53.8
ilāvratāya pradadau merurairyañca tu madhyamaḥ
nīlācalāśritaṃ varṣaṃ ramyāya pradadau pitā
53.9
śvetaṃ yaduttaraṃ tasmāt pitrā dattaṃ hiraṇmate
yaduttaraṃ śṛṅgavarṣaṃ pitā tat kurave dadau
53.10
varṣaṃ mālyavataścāpi bhadrāśvasya nyavedayat
gandhamādanavarṣantu ketumālāya dattavān
53.11
ityetāni mahāmtoha navavarṣāṇi bhāgaśaḥ
āgnīdhrasteṣu varṣeṣu putrāṃstānabhiṣicya vai
53.12
yathākramaṃ sa dharmātmā tatastu tapasi sthitaḥ
tapasā bhāvitaścaiva svādhyāyaniratastvabhūt
53.13
svādhyāyanirataḥ paścācchivadhyānaratastvabhūt
yāni kimpuruṣādyāni varṣāṇyaṣṭau śubhāni ca
53.14
teṣāṃ svabhāvataḥ siddhiḥ sukhaprāyā hyayatnataḥ
viparyyayo na teṣvasti jarāmṛtyubhayaṃ na ca
53.15
dharmādharmau na teṣvāstāṃ nottamādhamamadhyamāḥ
na teṣvasti yugāvasthā kṣetreṣvaṣṭasu sarvataḥ
53.16
rudrakṣetre mṛtāścaiva jaṅgamā sthāvarāstathā
bhaktāḥ prāsaṅgikāścāpi teṣu kṣetreṣu yānti te
53.17
teṣāṃ hitāya rudreṇa cāṣṭakṣetraṃ vinirmitam
tatra teṣāṃ mahādevaḥ sānnidhyaṃ kurute sadā
53.18
dṛṣṭvā hṛdi mahādevamaṣṭakṣetranivāsinaḥ
sukhinaḥ sarvadā teṣāṃ sa eveha parā gatiḥ
53.16-2
nābhernisargaṃ vakṣyāmi himāṅge'sminnibodhata
nābhistvajanayat putraṃ merudevyāṃ mahāmatiḥ
53.20
ṛṣabhaṃ pārthivaśreṣṭhaṃ sarvakṣatrasya pūjitam
ṛṣabhādbharato yajñe vīraḥ putraśatāgrajaḥ
53.21
so'bhiṣicyautha ṛṣabho bharataṃ putravatsalaḥ
jñānavairāgyamāśritya jitvendriyamahoragān
53.22
sarvātmanātmani sthāpya paramātmānamīśvaram
nagno jaṭī nirāhāro cīrī dhvāntagato hi saḥ
53.23
nirāśastyaktasandehaḥ śaivamāpa paraṃ padam
himādrerdakṣiṇaṃ varṣaṃ bharatāya nyavedayat
53.24
tasmāttu bhārataṃ varṣaṃ tasya nāmnā vidurbudhāḥ
bharatasyātmajo vidvān sumatirnāma dhārmikaḥ
53.25
babhūva tasmiṃstadrājyaṃ bharataḥ sannyaveśayat
putrasaṃkrāmitaśrīko vanaṃ rājā viveśa saḥ
53.25.p1
iti śrīlaiṅge bharatavarṣakathanaṃ nāma saptacatvāriṃśo'dhyāyaḥ
Linked texts (6)
- Liṅgapurāṇa — Vyāsa, Sanskrit
- Brahmāṇḍapurāṇa — Vyāsa, Sanskrit
- Vāyupurāṇa — Vyāsa, Sanskrit
- Viṣṇupurāṇa (critical edition) — Sanskrit
- Liṅgapurāṇa — Ativīrarāma Pāṇṭiyar 1500, Sanskrit
- Prakriyāpāda — Sanskrit