[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 1.21 # Lingapurana 1.21 Liṅgapurāṇa 1.21 - **Language:** Sanskrit ### [1.21.1](https://indike.org/pramana/in.purana.linga.1.21.1) sūta uvāca brahmāṇamagrataḥ kṛtvā tataḥ sa garuḍadhvajaḥ atītaiś ca bhaviṣyaiś ca vartamānaistathaiva ca // ### [1.21.2](https://indike.org/pramana/in.purana.linga.1.21.2) nāmabhiśchāndasaiścaiva idaṃ stotramudīrayat namastubhyaṃ bhagavate suvratānantatejase // ### [1.21.3](https://indike.org/pramana/in.purana.linga.1.21.3) namaḥ kṣetrādhipataye bījine śūline namaḥ sumeḍhrāyārcyameḍhrāya daṇḍine rūkṣaretase // ### [1.21.4](https://indike.org/pramana/in.purana.linga.1.21.4) namo jyeṣṭhāya śreṣṭhāya pūrvāya prathamāya ca namo mānyāya pūjyāya sadyojātāya vai namaḥ // ### [1.21.5](https://indike.org/pramana/in.purana.linga.1.21.5) gahvarāya ghaṭeśāya vyomacīrāṃbarāya ca namaste hyasmadādīnāṃ bhūtānāṃ prabhave namaḥ // ### [1.21.6](https://indike.org/pramana/in.purana.linga.1.21.6) vedānāṃ prabhave caiva smṛtīnāṃ prabhave namaḥ prabhave karmadānānāṃ dravyāṇāṃ prabhave namaḥ // ### [1.21.7](https://indike.org/pramana/in.purana.linga.1.21.7) namo yogasya prabhave sāṃkhyasya prabhave namaḥ namo dhruvanibaddhānām ṛṣīṇāṃ prabhave namaḥ // ### [1.21.8](https://indike.org/pramana/in.purana.linga.1.21.8) ṛkṣāṇāṃ prabhave tubhyaṃ grahāṇāṃ prabhave namaḥ vaidyutāśanimeghānāṃ garjitaprabhave namaḥ // ### [1.21.9](https://indike.org/pramana/in.purana.linga.1.21.9) mahodadhīnāṃ prabhave dvīpānāṃ prabhave namaḥ adrīṇāṃ prabhave caiva varṣāṇāṃ prabhave namaḥ // ### [1.21.10](https://indike.org/pramana/in.purana.linga.1.21.10) namo nadīnāṃ prabhave nadānāṃ prabhave namaḥ mahauṣadhīnāṃ prabhave vṛkṣāṇāṃ prabhave namaḥ // ### [1.21.11](https://indike.org/pramana/in.purana.linga.1.21.11) dharmavṛkṣāya dharmāya sthitīnāṃ prabhave namaḥ prabhave ca parārdhasya parasya prabhave namaḥ // ### [1.21.12](https://indike.org/pramana/in.purana.linga.1.21.12) namo rasānāṃ prabhave ratnānāṃ prabhave namaḥ kṣaṇānāṃ prabhave caiva lavānāṃ prabhave namaḥ // ### [1.21.13](https://indike.org/pramana/in.purana.linga.1.21.13) ahorātrārdhamāsānāṃ māsānāṃ prabhave namaḥ ṛtūnāṃ prabhave tubhyaṃ saṃkhyāyāḥ prabhave namaḥ // ### [1.21.14](https://indike.org/pramana/in.purana.linga.1.21.14) prabhave cāparārdhasya parārdhaprabhave namaḥ namaḥ purāṇaprabhave sargāṇāṃ prabhave namaḥ // ### [1.21.15](https://indike.org/pramana/in.purana.linga.1.21.15) manvantarāṇāṃ prabhave yogasya prabhave namaḥ caturvidhasya sargasya prabhave 'nantacakṣuṣe // ### [1.21.16](https://indike.org/pramana/in.purana.linga.1.21.16) kalpodayanibandhānāṃ vātānāṃ prabhave namaḥ namo viśvasya prabhave brahmādhipataye namaḥ // ### [1.21.17](https://indike.org/pramana/in.purana.linga.1.21.17) vidyānāṃ prabhave caiva vidyādhipataye namaḥ namo vratādhipataye vratānāṃ prabhave namaḥ // ### [1.21.18](https://indike.org/pramana/in.purana.linga.1.21.18) mantrāṇāṃ prabhave tubhyaṃ mantrādhipataye namaḥ pitṝṇāṃ pataye caiva paśūnāṃ pataye namaḥ // ### [1.21.19](https://indike.org/pramana/in.purana.linga.1.21.19) vāgvṛṣāya namastubhyaṃ purāṇavṛṣabhāya ca namaḥ paśūnāṃ pataye govṛṣendradhvajāya ca // ### [1.21.20](https://indike.org/pramana/in.purana.linga.1.21.20) prajāpatīnāṃ pataye siddhīnāṃ pataye namaḥ daityadānavasaṃghānāṃ rakṣasāṃ pataye namaḥ // ### [1.21.21](https://indike.org/pramana/in.purana.linga.1.21.21) gandharvāṇāṃ ca pataye yakṣāṇāṃ pataye namaḥ garuḍoragasarpāṇāṃ pakṣiṇāṃ pataye namaḥ // ### [1.21.22](https://indike.org/pramana/in.purana.linga.1.21.22) sarvaguhyapiśācānāṃ guhyādhipataye namaḥ gokarṇāya ca goptre ca śaṅkukarṇāya vai namaḥ // ### [1.21.23](https://indike.org/pramana/in.purana.linga.1.21.23) varāhāyāprameyāya ṛkṣāya virajāya ca namaḥ surāṇāṃ pataye gaṇānāṃ pataye namaḥ // ### [1.21.24](https://indike.org/pramana/in.purana.linga.1.21.24) aṃbhasāṃ pataye caiva ojasāṃ pataye namaḥ namo 'stu lakṣmīpataye śrīpāya kṣitipāya ca // ### [1.21.25](https://indike.org/pramana/in.purana.linga.1.21.25) balābalasamūhāya akṣobhyakṣobhaṇāya ca dīptaśṛṅgaikaśṛṅgāya vṛṣabhāya kakudmine // ### [1.21.26](https://indike.org/pramana/in.purana.linga.1.21.26) namaḥ sthairyāya vapuṣe tejasānuvratāya ca atītāya bhaviṣyāya vartamānāya vai namaḥ // ### [1.21.27](https://indike.org/pramana/in.purana.linga.1.21.27) suvarcase ca vīryāya śūrāya hyajitāya ca varadāya vareṇyāya puruṣāya mahātmane // ### [1.21.28](https://indike.org/pramana/in.purana.linga.1.21.28) namo bhūtāya bhavyāya mahate prabhavāya ca janāya ca namastubhyaṃ tapase varadāya ca // ### [1.21.29](https://indike.org/pramana/in.purana.linga.1.21.29) aṇave mahate caiva namaḥ sarvagatāya ca namo bandhāya mokṣāya svargāya narakāya ca // ### [1.21.30](https://indike.org/pramana/in.purana.linga.1.21.30) namo bhavāya devāya ijyāya yājakāya ca pratyudīrṇāya dīptāya tattvāyātiguṇāya ca // ### [1.21.31](https://indike.org/pramana/in.purana.linga.1.21.31) namaḥ pāśāya śastrāya namastvābharaṇāya ca hutāya upahūtāya prahutaprāśitāya ca // ### [1.21.32](https://indike.org/pramana/in.purana.linga.1.21.32) namo 'stviṣṭāya pūrtāya agniṣṭomadvijāya ca sadasyāya namaścaiva dakṣiṇāvabhṛthāya ca // ### [1.21.33](https://indike.org/pramana/in.purana.linga.1.21.33) ahiṃsāyāpralobhāya paśumantrauṣadhāya ca namaḥ puṣṭipradānāya suśīlāya suśīline // ### [1.21.34](https://indike.org/pramana/in.purana.linga.1.21.34) atītāya bhaviṣyāya vartamānāya te namaḥ suvarcase ca vīryāya śūrāya hyajitāya ca // ### [1.21.35](https://indike.org/pramana/in.purana.linga.1.21.35) varadāya vareṇyāya puruṣāya mahātmane namo bhūtāya bhavyāya mahate cābhayāya ca // ### [1.21.36](https://indike.org/pramana/in.purana.linga.1.21.36) jarāsiddha namastubhyam ayase varadāya ca adhare mahate caiva namaḥ sastupatāya ca // ### [1.21.37](https://indike.org/pramana/in.purana.linga.1.21.37) namaścendriyapatrāṇāṃ lelihānāya sragviṇe viśvāya viśvarūpāya viśvataḥ śirase namaḥ // ### [1.21.38](https://indike.org/pramana/in.purana.linga.1.21.38) sarvataḥ pāṇipādāya rudrāyāpratimāya ca namo havyāya kavyāya havyavāhāya vai namaḥ // ### [1.21.39](https://indike.org/pramana/in.purana.linga.1.21.39) namaḥ siddhāya medhyāya iṣṭāyejyāparāya ca suvīrāya sughorāya akṣobhyakṣobhaṇāya ca // ### [1.21.40](https://indike.org/pramana/in.purana.linga.1.21.40) suprajāya sumedhāya dīptāya bhāskarāya ca namo buddhāya śuddhāya vistṛtāya matāya ca // ### [1.21.41](https://indike.org/pramana/in.purana.linga.1.21.41) namaḥ sthūlāya sūkṣmāya dṛśyādṛśyāya sarvaśaḥ varṣate jvalate caiva vāyave śiśirāya ca // ### [1.21.42](https://indike.org/pramana/in.purana.linga.1.21.42) namaste vakrakeśāya ūruvakṣaḥśikhāya ca namo namaḥ suvarṇāya tapanīyanibhāya ca // ### [1.21.43](https://indike.org/pramana/in.purana.linga.1.21.43) virūpākṣāya liṅgāya piṅgalāya mahaujase vṛṣṭighnāya namaścaiva namaḥ saumyekṣaṇāya ca // ### [1.21.44](https://indike.org/pramana/in.purana.linga.1.21.44) namo dhūmrāya śvetāya kṛṣṇāya lohitāya ca piśitāya piśaṅgāya pītāya ca niṣaṅgiṇe // ### [1.21.45](https://indike.org/pramana/in.purana.linga.1.21.45) namaste saviśeṣāya nirviśeṣāya vai namaḥ nama ījyāya pūjyāya upajīvyāya vai namaḥ // ### [1.21.46](https://indike.org/pramana/in.purana.linga.1.21.46) namaḥ kṣemyāya vṛddhāya vatsalāya namonamaḥ namo bhūtāya satyāya satyāsatyāya vai namaḥ // ### [1.21.47](https://indike.org/pramana/in.purana.linga.1.21.47) namo vai padmavarṇāya mṛtyughnāya ca mṛtyave namo gaurāya śyāmāya kadrave lohitāya ca // ### [1.21.48](https://indike.org/pramana/in.purana.linga.1.21.48) mahāsaṃdhyābhravarṇāya cārudīptāya dīkṣiṇe namaḥ kamalahastāya digvāsāya kapardine // ### [1.21.49](https://indike.org/pramana/in.purana.linga.1.21.49) apramāṇāya sarvāya avyayāyāmarāya ca namo rūpāya gandhāya śāśvatāyākṣatāya ca // ### [1.21.50](https://indike.org/pramana/in.purana.linga.1.21.50) purastādbṛṃhate caiva vibhrāntāya kṛtāya ca durgamāya maheśāya krodhāya kapilāya ca // ### [1.21.51](https://indike.org/pramana/in.purana.linga.1.21.51) tarkyātarkyaśarīrāya baline raṃhasāya ca sikatyāya pravāhyāya sthitāya prasṛtāya ca // ### [1.21.52](https://indike.org/pramana/in.purana.linga.1.21.52) sumedhase kulālāya namaste śaśikhaṇḍine citrāya citraveṣāya citravarṇāya medhase // ### [1.21.53](https://indike.org/pramana/in.purana.linga.1.21.53) cekitānāya tuṣṭāya namaste nihitāya ca namaḥ kṣāntāya dāntāya vajrasaṃhananāya ca // ### [1.21.54](https://indike.org/pramana/in.purana.linga.1.21.54) rakṣoghnāya viṣaghnāya śitikaṇṭhordhvamanyave // ### [1.21.55](https://indike.org/pramana/in.purana.linga.1.21.55) lelihāya kṛtāntāya tigmāyudhadharāya ca // ### [1.21.56](https://indike.org/pramana/in.purana.linga.1.21.56) pramodāya saṃmodāya yativedyāya te namaḥ anāmayāya sarvāya mahākālāya vai namaḥ // ### [1.21.57](https://indike.org/pramana/in.purana.linga.1.21.57) praṇavapraṇaveśāya bhaganetrāntakāya ca mṛgavyādhāya dakṣāya dakṣayajñāntakāya ca // ### [1.21.58](https://indike.org/pramana/in.purana.linga.1.21.58) sarvabhūtātmabhūtāya sarveśātiśayāya ca puraghnāya suśastrāya dhanvine 'tha paraśvadhe // ### [1.21.59](https://indike.org/pramana/in.purana.linga.1.21.59) pūṣadantavināśāya bhaganetrāntakāya ca kāmadāya variṣṭhāya kāmāṅgadahanāya ca // ### [1.21.60](https://indike.org/pramana/in.purana.linga.1.21.60) raṅge karālavaktrāya nāgendravadanāya ca daityānāmantakeśāya daityākrandakarāya ca // ### [1.21.61](https://indike.org/pramana/in.purana.linga.1.21.61) himaghnāya ca tīkṣṇāya ārdracarmadharāya ca śmaśānaratinityāya namo 'stūlmukadhāriṇe // ### [1.21.62](https://indike.org/pramana/in.purana.linga.1.21.62) namaste prāṇapālāya muṇḍamālādharāya ca prahīṇaśokairvividhair bhūtaiḥ parivṛtāya ca // ### [1.21.63](https://indike.org/pramana/in.purana.linga.1.21.63) naranārīśarīrāya devyāḥ priyakarāya ca jaṭine muṇḍine caiva vyālayajñopavītine // ### [1.21.64](https://indike.org/pramana/in.purana.linga.1.21.64) namo 'stu nṛtyaśīlāya upanṛtyapriyāya ca manyave gītaśīlāya munibhir gāyate namaḥ // ### [1.21.65](https://indike.org/pramana/in.purana.linga.1.21.65) kaṭakaṭāya tigmāya apriyāya priyāya ca vibhīṣaṇāya bhīṣmāya bhagapramathanāya ca // ### [1.21.66](https://indike.org/pramana/in.purana.linga.1.21.66) siddhasaṃghānugītāya mahābhāgāya vai namaḥ namo muktāṭṭahāsāya kṣveḍitāsphoṭitāya ca // ### [1.21.67](https://indike.org/pramana/in.purana.linga.1.21.67) nardate kūrdate caiva namaḥ pramuditātmane namo mṛḍāya śvasate dhāvate 'dhiṣṭhite namaḥ // ### [1.21.68](https://indike.org/pramana/in.purana.linga.1.21.68) dhyāyate jṛmbhate caiva rudate dravate namaḥ valgate krīḍate caiva lambodaraśarīriṇe // ### [1.21.69](https://indike.org/pramana/in.purana.linga.1.21.69) namo 'kṛtyāya kṛtyāya muṇḍāya kīkaṭāya ca nama unmattadehāya kiṅkiṇīkāya vai namaḥ // ### [1.21.70](https://indike.org/pramana/in.purana.linga.1.21.70) namo vikṛtaveṣāya krūrāyāmarṣaṇāya ca aprameyāya goptre ca dīptāyānirguṇāya ca // ### [1.21.71](https://indike.org/pramana/in.purana.linga.1.21.71) vāmapriyāya vāmāya cūḍāmaṇidharāya ca namastokāya tanave guṇairapramitāya ca // ### [1.21.72](https://indike.org/pramana/in.purana.linga.1.21.72) namo guṇyāya guhyāya agamyagamanāya ca lokadhātrī tviyaṃ bhūmiḥ pādau sajjanasevitau // ### [1.21.73](https://indike.org/pramana/in.purana.linga.1.21.73) sarveṣāṃ siddhiyogānām adhiṣṭhānaṃ tavodaram madhye 'ntarikṣaṃ vistīrṇaṃ tārāgaṇavibhūṣitam // ### [1.21.74](https://indike.org/pramana/in.purana.linga.1.21.74) svāteḥ patha ivābhāti śrīmān hārastavorasi diśo daśabhujāstubhyaṃ keyūrāṅgadabhūṣitāḥ // ### [1.21.75](https://indike.org/pramana/in.purana.linga.1.21.75) vistīrṇapariṇāhaś ca nīlāñjanacayopamaḥ kaṇṭhaste śobhate śrīmān hemasūtravibhūṣitaḥ // ### [1.21.76](https://indike.org/pramana/in.purana.linga.1.21.76) daṃṣṭrākarālaṃ durdharṣam anaupamyaṃ mukhaṃ tathā padmamālākṛtoṣṇīṣaṃ śiro dyauḥ śobhate 'dhikam // ### [1.21.77](https://indike.org/pramana/in.purana.linga.1.21.77) dīptiḥ sūrye vapuścandre sthairyaṃ śaile 'nile balam auṣṇyamagnau tathā śaityam apsu śabdo 'mbare tathā // ### [1.21.78](https://indike.org/pramana/in.purana.linga.1.21.78) akṣarāntaraniṣpandād guṇānetānvidurbudhāḥ japo japyo mahādevo mahāyogomaheśvaraḥ // ### [1.21.79](https://indike.org/pramana/in.purana.linga.1.21.79) pureśayo guhāvāsī khecaro rajanīcaraḥ taponidhirguhagurur nandano nandavardhanaḥ // ### [1.21.80](https://indike.org/pramana/in.purana.linga.1.21.80) hayaśīrṣā payodhātā vidhātā bhūtabhāvanaḥ boddhavyo bodhitā netā durdharṣo duṣprakampanaḥ // ### [1.21.81](https://indike.org/pramana/in.purana.linga.1.21.81) bṛhadratho bhīmakarmā bṛhatkīrtir dhanañjayaḥ ghaṇṭāpriyo dhvajī chattrī pinākī dhvajinīpatiḥ // ### [1.21.82](https://indike.org/pramana/in.purana.linga.1.21.82) kavacī paṭṭiśī khaḍgī dhanurhastaḥ paraśvadhī aghasmaro 'naghaḥ śūro devarājo 'rimardanaḥ // ### [1.21.83](https://indike.org/pramana/in.purana.linga.1.21.83) tvāṃ prasādya purāsmābhir dviṣanto nihatā yudhi agniḥ sadārṇavāṃbhastvaṃ pibannapi na tṛpyase // ### [1.21.84](https://indike.org/pramana/in.purana.linga.1.21.84) krodhākāraḥ prasannātmā kāmadaḥ kāmagaḥ priyaḥ brahmacāri cāgādhaś ca brahmaṇyaḥ śiṣṭapūjitaḥ // ### [1.21.85](https://indike.org/pramana/in.purana.linga.1.21.85) devānām akṣayaḥ kośas tvayā yajñaḥ prakalpitaḥ havyaṃ tavedaṃ vahati vedoktaṃ havyavāhanaḥ prīte tvayi mahādeva vayaṃ prītā bhavāmahe // ### [1.21.86](https://indike.org/pramana/in.purana.linga.1.21.86) bhavānīśo 'nādimāṃstvaṃ ca sarvalokānāṃ tvaṃ brahmakartādisargaḥ sāṃkhyāḥ prakṛteḥ paramaṃ tvāṃ viditvā kṣīṇadhyānāstvāmamṛtyuṃ viśanti // ### [1.21.87](https://indike.org/pramana/in.purana.linga.1.21.87) yogāś ca tvāṃ dhyāyino nityasiddhaṃ jñātvā yogān saṃtyajante punastān ye cāpyanye tvāṃ prasannā viśuddhāḥ svakarmabhiste divyabhogā bhavanti // ### [1.21.88](https://indike.org/pramana/in.purana.linga.1.21.88) aprasaṃkhyeyatattvasya yathā vidmaḥ svaśaktitaḥ kīrtitaṃ tava māhātmyam apārasya mahātmanaḥ // ### [1.21.89](https://indike.org/pramana/in.purana.linga.1.21.89) śivo no bhava sarvatra yo 'si so 'si namo 'stu te ya idaṃ kīrtayedbhaktyā brahmanārāyaṇastavam // ### [1.21.90](https://indike.org/pramana/in.purana.linga.1.21.90) śrāvayedvā dvijān vidvān śṛṇuyādvā samāhitaḥ aśvamedhāyutaṃ kṛtvā yatphalaṃ tadavāpnuyāt // ### [1.21.91](https://indike.org/pramana/in.purana.linga.1.21.91) pāpācāro 'pi yo martyaḥ śṛṇuyācchivasannidhau japedvāpi vinirmukto brahmalokaṃ sa gacchati // ### [1.21.92](https://indike.org/pramana/in.purana.linga.1.21.92) śrāddhe vā daivike kārye yajñe vāvabhṛthāntike kīrtayedvā satāṃ madhye sa yāti brahmaṇo 'ntikam // ## Commentaries (1) - [Śivatosaṇī Liṅgapurāṇaṭīkā](https://indike.org/pramana/in.purana.linga!ganesa.23.39) — Gaṇeśa Bhaṭṭa, Sanskrit ## Linked texts (2) - [Vāyupurāṇa](https://indike.org/pramana/in.purana.vayu.1.24.92) — Vyāsa, Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.25.1) — Ativīrarāma Pāṇṭiyar 1500, Sanskrit --- Source: [https://indike.org/pramana/in.purana.linga.1.21](https://indike.org/pramana/in.purana.linga.1.21) · Pramāṇa