[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 1.16 # Lingapurana 1.16 Liṅgapurāṇa 1.16 - **Language:** Sanskrit ### [1.16.1](https://indike.org/pramana/in.purana.linga.1.16.1) sūta uvāca athānyo brahmaṇaḥ kalpo vartate munipuṅgavāḥ viśvarūpa iti khyāto nāmataḥ paramādbhutaḥ // ### [1.16.2](https://indike.org/pramana/in.purana.linga.1.16.2) vinivṛtte tu saṃhāre punaḥ sṛṣṭe carācare brahmaṇaḥ putrakāmasya dhyāyataḥ parameṣṭhinaḥ // ### [1.16.3](https://indike.org/pramana/in.purana.linga.1.16.3) prādurbhūtā mahānādā viśvarūpā sarasvatī viśvamālyāṃbaradharā viśvayajñopavītinī // ### [1.16.4](https://indike.org/pramana/in.purana.linga.1.16.4) viśvoṣṇīṣā viśvagandhā viśvamātā mahoṣṭhikā tathāvidhaṃ sa bhagavān īśānaṃ parameśvaram // ### [1.16.5](https://indike.org/pramana/in.purana.linga.1.16.5) śuddhasphaṭikasaṃkāśaṃ sarvābharaṇabhūṣitam atha taṃ manasā dhyātvā yuktātmā vai pitāmahaḥ // ### [1.16.6](https://indike.org/pramana/in.purana.linga.1.16.6) vavande devamīśānaṃ sarveśaṃ sarvagaṃ prabhum omīśāna namaste 'stu mahādeva namo 'stu te // ### [1.16.7](https://indike.org/pramana/in.purana.linga.1.16.7) namo 'stu sarvavidyānām īśāna parameśvara namo 'stu sarvabhūtānām īśāna vṛṣavāhana // ### [1.16.8](https://indike.org/pramana/in.purana.linga.1.16.8) brahmaṇo 'dhipate tubhyaṃ brahmaṇe brahmarūpiṇe namo brahmādhipataye śivaṃ me 'stu sadāśiva // ### [1.16.9](https://indike.org/pramana/in.purana.linga.1.16.9) oṅkāramūrte deveśa sadyojāta namonamaḥ prapadye tvāṃ prapanno 'smi sadyojātāya vai namaḥ // ### [1.16.10](https://indike.org/pramana/in.purana.linga.1.16.10) abhave ca bhave tubhyaṃ tathā nātibhave namaḥ bhavodbhava bhaveśāna māṃ bhajasva mahādyute // ### [1.16.11](https://indike.org/pramana/in.purana.linga.1.16.11) vāmadeva namastubhyaṃ jyeṣṭhāya varadāya ca namo rudrāya kālāya kalanāya namo namaḥ // ### [1.16.12](https://indike.org/pramana/in.purana.linga.1.16.12) namo vikaraṇāyaiva kālavarṇāya varṇine balāya balināṃ nityaṃ sadā vikaraṇāya te // ### [1.16.13](https://indike.org/pramana/in.purana.linga.1.16.13) balapramathanāyaiva baline brahmarūpiṇe sarvabhūteśvareśāya bhūtānāṃ damanāya ca // ### [1.16.14](https://indike.org/pramana/in.purana.linga.1.16.14) manonmanāya devāya namastubhyaṃ mahādyute vāmadevāya vāmāya namastubhyaṃ mahātmane // ### [1.16.15](https://indike.org/pramana/in.purana.linga.1.16.15) jyeṣṭhāya caiva śreṣṭhāya rudrāya varadāya ca kālahantre namastubhyaṃ namastubhyaṃ mahātmane // ### [1.16.16](https://indike.org/pramana/in.purana.linga.1.16.16) iti stavena deveśaṃ nanāma vṛṣabhadhvajam yaḥ paṭhet sakṛdeveha brahmalokaṃ gamiṣyati // ### [1.16.17](https://indike.org/pramana/in.purana.linga.1.16.17) śrāvayedvā dvijān śrāddhe sa yāti paramāṃ gatim evaṃ dhyānagataṃ tatra praṇamantaṃ pitāmaham // ### [1.16.18](https://indike.org/pramana/in.purana.linga.1.16.18) uvāca bhagavānīśaḥ prīto 'haṃ te kimicchasi tatastu praṇato bhūtvā vāgviśuddhaṃ maheśvaram // ### [1.16.19](https://indike.org/pramana/in.purana.linga.1.16.19) uvāca bhagavān rudraṃ prītaṃ prītena cetasā yadidaṃ viśvarūpaṃ te viśvagauḥ śreyasīśvarī // ### [1.16.20](https://indike.org/pramana/in.purana.linga.1.16.20) etadveditumicchāmi yatheyaṃ parameśvara kaiṣā bhagavatī devī catuṣpādā caturmukhī // ### [1.16.21](https://indike.org/pramana/in.purana.linga.1.16.21) catuḥśṛṅgī caturvaktrā caturdaṃṣṭrā catuḥstanī caturhastā caturnetrā viśvarūpā kathaṃ smṛtā // ### [1.16.22](https://indike.org/pramana/in.purana.linga.1.16.22) kiṃnāmagotrā kasyeyaṃ kiṃvīryā cāpi karmataḥ tasya tadvacanaṃ śrutvā devadevo vṛṣadhvajaḥ // ### [1.16.23](https://indike.org/pramana/in.purana.linga.1.16.23) prāha devavṛṣaṃ brahmā brahmāṇaṃ cātmasaṃbhavam rahasyaṃ sarvamantrāṇāṃ pāvanaṃ puṣṭivardhanam // ### [1.16.24](https://indike.org/pramana/in.purana.linga.1.16.24) śṛṇuṣvaitatparaṃ guhyam ādisarge yathā tathā evaṃ yo vartate kalpo viśvarūpastvasau mataḥ // ### [1.16.25](https://indike.org/pramana/in.purana.linga.1.16.25) brahmasthānamidaṃ cāpi yatra prāptaṃ tvayā prabho tvattaḥ parataraṃ deva viṣṇunā tatpadaṃ śubham // ### [1.16.26](https://indike.org/pramana/in.purana.linga.1.16.26) vaikuṇṭhena viśuddhena mama vāmāṅgajena vā tadāprabhṛti kalpaś ca trayastriṃśattamo hyayam // ### [1.16.27](https://indike.org/pramana/in.purana.linga.1.16.27) śataṃ śatasahasrāṇām atītā ye svayaṃbhuvaḥ purastāttava deveśa tacchṛṇuṣva mahāmate // ### [1.16.28](https://indike.org/pramana/in.purana.linga.1.16.28) ānandastu sa vijñeya ānandatve vyavasthitaḥ māṇḍavyagotrastapasā mama putratvamāgataḥ // ### [1.16.29](https://indike.org/pramana/in.purana.linga.1.16.29) tvayi yogaṃ ca sāṃkhyaṃ ca tapovidyāvidhikriyāḥ ṛtaṃ satyaṃ dayā brahma ahiṃsā sanmatiḥ kṣamā // ### [1.16.30](https://indike.org/pramana/in.purana.linga.1.16.30) dhyānaṃ dhyeyaṃ damaḥ śāntir vidyāvidyā matirdhṛtiḥ kāntirnītiḥ prathā medhā lajjā dṛṣṭiḥ sarasvatī // ### [1.16.31](https://indike.org/pramana/in.purana.linga.1.16.31) tuṣṭiḥ puṣṭiḥ kriyā caiva prasādaś ca pratiṣṭhitāḥ dvātriṃśatsuguṇā hyeṣā dvātriṃśākṣarasaṃjñayā // ### [1.16.32](https://indike.org/pramana/in.purana.linga.1.16.32) prakṛtirvihitā brahmaṃs tvatprasūtirmaheśvarī viṣṇorbhagavataścāpi tathānyeṣāmapi prabho // ### [1.16.33](https://indike.org/pramana/in.purana.linga.1.16.33) saiṣā bhagavatī devī matprasūtiḥ pratiṣṭhitā caturmukhī jagadyoniḥ prakṛtir gauḥ pratiṣṭhitā // ### [1.16.34](https://indike.org/pramana/in.purana.linga.1.16.34) gaurī māyā ca vidyā ca kṛṣṇā haimavatīti ca pradhānaṃ prakṛtiścaiva yāmāhustattvacintakāḥ // ### [1.16.35](https://indike.org/pramana/in.purana.linga.1.16.35) ajāmekāṃ lohitāṃ śuklakṛṣṇāṃ viśvaprajāṃ sṛjamānāṃ sarūpām ajo 'haṃ māṃ viddhi tāṃ viśvarūpaṃ gāyatrīṃ gāṃ viśvarūpāṃ hi buddhyā // ### [1.16.36](https://indike.org/pramana/in.purana.linga.1.16.36) evamuktvā mahādevaḥ sasarja parameśvaraḥ tataś ca pārśvagā devyāḥ sarvarūpakumārakāḥ // ### [1.16.37](https://indike.org/pramana/in.purana.linga.1.16.37) jaṭī muṇḍī śikhaṇḍī ca ardhamuṇḍaś ca jajñire tatastena yathoktena yogena sumahaujasaḥ // ### [1.16.38](https://indike.org/pramana/in.purana.linga.1.16.38) divyavarṣasahasrānte upāsitvā maheśvaram dharmopadeśamakhilaṃ kṛtvā yogamayaṃ dṛḍham // ### [1.16.39](https://indike.org/pramana/in.purana.linga.1.16.39) śiṣṭāś ca niyatātmānaḥ praviṣṭā rudramīśvaram // ## Commentaries (2) - [Śivatosaṇī Liṅgapurāṇaṭīkā](https://indike.org/pramana/in.purana.linga!ganesa.18.17) — Gaṇeśa Bhaṭṭa, Sanskrit - [Śivatoṣiṇī](https://indike.org/pramana/in.purana.linga!ganesa-ballala-natu.18.17) — Gaṇeśa Ballāla Nātū, Sanskrit ## Linked texts (4) - [Vāyupurāṇa](https://indike.org/pramana/in.purana.vayu.1.23.35) — Vyāsa, Sanskrit - [Liṅga](https://indike.org/pramana/in.purana.linga-anon.19.1) — Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.19.1) — Ativīrarāma Pāṇṭiyar 1500, Sanskrit - [Himavatkhaṇḍa](https://indike.org/pramana/in.purana.sthala.himavatkhanda.5.39) — Sanskrit --- Source: [https://indike.org/pramana/in.purana.linga.1.16](https://indike.org/pramana/in.purana.linga.1.16) · Pramāṇa