[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 1.23 # Lingapurana 1.23 Liṅgapurāṇa 1.23 - **Language:** Sanskrit ### [1.23.1](https://indike.org/pramana/in.purana.linga.1.23.1) sūta uvāca tasya tadvacanaṃ śrutvā brahmaṇo bhagavān bhavaḥ brahmarūpī prabodhārthaṃ brahmāṇaṃ prāha sasmitam // ### [1.23.2](https://indike.org/pramana/in.purana.linga.1.23.2) śvetakalpo yadā hyāsīd ahameva tadābhavam śvetoṣṇīṣaḥ śvetamālyaḥ śvetāṃbaradharaḥ sitaḥ // ### [1.23.3](https://indike.org/pramana/in.purana.linga.1.23.3) śvetāsthiḥ śvetaromā ca śvetāsṛk śvetalohitaḥ tena nāmnā ca vikhyātaḥ śvetakalpastadā hyasau // ### [1.23.4](https://indike.org/pramana/in.purana.linga.1.23.4) matprasūtā ca deveśī śvetāṅgā śvetalohitā śvetavarṇā tadā hyāsīd gāyatrī brahmasaṃjñitā // ### [1.23.5](https://indike.org/pramana/in.purana.linga.1.23.5) tasmādahaṃ ca deveśa tvayā guhyena vai punaḥ vijñātaḥ svena tapasā sadyojātatvamāgataḥ // ### [1.23.6](https://indike.org/pramana/in.purana.linga.1.23.6) sadyojāteti brahmaitad guhyaṃ caitatprakīrtitam tasmādguhyatvamāpannaṃ ye vetsyanti dvijātayaḥ // ### [1.23.7](https://indike.org/pramana/in.purana.linga.1.23.7) matsamīpaṃ gamiṣyanti punarāvṛttidurlabham yadā caiva punastvāsīl lohito nāma nāmataḥ // ### [1.23.8](https://indike.org/pramana/in.purana.linga.1.23.8) matkṛtena ca varṇena kalpo vai lohitaḥ smṛtaḥ tadā lohitamāṃsāsthilohitakṣīrasaṃbhavā // ### [1.23.9](https://indike.org/pramana/in.purana.linga.1.23.9) lohitākṣī stanavatī gāyatrī gauḥ prakīrtitā tato 'syā lohitatvena varṇasya ca viparyayāt // ### [1.23.10](https://indike.org/pramana/in.purana.linga.1.23.10) vāmatvāccaiva devasya vāmadevatvamāgataḥ tatrāpi ca mahāsattva tvayāhaṃ niyatātmanā // ### [1.23.11](https://indike.org/pramana/in.purana.linga.1.23.11) vijñātaḥ svena yogena tasminvarṇāntare sthitaḥ tataś ca vāmadeveti khyātiṃ yāto 'smi bhūtale // ### [1.23.12](https://indike.org/pramana/in.purana.linga.1.23.12) ye cāpi vāmadeva tvāṃ jñāsyantīha dvijātayaḥ rudralokaṃ gamiṣyanti punarāvṛttidurlabham // ### [1.23.13](https://indike.org/pramana/in.purana.linga.1.23.13) yadāhaṃ punareveha pītavarṇo yugakramāt matkṛtena ca nāmnā vai pītakalpo 'bhavattadā // ### [1.23.14](https://indike.org/pramana/in.purana.linga.1.23.14) matprasūtā ca deveśī pītāṅgī pītalohitā pītavarṇā tadā hyāsīd gāyatrī brahmasaṃjñitā // ### [1.23.15](https://indike.org/pramana/in.purana.linga.1.23.15) tatrāpi ca mahāsattva yogayuktena cetasā yasmādahaṃ tairvijñāto yogatatparamānasaiḥ // ### [1.23.16](https://indike.org/pramana/in.purana.linga.1.23.16) tatra tatpuruṣatvena vijñāto 'haṃ tvayā punaḥ tasmāttatpuruṣatvaṃ vai mamaitatkanakāṇḍaja // ### [1.23.17](https://indike.org/pramana/in.purana.linga.1.23.17) ye māṃ rudraṃ ca rudrāṇīṃ gāyatrīṃ vedamātaram vetsyanti tapasā yuktā vimalā brahmasaṃgatāḥ // ### [1.23.18](https://indike.org/pramana/in.purana.linga.1.23.18) rudralokaṃ gamiṣyanti punarāvṛttidurlabham yadāhaṃ punarevāsaṃ kṛṣṇavarṇo bhayānakaḥ // ### [1.23.19](https://indike.org/pramana/in.purana.linga.1.23.19) matkṛtena ca varṇena saṃkalpaḥ kṛṣṇa ucyate tatrāhaṃ kālasaṃkāśaḥ kālo lokaprakālakaḥ // ### [1.23.20](https://indike.org/pramana/in.purana.linga.1.23.20) vijñāto 'haṃ tvayā brahman ghoro ghoraparākramaḥ matprasūtā ca gāyatrī kṛṣṇāṅgī kṛṣṇalohitā // ### [1.23.21](https://indike.org/pramana/in.purana.linga.1.23.21) kṛṣṇarūpā ca deveśa tadāsīdbrahmasaṃjñitā tasmād ghoratvamāpannaṃ ye māṃ vetsyanti bhūtale // ### [1.23.22](https://indike.org/pramana/in.purana.linga.1.23.22) teṣāmaghoraḥ śāntaś ca bhaviṣyāmyahamavyayaḥ punaś ca viśvarūpatvaṃ yadā brahmanmamābhavat // ### [1.23.23](https://indike.org/pramana/in.purana.linga.1.23.23) tadāpyahaṃ tvayā jñātaḥ parameṇa samādhinā viśvarūpā ca saṃvṛttā gāyatrī lokadhāriṇī // ### [1.23.24](https://indike.org/pramana/in.purana.linga.1.23.24) tasmin viśvatvam āpannaṃ ye māṃ vetsyanti bhūtale teṣāṃ śivaś ca saumyaś ca bhaviṣyāmi sadaiva hi // ### [1.23.25](https://indike.org/pramana/in.purana.linga.1.23.25) yasmācca viśvarūpo vai kalpo 'yaṃ samudāhṛtaḥ viśvarūpā tathā ceyaṃ sāvitrī samudāhṛtā // ### [1.23.26](https://indike.org/pramana/in.purana.linga.1.23.26) sarvarūpā tathā ceme saṃvṛttā mama putrakāḥ catvāraste mayā khyātāḥ putra vai lokasaṃmatāḥ // ### [1.23.27](https://indike.org/pramana/in.purana.linga.1.23.27) yasmācca sarvavarṇatvaṃ prajānāṃ ca bhaviṣyati sarvabhakṣā ca medhyā ca varṇataś ca bhaviṣyati // ### [1.23.28](https://indike.org/pramana/in.purana.linga.1.23.28) mokṣo dharmastathārthaś ca kāmaśceti catuṣṭayam yasmādvedāś ca vedyaṃ ca caturdhā vai bhaviṣyati // ### [1.23.29](https://indike.org/pramana/in.purana.linga.1.23.29) bhūtagrāmāś ca catvāra āśramāś ca tathaiva ca dharmasya pādāścatvāraś catvāro mama putrakāḥ // ### [1.23.30](https://indike.org/pramana/in.purana.linga.1.23.30) tasmāccaturyugāvasthaṃ jagadvai sacarācaram caturdhāvasthitaścaiva catuṣpādo bhaviṣyati // ### [1.23.31](https://indike.org/pramana/in.purana.linga.1.23.31) bhūrloko 'tha bhuvarlokaḥ svarlokaś ca mahas tathā janastapaś ca satyaṃ ca viṣṇulokastataḥ param // ### [1.23.32](https://indike.org/pramana/in.purana.linga.1.23.32) aṣṭākṣarasthito lokaḥ sthāne sthāne tadakṣaram bhūrbhuvaḥ svarmahaścaiva pādāścatvāra eva ca // ### [1.23.33](https://indike.org/pramana/in.purana.linga.1.23.33) bhūrlokaḥ prathamaḥ pādo bhuvarlokastataḥ param svarloko vai tṛtīyaś ca caturthastu mahas tathā // ### [1.23.34](https://indike.org/pramana/in.purana.linga.1.23.34) pañcamastu janastatra ṣaṣṭhaś ca tapa ucyate satyaṃ tu saptamo loko hy apunarbhavagāminām // ### [1.23.35](https://indike.org/pramana/in.purana.linga.1.23.35) viṣṇulokaḥ smṛtaṃ sthānaṃ punarāvṛttidurlabham skāndamaumaṃ tathā sthānaṃ sarvasiddhisamanvitam // ### [1.23.36](https://indike.org/pramana/in.purana.linga.1.23.36) rudralokaḥ smṛtastasmāt padaṃ tadyogināṃ śubham nirmamā nirahaṅkārāḥ kāmakrodhavivarjitāḥ // ### [1.23.37](https://indike.org/pramana/in.purana.linga.1.23.37) drakṣyanti taddvijā yuktā dhyānatatparamānasāḥ yasmāccatuṣpadā hyeṣā tvayā dṛṣṭā sarasvatī // ### [1.23.38](https://indike.org/pramana/in.purana.linga.1.23.38) pādāntaṃ viṣṇulokaṃ vai kaumāraṃ śāntamuttamam aumaṃ māheśvaraṃ caiva tasmāddṛṣṭā catuṣpadā // ### [1.23.39](https://indike.org/pramana/in.purana.linga.1.23.39) tasmāttu paśavaḥ sarve bhaviṣyanti catuṣpadāḥ tataścaiṣāṃ bhaviṣyanti catvāraste payodharāḥ // ### [1.23.40](https://indike.org/pramana/in.purana.linga.1.23.40) somaś ca mantrasaṃyukto yasmānmama mukhāccyutaḥ jīvaḥ prāṇabhṛtāṃ brahman punaḥ pītastanāḥ smṛtāḥ // ### [1.23.41](https://indike.org/pramana/in.purana.linga.1.23.41) tasmātsomamayaṃ caiva amṛtaṃ jīvasaṃjñitam catuṣpādā bhaviṣyanti śvetatvaṃ cāsya tena tat // ### [1.23.42](https://indike.org/pramana/in.purana.linga.1.23.42) yasmāccaiva kriyā bhūtvā dvipadā ca maheśvarī dṛṣṭā punastathaivaiṣā sāvitrī lokabhāvinī // ### [1.23.43](https://indike.org/pramana/in.purana.linga.1.23.43) tasmācca dvipadāḥ sarve dvistanāś ca narāḥ śubhāḥ tasmācceyamajā bhūtvā sarvavarṇā maheśvarī // ### [1.23.44](https://indike.org/pramana/in.purana.linga.1.23.44) yā vai dṛṣṭā mahāsattvā sarvabhūtadharā tvayā tasmācca viśvarūpatvaṃ prajānāṃ vai bhaviṣyati // ### [1.23.45](https://indike.org/pramana/in.purana.linga.1.23.45) ajaścaiva mahātejā viśvarūpo bhaviṣyati amogharetāḥ sarvatra mukhe cāsya hutāśanaḥ // ### [1.23.46](https://indike.org/pramana/in.purana.linga.1.23.46) tasmātsarvagato medhyaḥ paśurūpī hutāśanaḥ tapasā bhāvitātmāno ye māṃ drakṣyanti vai dvijāḥ // ### [1.23.47](https://indike.org/pramana/in.purana.linga.1.23.47) īśitve ca vaśitve ca sarvagaṃ sarvataḥ sthitam rajastamobhyāṃ nirmuktās tyaktvā mānuṣyakaṃ vapuḥ // ### [1.23.48](https://indike.org/pramana/in.purana.linga.1.23.48) matsamīpamupeṣyanti punarāvṛttidurlabham ityevamukto bhagavān brahmā rudreṇa vai dvijāḥ // ### [1.23.49](https://indike.org/pramana/in.purana.linga.1.23.49) praṇamya prayato bhūtvā punarāha pitāmahaḥ ya evaṃ bhagavān vidvān gāyatryā vai maheśvaram // ### [1.23.50](https://indike.org/pramana/in.purana.linga.1.23.50) viśvātmānaṃ hi sarvaṃ tvāṃ gāyatryāstava ceśvara tasya dehi paraṃ sthānaṃ tathāstviti ca so 'bravīt // ### [1.23.51](https://indike.org/pramana/in.purana.linga.1.23.51) tasmādvidvān hi viśvatvam asyāścāsya mahātmanaḥ sa yāti brahmasāyujyaṃ vacanād brahmaṇaḥ prabhoḥ // ## Commentaries (1) - [Śivatosaṇī Liṅgapurāṇaṭīkā](https://indike.org/pramana/in.purana.linga!ganesa.26.40) — Gaṇeśa Bhaṭṭa, Sanskrit ## Linked texts (1) - [Liṅgapurāṇa](https://indike.org/pramana/in.vernacular.tamil.kappiyam.lingapurana.27.4) — Ativīrarāma Pāṇṭiyar 1500, Sanskrit --- Source: [https://indike.org/pramana/in.purana.linga.1.23](https://indike.org/pramana/in.purana.linga.1.23) · Pramāṇa