[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 1.24 # Lingapurana 1.24 Liṅgapurāṇa 1.24 - **Language:** Sanskrit ### [1.24.1](https://indike.org/pramana/in.purana.linga.1.24.1) sūta uvāca śrutvaivamakhilaṃ brahmā rudreṇa paribhāṣitam punaḥ praṇamya deveśaṃ rudramāha prajāpatiḥ // ### [1.24.2](https://indike.org/pramana/in.purana.linga.1.24.2) bhagavandevadeveśa viśvarūpaṃ maheśvara umādhava mahādeva namo lokābhivandita // ### [1.24.3](https://indike.org/pramana/in.purana.linga.1.24.3) viśvarūpa mahābhāga kasminkāle maheśvara yā imāste mahādeva tanavo lokavanditāḥ // ### [1.24.4](https://indike.org/pramana/in.purana.linga.1.24.4) kasyāṃ vā yugasaṃbhūtyāṃ drakṣyantīha dvijātayaḥ kena vā tapasā deva dhyānayogena kena vā // ### [1.24.5](https://indike.org/pramana/in.purana.linga.1.24.5) namaste vai mahādeva śakyo draṣṭuṃ dvijātibhiḥ tasya tadvacanaṃ śrutvā śarvaḥ samprekṣya taṃ puraḥ // ### [1.24.6](https://indike.org/pramana/in.purana.linga.1.24.6) smayanprāha mahādeva ṛgyajuḥsāmasaṃbhavaḥ tapasā naiva vṛttena dānadharmaphalena ca // ### [1.24.7](https://indike.org/pramana/in.purana.linga.1.24.7) na tīrthaphalayogena kratubhir vāptadakṣiṇaiḥ na vedādhyayanairvāpi na vittena na vedanaiḥ // ### [1.24.8](https://indike.org/pramana/in.purana.linga.1.24.8) na śakyaṃ mānavairdraṣṭum ṛte dhyānādahaṃ tviha saptame caiva vārāhe tatastasminpitāmaha // ### [1.24.9](https://indike.org/pramana/in.purana.linga.1.24.9) kalpeśvaro 'tha bhagavān sarvalokaprakāśanaḥ manurvaivasvataścaiva tava pautro bhaviṣyati // ### [1.24.10](https://indike.org/pramana/in.purana.linga.1.24.10) tadā caturyugāvasthe tasminkalpe yugāntike anugrahārthaṃ lokānāṃ brāhmaṇānāṃ hitāya ca // ### [1.24.11](https://indike.org/pramana/in.purana.linga.1.24.11) utpatsyāmi tadā brahman punar asmin yugāntike yugapravṛttyā ca tadā tasmiṃś ca prathame yuge // ### [1.24.12](https://indike.org/pramana/in.purana.linga.1.24.12) dvāpare prathame brahman yadā vyāsaḥ svayaṃ prabhuḥ tadāhaṃ brāhmaṇārthāya kalau tasmin yugāntike // ### [1.24.13](https://indike.org/pramana/in.purana.linga.1.24.13) bhaviṣyāmi śikhāyuktaḥ śveto nāma mahāmuniḥ himavacchikhare ramye chāgale parvatottame // ### [1.24.14](https://indike.org/pramana/in.purana.linga.1.24.14) tatra śiṣyāḥ śikhāyuktā bhaviṣyanti tadā mama śvetaḥ śvetaśikhaścaiva śvetāsyaḥ śvetalohitaḥ // ### [1.24.15](https://indike.org/pramana/in.purana.linga.1.24.15) catvārastu mahātmāno brāhmaṇā vedapāragāḥ tataste brahmabhūyiṣṭhā dṛṣṭvā brahmagatiṃ parām // ### [1.24.16](https://indike.org/pramana/in.purana.linga.1.24.16) matsamīpaṃ gamiṣyanti dhyānayogaparāyaṇāḥ tataḥ punaryadā brahman dvitīye dvāpare prabhuḥ // ### [1.24.17](https://indike.org/pramana/in.purana.linga.1.24.17) prajāpatiryadā vyāsaḥ sadyo nāma bhaviṣyati tadā lokahitārthāya sutāro nāma nāmataḥ // ### [1.24.18](https://indike.org/pramana/in.purana.linga.1.24.18) bhaviṣyāmi kalau tasmin śiṣyānugrahakāmyayā tatrāpi mama te śiṣyā nāmataḥ parikīrtitāḥ // ### [1.24.19](https://indike.org/pramana/in.purana.linga.1.24.19) dundubhiḥ śatarūpaś ca ṛcīkaḥ ketumāṃstadā prāpya yogaṃ tathā dhyānaṃ sthāpya brahma ca bhūtale // ### [1.24.20](https://indike.org/pramana/in.purana.linga.1.24.20) rudralokaṃ gamiṣyanti sahacāritvameva ca tṛtīye dvāpare caiva yadā vyāsastu bhārgavaḥ // ### [1.24.21](https://indike.org/pramana/in.purana.linga.1.24.21) tadāpyahaṃ bhaviṣyāmi damanastu yugāntike tatrāpi ca bhaviṣyanti catvāro mama putrakāḥ // ### [1.24.22](https://indike.org/pramana/in.purana.linga.1.24.22) vikośaś ca vikeśaś ca vipāśaḥ śāpanāśanaḥ te 'pi tenaiva mārgeṇa yogoktena mahaujasaḥ // ### [1.24.23](https://indike.org/pramana/in.purana.linga.1.24.23) rudralokaṃ gamiṣyanti punarāvṛttidurlabham caturthe dvāpare caiva yadā vyāso 'ṅgirāḥ smṛtaḥ // ### [1.24.24](https://indike.org/pramana/in.purana.linga.1.24.24) tadāpyahaṃ bhaviṣyāmi suhotro nāma nāmataḥ tatrāpi mama te putrāś catvāro 'pi tapodhanāḥ // ### [1.24.25](https://indike.org/pramana/in.purana.linga.1.24.25) dvijaśreṣṭhā bhaviṣyanti yogātmāno dṛḍhavratāḥ sumukho durmukhaścaiva durdaro duratikramaḥ // ### [1.24.26](https://indike.org/pramana/in.purana.linga.1.24.26) prāpya yogagatiṃ sūkṣmāṃ vimalā dagdhakilbiṣāḥ te 'pi tenaiva mārgeṇa yogayuktā mahaujasaḥ // ### [1.24.27](https://indike.org/pramana/in.purana.linga.1.24.27) rudralokaṃ gamiṣyanti punarāvṛttidurlabham pañcame dvāpare caiva vyāsastu savitā yadā // ### [1.24.28](https://indike.org/pramana/in.purana.linga.1.24.28) tadā cāpi bhaviṣyāmi kaṅko nāma mahātapāḥ anugrahārthaṃ lokānāṃ yogātmaikakalāgatiḥ // ### [1.24.29](https://indike.org/pramana/in.purana.linga.1.24.29) catvārastu mahābhāgā vimalāḥ śuddhayonayaḥ śiṣyā mama bhaviṣyanti yogātmāno dṛḍhavratāḥ // ### [1.24.30](https://indike.org/pramana/in.purana.linga.1.24.30) sanakaḥ sanandanaś caiva prabhuryaś ca sanātanaḥ vibhuḥ sanatkumāraś ca nirmamā nirahaṃkṛtāḥ // ### [1.24.31](https://indike.org/pramana/in.purana.linga.1.24.31) matsamīpamupeṣyanti punarāvṛttidurlabham parīvarte punaḥ ṣaṣṭhe mṛtyurvyāso yadā vibhuḥ // ### [1.24.32](https://indike.org/pramana/in.purana.linga.1.24.32) tadāpyahaṃ bhaviṣyāmi logākṣīr nāma nāmataḥ tatrāpi mama te śiṣyā yogātmāno dṛḍhavratāḥ // ### [1.24.33](https://indike.org/pramana/in.purana.linga.1.24.33) bhaviṣyanti mahābhāgāś catvāro lokasaṃmatāḥ sudhāmā virajāścaiva śaṅkhapādraja eva ca // ### [1.24.34](https://indike.org/pramana/in.purana.linga.1.24.34) yogātmāno mahātmānaḥ sarve vai dagdhakilbiṣāḥ te 'pi tenaiva mārgeṇa dhyānayogasamanvitāḥ // ### [1.24.35](https://indike.org/pramana/in.purana.linga.1.24.35) matsamīpaṃ gamiṣyanti punarāvṛttidurlabham saptame parivarte tu yadā vyāsaḥ śatakratuḥ // ### [1.24.36](https://indike.org/pramana/in.purana.linga.1.24.36) vibhunāmā mahātejāḥ prathitaḥ pūrvajanmani tadāpyahaṃ bhaviṣyāmi kalau tasmin yugāntike // ### [1.24.37](https://indike.org/pramana/in.purana.linga.1.24.37) jaigīṣavyo vibhuḥ khyātaḥ sarveṣāṃ yogināṃ varaḥ tatrāpi mama te putrā bhaviṣyanti yuge tathā // ### [1.24.38](https://indike.org/pramana/in.purana.linga.1.24.38) sārasvataś ca meghaś ca meghavāhaḥ suvāhanaḥ te 'pi tenaiva mārgeṇa dhyānayogaparāyaṇāḥ // ### [1.24.39](https://indike.org/pramana/in.purana.linga.1.24.39) gamiṣyanti mahātmāno rudralokaṃ nirāmayam vasiṣṭhaścāṣṭame vyāsaḥ parīvarte bhaviṣyati // ### [1.24.40](https://indike.org/pramana/in.purana.linga.1.24.40) yadā tadā bhaviṣyāmi nāmnāhaṃ dadhivāhanaḥ tatrāpi mama te putrā yogātmāno dṛḍhavratāḥ // ### [1.24.41](https://indike.org/pramana/in.purana.linga.1.24.41) bhaviṣyanti mahāyogā yeṣāṃ nāsti samo bhuvi kapilaścāsuriścaiva tathā pañcaśikho muniḥ // ### [1.24.42](https://indike.org/pramana/in.purana.linga.1.24.42) bāṣkalaś ca mahāyogī dharmātmāno mahaujasaḥ prāpya māheśvaraṃ yogaṃ jñānino dagdhakilbiṣāḥ // ### [1.24.43](https://indike.org/pramana/in.purana.linga.1.24.43) matsamīpaṃ gamiṣyanti punarāvṛttidurlabham parivarte tu navame vyāsaḥ sārasvato yadā // ### [1.24.44](https://indike.org/pramana/in.purana.linga.1.24.44) tadāpyahaṃ bhaviṣyāmi ṛṣabho nāma nāmataḥ tatrāpi mama te putrā bhaviṣyanti mahaujasaḥ // ### [1.24.45](https://indike.org/pramana/in.purana.linga.1.24.45) parāśaraś ca gargaś ca bhārgavāṅgirasau tadā bhaviṣyanti mahātmāno brāhmaṇā vedapāragāḥ // ### [1.24.46](https://indike.org/pramana/in.purana.linga.1.24.46) dhyānamārgaṃ samāsādya gamiṣyanti tathaiva te sarve tapobalotkṛṣṭāḥ śāpānugrahakovidāḥ // ### [1.24.47](https://indike.org/pramana/in.purana.linga.1.24.47) te 'pi tenaiva mārgeṇa yogoktena tapasvinaḥ rudralokaṃ gamiṣyanti punarāvṛttidurlabham // ### [1.24.48](https://indike.org/pramana/in.purana.linga.1.24.48) daśame dvāpare vyāsaḥ tripādvai nāma nāmataḥ yadā bhaviṣyate vipras tadāhaṃ bhavitā muniḥ // ### [1.24.49](https://indike.org/pramana/in.purana.linga.1.24.49) himavacchikhare ramye bhṛgutuṅge nagottame nāmnā bhṛgostu śikharaṃ prathitaṃ devapūjitam // ### [1.24.50](https://indike.org/pramana/in.purana.linga.1.24.50) tatrāpi mama te putrā bhaviṣyanti dṛḍhavratāḥ balabandhurnirāmitraḥ ketuśṛṅgastapodhanaḥ // ### [1.24.51](https://indike.org/pramana/in.purana.linga.1.24.51) yogātmāno mahātmānas tapoyogasamanvitāḥ rudralokaṃ gamiṣyanti tapasā dagdhakilbiṣāḥ // ### [1.24.52](https://indike.org/pramana/in.purana.linga.1.24.52) ekādaśe dvāpare tu vyāsastu trivrato yadā tadāpyahaṃ bhaviṣyāmi gaṅgādvāre kalau tathā // ### [1.24.53](https://indike.org/pramana/in.purana.linga.1.24.53) ugro nāma mahātejāḥ sarvalokeṣu viśrutaḥ tatrāpi mama te putrā bhaviṣyanti mahaujasaḥ // ### [1.24.54](https://indike.org/pramana/in.purana.linga.1.24.54) lambodaraś ca lambākṣo lambakeśaḥ pralambakaḥ prāpya māheśvaraṃ yogaṃ rudralokaṃ gatā hi te // ### [1.24.55](https://indike.org/pramana/in.purana.linga.1.24.55) dvādaśe parivarte tu śatatejā yadā muniḥ bhaviṣyati mahātejā vyāsastu kavisattamaḥ // ### [1.24.56](https://indike.org/pramana/in.purana.linga.1.24.56) tadāpyahaṃ bhaviṣyāmi kalāviha yugāntike haitukaṃ vanamāsādya atrirnāmnā pariśrutaḥ // ### [1.24.57](https://indike.org/pramana/in.purana.linga.1.24.57) tatrāpi mama te putrā bhasmasnānānulepanāḥ bhaviṣyanti mahāyogā rudralokaparāyaṇāḥ // ### [1.24.58](https://indike.org/pramana/in.purana.linga.1.24.58) sarvajñaḥ samabuddhiś ca sādhyaḥ sarvastathaiva ca prāpya māheśvaraṃ yogaṃ rudralokaṃ gatā hi te // ### [1.24.59](https://indike.org/pramana/in.purana.linga.1.24.59) trayodaśe punaḥ prāpte parivarte krameṇa tu dharmo nārāyaṇo nāma vyāsastu bhavitā yadā // ### [1.24.60](https://indike.org/pramana/in.purana.linga.1.24.60) tadāpyahaṃ bhaviṣyāmi vālirnāma mahāmuniḥ vālakhilyāśrame puṇye parvate gandhamādane // ### [1.24.61](https://indike.org/pramana/in.purana.linga.1.24.61) tatrāpi mama te putrā bhaviṣyanti tapodhanāḥ sudhāmā kāśyapaścaiva vāsiṣṭho virajāstathā // ### [1.24.62](https://indike.org/pramana/in.purana.linga.1.24.62) mahāyogabalopetā vimalā ūrdhvaretasaḥ prāpya māheśvaraṃ yogaṃ rudralokaṃ gatā hi te // ### [1.24.63](https://indike.org/pramana/in.purana.linga.1.24.63) yadā vyāsastarakṣustu paryāye tu caturdaśe tatrāpi punarevāhaṃ bhaviṣyāmi yugāntike // ### [1.24.64](https://indike.org/pramana/in.purana.linga.1.24.64) vaṃśe tvaṅgirasāṃ śreṣṭhe gautamo nāma nāmataḥ bhaviṣyati mahāpuṇyaṃ gautamaṃ nāma tadvanam // ### [1.24.65](https://indike.org/pramana/in.purana.linga.1.24.65) tatrāpi mama te putrā bhaviṣyanti kalau tadā atrirdevasadaścaiva śravaṇo 'tha śraviṣṭhakaḥ // ### [1.24.66](https://indike.org/pramana/in.purana.linga.1.24.66) yogātmāno mahātmānaḥ sarve yogasamanvitāḥ prāpya māheśvaraṃ yogaṃ rudralokāya te gatāḥ // ### [1.24.67](https://indike.org/pramana/in.purana.linga.1.24.67) tataḥ pañcadaśe prāpte parivarte kramāgate traiyyāruṇiryadā vyāso dvāpare samapadyata // ### [1.24.68](https://indike.org/pramana/in.purana.linga.1.24.68) tadāpyahaṃ bhaviṣyāmi nāmnā vedaśirā dvijaḥ tatra vedaśiro nāma astraṃ tatpārameśvaram // ### [1.24.69](https://indike.org/pramana/in.purana.linga.1.24.69) bhaviṣyati mahāvīryaṃ vedaśīrṣaś ca parvataḥ himavatpṛṣṭhamāsādya sarasvatyāṃ nagottame // ### [1.24.70](https://indike.org/pramana/in.purana.linga.1.24.70) tatrāpi mama te putrā bhaviṣyanti tapodhanāḥ kuṇiś ca kuṇibāhuś ca kuśarīraḥ kunetrakaḥ // ### [1.24.71](https://indike.org/pramana/in.purana.linga.1.24.71) yogātmāno mahātmānaḥ sarve te hyūrdhvaretasaḥ prāpya māheśvaraṃ yogaṃ rudralokāya te gatāḥ // ### [1.24.72](https://indike.org/pramana/in.purana.linga.1.24.72) vyāso yuge ṣoḍaśe tu yadā devo bhaviṣyati tatra yogapradānāya bhaktānāṃ ca yatātmanām // ### [1.24.73](https://indike.org/pramana/in.purana.linga.1.24.73) tadāpyahaṃ bhaviṣyāmi gokarṇo nāma nāmataḥ bhaviṣyati supuṇyaṃ ca gokarṇaṃ nāma tadvanam // ### [1.24.74](https://indike.org/pramana/in.purana.linga.1.24.74) tatrāpi mama te putrā bhaviṣyanti ca yoginaḥ kāśyapo hyuśanāścaiva cyavano 'tha bṛhaspatiḥ // ### [1.24.75](https://indike.org/pramana/in.purana.linga.1.24.75) te 'pi tenaiva mārgeṇa dhyānayogasamanvitāḥ prāpya māheśvaraṃ yogaṃ gantāro rudrameva hi // ### [1.24.76](https://indike.org/pramana/in.purana.linga.1.24.76) tataḥ saptadaśe caiva parivarte kramāgate yadā bhaviṣyati vyāso nāmnā devakṛtañjayaḥ // ### [1.24.77](https://indike.org/pramana/in.purana.linga.1.24.77) tadāpyahaṃ bhaviṣyāmi guhāvāsīti nāmataḥ himavacchikhare ramye mahottuṅge mahālaye // ### [1.24.78](https://indike.org/pramana/in.purana.linga.1.24.78) siddhakṣetraṃ mahāpuṇyaṃ bhaviṣyati mahālayam tatrāpi mama te putrā yogajñā brahmavādinaḥ // ### [1.24.79](https://indike.org/pramana/in.purana.linga.1.24.79) bhaviṣyanti mahātmāno nirmamā nirahaṃkṛtāḥ utathyo vāmadevaś ca mahāyogo mahābalaḥ // ### [1.24.80](https://indike.org/pramana/in.purana.linga.1.24.80) teṣāṃ śatasahasraṃ tu śiṣyāṇāṃ dhyānayoginām bhaviṣyanti tadā kāle sarve te dhyānayuñjakāḥ // ### [1.24.81](https://indike.org/pramana/in.purana.linga.1.24.81) yogābhyāsaratāścaiva hṛdi kṛtvā maheśvaram mahālaye padaṃ nyastaṃ dṛṣṭvā yānti śivaṃ padam // ### [1.24.82](https://indike.org/pramana/in.purana.linga.1.24.82) ye cānye 'pi mahātmānaḥ kalau tasmin yugāntike dhyāne manaḥ samādhāya vimalāḥ śuddhabuddhayaḥ // ### [1.24.83](https://indike.org/pramana/in.purana.linga.1.24.83) mama prasādādyāsyanti rudralokaṃ gatajvarāḥ gatvā mahālayaṃ puṇyaṃ dṛṣṭvā māheśvaraṃ padam // ### [1.24.84](https://indike.org/pramana/in.purana.linga.1.24.84) tīrṇastārayate jantur daśa pūrvāndaśottarān ātmānamekaviṃśaṃ tu tārayitvā mahālaye // ### [1.24.85](https://indike.org/pramana/in.purana.linga.1.24.85) mama prasādādyāsyanti rudralokaṃ gatajvarāḥ tato 'ṣṭādaśame caiva parivarte yadā vibho // ### [1.24.86](https://indike.org/pramana/in.purana.linga.1.24.86) tadā ṛtañjayo nāma vyāsastu bhavitā muniḥ tadāpyahaṃ bhaviṣyāmi śikhaṇḍī nāma nāmataḥ // ### [1.24.87](https://indike.org/pramana/in.purana.linga.1.24.87) siddhakṣetre mahāpuṇye devadānavapūjite himavacchikhare ramye śikhaṇḍī nāma parvataḥ // ### [1.24.88](https://indike.org/pramana/in.purana.linga.1.24.88) śikhaṇḍino vanaṃ cāpi yatra siddhaniṣevitam tatrāpi mama te putrā bhaviṣyanti tapodhanāḥ // ### [1.24.89](https://indike.org/pramana/in.purana.linga.1.24.89) vācaśravā ṛcīkaś ca śyāvāśvaś ca yatīśvaraḥ yogātmāno mahātmānaḥ sarve te vedapāragāḥ // ### [1.24.90](https://indike.org/pramana/in.purana.linga.1.24.90) prāpya māheśvaraṃ yogaṃ rudralokāya saṃvṛtāḥ atha ekonaviṃśe tu parivarte kramāgate // ### [1.24.91](https://indike.org/pramana/in.purana.linga.1.24.91) vyāsastu bhavitā nāmnā bharadvājo mahāmuniḥ tadāpyahaṃ bhaviṣyāmi jaṭāmālī ca nāmataḥ // ### [1.24.92](https://indike.org/pramana/in.purana.linga.1.24.92) himavacchikhare ramye jaṭāyuryatra parvataḥ tatrāpi mama te putrā bhaviṣyanti mahaujasaḥ // ### [1.24.93](https://indike.org/pramana/in.purana.linga.1.24.93) hiraṇyanābhaḥ kauśalyo lokākṣī kuthumis tathā īśvarā yogadharmāṇaḥ sarve te hyūrdhvaretasaḥ // ### [1.24.94](https://indike.org/pramana/in.purana.linga.1.24.94) prāpya māheśvaraṃ yogaṃ rudralokāya saṃsthitāḥ tato viṃśatimaścaiva parivarto yadā tadā // ### [1.24.95](https://indike.org/pramana/in.purana.linga.1.24.95) gautamastu tadā vyāso bhaviṣyati mahāmuniḥ tadāpyahaṃ bhaviṣyāmi aṭṭahāsastu nāmataḥ // ### [1.24.96](https://indike.org/pramana/in.purana.linga.1.24.96) aṭṭahāsapriyāścaiva bhaviṣyanti tadā narāḥ tatraiva himavatpṛṣṭhe aṭṭahāso mahāgiriḥ // ### [1.24.97](https://indike.org/pramana/in.purana.linga.1.24.97) devadānavayakṣendrasiddhacāraṇasevitaḥ tatrāpi mama te putrā bhaviṣyanti mahaujasaḥ // ### [1.24.98](https://indike.org/pramana/in.purana.linga.1.24.98) yogātmāno mahātmāno dhyāyino niyatavratāḥ sumanturbarbarī vidvān kabandhaḥ kuśikaṃdharaḥ // ### [1.24.99](https://indike.org/pramana/in.purana.linga.1.24.99) prāpya māheśvaraṃ yogaṃ rudralokāya te gatāḥ ekaviṃśe punaḥ prāpte parivarte kramāgate // ### [1.24.100](https://indike.org/pramana/in.purana.linga.1.24.100) vācaśravāḥ smṛto vyāso yadā sa ṛṣisattamaḥ tadāpyahaṃ bhaviṣyāmi dāruko nāma nāmataḥ // ### [1.24.101](https://indike.org/pramana/in.purana.linga.1.24.101) tasmādbhaviṣyate puṇyaṃ devadāruvanaṃ śubham tatrāpi mama te putrā bhaviṣyanti mahaujasaḥ // ### [1.24.102](https://indike.org/pramana/in.purana.linga.1.24.102) plakṣo dārbhāyaṇiścaiva ketumān gautamas tathā yogātmāno mahātmāno niyatā ūrdhvaretasaḥ // ### [1.24.103](https://indike.org/pramana/in.purana.linga.1.24.103) naiṣṭhikaṃ vratamāsthāya rudralokāya te gatāḥ dvāviṃśe parivarte tu vyāsaḥ śuṣmāyaṇo yadā // ### [1.24.104](https://indike.org/pramana/in.purana.linga.1.24.104) tadāpyahaṃ bhaviṣyāmi vārāṇasyāṃ mahāmuniḥ nāmnā vai lāṅgalī bhīmo yatra devāḥ savāsavāḥ // ### [1.24.105](https://indike.org/pramana/in.purana.linga.1.24.105) drakṣyanti māṃ kalau tasmin bhavaṃ caiva halāyudham tatrāpi mama te putrā bhaviṣyanti sudhārmikāḥ // ### [1.24.106](https://indike.org/pramana/in.purana.linga.1.24.106) bhallavī madhupiṅgaś ca śvetaketuḥ kuśas tathā prāpya māheśvaraṃ yogaṃ te 'pi dhyānaparāyaṇāḥ // ### [1.24.107](https://indike.org/pramana/in.purana.linga.1.24.107) vimalā brahmabhūyiṣṭhā rudralokāya saṃsthitāḥ parivarte trayoviṃśe tṛṇabinduryadā muniḥ // ### [1.24.108](https://indike.org/pramana/in.purana.linga.1.24.108) vyāso hi bhavitā brahmaṃs tadāhaṃ bhavitā punaḥ śveto nāma mahākāyo muniputrastu dhārmikaḥ // ### [1.24.109](https://indike.org/pramana/in.purana.linga.1.24.109) tatra kālaṃ jariṣyāmi tadā girivarottame tena kālañjaro nāma bhaviṣyati sa parvataḥ // ### [1.24.110](https://indike.org/pramana/in.purana.linga.1.24.110) tatrāpi mama te śiṣyā bhaviṣyanti tapasvinaḥ uśiko bṛhadaśvaś ca devalaḥ kavireva ca // ### [1.24.111](https://indike.org/pramana/in.purana.linga.1.24.111) prāpya māheśvaraṃ yogaṃ rudralokāya te gataḥ parivarte caturviṃśe vyāsa ṛkṣo yadā vibho // ### [1.24.112](https://indike.org/pramana/in.purana.linga.1.24.112) tadāpyahaṃ bhaviṣyāmi kalau tasmin yugāntike śūlī nāma mahāyogī naimiṣe devavandite // ### [1.24.113](https://indike.org/pramana/in.purana.linga.1.24.113) tatrāpi mama te śiṣyā bhaviṣyanti tapodhanāḥ śālihotro 'gniveśaś ca yuvanāśvaḥ śaradvasuḥ // ### [1.24.114](https://indike.org/pramana/in.purana.linga.1.24.114) te 'pi tenaiva mārgeṇa rudralokāya saṃsthitāḥ pañcaviṃśe punaḥ prāpte parivarte kramāgate // ### [1.24.115](https://indike.org/pramana/in.purana.linga.1.24.115) vāsiṣṭhastu yadā vyāsaḥ śaktirnāmnā bhaviṣyati tadāpyahaṃ bhaviṣyāmi daṇḍī muṇḍīśvaraḥ prabhuḥ // ### [1.24.116](https://indike.org/pramana/in.purana.linga.1.24.116) tatrāpi mama te putrā bhaviṣyanti tapodhanāḥ chagalaḥ kuṇḍakarṇaś ca kubhāṇḍaś ca pravāhakaḥ // ### [1.24.117](https://indike.org/pramana/in.purana.linga.1.24.117) prāpya māheśvaraṃ yogam amṛtatvāya te gatāḥ ṣaḍviṃśe parivarte tu yadā vyāsaḥ parāśaraḥ // ### [1.24.118](https://indike.org/pramana/in.purana.linga.1.24.118) tadāpyahaṃ bhaviṣyāmi sahiṣṇurnāma nāmataḥ puraṃ bhadravaṭaṃ prāpya kalau tasmin yugāntike // ### [1.24.119](https://indike.org/pramana/in.purana.linga.1.24.119) tatrāpi mama te putrā bhaviṣyanti sudhārmikāḥ ulūko vidyutaścaiva śaṃbūko hyāśvalāyanaḥ // ### [1.24.120](https://indike.org/pramana/in.purana.linga.1.24.120) prāpya māheśvaraṃ yogaṃ rudralokāya te gatāḥ saptaviṃśe punaḥ prāpte parivarte kramāgate // ### [1.24.121](https://indike.org/pramana/in.purana.linga.1.24.121) jātūkarṇyo yadā vyāso bhaviṣyati tapodhanaḥ tadāpyahaṃ bhaviṣyāmi somaśarmā dvijottamaḥ // ### [1.24.122](https://indike.org/pramana/in.purana.linga.1.24.122) prabhāsatīrthamāsādya yogātmā yogaviśrutaḥ tatrāpi mama te śiṣyā bhaviṣyanti tapodhanāḥ // ### [1.24.123](https://indike.org/pramana/in.purana.linga.1.24.123) akṣapādaḥ kumāraś ca ulūko vatsa eva ca yogātmāno mahātmāno vimalāḥ śuddhabuddhayaḥ // ### [1.24.124](https://indike.org/pramana/in.purana.linga.1.24.124) prāpya māheśvaraṃ yogaṃ rudralokaṃ tato gatāḥ aṣṭāviṃśe punaḥ prāpte parivarte kramāgate // ### [1.24.125](https://indike.org/pramana/in.purana.linga.1.24.125) parāśarasutaḥ śrīmān viṣṇurlokapitāmahaḥ yadā bhaviṣyati vyāso nāmnā dvaipāyanaḥ prabhuḥ // ### [1.24.126](https://indike.org/pramana/in.purana.linga.1.24.126) tadā ṣaṣṭhena cāṃśena kṛṣṇaḥ puruṣasattamaḥ vasudevādyaduśreṣṭho vāsudevo bhaviṣyati // ### [1.24.127](https://indike.org/pramana/in.purana.linga.1.24.127) tadāpyahaṃ bhaviṣyāmi yogātmā yogamāyayā lokavismayanārthāya brahmacāriśarīrakaḥ // ### [1.24.128](https://indike.org/pramana/in.purana.linga.1.24.128) śmaśāne mṛtam utsṛṣṭaṃ dṛṣṭvā kāyam anāthakam brāhmaṇānāṃ hitārthāya praviṣṭo yogamāyayā // ### [1.24.129](https://indike.org/pramana/in.purana.linga.1.24.129) divyāṃ meruguhāṃ puṇyāṃ tvayā sārdhaṃ ca viṣṇunā bhaviṣyāmi tadā brahmaṃl lakulī nāma nāmataḥ // ### [1.24.130](https://indike.org/pramana/in.purana.linga.1.24.130) kāyāvatāra ityevaṃ siddhakṣetraṃ ca vai tadā bhaviṣyati suvikhyātaṃ yāvad bhūmir dhariṣyati // ### [1.24.131](https://indike.org/pramana/in.purana.linga.1.24.131) tatrāpi mama te putrā bhaviṣyanti tapasvinaḥ kuśikaś caiva gargaś ca mitraḥ kauruṣya eva ca // ### [1.24.132](https://indike.org/pramana/in.purana.linga.1.24.132) yogātmāno mahātmāno brāhmaṇā vedapāragāḥ prāpya māheśvaraṃ yogaṃ vimalā hyūrdhvaretasaḥ // ### [1.24.133](https://indike.org/pramana/in.purana.linga.1.24.133) rudralokaṃ gamiṣyanti punarāvṛttidurlabham ete pāśupatāḥ siddhā bhasmoddhūlitavigrahāḥ // ### [1.24.134](https://indike.org/pramana/in.purana.linga.1.24.134) liṅgārcanaratā nityaṃ bāhyābhyantarataḥ sthitāḥ bhaktyā mayi ca yogena dhyānaniṣṭhā jitendriyāḥ // ### [1.24.135](https://indike.org/pramana/in.purana.linga.1.24.135) saṃsārabandhacchedārthaṃ jñānamārgaprakāśakam svarūpajñānasiddhyarthaṃ yogaṃ pāśupataṃ mahat // ### [1.24.136](https://indike.org/pramana/in.purana.linga.1.24.136) yogamārgā anekāś ca jñānamārgās tv anekaśaḥ na nivṛttimupāyānti vinā pañcākṣarīṃ kvacit // ### [1.24.137](https://indike.org/pramana/in.purana.linga.1.24.137) yadācarettapaścāyaṃ sarvadvandvavivarjitam tadā sa mukto mantavyaḥ pakvaṃ phalamiva sthitaḥ // ### [1.24.138](https://indike.org/pramana/in.purana.linga.1.24.138) ekāhaṃ yaḥ pumānsamyak caretpāśupatavratam na sāṃkhye pañcarātre vā na prāpnoti gatiṃ kadā // ### [1.24.139](https://indike.org/pramana/in.purana.linga.1.24.139) ityetadvai mayā proktam avatāreṣu lakṣaṇam manvādikṛṣṇaparyantam aṣṭāviṃśad yugakramāt // ### [1.24.140](https://indike.org/pramana/in.purana.linga.1.24.140) tatra śrutisamūhānāṃ vibhāgo dharmalakṣaṇaḥ bhaviṣyati tadā kalpe kṛṣṇadvaipāyano yadā // ### [1.24.141](https://indike.org/pramana/in.purana.linga.1.24.141) sūta uvāca niśamyaivaṃ mahātejā mahādevena kīrtitam rudrāvatāraṃ bhagavān praṇipatya maheśvaram // ### [1.24.142](https://indike.org/pramana/in.purana.linga.1.24.142) tuṣṭāva vāgbhir iṣṭābhiḥ punaḥ prāha ca śaṅkaram sarve viṣṇumayā devāḥ sarve viṣṇumayā gaṇāḥ // ### [1.24.143](https://indike.org/pramana/in.purana.linga.1.24.143) na hi viṣṇusamā kācid gatiranyā vidhīyate ityevaṃ satataṃ vedā gāyanti nātra saṃśayaḥ // ### [1.24.144](https://indike.org/pramana/in.purana.linga.1.24.144) sa devadevo bhagavāṃs tava liṅgārcane rataḥ tava praṇāmaparamaḥ kathaṃ devo hyabhūtprabhuḥ // ### [1.24.145](https://indike.org/pramana/in.purana.linga.1.24.145) sūta uvāca niśamya vacanaṃ tasya brahmaṇaḥ parameṣṭhinaḥ prapibanniva cakṣurbhyāṃ prītastatpraśnagauravāt // ### [1.24.146](https://indike.org/pramana/in.purana.linga.1.24.146) pūjāprakaraṇaṃ tasmai tamālokyāha śaṅkaraḥ bhavānnārāyaṇaścaiva śakraḥ sākṣātsurottamaḥ // ### [1.24.147](https://indike.org/pramana/in.purana.linga.1.24.147) munayaś ca sadā liṅgaṃ sampūjya vidhipūrvakam svaṃsvaṃ padaṃ vibho prāptās tasmāt sampūjayanti te // ### [1.24.148](https://indike.org/pramana/in.purana.linga.1.24.148) liṅgārcanaṃ vinā niṣṭhā nāsti tasmājjanārdanaḥ ātmano yajate nityaṃ śraddhayā bhagavānprabhuḥ // ### [1.24.149](https://indike.org/pramana/in.purana.linga.1.24.149) ityevamuktvā brahmāṇam anugṛhya maheśvaraḥ punaḥ samprekṣya deveśaṃ tatraivāntaradhīyata // ### [1.24.150](https://indike.org/pramana/in.purana.linga.1.24.150) tamuddiśya tadā brahmā namaskṛtya kṛtāñjaliḥ sraṣṭuṃ tvaśeṣaṃ bhagavāṃl labdhasaṃjñastu śaṅkarāt // ## Commentaries (2) - [Śivatosaṇī Liṅgapurāṇaṭīkā](https://indike.org/pramana/in.purana.linga!ganesa) — Gaṇeśa Bhaṭṭa, Sanskrit - [Śivatoṣiṇī](https://indike.org/pramana/in.purana.linga!ganesa-ballala-natu) — Gaṇeśa Ballāla Nātū, Sanskrit ## Linked texts (6) - [Varāhapurāṇa](https://indike.org/pramana/in.purana.varaha.11.31) — Vyāsa, Sanskrit - [Liṅga](https://indike.org/pramana/in.purana.linga-anon.28.1) — Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.28.1) — Ativīrarāma Pāṇṭiyar 1500, Sanskrit - [A History of Indian Medical Literature](https://indike.org/pramana/ins.science.meulenbeld-1999.v4.c62.360) — G. Jan Meulenbeld, English - [Ancient Indian Historical Tradition](https://indike.org/pramana/ins.general.pargiter-1922.c32.77) — F. E. Pargiter, English - [Śivatattvarahasya](https://indike.org/pramana/in.sampradaya.saiva.siddhanta.darsana.sivatattvarahasya.p2.4) — Nīlakaṇṭha Dīkṣita, Sanskrit --- Source: [https://indike.org/pramana/in.purana.linga.1.24](https://indike.org/pramana/in.purana.linga.1.24) · Pramāṇa