[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 1.27 # Lingapurana 1.27 Liṅgapurāṇa 1.27 - **Language:** Sanskrit ## Contents - [1.27.54](https://indike.org/pramana/in.purana.linga.1.27.54) — 1 part ### [1.27.1](https://indike.org/pramana/in.purana.linga.1.27.1) śailādiruvāca vakṣyāmi śṛṇu saṃkṣepāl liṅgārcanāvidhikramam vaktuṃ varṣaśatenāpi na śakyaṃ vistareṇa yat // ### [1.27.2](https://indike.org/pramana/in.purana.linga.1.27.2) evaṃ snātvā yathānyāyaṃ pūjāsthānaṃ praviśya ca prāṇāyāmatrayaṃ kṛtvā dhyāyeddevaṃ triyaṃbakam // ### [1.27.3](https://indike.org/pramana/in.purana.linga.1.27.3) pañcavaktraṃ daśabhujaṃ śuddhasphaṭikasannibham sarvābharaṇasaṃyuktaṃ citrāṃbaravibhūṣitam // ### [1.27.4](https://indike.org/pramana/in.purana.linga.1.27.4) tasya rūpaṃ samāśritya dāhanaplāvanādibhiḥ śaivīṃ tanuṃ samāsthāya pūjayetparameśvaram // ### [1.27.5](https://indike.org/pramana/in.purana.linga.1.27.5) dehaśuddhiṃ ca kṛtvaiva mūlamantraṃ nyaset kramāt sarvatra praṇavenaiva brahmāṇi ca yathākramam // ### [1.27.6](https://indike.org/pramana/in.purana.linga.1.27.6) sūtre namaḥ śivāyeti chandāṃsi parame śubhe mantrāṇi sūkṣmarūpeṇa saṃsthitāni yatastataḥ // ### [1.27.7](https://indike.org/pramana/in.purana.linga.1.27.7) nyagrodhabīje nyagrodhas tathā sūtre tu śobhane mahatyapi mahadbrahma saṃsthitaṃ sūkṣmavatsvayam // ### [1.27.8](https://indike.org/pramana/in.purana.linga.1.27.8) secayedarcanasthānaṃ gandhacandanavāriṇā dravyāṇi śodhayetpaścāt kṣālanaprokṣaṇādibhiḥ // ### [1.27.9](https://indike.org/pramana/in.purana.linga.1.27.9) kṣālanaṃ prokṣaṇaṃ caiva praṇavena vidhīyate prokṣaṇī cārghyapātraṃ ca pādyapātram anukramāt // ### [1.27.10](https://indike.org/pramana/in.purana.linga.1.27.10) tathā hyācamanīyārthaṃ kalpitaṃ pātrameva ca sthāpayed vidhinā dhīmān avaguṇṭhya yathāvidhi // ### [1.27.11](https://indike.org/pramana/in.purana.linga.1.27.11) darbhair ācchādayeccaiva prokṣayecchuddhavāriṇā teṣu teṣvatha sarveṣu kṣipettoyaṃ suśītalam // ### [1.27.12](https://indike.org/pramana/in.purana.linga.1.27.12) praṇavena kṣipetteṣu dravyāṇyālokya buddhimān uśīraṃ candanaṃ caiva pādye tu parikalpayet // ### [1.27.13](https://indike.org/pramana/in.purana.linga.1.27.13) jātikaṅkolakarpūrabahumūlatamālakam cūrṇayitvā yathānyāyaṃ kṣipedācamanīyake // ### [1.27.14](https://indike.org/pramana/in.purana.linga.1.27.14) evaṃ sarveṣu pātreṣu dāpayeccandanaṃ tathā karpūraṃ ca yathānyāyaṃ puṣpāṇi vividhāni ca // ### [1.27.15](https://indike.org/pramana/in.purana.linga.1.27.15) kuśāgramakṣatāṃścaiva yavavrīhitilāni ca ājyasiddhārthapuṣpāṇi bhasitaṃ cārghyapātrake // ### [1.27.16](https://indike.org/pramana/in.purana.linga.1.27.16) kuśapuṣpayavavrīhibahumūlatamālakam dāpayetprokṣaṇīpātre bhasitaṃ praṇavena ca // ### [1.27.17](https://indike.org/pramana/in.purana.linga.1.27.17) nyasetpañcākṣaraṃ caiva gāyatrīṃ rudradevatām kevalaṃ praṇavaṃ vāpi vedasāramanuttamam // ### [1.27.18](https://indike.org/pramana/in.purana.linga.1.27.18) atha saṃprokṣayetpaścād dravyāṇi praṇavena tu prokṣaṇīpātrasaṃsthena īśānādyaiś ca pañcabhiḥ // ### [1.27.19](https://indike.org/pramana/in.purana.linga.1.27.19) pārśvato devadevasya nandinaṃ māṃsamarcayet dīptānalāyutaprakhyaṃ trinetraṃ tridaśeśvaram // ### [1.27.20](https://indike.org/pramana/in.purana.linga.1.27.20) bālendumukuṭaṃ caiva harivaktraṃ caturbhujam puṣpamālādharaṃ saumyaṃ sarvābharaṇabhūṣitam // ### [1.27.21](https://indike.org/pramana/in.purana.linga.1.27.21) uttare cātmanaḥ puṇyāṃ bhāryāṃ ca marutāṃ śubhām suyaśāṃ suvratāṃ cāmbāṃ pādamaṇḍanatatparām // ### [1.27.22](https://indike.org/pramana/in.purana.linga.1.27.22) evaṃ pūjya praviśyāntar bhavanaṃ parameṣṭhinaḥ dattvā puṣpāñjaliṃ bhaktyā pañcamūrdhasu pañcabhiḥ // ### [1.27.23](https://indike.org/pramana/in.purana.linga.1.27.23) gandhapuṣpais tathā dhūpair vividhaiḥ pūjya śaṅkaram skandaṃ vināyakaṃ devīṃ liṅgaśuddhiṃ ca kārayet // ### [1.27.24](https://indike.org/pramana/in.purana.linga.1.27.24) japtvā sarvāṇi mantrāṇi praṇavādinamo 'ntakam kalpayedāsanaṃ paścāt padmākhyaṃ praṇavena tat // ### [1.27.25](https://indike.org/pramana/in.purana.linga.1.27.25) tasya pūrvadalaṃ sākṣād aṇimāmayam akṣaram laghimā dakṣiṇaṃ caiva mahimā paścimaṃ tathā // ### [1.27.26](https://indike.org/pramana/in.purana.linga.1.27.26) prāptistathottaraṃ patraṃ prākāmyaṃ pāvakasya tu īśitvaṃ nairṛtaṃ patraṃ vaśitvaṃ vāyugocare // ### [1.27.27](https://indike.org/pramana/in.purana.linga.1.27.27) sarvajñatvaṃ tathaiśānyaṃ karṇikā soma ucyate somasyādhas tathā sūryas tasyādhaḥ pāvakaḥ svayam // ### [1.27.28](https://indike.org/pramana/in.purana.linga.1.27.28) dharmādayo vidikṣvete tv anantaṃ kalpayetkramāt avyaktādicaturdikṣu somasyānte guṇatrayam // ### [1.27.29](https://indike.org/pramana/in.purana.linga.1.27.29) ātmatrayaṃ tataścordhvaṃ tasyānte śivapīṭhikā sadyojātaṃ prapadyāmīty āvāhya parameśvaram // ### [1.27.30](https://indike.org/pramana/in.purana.linga.1.27.30) vāmadevena mantreṇa sthāpayedāsanopari sānnidhyaṃ rudragāyatryā aghoreṇa nirudhya ca // ### [1.27.31](https://indike.org/pramana/in.purana.linga.1.27.31) īśānaḥ sarvavidyānām iti mantreṇa pūjayet pādyamācamanīyaṃ ca vibhoścārghyaṃ pradāpayet // ### [1.27.32](https://indike.org/pramana/in.purana.linga.1.27.32) snāpayedvidhinā rudraṃ gandhacandanavāriṇā pañcagavyavidhānena gṛhya pātre 'bhimantrya ca // ### [1.27.33](https://indike.org/pramana/in.purana.linga.1.27.33) praṇavenaiva gavyaistu snāpayecca yathāvidhi ājyena madhunā caiva tathā cekṣurasena ca // ### [1.27.34](https://indike.org/pramana/in.purana.linga.1.27.34) puṇyairdravyairmahādevaṃ praṇavenābhiṣecayet jalabhāṇḍaiḥ pavitraistu mantraistoyaṃ kṣipettataḥ // ### [1.27.35](https://indike.org/pramana/in.purana.linga.1.27.35) śuddhiṃ kṛtvā yathānyāyaṃ sitavastreṇa sādhakaḥ kuśāpāmārgakarpūrajātipuṣpakacampakaiḥ // ### [1.27.36](https://indike.org/pramana/in.purana.linga.1.27.36) karavīraiḥ sitaiścaiva mallikākamalotpalaiḥ āpūrya puṣpaiḥ suśubhaiḥ candanādyaiś ca tajjalam // ### [1.27.37](https://indike.org/pramana/in.purana.linga.1.27.37) nyasenmantrāṇi tattoye sadyojātādikāni tu suvarṇakalaśenātha tathā vai rājatena vā // ### [1.27.38](https://indike.org/pramana/in.purana.linga.1.27.38) tāmreṇa padmapatreṇa pālāśena dalena vā śaṃkhena mṛnmayenātha śodhitena śubhena vā // ### [1.27.39](https://indike.org/pramana/in.purana.linga.1.27.39) sakūrcena sapuṣpeṇa snāpayenmantrapūrvakam mantrāṇi te pravakṣyāmi śṛṇu sarvārthasiddhaye // ### [1.27.40](https://indike.org/pramana/in.purana.linga.1.27.40) yairliṅgaṃ sakṛdapyevaṃ snāpya mucyeta mānavaḥ pavamānena mantrajñāḥ tathā vāmīyakena ca // ### [1.27.41](https://indike.org/pramana/in.purana.linga.1.27.41) rudreṇa nīlarudreṇa śrīsūktena śubhena ca rajanīsūktakenaiva camakena śubhena ca // ### [1.27.42](https://indike.org/pramana/in.purana.linga.1.27.42) hotāreṇātha śirasā atharveṇa śubhena ca śāntyā cātha punaḥ śāntyā bhāruṇḍenāruṇena ca // ### [1.27.43](https://indike.org/pramana/in.purana.linga.1.27.43) vāruṇena ca jyeṣṭhena tathā vedavratena ca tathāntareṇa puṇyena sūktena puruṣeṇa ca // ### [1.27.44](https://indike.org/pramana/in.purana.linga.1.27.44) tvaritenaiva rudreṇa kapinā ca kapardinā āvosajeti sāmnā tu bṛhaccandreṇa viṣṇunā // ### [1.27.45](https://indike.org/pramana/in.purana.linga.1.27.45) virūpākṣeṇa skandena śataṛgbhiḥ śivais tathā pañcabrahmaiś ca sūtreṇa kevalapraṇavena ca // ### [1.27.46](https://indike.org/pramana/in.purana.linga.1.27.46) snāpayeddevadeveśaṃ sarvapāpapraśāntaye vastraṃ śivopavītaṃ ca tathā hyācamanīyakam // ### [1.27.47](https://indike.org/pramana/in.purana.linga.1.27.47) gandhaṃ puṣpaṃ tathā dhūpaṃ dīpamannaṃ krameṇa tu toyaṃ sugandhitaṃ caiva punarācamanīyakam // ### [1.27.48](https://indike.org/pramana/in.purana.linga.1.27.48) mukuṭaṃ ca śubhaṃ channaṃ tathā vai bhūṣaṇāni ca dāpayetpraṇavenaiva mukhavāsādikāni ca // ### [1.27.49](https://indike.org/pramana/in.purana.linga.1.27.49) tataḥ sphaṭikasaṃkāśaṃ devaṃ niṣkalamakṣaram kāraṇaṃ sarvadevānāṃ sarvalokamayaṃ param // ### [1.27.50](https://indike.org/pramana/in.purana.linga.1.27.50) brahmendraviṣṇurudrādyair ṛṣidevair agocaram vedavidbhir hi vedāntais tv agocaramiti śrutiḥ // ### [1.27.51](https://indike.org/pramana/in.purana.linga.1.27.51) ādimadhyāntarahitaṃ bheṣajaṃ bhavarogiṇām śivatattvamiti khyātaṃ śivaliṅge vyavasthitam // ### [1.27.52](https://indike.org/pramana/in.purana.linga.1.27.52) praṇavenaiva mantreṇa pūjayelliṅgamūrdhani stotraṃ japecca vidhinā namaskāraṃ pradakṣiṇam // ### [1.27.53](https://indike.org/pramana/in.purana.linga.1.27.53) arghyaṃ dattvātha puṣpāṇi pādayostu vikīrya ca praṇipatya ca deveśam ātmanyāropayecchivam // ### [1.27.54](https://indike.org/pramana/in.purana.linga.1.27.54) evaṃ saṃkṣipya kathitaṃ liṅgārcanamanuttamam ābhyantaraṃ pravakṣyāmi liṅgārcanamihādya te // ### [1.27.54.p1](https://indike.org/pramana/in.purana.linga.1.27.54.p1) iti śrīliṅgamahāpurāṇe pūrvabhāge liṅgārcanavidhirnāma saptaviṃśo 'dhyāyaḥ ## Commentaries (1) - [Śivatosaṇī Liṅgapurāṇaṭīkā](https://indike.org/pramana/in.purana.linga!ganesa.30.7) — Gaṇeśa Bhaṭṭa, Sanskrit ## Linked texts (6) - [Śivapurāṇa (complete text)](https://indike.org/pramana/in.purana.siva*complete-2.2.1.11.35) — Sanskrit - [Kāmikāgama](https://indike.org/pramana/in.sampradaya.saiva.agama.siva.kamika.1.0-5.208) — Sanskrit - [Śrīvidyārṇavatantra](https://indike.org/pramana/in.sampradaya.saiva.agama.srividya.srividyarnavatantra.8.435) — Sanskrit - [Pañcarātravyākhyā](https://indike.org/pramana/in.sampradaya.saiva.virasaiva.pancaratravyakhya.29) — Reṇuka, Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.31.1) — Ativīrarāma Pāṇṭiyar 1500, Sanskrit - [Śivatattvaviveka (Appayya Dīkṣita)](https://indike.org/pramana/in.sampradaya.saiva.sivatattvaviveka-appayya-diksita.24-2.1) — Appayya Dīkṣita 1560, Sanskrit --- Source: [https://indike.org/pramana/in.purana.linga.1.27](https://indike.org/pramana/in.purana.linga.1.27) · Pramāṇa