Linga 97
Liṅga 97
- Language
- Sanskrit
Contents
- 97.54 — 1 part
97.1
iti śrīlaiṅge pūrvabhāge hyaśotitamo'dhyāyaḥ samāptaḥ
vyaśītitamo'dhyāyaḥ
ṛṣaya ūcuḥ
vyapohanastavaṃ puṇyaṃ śrutamasmābhirādarāt
prasaṅgālliṅgadānasya vratānyapi vadasva naḥ
97.2
sūta uvāca
vratāni vaḥ pravakṣyāmi śubhāni munisattamāḥ !
nandinā kathitānīha brahmaputrāya dhīmate
97.3
tāni vyāsādupaśrutya yuṣmākaṃ pravadāmyaham
aṣṭamyāñca caturdaśyāṃ pakṣayorubhayorapi
97.4
varṣamekaṃ tu bhuñjāno naktaṃ yaḥ pūjayecchivam
sarvayajñaphalaṃ prāpya sa yāti paramāṅgatim
97.5
pṛthivīṃ bhājanaṅkṛtvā bhuktvā parvasu mānavaḥ
ahorātreṇa caikena trirātraphalamaśnute
97.6
dvayormāsasya pañcamyorddhayoḥ pratipadornaraḥ
kṣauradhārāvrataṅkuryāt so'śvamedhaphalaṃ labhet
97.7
kṛṣṇāṣṭamyāntu naktena yāvat kṛṣṇā caturdaśī
bhuñjan bhogānavāpnoti brahmalokañca gacchati
97.8
yo'bdamekaṃ prakurvīta naktaṃ parvasu parvasu
brahmacārī jitakrodhaḥ śivadhyānaparāyaṇaḥ
97.9
saṃvatsarānte viprendrān bhojayedvidhipūrvakam
sa yāti śāṅkaraṃ lokaṃ nātra kāryā vicāraṇā
97.10
upavāsātparaṃ bhaikṣyaṃ bhaikṣyātparamayācitam
ayācitātatparaṃ naktaṃ tasmānnakte na varttayet
97.11
devairbhuktaṃ tu pūrvāhṇe madhyāhne ṛṣibhistathā
aparāhṇe ca pitṛbhiḥ sandhyāyāṃ guhyakādibhiḥ
97.12
sarvavelāmatikramya naktabhojanamuttamam
haviṣyabhojanaṃ snānaṃ satyamāhāralāghavam
97.13
agnikāryyamadhaḥśayyāṃ naktabhojī samācaret
pratimāsaṃ pravakṣyāmi śivavratamanuttamam
97.14
dharmmakāmārthamokṣārthaṃ sarvapāpaviśuddhaye
puṣyamāse ca sampūjya yaḥ kuryyānnaktabhojanam
97.15
satyavādī jitakrodhaḥ śāligodhūmagorasaiḥ
pakṣayoraṣṭamīṃ yatnādupavāsena varttayet
97.16
bhūmiśayyāñca māsānte paurṇamāsyāṃ ghṛtādibhiḥ
snāpya rudraṃ mahādevaṃ sampūjya vidhipūrvakam
97.17
yāvakaṃ caudanaṃ dattvā sakṣīraṃ saghṛtaṃ dvijāḥ !
bhojayed brāhmaṇān śiṣṭān japecchāntiṃ viśeṣataḥ
97.18
tathā gomithunaṃ caiva kapilaṃ vinivedayet
bhavāya devadevāya śivāya paramātmane
97.19
sa yāti muniśārdūla ! brāhmeyaṃ lokamuttamam
bhuktvā sa vipulām lokān tatraiva sa vimucyate
97.20
māghamāse tu sampūjya yaḥ kuryyānnaktabhojanam
kṛśaraṃ ghṛtasaṃyuktaṃ bhuñjānaḥ saṃyatendriyaḥ
97.21
sopavāsaścaturdaśyāṃ bhavedubhayapakṣayoḥ
rudrāya paurṇamāsyāṃ tu dadyādvai ghṛtakambalam
97.22
kṛṣṇaṃ gomithunaṃ dadyāt pūjayeccaiva śaṅkaram
bhojayedu brāhmaṇaṃścaiva yathā vibhavavistaram
97.23
yāmyamāsādya vai lokaṃ yamena saha modate
phālgune caiva samprāpte kuryādvai naktabhojanam
97.24
śyāmākānnaghṛtacaurairjitakrodho jitendriyaḥ
caturdaśīmathāṣṭamyāmapavāsañca kārayet
97.25
paurṇamāsyāṃ mahādevaṃ snāpya sampūjya śaṅkaram
dadyādgomithunaṃ vāpi tāmrābhaṃ śūlapāṇaye
97.26
brāhmaṇān bhojayitvā tu prārthayet parameśvaram
sa yāti candrasāyujyaṃ nātra kāryā vicāraṇā
97.27
caitre'pi rudramabhyarcya kuryādu vai naktabhojanam
śālyannaṃ payasā yuktaṃ ghṛtena ca yathāsukham
97.28
goṣṭhaśāyī muniśreṣṭhāḥ ! cittau niśiśravaṃ smaret
paurṇamāsyāṃ śivaṃ snāpya dadyādgomithunaṃ sitam
97.28-2
brāhmaṇān bhojayeccaiva nirvvṛtaiḥ sthānamāpnuyāt
vaiśākhe ca tathā māse kṛtvā vai naktabhojanam
97.30
paurṇamāsyāṃ bhavaṃ snāpya pañcagavyaghṛtādibhiḥ
śvetaṃ gomithunaṃ dattvā so'śvamedhaphalaṃ labhet
97.31
jyaiṣṭhe māse ca deveśaṃ bhavaṃ śarvvamumāpatim
sampūjya śraddhayā bhaktyā kṛtvā vai naktabhojanam
97.32
raktāgastyajamadhyā ca vahniḥ pūtaṃ ghṛtādibhiḥ
kṣīrāsano niśārddhaṃ ca gavāṃśuśrūṣaṇe rataḥ
97.33
paurṇamāsyāṃ tu saṃpūjya devadevamumāpatim
snāpya bhaktyā yathānyāyaṃ caruṃ dadyācca śūline
97.34
brāhmaṇān bhojayitvā ca yathāvibhavavistaram
dhūmraṃ gomithunaṃ datvā vāyuloke mahīyate
97.35
āṣāḍhe māsi cāpyevaṃ naktabhojanatatparaḥ
bhūrikhaṇḍānvayasammiśraṃ saktubhicaiva gorasam
97.36
paurṇamāsyāṃ ghṛtādyaistu snāpya pūjya yathāvidhi
brāhmaṇān bhojayitvā ca śrotriyān vedapāragān
97.37
dadyādgomithunaṃ gauraṃ vāruṇaṃ lokamāpnuyāt
śrāvaṇe ca dvijā māse kṛtvā vai naktabhojanam
97.38
kṣīraṣaṣṭikabhaktena sampūjya vṛṣabhadhvajam
paurṇamāsyāṃ ghṛtādyaistu snāpya pūjya yathāvidhi
97.38-2
brāhmaṇān bhojayitvā ca śrotriyān vedapāragān !
śvetāyapādaṃ pauṇḍraṃ ca dadyādgomithunaṃ punaḥ
97.40
sa yāti vāyusāyujyaṃ vāyuvatsarvago bhavet
prāpte bhādrapade māse kṛtvaivaṃ naktabhojanam
97.41
hutaśeṣaśca viprendrān vṛttamūlāgrito divā
paurṇamāsyāṃ tu deveśaṃ snāpya saṃpūjya śaṅkaram
97.42
nīlaskandhaṃ vṛṣaṃ gāṃ ca dattvā bhaktyā yathāvidhi
brāhmaṇān bhojayitvā ca vedavedāṅgapāragān
97.43
yakṣalokamanuprāpya yakṣarājo bhavennaraḥ
tataścāśvayuje māsi kṛtvaivaṃ naktabhojanam
97.4-2
saghṛtaṃ śaṅkaraṃ pūjya paurṇamāsyāṃ ca pūrvavat
brāhmaṇān bhojayitvā ca śivabhaktān sadā śucīn
97.45
vṛṣabhaṃ nīlavarṇāmaṃ suroheṇa samunnatam
gāṃ ca dattvā yathānyāyamaiśānaṃ lokamāpnuyāt
97.46
kārtike ca tathā māse kṛtvā vai naktabhojanam
kṣīrodanena sādhye na saṃpūjya ca bhavaṃ prabhum
97.47
paurṇamāsyāṃ ca vidhivat snāpya dattvā caruṃ punaḥ
brāhmaṇān bhojayitvā ca yathāvibhavavistaram
97.48
dattvā gomithunaṃ caiva kāpilaṃ pūrvavaddvijāḥ
sūryyasāyujyamāpnoti nātra kāryyā vicāraṇā
97.46-2
mārgaśīrṣe ca māse'pi kṛtvaivaṃ naktabhojanam
yavānnena yathānyāyamājyakṣīrādibhiḥ samam
97.50
paurṇamāsyāṃ ca pūrvoktaṃ kṛtvā śarvāya śambhave
brāhmaṇān bhojayitvā ca daridrān vedapāragān
97.51
dattvā gomithunañcaiva pāṇḍuraṃ vidhipūrvakam
somalokamanuprāpya somena saha modate
97.52
ahiṃsā satyamasteyaṃ brahmacaryyaṃ kṣamā dayā
triḥ snānaṃ cāgnihotraṃ ca bhūśayyā naktabhojanam
97.53
pakṣayorupavāsaṃ ca caturdaśyaṣṭamīṣu ca
ityetadakhilaṃ proktaṃ pratimāsaṃ śivavratam
97.54
kuryyādvarṣaṃ krameṇaiva vyutkrameṇāpi vā dvijāḥ
sa yāti śivasāyujyaṃ jñānayogamavāpnuyāt
97.54.p1
iti śrīlaiṅge śivavratakathanaṃ nāma tryaśītitamo'dhyāyaḥ
Linked texts (12)
- Liṅgapurāṇa — Vyāsa, Sanskrit
- Śivadharmaśāstra (IFP/EFEO 860 copied from R2442 G.O.N.L., Madras) — Sanskrit
- Śivadharmottara — Sanskrit
- Kāmikāgama — Sanskrit
- Acintyaviśvasādākhyatantra — Sanskrit
- Liṅgapurāṇa — Ativīrarāma Pāṇṭiyar 1500, Sanskrit
- Śivadharma — Sanskrit
- Śivadharmopapurāṇa — Sanskrit
- Śivadharmapurāṇa — Nandikeśvara, Sanskrit
- Narmadāmāhātmya — Sanskrit
- Kāmikatantra — Sanskrit
- Tīrthacintāmaṇi — Vācaspatimiśra, Sanskrit