[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Linga Purana](https://indike.org/pramana/in.purana.linga) › 1.2 # Linga Purana 1.2 Liṅgapurāṇa 1.2 - **Language:** Sanskrit ### [1.2.1](https://indike.org/pramana/in.purana.linga.1.2.1) sūta uvāca īśānakalpavṛttāntam adhikṛtya mahātmanā brahmaṇā kalpitaṃ pūrvaṃ purāṇaṃ laiṅgam uttamam // ### [1.2.2](https://indike.org/pramana/in.purana.linga.1.2.2) granthakoṭipramāṇaṃ tu śatakoṭipravistare caturlakṣeṇa saṃkṣipte vyāsaiḥ sarvāntareṣu vai // ### [1.2.3](https://indike.org/pramana/in.purana.linga.1.2.3) vyasteṣṭā daśadhā caiva brahmādau dvāparādiṣu liṅgamekādaśaṃ proktaṃ mayā vyāsācchrutaṃ ca tat // ### [1.2.4](https://indike.org/pramana/in.purana.linga.1.2.4) asyaikādaśasāhasre granthamānamiha dvijāḥ tasmātsaṃkṣepato vakṣye na śrutaṃ vistareṇa yat // ### [1.2.5](https://indike.org/pramana/in.purana.linga.1.2.5) caturlakṣeṇa saṃkṣipte kṛṣṇadvaipāyanena tu atraikādaśasāhasraiḥ kathito liṅgasambhavaḥ // ### [1.2.6](https://indike.org/pramana/in.purana.linga.1.2.6) sargaḥ prādhānikaḥ paścāt prākṛto vaikṛtāni ca aṇḍasyāsya ca sambhūtir aṇḍasyāvaraṇāṣṭakam // ### [1.2.7](https://indike.org/pramana/in.purana.linga.1.2.7) aṇḍodbhavatvaṃ śarvasya rajoguṇasamāśrayāt viṣṇutvaṃ kālarudratvaṃ śayanaṃ cāpsu tasya ca // ### [1.2.8](https://indike.org/pramana/in.purana.linga.1.2.8) prajāpatīnāṃ sargaś ca pṛthivyuddharaṇaṃ tathā brahmaṇaś ca divārātram āyuṣo gaṇanaṃ punaḥ // ### [1.2.9](https://indike.org/pramana/in.purana.linga.1.2.9) savanaṃ brahmaṇaścaiva yugakalpaś ca tasya tu divyaṃ ca mānuṣaṃ varṣam ārṣaṃ vai dhrauvyameva ca // ### [1.2.10](https://indike.org/pramana/in.purana.linga.1.2.10) pitryaṃ pitṝṇāṃ sambhūtir dharmaścāśramiṇāṃ tathā avṛddhirjagato bhūyo devyāḥ śaktyudbhavastathā // ### [1.2.11](https://indike.org/pramana/in.purana.linga.1.2.11) strīpumbhāvo viriñcasya sargo mithunasambhavaḥ ākhyāṣṭakaṃ hi rudrasya kathitaṃ rodanāntare // ### [1.2.12](https://indike.org/pramana/in.purana.linga.1.2.12) brahmaviṣṇuvivādaś ca punarliṅgasya sambhavaḥ śilādasya tapaścaiva vṛtrārerdarśanaṃ tathā // ### [1.2.13](https://indike.org/pramana/in.purana.linga.1.2.13) prārthanā yonijasyātha durlabhatvaṃ sutasya tu śilādaśakrasaṃvādaḥ padmayonitvameva ca // ### [1.2.14](https://indike.org/pramana/in.purana.linga.1.2.14) bhavasya darśanaṃ caiva tiṣyeṣvācāryaśiṣyayoḥ vyāsāvatārāś ca tathā kalpamanvantarāṇi ca // ### [1.2.15](https://indike.org/pramana/in.purana.linga.1.2.15) kalpatvaṃ caiva kalpānām ākhyābhedeṣvanukramāt kalpeṣu kalpe vārāhe vārāhatvaṃ hares tathā // ### [1.2.16](https://indike.org/pramana/in.purana.linga.1.2.16) meghavāhanakalpasya vṛttāntaṃ rudragauravam punarliṅgodbhavaścaiva ṛṣimadhye pinākinaḥ // ### [1.2.17](https://indike.org/pramana/in.purana.linga.1.2.17) liṅgasyārādhanaṃ snānavidhānaṃ śaucalakṣaṇam vārāṇasyāś ca māhātmyaṃ kṣetramāhātmyavarṇanam // ### [1.2.18](https://indike.org/pramana/in.purana.linga.1.2.18) bhuvi rudrālayānāṃ tu saṃkhyā viṣṇorgṛhasya ca antarikṣe tathāṇḍe 'smin devāyatanavarṇanam // ### [1.2.19](https://indike.org/pramana/in.purana.linga.1.2.19) dakṣasya patanaṃ bhūmau punaḥ svārociṣe 'ntare dakṣaśāpaś ca dakṣasya śāpamokṣastathaiva ca // ### [1.2.20](https://indike.org/pramana/in.purana.linga.1.2.20) kailāsavarṇanaṃ caiva yogaḥ pāśupatas tathā caturyugapramāṇaṃ ca yugadharmaḥ suvistaraḥ // ### [1.2.21](https://indike.org/pramana/in.purana.linga.1.2.21) saṃdhyāṃśakapramāṇaṃ ca saṃdhyāvṛttaṃ bhavasya ca śmaśānanilayaścaiva candrarekhāsamudbhavaḥ // ### [1.2.22](https://indike.org/pramana/in.purana.linga.1.2.22) udvāhaḥ śaṃkarasyātha putrotpādanameva ca maithunātiprasaṅgena vināśo jagatāṃ bhayam // ### [1.2.23](https://indike.org/pramana/in.purana.linga.1.2.23) śāpaḥ satyā kṛto devānpurā viṣṇuṃ ca pālitam śukrotsargastu rudrasya gāṅgeyodbhava eva ca // ### [1.2.24](https://indike.org/pramana/in.purana.linga.1.2.24) grahaṇādiṣu kāleṣu snāpya liṅgaṃ phalaṃ tathā kṣubdhadhī ca vivādaś ca dadhīcopendrayos tathā // ### [1.2.25](https://indike.org/pramana/in.purana.linga.1.2.25) utpattirnandināmnā tu devadevasya śūlinaḥ pativratāyāścākhyānaṃ paśupāśavicāraṇā // ### [1.2.26](https://indike.org/pramana/in.purana.linga.1.2.26) pravṛttilakṣaṇaṃ jñānaṃ nivṛttyadhikṛtā tathā vasiṣṭhatanayotpattir vāsiṣṭhānāṃ mahātmanām // ### [1.2.27](https://indike.org/pramana/in.purana.linga.1.2.27) munīnāṃ vaṃśavistāro rājñāṃ śaktervināśanam daurātmyaṃ kauśikasyātha surabherbandhanaṃ tathā // ### [1.2.28](https://indike.org/pramana/in.purana.linga.1.2.28) sutaśoko vasiṣṭhasya arundhatyāḥ pralāpanam snuṣāyāḥ preṣaṇaṃ caiva garbhasthasya vacas tathā // ### [1.2.29](https://indike.org/pramana/in.purana.linga.1.2.29) parāśarasyāvatāro vyāsasya ca śukasya ca vināśo rākṣasānāṃ ca kṛto vai śaktisūnunā // ### [1.2.30](https://indike.org/pramana/in.purana.linga.1.2.30) devatāparamārthaṃ tu vijñānaṃ ca prasādataḥ purāṇakaraṇaṃ caiva pulastyasyājñayā guroḥ // ### [1.2.31](https://indike.org/pramana/in.purana.linga.1.2.31) bhuvanānāṃ pramāṇaṃ ca grahāṇāṃ jyotiṣāṃ gatiḥ jīvacchrāddhavidhānaṃ ca śrāddhārhāḥ śrāddhameva ca // ### [1.2.32](https://indike.org/pramana/in.purana.linga.1.2.32) nāndīśrāddhavidhānaṃ ca tathādhyayanalakṣaṇam pañcayajñaprabhāvaś ca pañcayajñavidhis tathā // ### [1.2.33](https://indike.org/pramana/in.purana.linga.1.2.33) rajasvalānāṃ vṛttiś ca vṛttyā putraviśiṣṭatā maithunasya vidhiścaiva prativarṇamanukramāt // ### [1.2.34](https://indike.org/pramana/in.purana.linga.1.2.34) bhojyābhojyavidhānaṃ ca sarveṣāmeva varṇinām prāyaścittam aśeṣasya pratyekaṃ caiva vistarāt // ### [1.2.35](https://indike.org/pramana/in.purana.linga.1.2.35) narakāṇāṃ svarūpaṃ ca daṇḍaḥ karmānurūpataḥ svarginārakiṇāṃ puṃsāṃ cihnaṃ janmāntareṣu ca // ### [1.2.36](https://indike.org/pramana/in.purana.linga.1.2.36) nānāvidhāni dānāni pretarājapuraṃ tathā kalpaṃ pañcākṣarasyātha rudramāhātmyameva ca // ### [1.2.37](https://indike.org/pramana/in.purana.linga.1.2.37) vṛtrendrayormahāyuddhaṃ viśvarūpavimardanam śvetasya mṛtyoḥ saṃvādaḥ śvetārthe kālanāśanam // ### [1.2.38](https://indike.org/pramana/in.purana.linga.1.2.38) devadāruvane śambhoḥ praveśaḥ śaṃkarasya tu sudarśanasya cākhyānaṃ kramasaṃnyāsalakṣaṇam // ### [1.2.39](https://indike.org/pramana/in.purana.linga.1.2.39) śraddhāsādhyo 'tha rudrastu kathitaṃ brahmaṇā tadā madhunā kaiṭabhenaiva purā hṛtagatervibhoḥ // ### [1.2.40](https://indike.org/pramana/in.purana.linga.1.2.40) brahmaṇaḥ paramaṃ jñānam ādātuṃ mīnatā hareḥ sarvāvasthāsu viṣṇoś ca jananaṃ līlayaiva tu // ### [1.2.41](https://indike.org/pramana/in.purana.linga.1.2.41) rudraprasādādviṣṇoś ca jiṣṇoścaiva tu sambhavaḥ manthānadhāraṇārthāya hareḥ kūrmatvamevaca // ### [1.2.42](https://indike.org/pramana/in.purana.linga.1.2.42) saṃkarṣaṇasya cotpattiḥ kauśikyāś ca punarbhavaḥ yadūnāṃ caiva sambhūtir yādavatvaṃ hareḥ svayam // ### [1.2.43](https://indike.org/pramana/in.purana.linga.1.2.43) bhojarājasya daurātmyaṃ mātulasya harervibhoḥ bālabhāve hareḥ krīḍā putrārthaṃ śaṃkarārcanam // ### [1.2.44](https://indike.org/pramana/in.purana.linga.1.2.44) nārasya ca tathotpattiḥ kapāle vaiṣṇavāddharāt bhūbhāranigrahārthe tu rudrasyārādhanaṃ hareḥ // ### [1.2.45](https://indike.org/pramana/in.purana.linga.1.2.45) vainyena pṛthunā bhūmeḥ purā dohapravartanam devāsure purā labdho bhṛguśāpaś ca viṣṇunā // ### [1.2.46](https://indike.org/pramana/in.purana.linga.1.2.46) kṛṣṇatve dvārakāyāṃ tu nilayo mādhavasya tu labdho hitāya śāpastu durvāsasyānanāddhareḥ // ### [1.2.47](https://indike.org/pramana/in.purana.linga.1.2.47) vṛṣṇyandhakavināśāya śāpaḥ piṇḍāravāsinām erakasya tathotpattis tomarasyodbhavas tathā // ### [1.2.48](https://indike.org/pramana/in.purana.linga.1.2.48) erakālābhato 'nyonyaṃ vivāde vṛṣṇivigrahaḥ līlayā caiva kṛṣṇena svakulasya ca saṃhṛtiḥ // ### [1.2.49](https://indike.org/pramana/in.purana.linga.1.2.49) erakāstrabalenaiva gamanaṃ svecchayaiva tu brahmaṇaścaiva mokṣasya vijñānaṃ tu suvistaram // ### [1.2.50](https://indike.org/pramana/in.purana.linga.1.2.50) purāndhakāgnidakṣāṇāṃ śakrebhamṛgarūpiṇām madanasyādidevasya brahmaṇaś cāmarāriṇām // ### [1.2.51](https://indike.org/pramana/in.purana.linga.1.2.51) halāhalasya daityasya kṛtāvajñā pinākinā jālaṃdharavadhaścaiva sudarśanasamudbhavaḥ // ### [1.2.52](https://indike.org/pramana/in.purana.linga.1.2.52) viṣṇorvarāyudhāvāptis tathā rudrasya ceṣṭitam tathānyāni ca rudrasya caritāni sahasraśaḥ // ### [1.2.53](https://indike.org/pramana/in.purana.linga.1.2.53) hareḥ pitāmahasyātha śakrasya ca mahātmanaḥ prabhāvānubhavaścaiva śivalokasya varṇanam // ### [1.2.54](https://indike.org/pramana/in.purana.linga.1.2.54) bhūmau rudrasya lokaṃ ca pātāle hāṭakeśvaram tapasāṃ lakṣaṇaṃ caiva dvijānāṃ vaibhavaṃ tathā // ### [1.2.55](https://indike.org/pramana/in.purana.linga.1.2.55) ādhikyaṃ sarvamūrtīnāṃ liṅgamūrterviśeṣataḥ liṅge 'sminnānupūrvyeṇa vistareṇānukīrtyate // ### [1.2.56](https://indike.org/pramana/in.purana.linga.1.2.56) etajjñātvā purāṇasya saṃkṣepaṃ kīrtayettu yaḥ sarvapāpavinirmukto brahmalokaṃ sa gacchati // ## Commentaries (1) - [Śivatoṣiṇī](https://indike.org/pramana/in.purana.linga!ganesa-ballala-natu.2.1) — Gaṇeśa Ballāla Nātū, Sanskrit ## Linked texts (1) - [Liṅgapurāṇa](https://indike.org/pramana/in.vernacular.tamil.kappiyam.lingapurana.2.1) — Ativīrarāma Pāṇṭiyar 1500, Sanskrit ## Discussed in (3) - [History of Dharmaśāstra (Ancient and Mediaeval Religious and Civil Law in India)](https://indike.org/pramana/ins.polity.kane-1930.v7.c90.49) — Kane 1930, English - [Ancient Indian Historical Tradition](https://indike.org/pramana/ins.general.pargiter-1922.c7.153) — Pargiter 1922, English - [Studies in the Purāṇic Records on Hindu Rites and Customs](https://indike.org/pramana/ins.religion.hazra-1940.c7.s9.5) — Hazra 1940, English --- Source: [https://indike.org/pramana/in.purana.linga.1.2](https://indike.org/pramana/in.purana.linga.1.2) · Pramāṇa