[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 1.104 # Lingapurana 1.104 Liṅgapurāṇa 1.104 - **Language:** Sanskrit ## Contents - [1.104.29](https://indike.org/pramana/in.purana.linga.1.104.29) — 1 part ### [1.104.1](https://indike.org/pramana/in.purana.linga.1.104.1) ṛṣaya ūcuḥ kathaṃ vināyako jāto gajavaktro gaṇeśvaraḥ kathaṃ prabhāvastasyaivaṃ sūta vaktumihārhasi // ### [1.104.2](https://indike.org/pramana/in.purana.linga.1.104.2) sūta uvāca etasminnantare devāḥ sendropendrāḥ sametya te dharmavighnaṃ tadā kartuṃ daityānāmabhavandvijāḥ // ### [1.104.3](https://indike.org/pramana/in.purana.linga.1.104.3) asurā yātudhānāś ca rākṣasāḥ krūrakarmiṇaḥ tāmasāś ca tathā cānye rājasāś ca tathā bhuvi // ### [1.104.4](https://indike.org/pramana/in.purana.linga.1.104.4) avighnaṃ yajñadānādyaiḥ samabhyarcya maheśvaram brahmāṇaṃ ca hariṃ viprā labdhepsitavarā yataḥ // ### [1.104.5](https://indike.org/pramana/in.purana.linga.1.104.5) tato 'smākaṃ suraśreṣṭhāḥ sadā vijayasaṃbhavaḥ teṣāṃ tatastu vighnārtham avighnāya divaukasām // ### [1.104.6](https://indike.org/pramana/in.purana.linga.1.104.6) putrārthaṃ caiva nārīṇāṃ narāṇāṃ karmasiddhaye vighneśaṃ śaṅkaraṃ sraṣṭuṃ gaṇapaṃ stotumarhatha // ### [1.104.7](https://indike.org/pramana/in.purana.linga.1.104.7) ityuktvānyonyamanaghaṃ tuṣṭuvuḥ śivamīśvaram namaḥ sarvātmane tubhyaṃ sarvajñāya pinākine // ### [1.104.8](https://indike.org/pramana/in.purana.linga.1.104.8) anaghāya viriñcāya devyāḥ kāryārthadāyine akāyāyārthakāyāya hareḥ kāyāpahāriṇe // ### [1.104.9](https://indike.org/pramana/in.purana.linga.1.104.9) kāyāntasthāmṛtādhāramaṇḍalāvasthitāya te kṛtādibhedakālāya kālavegāya te namaḥ // ### [1.104.10](https://indike.org/pramana/in.purana.linga.1.104.10) kālāgnirudrarūpāya dharmādyaṣṭapadāya ca kālīviśuddhadehāya kālikākāraṇāya te // ### [1.104.11](https://indike.org/pramana/in.purana.linga.1.104.11) kālakaṇṭhāya mukhyāya vāhanāya varāya te aṃbikāpataye tubhyaṃ hiraṇyapataye namaḥ // ### [1.104.12](https://indike.org/pramana/in.purana.linga.1.104.12) hiraṇyaretase caiva namaḥ śarvāya śūline kapāladaṇḍapāśāsicarmāṅkuśadharāya ca // ### [1.104.13](https://indike.org/pramana/in.purana.linga.1.104.13) pataye haimavatyāś ca hemaśuklāya te namaḥ pītaśuklāya rakṣārthaṃ surāṇāṃ kṛṣṇavartmane // ### [1.104.14](https://indike.org/pramana/in.purana.linga.1.104.14) pañcamāya mahāpañcayajñināṃ phaladāya ca pañcāsyaphaṇihārāya pañcākṣaramayāya te // ### [1.104.15](https://indike.org/pramana/in.purana.linga.1.104.15) pañcadhā pañcakaivalyadevairarcitamūrtaye pañcākṣaradṛśe tubhyaṃ parātparatarāya te // ### [1.104.16](https://indike.org/pramana/in.purana.linga.1.104.16) ṣoḍaśasvaravajrāṅgavaktrāyākṣayarūpiṇe kādipañcakahastāya cādihastāya te namaḥ // ### [1.104.17](https://indike.org/pramana/in.purana.linga.1.104.17) ṭādipādāya rudrāya tādipādāya te namaḥ pādimeṇḍhrāya yadyaṅgadhātusaptakadhāriṇe // ### [1.104.18](https://indike.org/pramana/in.purana.linga.1.104.18) śāntātmarūpiṇe sākṣāt kṣadantakrodhine namaḥ lavarephahalāṅgāya niraṅgāya ca te namaḥ // ### [1.104.19](https://indike.org/pramana/in.purana.linga.1.104.19) sarveṣām eva bhūtānāṃ hṛdi niḥsvanakāriṇe bhruvor ante sadā sadbhir dṛṣṭāyātyantabhānave // ### [1.104.20](https://indike.org/pramana/in.purana.linga.1.104.20) bhānusomāgninetrāya paramātmasvarūpiṇe guṇatrayoparisthāya tīrthapādāya te namaḥ // ### [1.104.21](https://indike.org/pramana/in.purana.linga.1.104.21) tīrthatattvāya sārāya tasmādapi parāya te ṛgyajuḥsāmavedāya oṃkārāya namo namaḥ // ### [1.104.22](https://indike.org/pramana/in.purana.linga.1.104.22) oṅkāre trividhaṃ rūpam āsthāyoparivāsine pītāya kṛṣṇavarṇāya raktāyātyantatejase // ### [1.104.23](https://indike.org/pramana/in.purana.linga.1.104.23) sthānapañcakasaṃsthāya pañcadhāṇḍabahiḥ kramāt brahmaṇe viṣṇave tubhyaṃ kumārāya namonamaḥ // ### [1.104.24](https://indike.org/pramana/in.purana.linga.1.104.24) aṃbāyāḥ parameśāya sarvoparicarāya te mūlasūkṣmasvarūpāya sthūlasūkṣmāya te namaḥ // ### [1.104.25](https://indike.org/pramana/in.purana.linga.1.104.25) sarvasaṃkalpaśūnyāya sarvasmādrakṣitāya te ādimadhyāntaśūnyāya citsaṃsthāya namonamaḥ // ### [1.104.26](https://indike.org/pramana/in.purana.linga.1.104.26) yamāgnivāyurudrāṃbusomaśakraniśācaraiḥ diṅmukhe diṅmukhe nityaṃ sagaṇaiḥ pūjitāya te // ### [1.104.27](https://indike.org/pramana/in.purana.linga.1.104.27) sarveṣu sarvadā sarvamārge sampūjitāya te rudrāya rudranīlāya kadrudrāya pracetase maheśvarāya dhīrāya namaḥ sākṣācchivāya te // ### [1.104.28](https://indike.org/pramana/in.purana.linga.1.104.28) makhamadanayamāgnidakṣayajñakṣapaṇavicitraviceṣṭitaṃ kṣamasva // ### [1.104.29](https://indike.org/pramana/in.purana.linga.1.104.29) sūta uvāca yaḥ paṭhettu stavaṃ bhaktyā śakrāgnipramukhaiḥ suraiḥ kīrtitaṃ śrāvayedvidvān sa yāti paramāṃ gatim // ### [1.104.29.p1](https://indike.org/pramana/in.purana.linga.1.104.29.p1) iti śrīliṅgamahāpurāṇe pūrvabhāge devastutirnāma caturadhikaśatatamo 'dhyāyaḥ ## Commentaries (1) - [Śivatosaṇī Liṅgapurāṇaṭīkā](https://indike.org/pramana/in.purana.linga!ganesa.127.76) — Gaṇeśa Bhaṭṭa, Sanskrit ## Linked texts (1) - [Liṅgapurāṇa](https://indike.org/pramana/in.vernacular.tamil.kappiyam.lingapurana.126.1) — Ativīrarāma Pāṇṭiyar 1500, Sanskrit --- Source: [https://indike.org/pramana/in.purana.linga.1.104](https://indike.org/pramana/in.purana.linga.1.104) · Pramāṇa