[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 1.17 # Lingapurana 1.17 Liṅgapurāṇa 1.17 - **Language:** Sanskrit ### [1.17.1](https://indike.org/pramana/in.purana.linga.1.17.1) sūta uvāca evaṃ saṃkṣepataḥ proktaḥ sahyādīnāṃ samudbhavaḥ yaḥ paṭhecchṛṇuyādvāpi śrāvayedvā dvijottamān // ### [1.17.2](https://indike.org/pramana/in.purana.linga.1.17.2) sa yāti brahmasāyujyaṃ prasādātparameṣṭhinaḥ kathaṃ liṅgamabhūlliṅge samabhyarcyaḥ sa śaṅkaraḥ // ### [1.17.3](https://indike.org/pramana/in.purana.linga.1.17.3) kiṃ liṅgaṃ kas tathā liṅgī sūta vaktumihārhasi evaṃ devāś ca ṛṣayaḥ praṇipatya pitāmaham // ### [1.17.4](https://indike.org/pramana/in.purana.linga.1.17.4) apṛcchan bhagavaṃlliṅgaṃ kathamāsīditi svayam liṅge maheśvaro rudraḥ samabhyarcyaḥ kathaṃ tviti // ### [1.17.5](https://indike.org/pramana/in.purana.linga.1.17.5) kiṃ liṅgaṃ kas tathā liṅgī so 'pyāha ca pitāmahaḥ pradhānaṃ liṅgamākhyātaṃ liṅgī ca parameśvaraḥ // ### [1.17.6](https://indike.org/pramana/in.purana.linga.1.17.6) rakṣārthamaṃbudhau mahyaṃ viṣṇostvāsīt surottamāḥ vaimānike gate sarge janalokaṃ saharṣibhiḥ // ### [1.17.7](https://indike.org/pramana/in.purana.linga.1.17.7) sthitikāle tadā pūrṇe tataḥ pratyāhṛte tathā caturyugasahasrānte satyalokaṃ gate surāḥ // ### [1.17.8](https://indike.org/pramana/in.purana.linga.1.17.8) vinādhipatyaṃ samatāṃ gate 'nte brahmaṇo mama śuṣke ca sthāvare sarve tv anāvṛṣṭyā ca sarvaśaḥ // ### [1.17.9](https://indike.org/pramana/in.purana.linga.1.17.9) paśavo mānuṣā vṛkṣāḥ piśācāḥ piśitāśanāḥ gandharvādyāḥ krameṇaiva nirdagdhā bhānubhānubhiḥ // ### [1.17.10](https://indike.org/pramana/in.purana.linga.1.17.10) ekārṇave mahāghore tamobhūte samantataḥ suṣvāpāṃbhasi yogātmā nirmalo nirupaplavaḥ // ### [1.17.11](https://indike.org/pramana/in.purana.linga.1.17.11) sahasraśīrṣā viśvātmā sahasrākṣaḥ sahasrapāt sahasrabāhuḥ sarvajñaḥ sarvadevabhavodbhavaḥ // ### [1.17.12](https://indike.org/pramana/in.purana.linga.1.17.12) hiraṇyagarbho rajasā tamasā śaṅkaraḥ svayam sattvena sarvago viṣṇuḥ sarvātmatve maheśvaraḥ // ### [1.17.13](https://indike.org/pramana/in.purana.linga.1.17.13) kālātmā kālanābhastu śuklaḥ kṛṣṇastu nirguṇaḥ nārāyaṇo mahābāhuḥ sarvātmā sadasanmayaḥ // ### [1.17.14](https://indike.org/pramana/in.purana.linga.1.17.14) tathābhūtamahaṃ dṛṣṭvā śayānaṃ paṅkajekṣaṇam māyayā mohitastasya tamavocamamarṣitaḥ // ### [1.17.15](https://indike.org/pramana/in.purana.linga.1.17.15) kastvaṃ vadeti hastena samutthāpya sanātanam tadā hastaprahāreṇa tīvreṇa sa dṛḍhena tu // ### [1.17.16](https://indike.org/pramana/in.purana.linga.1.17.16) prabuddho 'hīyaśayanāt samāsīnaḥ kṣaṇaṃ vaśī dadarśa nidrāviklinnanīrajāmalalocanaḥ // ### [1.17.17](https://indike.org/pramana/in.purana.linga.1.17.17) māmagre saṃsthitaṃ bhāsādhyāsito bhagavān hariḥ āha cotthāya bhagavān hasanmāṃ madhuraṃ sakṛt // ### [1.17.18](https://indike.org/pramana/in.purana.linga.1.17.18) svāgataṃsvāgataṃ vatsa pitāmaha mahādyute tasya tadvacanaṃ śrutvā smitapūrvaṃ surarṣabhāḥ // ### [1.17.19](https://indike.org/pramana/in.purana.linga.1.17.19) rajasā baddhavairaś ca tamavocaṃ janārdanam bhāṣase vatsa vatseti sargasaṃhārakāraṇam // ### [1.17.20](https://indike.org/pramana/in.purana.linga.1.17.20) mām ihāntaḥsmitaṃ kṛtvā guruḥ śiṣyamivānagha kartāraṃ jagatāṃ sākṣāt prakṛteś ca pravartakam // ### [1.17.21](https://indike.org/pramana/in.purana.linga.1.17.21) sanātanamajaṃ viṣṇuṃ viriñciṃ viśvasaṃbhavam viśvātmānaṃ vidhātāraṃ dhātāraṃ paṅkajekṣaṇam // ### [1.17.22](https://indike.org/pramana/in.purana.linga.1.17.22) kimarthaṃ bhāṣase mohād vaktumarhasi satvaram so 'pi māmāha jagatāṃ kartāhamiti lokaya // ### [1.17.23](https://indike.org/pramana/in.purana.linga.1.17.23) bhartā hartā bhavān aṅgād avatīrṇo mamāvyayāt vismṛto 'si jagannāthaṃ nārāyaṇamanāmayam // ### [1.17.24](https://indike.org/pramana/in.purana.linga.1.17.24) puruṣaṃ paramātmānaṃ puruhūtaṃ puruṣṭutam viṣṇumacyutamīśānaṃ viśvasya prabhavodbhavam // ### [1.17.25](https://indike.org/pramana/in.purana.linga.1.17.25) tavāparādho nāstyatra mama māyākṛtaṃ tvidam śṛṇu satyaṃ caturvaktra sarvadeveśvaro hyayam // ### [1.17.26](https://indike.org/pramana/in.purana.linga.1.17.26) kartā netā ca hartā ca na mayāsti samo vibhuḥ ahameva paraṃ brahma paraṃ tattvaṃ pitāmaha // ### [1.17.27](https://indike.org/pramana/in.purana.linga.1.17.27) ahameva paraṃ jyotiḥ paramātmā tvahaṃ vibhuḥ yadyaddṛṣṭaṃ śrutaṃ sarvaṃ jagatyasmiṃścarācaram // ### [1.17.28](https://indike.org/pramana/in.purana.linga.1.17.28) tattadviddhi caturvaktra sarvaṃ manmayamityatha mayā sṛṣṭaṃ purāvyaktaṃ caturviṃśatikaṃ svayam // ### [1.17.29](https://indike.org/pramana/in.purana.linga.1.17.29) nityāntā hyaṇavo baddhāḥ sṛṣṭāḥ krodhodbhavādayaḥ prasādāddhi bhavānaṇḍāny anekānīha līlayā // ### [1.17.30](https://indike.org/pramana/in.purana.linga.1.17.30) sṛṣṭā buddhirmayā tasyām ahaṅkārastridhā tataḥ tanmātrāpañcakaṃ tasmān manaḥ ṣaṣṭhendriyāṇi ca // ### [1.17.31](https://indike.org/pramana/in.purana.linga.1.17.31) ākāśādīni bhūtāni bhautikāni ca līlayā ityuktavati tasmiṃś ca mayi cāpi vacas tathā // ### [1.17.32](https://indike.org/pramana/in.purana.linga.1.17.32) āvayoścābhavadyuddhaṃ sughoraṃ romaharṣaṇam pralayārṇavamadhye tu rajasā baddhavairayoḥ // ### [1.17.33](https://indike.org/pramana/in.purana.linga.1.17.33) etasminnantare liṅgam abhavaccāvayoḥ puraḥ vivādaśamanārthaṃ hi prabodhārthaṃ ca bhāsvaram // ### [1.17.34](https://indike.org/pramana/in.purana.linga.1.17.34) jvālāmālāsahasrāḍhyaṃ kālānalaśatopamam kṣayavṛddhivinirmuktam ādimadhyāntavarjitam // ### [1.17.35](https://indike.org/pramana/in.purana.linga.1.17.35) anaupamyamanirdeśyam avyaktaṃ viśvasaṃbhavam tasya jvālāsahasreṇa mohito bhagavān hariḥ // ### [1.17.36](https://indike.org/pramana/in.purana.linga.1.17.36) mohitaṃ prāha māmatra parīkṣāvo 'gnisaṃbhavam adhogamiṣyāmyanalastaṃbhasyānupamasya ca // ### [1.17.37](https://indike.org/pramana/in.purana.linga.1.17.37) bhavānūrdhvaṃ prayatnena gantumarhasi satvaram evaṃ vyāhṛtya viśvātmā svarūpamakarottadā // ### [1.17.38](https://indike.org/pramana/in.purana.linga.1.17.38) vārāhamahamapyāśu haṃsatvaṃ prāptavānsurāḥ tadāprabhṛti māmāhurh aṃsaṃ haṃso virāḍiti // ### [1.17.39](https://indike.org/pramana/in.purana.linga.1.17.39) haṃsahaṃseti yo brūyān māṃ haṃsaḥ sa bhaviṣyati suśveto hyanalākṣaś ca viśvataḥ pakṣasaṃyutaḥ // ### [1.17.40](https://indike.org/pramana/in.purana.linga.1.17.40) mano 'nilajavo bhūtvā gato 'haṃ cordhvataḥ surāḥ nārāyaṇo 'pi viśvātmā nīlāñjanacayopamam // ### [1.17.41](https://indike.org/pramana/in.purana.linga.1.17.41) daśayojanavistīrṇaṃ śatayojanamāyatam meruparvatavarṣmāṇaṃ gauratīkṣṇāgradaṃṣṭriṇam // ### [1.17.42](https://indike.org/pramana/in.purana.linga.1.17.42) kālādityasamābhāsaṃ dīrghaghoṇaṃ mahāsvaram hrasvapādaṃ vicitrāṅgaṃ jaitraṃ dṛḍham anaupamam // ### [1.17.43](https://indike.org/pramana/in.purana.linga.1.17.43) vārāhamasitaṃ rūpam āsthāya gatavānadhaḥ evaṃ varṣasahasraṃ tu tvaranviṣṇuradhogataḥ // ### [1.17.44](https://indike.org/pramana/in.purana.linga.1.17.44) nāpaśyadalpamapyasya mūlaṃ liṅgasya sūkaraḥ tāvatkālaṃ gato hyūrdhvam ahamapyarisūdanaḥ // ### [1.17.45](https://indike.org/pramana/in.purana.linga.1.17.45) satvaraṃ sarvayatnena tasyāntaṃ jñātumicchayā śrānto hyadṛṣṭvā tasyāntam ahaṅkārādadhogataḥ // ### [1.17.46](https://indike.org/pramana/in.purana.linga.1.17.46) tathaiva bhagavān viṣṇuḥ śrāntaḥ saṃtrastalocanaḥ sarvadevabhavastūrṇam utthitaḥ saḥ mahāvapuḥ // ### [1.17.47](https://indike.org/pramana/in.purana.linga.1.17.47) samāgato mayā sārdhaṃ praṇipatya mahāmanāḥ māyayā mohitaḥ śaṃbhos tasthau saṃvignamānasaḥ // ### [1.17.48](https://indike.org/pramana/in.purana.linga.1.17.48) pṛṣṭhataḥ pārśvataścaiva cāgrataḥ parameśvaram praṇipatya mayā sārdhaṃ sasmāra kimidaṃ tviti // ### [1.17.49](https://indike.org/pramana/in.purana.linga.1.17.49) tadā samabhavattatra nādo vai śabdalakṣaṇaḥ omomiti suraśreṣṭhāḥ suvyaktaḥ plutalakṣaṇaḥ // ### [1.17.50](https://indike.org/pramana/in.purana.linga.1.17.50) kimidaṃ tviti saṃcintya mayā tiṣṭhanmahāsvanam liṅgasya dakṣiṇe bhāge tadāpaśyatsanātanam // ### [1.17.51](https://indike.org/pramana/in.purana.linga.1.17.51) ādyavarṇamakāraṃ tu ukāraṃ cottare tataḥ makāraṃ madhyataścaiva nādāntaṃ tasya caumiti // ### [1.17.52](https://indike.org/pramana/in.purana.linga.1.17.52) sūryamaṇḍalavaddṛṣṭvā varṇamādyaṃ tu dakṣiṇe uttare pāvakaprakhyam ukāraṃ puruṣarṣabhaḥ // ### [1.17.53](https://indike.org/pramana/in.purana.linga.1.17.53) śītāṃśumaṇḍalaprakhyaṃ makāraṃ madhyamaṃ tathā tasyopari tadāpaśyac chuddhasphaṭikavat prabhum // ### [1.17.54](https://indike.org/pramana/in.purana.linga.1.17.54) turīyātītam amṛtaṃ niṣkalaṃ nirupaplavam nirdvandvaṃ kevalaṃ śūnyaṃ bāhyābhyantaravarjitam // ### [1.17.55](https://indike.org/pramana/in.purana.linga.1.17.55) sabāhyābhyantaraṃ caiva sabāhyābhyantarasthitam ādimadhyāntarahitam ānandasyāpi kāraṇam // ### [1.17.56](https://indike.org/pramana/in.purana.linga.1.17.56) mātrāstisrastvardhamātraṃ nādākhyaṃ brahmasaṃjñitam ṛgyajuḥsāmavedā vai mātrārūpeṇa mādhavaḥ // ### [1.17.57](https://indike.org/pramana/in.purana.linga.1.17.57) vedaśabdebhya eveśaṃ viśvātmānamacintayat tadābhavadṛṣirveda ṛṣeḥ sāratamaṃ śubham // ### [1.17.58](https://indike.org/pramana/in.purana.linga.1.17.58) tenaiva ṛṣiṇā viṣṇur jñātavān parameśvaram cintayā rahito rudro vāco yanmanasā saha // ### [1.17.59](https://indike.org/pramana/in.purana.linga.1.17.59) aprāpya taṃ nivartante vācyastvekākṣareṇa saḥ ekākṣareṇa tadvācyam ṛtaṃ paramakāraṇam // ### [1.17.60](https://indike.org/pramana/in.purana.linga.1.17.60) satyamānandamamṛtaṃ paraṃ brahma parātparam ekākṣarādakārākhyo bhagavānkanakāṇḍajaḥ // ### [1.17.61](https://indike.org/pramana/in.purana.linga.1.17.61) ekākṣarādukārākhyo hariḥ paramakāraṇam ekākṣarānmakārākhyo bhagavānnīlalohitaḥ // ### [1.17.62](https://indike.org/pramana/in.purana.linga.1.17.62) sargakartā tvakārākhyo hy ukārākhyastu mohakaḥ makārākhyas tayor nityam anugrahakaro 'bhavat // ### [1.17.63](https://indike.org/pramana/in.purana.linga.1.17.63) makārākhyo vibhurbījī hy akāro bījamucyate ukārākhyo hariryoniḥ pradhānapuruṣeśvaraḥ // ### [1.17.64](https://indike.org/pramana/in.purana.linga.1.17.64) bījī ca bījaṃ tadyonir nādākhyaś ca maheśvaraḥ bījī vibhajya cātmānaṃ svecchayā tu vyavasthitaḥ // ### [1.17.65](https://indike.org/pramana/in.purana.linga.1.17.65) asya liṅgādabhūdbījam akāro bījinaḥ prabhoḥ ukārayonau nikṣiptam avardhata samantataḥ // ### [1.17.66](https://indike.org/pramana/in.purana.linga.1.17.66) sauvarṇamabhavaccāṇḍam āveṣṭyādyaṃ tadakṣaram anekābdaṃ tathā cāpsu divyamaṇḍaṃ vyavasthitam // ### [1.17.67](https://indike.org/pramana/in.purana.linga.1.17.67) tato varṣasahasrānte dvidhā kṛtamajodbhavam aṇḍam apsu sthitaṃ sākṣād ādyākhyeneśvareṇa tu // ### [1.17.68](https://indike.org/pramana/in.purana.linga.1.17.68) tasyāṇḍasya śubhaṃ haimaṃ kapālaṃ cordhvasaṃsthitam jajñe yaddyaustadaparaṃ pṛthivī pañcalakṣaṇā // ### [1.17.69](https://indike.org/pramana/in.purana.linga.1.17.69) tasmādaṇḍodbhavo jajñe tv akārākhyaścaturmukhaḥ sa sraṣṭā sarvalokānāṃ sa eva trividhaḥ prabhuḥ // ### [1.17.70](https://indike.org/pramana/in.purana.linga.1.17.70) evamomomiti proktam ityāhuryajuṣāṃ varāḥ yajuṣāṃ vacanaṃ śrutvā ṛcaḥ sāmāni sādaram // ### [1.17.71](https://indike.org/pramana/in.purana.linga.1.17.71) evameva hare brahmann ityāhuḥ śrutayastadā tato vijñāya deveśaṃ yathāvacchrutisaṃbhavaiḥ // ### [1.17.72](https://indike.org/pramana/in.purana.linga.1.17.72) mantrairmaheśvaraṃ devaṃ tuṣṭāva sumahodayam āvayoḥ stutisaṃtuṣṭo liṅge tasminnirañjanaḥ // ### [1.17.73](https://indike.org/pramana/in.purana.linga.1.17.73) divyaṃ śabdamayaṃ rūpam āsthāya prahasan sthitaḥ akārastasya mūrdhā tu lalāṭaṃ dīrghamucyate // ### [1.17.74](https://indike.org/pramana/in.purana.linga.1.17.74) ikāro dakṣiṇaṃ netram īkāro vāmalocanam ukāro dakṣiṇaṃ śrotram ūkāro vāmamucyate // ### [1.17.75](https://indike.org/pramana/in.purana.linga.1.17.75) ṛkāro dakṣiṇaṃ tasya kapolaṃ parameṣṭhinaḥ vāmaṃ kapolam ṝkāro ḷ ḹ nāsāpuṭe ubhe // ### [1.17.76](https://indike.org/pramana/in.purana.linga.1.17.76) ekāram oṣṭhamūrddhvaś ca aikārastvadharo vibhoḥ okāraś ca tathaukāro dantapaṅktidvayaṃ kramāt // ### [1.17.77](https://indike.org/pramana/in.purana.linga.1.17.77) amastu tālunī tasya devadevasya dhīmataḥ kādipañcākṣarāṇyasya pañca hastāni dakṣiṇe // ### [1.17.78](https://indike.org/pramana/in.purana.linga.1.17.78) cādipañcākṣarāṇyevaṃ pañca hastāni vāmataḥ ṭādipañcākṣaraṃ pādas tādipañcākṣaraṃ tathā // ### [1.17.79](https://indike.org/pramana/in.purana.linga.1.17.79) pakāramudaraṃ tasya phakāraḥ pārśvamucyate bakāro vāmapārśvaṃ vai bhakāraṃ skandhamasya tat // ### [1.17.80](https://indike.org/pramana/in.purana.linga.1.17.80) makāraṃ hṛdayaṃ śaṃbhor mahādevasya yoginaḥ yakārādisakārāntaṃ vibhorvai sapta dhātavaḥ // ### [1.17.81](https://indike.org/pramana/in.purana.linga.1.17.81) hakāra ātmarūpaṃ vai kṣakāraḥ krodha ucyate taṃ dṛṣṭvā umayā sārdhaṃ bhagavantaṃ maheśvaram // ### [1.17.82](https://indike.org/pramana/in.purana.linga.1.17.82) praṇamya bhagavān viṣṇuḥ punaścāpaśyadūrddhvataḥ oṅkāraprabhavaṃ mantraṃ kalāpañcakasaṃyutam // ### [1.17.83](https://indike.org/pramana/in.purana.linga.1.17.83) śuddhasphaṭikasaṃkāśaṃ subhāṣṭatriṃśadakṣaram medhākaram abhūdbhūyaḥ sarvadharmārthasādhakam // ### [1.17.84](https://indike.org/pramana/in.purana.linga.1.17.84) gāyatrīprabhavaṃ mantraṃ haritaṃ vaśyakārakam caturviṃśativarṇāḍhyaṃ catuṣkalamanuttamam // ### [1.17.85](https://indike.org/pramana/in.purana.linga.1.17.85) atharvamasitaṃ mantraṃ kalāṣṭakasamāyutam abhicārikamatyarthaṃ trayastriṃśacchubhākṣaram // ### [1.17.86](https://indike.org/pramana/in.purana.linga.1.17.86) yajurvedasamāyuktaṃ pañcatriṃśacchubhākṣaram kalāṣṭakasamāyuktaṃ suśvetaṃ śāntikaṃ tathā // ### [1.17.87](https://indike.org/pramana/in.purana.linga.1.17.87) trayodaśakalāyuktaṃ bālādyaiḥ saha lohitam sāmodbhavaṃ jagatyādyaṃ vṛddhisaṃhārakāraṇam // ### [1.17.88](https://indike.org/pramana/in.purana.linga.1.17.88) varṇāḥ ṣaḍadhikāḥ ṣaṣṭir asya mantravarasya tu pañca mantrāṃs tathā labdhvā jajāpa bhagavān hariḥ // ### [1.17.89](https://indike.org/pramana/in.purana.linga.1.17.89) atha dṛṣṭvā kalāvarṇam ṛgyajuḥsāmarūpiṇam īśānamīśamukuṭaṃ puruṣāsyaṃ purātanam // ### [1.17.90](https://indike.org/pramana/in.purana.linga.1.17.90) aghorahṛdayaṃ hṛdyaṃ vāmaguhyaṃ sadāśivam sadyaḥ pādaṃ mahādevaṃ mahābhogīndrabhūṣaṇam // ### [1.17.91](https://indike.org/pramana/in.purana.linga.1.17.91) viśvataḥ pādavadanaṃ viśvato 'kṣikaraṃ śivam brahmaṇo 'dhipatiṃ sargasthitisaṃhārakāraṇam // ### [1.17.92](https://indike.org/pramana/in.purana.linga.1.17.92) tuṣṭāva punariṣṭābhir vāgbhir varadamīśvaram // ## Commentaries (2) - [Śivatosaṇī Liṅgapurāṇaṭīkā](https://indike.org/pramana/in.purana.linga!ganesa.19.28) — Gaṇeśa Bhaṭṭa, Sanskrit - [Śivatoṣiṇī](https://indike.org/pramana/in.purana.linga!ganesa-ballala-natu.19.28) — Gaṇeśa Ballāla Nātū, Sanskrit ## Linked texts (5) - [Śivapurāṇa (complete text)](https://indike.org/pramana/in.purana.siva*complete-2.2.1.7.23) — Sanskrit - [Liṅga](https://indike.org/pramana/in.purana.linga-anon.20.1) — Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.20.1) — Ativīrarāma Pāṇṭiyar 1500, Sanskrit - [Purāṇasāra (Mādhava Vidyāraṇya)](https://indike.org/pramana/in.purana.sangraha.puranasara-madhava-vidyaranya.5.10) — Mādhava Vidyāraṇya, Sanskrit - [Purāṇasāra](https://indike.org/pramana/in.niti.dharma.jati.puranasara.5.10) — Sāyaṇa, Sanskrit --- Source: [https://indike.org/pramana/in.purana.linga.1.17](https://indike.org/pramana/in.purana.linga.1.17) · Pramāṇa