[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 1.22 # Lingapurana 1.22 Liṅgapurāṇa 1.22 - **Language:** Sanskrit ### [1.22.1](https://indike.org/pramana/in.purana.linga.1.22.1) sūta uvāca atyantāvanatau dṛṣṭvā madhupiṅgāyatekṣaṇaḥ prahṛṣṭavadano 'tyartham abhavatsatyakīrtanāt // ### [1.22.2](https://indike.org/pramana/in.purana.linga.1.22.2) umāpatirvirūpākṣo dakṣayajñavināśanaḥ pinākī khaṇḍaparaśuḥ suprītastu trilocanaḥ // ### [1.22.3](https://indike.org/pramana/in.purana.linga.1.22.3) tataḥ sa bhagavāndevaḥ śrutvā vāgamṛtaṃ tayoḥ jānannapi mahādevaḥ krīḍāpūrvamathābravīt // ### [1.22.4](https://indike.org/pramana/in.purana.linga.1.22.4) kau bhavantau mahātmānau parasparahitaiṣiṇau sametāvaṃbujābhakṣāv asmin ghore mahāplave // ### [1.22.5](https://indike.org/pramana/in.purana.linga.1.22.5) tāvūcaturmahātmānau saṃnirīkṣya parasparam bhagavān kiṃ tu yatte 'dya na vijñānaṃ tvayā vibho // ### [1.22.6](https://indike.org/pramana/in.purana.linga.1.22.6) vibho rudra mahāmāya icchayā vāṃ kṛtau tvayā tayostadvacanaṃ śrutvā abhinandyābhimānya ca // ### [1.22.7](https://indike.org/pramana/in.purana.linga.1.22.7) uvāca bhagavāndevo madhuraṃ ślakṣṇayā girā bho bho hiraṇyagarbha tvāṃ tvāṃ ca kṛṣṇa bravīmyaham // ### [1.22.8](https://indike.org/pramana/in.purana.linga.1.22.8) prīto 'hamanayā bhaktyā śāśvatākṣarayuktayā bhavantau hṛdayasyāsya mama hṛdyatarāvubhau // ### [1.22.9](https://indike.org/pramana/in.purana.linga.1.22.9) yuvābhyāṃ kiṃ dadāmyadya varāṇāṃ varamīpsitam athovāca mahābhāgo viṣṇurbhavamidaṃ vacaḥ // ### [1.22.10](https://indike.org/pramana/in.purana.linga.1.22.10) sarvaṃ mama kṛtaṃ deva parituṣṭo 'si me yadi tvayi me supratiṣṭhā tu bhaktirbhavatu śaṅkaraḥ // ### [1.22.11](https://indike.org/pramana/in.purana.linga.1.22.11) evamuktastu vijñāya saṃbhāvayata keśavam pradadau ca mahādevo bhaktiṃ nijapadāṃbuje // ### [1.22.12](https://indike.org/pramana/in.purana.linga.1.22.12) bhavānsarvasya lokasya kartā tvamadhidaivatam tadevaṃ svasti te vatsa gamiṣyāmyaṃbujekṣaṇa // ### [1.22.13](https://indike.org/pramana/in.purana.linga.1.22.13) evamuktvā tu bhagavān brahmāṇaṃ cāpi śaṅkaraḥ anugṛhyāspṛśaddevo brahmāṇaṃ parameśvaraḥ // ### [1.22.14](https://indike.org/pramana/in.purana.linga.1.22.14) karābhyāṃ suśubhābhyāṃ ca prāha hṛṣṭataraḥ svayam matsamastvaṃ na saṃdeho vatsa bhaktaś ca me bhavān // ### [1.22.15](https://indike.org/pramana/in.purana.linga.1.22.15) svastyastu te gamiṣyāmi saṃjñā bhavatu suvrata evamuktvā tu bhagavāṃs tato 'ntardhānamīśvaraḥ // ### [1.22.16](https://indike.org/pramana/in.purana.linga.1.22.16) gatavān gaṇapo devaḥ sarvadevanamaskṛtaḥ avāpya saṃjñāṃ govindāt padmayoniḥ pitāmahaḥ // ### [1.22.17](https://indike.org/pramana/in.purana.linga.1.22.17) prajāḥ sraṣṭumanāścakre tapa ugraṃ pitāmahaḥ tasyaivaṃ tapyamānasya na kiṃcit samavartata // ### [1.22.18](https://indike.org/pramana/in.purana.linga.1.22.18) tato dīrgheṇa kālena duḥkhātkrodho hyajāyata krodhāviṣṭasya netrābhyāṃ prāpatannaśrubindavaḥ // ### [1.22.19](https://indike.org/pramana/in.purana.linga.1.22.19) tatastebhyo 'śrubindubhyo vātapittakaphātmakāḥ mahābhāgā mahāsattvāḥ svastikairapyalaṃkṛtāḥ // ### [1.22.20](https://indike.org/pramana/in.purana.linga.1.22.20) prakīrṇakeśāḥ sarpāste prādurbhūtā mahāviṣāḥ sarpāṃstānagrajāndṛṣṭvā brahmātmānam anindayat // ### [1.22.21](https://indike.org/pramana/in.purana.linga.1.22.21) aho dhik tapaso mahyaṃ phalamīdṛśakaṃ yadi lokavaināśikī jajñe ādāveva prajā mama // ### [1.22.22](https://indike.org/pramana/in.purana.linga.1.22.22) tasya tīvrābhavanmūrcchā krodhāmarṣasamudbhavā mūrcchābhiparitāpena jahau prāṇānprajāpatiḥ // ### [1.22.23](https://indike.org/pramana/in.purana.linga.1.22.23) tasyāpratimavīryasya dehātkāruṇyapūrvakam athaikādaśa te rudrā rudanto 'bhyakramaṃs tathā // ### [1.22.24](https://indike.org/pramana/in.purana.linga.1.22.24) rodanātkhalu rudratvaṃ teṣu vai samajāyata ye rudrāste khalu prāṇā ye prāṇāste tadātmakāḥ // ### [1.22.25](https://indike.org/pramana/in.purana.linga.1.22.25) prāṇāḥ prāṇavatāṃ jñeyāḥ sarvabhūteṣvavasthitāḥ atyugrasya mahattvasya sādhurācaritasya ca // ### [1.22.26](https://indike.org/pramana/in.purana.linga.1.22.26) prāṇāṃstasya dadau bhūyas triśūlī nīlalohitaḥ labdhvāsūn bhagavānbrahma devadevamumāpatim // ### [1.22.27](https://indike.org/pramana/in.purana.linga.1.22.27) praṇamya saṃsthito 'paśyad gāyatryā viśvamīśvaram sarvalokamayaṃ devaṃ dṛṣṭvā stutvā pitāmahaḥ // ### [1.22.28](https://indike.org/pramana/in.purana.linga.1.22.28) tato vismayamāpannaḥ praṇipatya muhurmuhuḥ uvāca vacanaṃ śarvaṃ sadyāditvaṃ kathaṃ vibho // ## Linked texts (3) - [Vāyupurāṇa](https://indike.org/pramana/in.purana.vayu.1.25.2) — Vyāsa, Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.26.1) — Ativīrarāma Pāṇṭiyar 1500, Sanskrit - [Śivatattvaviveka (Appayya Dīkṣita)](https://indike.org/pramana/in.sampradaya.saiva.sivatattvaviveka-appayya-diksita.18.5) — Appayya Dīkṣita 1560, Sanskrit --- Source: [https://indike.org/pramana/in.purana.linga.1.22](https://indike.org/pramana/in.purana.linga.1.22) · Pramāṇa