Pramāṇa · Search · About · API

Linga 84: atha dvisaptatitamo'dhyāyaḥ

Liṅga 84

Language
Sanskrit

atha dvisaptatitamo'dhyāyaḥ

84.1

sūta uvāca
atha rudrasya devasya nirmito viśvakarmaṇā
sarvalokamayo divyo ratho yatnena sādaram

84.2

sarvabhūtamayaścaiva sarvadevanamaskṛtaḥ
sarvadevamayaścaiva sauvarṇaḥ sarvasammataḥ

84.3

rathāṅgaṃ dakṣiṇaṃ sūryo vāmāṅgaṃ soma eva ca
dakṣiṇaṃ dvādaśāraṃ hi ṣoḍaśāraṃ tathottaram

84.4

areṣu teṣu viprendrāścādityā dvādaśaiva tu
śaśinaḥ ṣoḍaśāreṣu kalā vāmasya suvratāḥ !

84.5

ṛkṣāṇi ca tadā tasya vāmasyaiva tu bhūṣaṇam
nemyaḥ ṣaḍ ṛtavaścaiva tayorve viprapuṅgavāḥ !

84.6

paṣkaraścāntarikṣaṃ vai rathanīr̤aśca mandaraḥ
astādrirudayādriśca ubhau tau kūbarau smṛtau

84.7

adhiṣṭhānaṃ mahāmerurāśrayāḥ kesarācalāḥ
vegaḥ saṃvatsarastasya ayane cakrasaṅgamo

84.8

muhūrttā bandhurāstasya śamyāścaiva kalāḥ smṛtāḥ
tasya kāṣṭhāḥ smṛtā ghoṇā cākṣadaṇḍāḥ kṣaṇāśca vai

84.9

nimeṣāścānukarṣāśca īṣā cāsya lavāḥ smṛtāḥ
dyaurvarūtho rathasyāsya svargamokṣāvubhau dhvajau

84.10

dharmmo virāgo daṇḍo'sya yajñā daṇḍāśrayāḥ smṛtāḥ
dakṣiṇāḥ savyahastasya loṣṭāḥ paścādyadagnayaḥ

84.11

yugāntakoṭī tau tasya dharmakāmāvubhau smṛtau
īṣā daṇḍastathā vyaktaṃ buddhistasyaiva naṅgalaḥ

84.12

koṇastathā hyahaṅkāro bhūtāni ca balaṃ smṛtam
indriyāṇi ca tasyaiva bhūṣaṇāni samantataḥ

84.13

śraddhā ca gatirasyaiva vedāstasya hayāḥ smṛtāḥ
padāni bhūṣaṇānyeva ṣaḍaṅgānyanubhūṣaṇam

84.14

purāṇanyāyamīmāṃsā dharmaśāstrāṇi suvratāḥ !
bālāgrāḥ paṭāścaiva sarvalakṣaṇasaṃyutāḥ

84.15

mantrā ghaṇṭāḥ smṛtāsteṣāṃ varṇāḥ pādāstathāyamā
avacchedo hyanantastu sahasraphaṇabhūṣitaḥ

84.16

diśaḥ pādā rathasyāsya tathā copadigaśca ha |,
puṣkarādyāḥ patākāśca sauvarṇā ratnabhūṣitāḥ

84.18

samudrāstasya catvāro rathakambalikāḥ smṛtāḥ
gaṅgādyāḥ saritaḥ śreṣṭhāḥ sarvābharaṇabhūṣitāḥ
cāmarāsaktahastāyāḥ sarvā strīrūpaśobhitāḥ
tatra tatra kṛtasthānāḥ śobhayāñcakrire ratham

Linked texts (6)