[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 1.102 # Lingapurana 1.102 Liṅgapurāṇa 1.102 - **Language:** Sanskrit ## Contents - [1.102.62](https://indike.org/pramana/in.purana.linga.1.102.62) — 1 part ### [1.102.1](https://indike.org/pramana/in.purana.linga.1.102.1) sūta uvāca tapasā ca mahādevyāḥ pārvatyā vṛṣabhadhvaja prītiś ca bhagavāñcharvo vacanādbrahmaṇastadā // ### [1.102.2](https://indike.org/pramana/in.purana.linga.1.102.2) hitāya cāśramāṇāṃ ca krīḍārthaṃ bhagavānbhavaḥ tadā haimavatīṃ devīm upayeme yathāvidhi // ### [1.102.3](https://indike.org/pramana/in.purana.linga.1.102.3) jagāma sa svayaṃ brahmā marīcyādyairmaharṣibhiḥ tapovanaṃ mahādevyāḥ pārvatyāḥ padmasaṃbhavaḥ // ### [1.102.4](https://indike.org/pramana/in.purana.linga.1.102.4) pradakṣiṇīkṛtya ca tāṃ devīṃ sa jagato 'raṇīm kim arthaṃ tapasā lokān saṃtāpayasi śailaje // ### [1.102.5](https://indike.org/pramana/in.purana.linga.1.102.5) tvayā sṛṣṭaṃ jagatsarvaṃ mātastvaṃ mā vināśaya tvaṃ hi saṃdhārayellokān imān sarvān svatejasā // ### [1.102.6](https://indike.org/pramana/in.purana.linga.1.102.6) sarvadeveśvaraḥ śrīmān sarvalokapatirbhavaḥ yasya vai devadevasya vayaṃ kiṅkaravādinaḥ // ### [1.102.7](https://indike.org/pramana/in.purana.linga.1.102.7) sa evaṃ parameśānaḥ svayaṃ ca varayiṣyati varade yena sṛṣṭāsi na vinā yastvayāṃbike // ### [1.102.8](https://indike.org/pramana/in.purana.linga.1.102.8) vartate nātra saṃdehas tava bharttā bhaviṣyati ityuktvā tāṃ namaskṛtya muhuḥ samprekṣya pārvatīm // ### [1.102.9](https://indike.org/pramana/in.purana.linga.1.102.9) gate pitāmahe devo bhagavān parameśvaraḥ jagāmānugrahaṃ kartuṃ dvijarūpeṇa cāśramam // ### [1.102.10](https://indike.org/pramana/in.purana.linga.1.102.10) sā ca dṛṣṭvā mahādevaṃ dvijarūpeṇa saṃsthitam pratibhādyaiḥ prabhuṃ jñātvā nanāma vṛṣabhadhvajam // ### [1.102.11](https://indike.org/pramana/in.purana.linga.1.102.11) sampūjya varadaṃ devaṃ brāhmaṇacchadmanāgatam tuṣṭāva parameśānaṃ pārvatī parameśvaram // ### [1.102.12](https://indike.org/pramana/in.purana.linga.1.102.12) anugṛhya tadā devīm uvāca prahasanniva kuladharmāśrayaṃ rakṣan bhūdharasya mahātmanaḥ // ### [1.102.13](https://indike.org/pramana/in.purana.linga.1.102.13) krīḍārthaṃ ca satāṃ madhye sarvadevapatirbhavaḥ svayaṃvare mahādevī tava divyasuśobhane // ### [1.102.14](https://indike.org/pramana/in.purana.linga.1.102.14) āsthāya rūpaṃ yatsaumyaṃ sameṣye 'haṃ saha tvayā ityuktvā tāṃ samālokya devo divyena cakṣuṣā // ### [1.102.15](https://indike.org/pramana/in.purana.linga.1.102.15) jagāmeṣṭaṃ tadā divyaṃ svapuraṃ prayayau ca sā dṛṣṭvā hṛṣṭastadā devīṃ menayā tuhinācalaḥ // ### [1.102.16](https://indike.org/pramana/in.purana.linga.1.102.16) āliṅgyāghrāya sampūjya putrīṃ sākṣāttapasvinīm duhiturdevadevena na jānannabhimantritam // ### [1.102.17](https://indike.org/pramana/in.purana.linga.1.102.17) svayaṃvaraṃ tadā devyāḥ sarvalokeṣvaghoṣayat atha brahmā ca bhagavān viṣṇuḥ sākṣājjanārdanaḥ // ### [1.102.18](https://indike.org/pramana/in.purana.linga.1.102.18) śakraś ca bhagavān vahnir bhāskaro bhaga eva ca tvaṣṭāryamā vivasvāṃś ca yamo varuṇa eva ca // ### [1.102.19](https://indike.org/pramana/in.purana.linga.1.102.19) vāyuḥ somastatheśāno rudrāś ca munayas tathā aśvinau dvādaśādityā gandharvā garuḍas tathā // ### [1.102.20](https://indike.org/pramana/in.purana.linga.1.102.20) yakṣāḥ siddhāstathā sādhyā daityāḥ kiṃpuruṣoragāḥ samudrāś ca nadā vedā mantrāḥ stotrādayaḥ kṣaṇāḥ // ### [1.102.21](https://indike.org/pramana/in.purana.linga.1.102.21) nāgāś ca parvatāḥ sarve yajñāḥ sūryādayo grahāḥ trayastriṃśacca devānāṃ trayaś ca triśataṃ tathā // ### [1.102.22](https://indike.org/pramana/in.purana.linga.1.102.22) trayaś ca trisahasraṃ ca tathānye bahavaḥ surā jagmur girīndraputryāstu svayaṃvaramanuttamam // ### [1.102.23](https://indike.org/pramana/in.purana.linga.1.102.23) atha śailasutā devī haimamāruhya śobhanam vimānaṃ sarvatobhadraṃ sarvaratnair alaṃkṛtam // ### [1.102.24](https://indike.org/pramana/in.purana.linga.1.102.24) apsarobhiḥ pranṛttābhiḥ sarvābharaṇabhūṣitaiḥ gandharvasiddhairvividhaiḥ kinnaraiś ca suśobhanaiḥ // ### [1.102.25](https://indike.org/pramana/in.purana.linga.1.102.25) bandibhiḥ stūyamānā ca sthitā śailasutā tadā sitātapatraṃ ratnāṃśumiśritaṃ cāvahattathā // ### [1.102.26](https://indike.org/pramana/in.purana.linga.1.102.26) mālinī giriputryāstu saṃdhyā pūrṇendumaṇḍalam cāmarāsaktahastābhir divyastrībhiś ca saṃvṛtā // ### [1.102.27](https://indike.org/pramana/in.purana.linga.1.102.27) mālāṃ gṛhya jayā tasthau suradrumasamudbhavām vijayā vyajanaṃ gṛhya sthitā devyāḥ samīpagā // ### [1.102.28](https://indike.org/pramana/in.purana.linga.1.102.28) mālāṃ pragṛhya devyāṃ tu sthitāyāṃ devasaṃsadi śiśurbhūtvā mahādevaḥ krīḍārthaṃ vṛṣabhadhvajaḥ // ### [1.102.29](https://indike.org/pramana/in.purana.linga.1.102.29) utsaṅgatalasaṃsupto babhūva bhagavānbhavaḥ atha dṛṣṭvā śiśuṃ devās tasyā utsaṃgavarttinam // ### [1.102.30](https://indike.org/pramana/in.purana.linga.1.102.30) ko 'yam atreti saṃmantrya cukṣubhuś ca samāgatāḥ vajramāhārayattasya bāhum udyamya vṛtrahā // ### [1.102.31](https://indike.org/pramana/in.purana.linga.1.102.31) sa bāhurudyamastasya tathaiva samupasthitaḥ stambhitaḥ śiśurūpeṇa devadevena līlayā // ### [1.102.32](https://indike.org/pramana/in.purana.linga.1.102.32) vajraṃ kṣeptuṃ na śaśāka bāhuṃ cālayituṃ tathā vahniḥ śaktiṃ tathā kṣeptuṃ na śaśāka tathā sthitaḥ // ### [1.102.33](https://indike.org/pramana/in.purana.linga.1.102.33) yamo 'pi daṇḍaṃ khaḍgaṃ ca nirṛtirmunipuṅgavāḥ varuṇo nāgapāśaṃ ca dhvajayaṣṭiṃ samīraṇaḥ // ### [1.102.34](https://indike.org/pramana/in.purana.linga.1.102.34) somo gadāṃ dhaneśaś ca daṇḍaṃ daṇḍabhṛtāṃ varaḥ īśānaś ca tathā śūlaṃ tīvramudyamya saṃsthitaḥ // ### [1.102.35](https://indike.org/pramana/in.purana.linga.1.102.35) rudrāś ca śūlamādityā muśalaṃ vasavas tathā mudgaraṃ stambhitāḥ sarve devenāśu divaukasaḥ // ### [1.102.36](https://indike.org/pramana/in.purana.linga.1.102.36) stambhitā devadevena tathānye ca divaukasaḥ śiraḥ prakampayan viṣṇuś cakram udyamya saṃsthitaḥ // ### [1.102.37](https://indike.org/pramana/in.purana.linga.1.102.37) tasyāpi śiraso bālaḥ sthiratvaṃ pracakāra ha cakraṃ kṣeptuṃ na śaśāka bāhūṃścālayituṃ na ca // ### [1.102.38](https://indike.org/pramana/in.purana.linga.1.102.38) pūṣā dantān daśan dantair bālamaikṣata mohitaḥ tasyāpi daśanāḥ petur dṛṣṭamātrasya śaṃbhunā // ### [1.102.39](https://indike.org/pramana/in.purana.linga.1.102.39) balaṃ tejaś ca yogaṃ ca tathaivāstambhayad vibhuḥ atha teṣu sthiteṣveva manyumatsu sureṣvapi // ### [1.102.40](https://indike.org/pramana/in.purana.linga.1.102.40) brahmā paramasaṃvigno dhyānamāsthāya śaṅkaram bubudhe devamīśānam umotsaṃge tamāsthitam // ### [1.102.41](https://indike.org/pramana/in.purana.linga.1.102.41) sa buddhvā devamīśānaṃ śīghram utthāya vismitaḥ vavande caraṇau śaṃbhor astuvacca pitāmahaḥ // ### [1.102.42](https://indike.org/pramana/in.purana.linga.1.102.42) buddhistvaṃ sarvalokānām ahaṅkāras tvam īśvaraḥ bhūtānāmindriyāṇāṃ ca tvameveśa pravarttakaḥ // ### [1.102.43](https://indike.org/pramana/in.purana.linga.1.102.43) tavāhaṃ dakṣiṇāddhastāt sṛṣṭaḥ pūrvaṃ purātanaḥ vāmahastān mahābāho devo nārāyaṇaḥ prabhuḥ // ### [1.102.44](https://indike.org/pramana/in.purana.linga.1.102.44) iyaṃ ca prakṛtirdevī sadā te sṛṣṭikāraṇa patnīrūpaṃ samāsthāya jagatkāraṇamāgatā // ### [1.102.45](https://indike.org/pramana/in.purana.linga.1.102.45) namastubhyaṃ mahādeva mahādevyai namonamaḥ prasādāttava deveśa niyogācca mayā prajāḥ // ### [1.102.46](https://indike.org/pramana/in.purana.linga.1.102.46) devādyāstu imāḥ sṛṣṭā mūḍhāstvadyogamohitāḥ kuru prasādameteṣāṃ yathāpūrvaṃ bhavantvime // ### [1.102.47](https://indike.org/pramana/in.purana.linga.1.102.47) sūta uvāca vijñāpyaivaṃ tadā brahmā devadevaṃ maheśvaram saṃstambhitāṃstadā tena bhagavān āha padmajaḥ // ### [1.102.48](https://indike.org/pramana/in.purana.linga.1.102.48) mūḍhāstha devatāḥ sarvā naiva budhyata śaṅkaram devadevam ihāyāntaṃ sarvadevanamaskṛtam // ### [1.102.49](https://indike.org/pramana/in.purana.linga.1.102.49) gacchadhvaṃ śaraṇaṃ śīghraṃ devāḥ śakrapurogamāḥ sanārāyaṇakāḥ sarve munibhiḥ śaṅkaraṃ prabhum // ### [1.102.50](https://indike.org/pramana/in.purana.linga.1.102.50) sārdhaṃ mayaiva deveśaṃ paramātmānamīśvaram anayā haimavatyā ca prakṛtyā saha sattamam // ### [1.102.51](https://indike.org/pramana/in.purana.linga.1.102.51) tatra te stambhitāstena tathaiva surasattamāḥ praṇemur manasā sarve sanārāyaṇakāḥ prabhum // ### [1.102.52](https://indike.org/pramana/in.purana.linga.1.102.52) atha teṣāṃ prasanno bhūd devadevastriyaṃbakaḥ yathāpūrvaṃ cakārāśu vacanādbrahmaṇaḥ prabhuḥ // ### [1.102.53](https://indike.org/pramana/in.purana.linga.1.102.53) tata evaṃ prasanne tu sarvadevanivāraṇam vapuścakāra deveśo divyaṃ paramamadbhutam // ### [1.102.54](https://indike.org/pramana/in.purana.linga.1.102.54) tejasā tasya devāste sendracandradivākarāḥ sabrahmakāḥ sasādhyāś ca sanārāyaṇakās tathā // ### [1.102.55](https://indike.org/pramana/in.purana.linga.1.102.55) sayamāś ca sarudrāś ca cakṣuraprārthayan vibhum tebhyaś ca paramaṃ cakṣuḥ sarvadṛṣṭau ca śaktimat // ### [1.102.56](https://indike.org/pramana/in.purana.linga.1.102.56) dadāvaṃbāpatiḥ śarvo bhavānyāś ca calasya ca labdhvā cakṣustadā devā indraviṣṇupurogamāḥ // ### [1.102.57](https://indike.org/pramana/in.purana.linga.1.102.57) sabrahmakaḥ saśakrāś ca tamapaśyanmaheśvaram brahmādyā nemire tūrṇaṃ bhavānī ca girīśvaraḥ // ### [1.102.58](https://indike.org/pramana/in.purana.linga.1.102.58) munayaś ca mahādevaṃ gaṇeśāḥ śivasaṃmatāḥ sasarjuḥ puṣpavṛṣṭiṃ ca khecarāḥ siddhacāraṇāḥ // ### [1.102.59](https://indike.org/pramana/in.purana.linga.1.102.59) devadundubhayo nedus tuṣṭuvurmunayaḥ prabhum jagurgandharvamukhyāś ca nanṛtuścāpsarogaṇāḥ // ### [1.102.60](https://indike.org/pramana/in.purana.linga.1.102.60) mumuhurgaṇapāḥ sarve mumodāṃbā ca pārvatī tasya devī tadā hṛṣṭā samakṣaṃ tridivaukasām // ### [1.102.61](https://indike.org/pramana/in.purana.linga.1.102.61) pādayoḥ sthāpayāmāsa mālāṃ divyāṃ sugandhinīm sādhu sādhviti samprocya tayā tatraiva cārcitam // ### [1.102.62](https://indike.org/pramana/in.purana.linga.1.102.62) saha devyā namaścakruḥ śirobhir bhūtalāśritaiḥ sarve sabrahmakā devāḥ sayakṣoragarākṣasāḥ // ### [1.102.62.p1](https://indike.org/pramana/in.purana.linga.1.102.62.p1) iti śrīliṅgamahāpurāṇe pūrvabhāge umāsvayaṃvaro nāma dvyadhikaśatatamo 'dhyāyaḥ ## Linked texts (3) - [Brahmapurāṇa](https://indike.org/pramana/in.purana.brahma.36.3) — Vyāsa, Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.124.1) — Ativīrarāma Pāṇṭiyar 1500, Sanskrit - [Skandapurāṇa (early; "Ambikākhaṇḍa") (ed. Bakker)](https://indike.org/pramana/in.purana.skanda*early*bakker.2.35.86-2.p1) — Sanskrit --- Source: [https://indike.org/pramana/in.purana.linga.1.102](https://indike.org/pramana/in.purana.linga.1.102) · Pramāṇa