[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 1.32 # Lingapurana 1.32 Liṅgapurāṇa 1.32 - **Language:** Sanskrit ## Contents - [1.32.16](https://indike.org/pramana/in.purana.linga.1.32.16) — 1 part ### [1.32.1](https://indike.org/pramana/in.purana.linga.1.32.1) ṛṣaya ūcuḥ namo digvāsase nityaṃ kṛtāntāya triśūline vikaṭāya karālāya karālavadanāya ca // ### [1.32.2](https://indike.org/pramana/in.purana.linga.1.32.2) arūpāya surūpāya viśvarūpāya te namaḥ kaṭaṅkaṭāya rudrāya svāhākārāya vai namaḥ // ### [1.32.3](https://indike.org/pramana/in.purana.linga.1.32.3) sarvapraṇatadehāya svayaṃ ca praṇatātmane nityaṃ nīlaśikhaṇḍāya śrīkaṇṭhāya namonamaḥ // ### [1.32.4](https://indike.org/pramana/in.purana.linga.1.32.4) nīlakaṇṭhāya devāya citābhasmāṅgadhāriṇe tvaṃ brahmā sarvadevānāṃ rudrāṇāṃ nīlalohitaḥ // ### [1.32.5](https://indike.org/pramana/in.purana.linga.1.32.5) ātmā ca sarvabhūtānāṃ sāṃkhyaiḥ puruṣa ucyate parvatānāṃ mahāmerur nakṣatrāṇāṃ ca candramāḥ // ### [1.32.6](https://indike.org/pramana/in.purana.linga.1.32.6) ṛṣīṇāṃ ca vasiṣṭhas tvaṃ devānāṃ vāsavas tathā oṅkāraḥ sarvavedānāṃ śreṣṭhaṃ sāma ca sāmasu // ### [1.32.7](https://indike.org/pramana/in.purana.linga.1.32.7) āraṇyānāṃ paśūnāṃ ca siṃhastvaṃ parameśvaraḥ grāmyāṇāmṛṣabhaścāsi bhagavāṃllokapūjitaḥ // ### [1.32.8](https://indike.org/pramana/in.purana.linga.1.32.8) sarvathā vartamāno 'pi yo yo bhāvo bhaviṣyati tvāmeva tatra paśyāmo brahmaṇā kathitaṃ tathā // ### [1.32.9](https://indike.org/pramana/in.purana.linga.1.32.9) kāmaḥ krodhaś ca lobhaś ca viṣādo mada eva ca etad icchāmahe boddhuṃ prasīda parameśvara // ### [1.32.10](https://indike.org/pramana/in.purana.linga.1.32.10) mahāsaṃharaṇe prāpte tvayā deva kṛtātmanā karaṃ lalāṭe saṃvidhya vahnirutpāditastvayā // ### [1.32.11](https://indike.org/pramana/in.purana.linga.1.32.11) tenāgninā tadā lokā arcirbhiḥ sarvato vṛtāḥ tasmādagnisamā hyete bahavo vikṛtāgnayaḥ // ### [1.32.12](https://indike.org/pramana/in.purana.linga.1.32.12) kāmaḥ krodhaś ca lobhaś ca moho dambha upadravaḥ yāni cānyāni bhūtāni sthāvarāṇi carāṇi ca // ### [1.32.13](https://indike.org/pramana/in.purana.linga.1.32.13) dahyante prāṇinaste tu tvatsamutthena vahninā asmākaṃ dahyamānānāṃ trātā bhava sureśvara // ### [1.32.14](https://indike.org/pramana/in.purana.linga.1.32.14) tvaṃ ca lokahitārthāya bhūtāni pariṣiñcasi maheśvara mahābhāga prabho śubhanirīkṣaka // ### [1.32.15](https://indike.org/pramana/in.purana.linga.1.32.15) ājñāpaya vayaṃ nātha kartāro vacanaṃ tava bhūtakoṭisahasreṣu rūpakoṭiśateṣu ca // ### [1.32.16](https://indike.org/pramana/in.purana.linga.1.32.16) antaṃ gantuṃ na śaktāḥ sma devadeva namo 'stu te // ### [1.32.16.p1](https://indike.org/pramana/in.purana.linga.1.32.16.p1) iti śrīliṅgamahāpurāṇe pūrvabhāge dvātriṃśo 'dhyāyaḥ ## Linked texts (3) - [Bṛhatstotraratnākaraḥ](https://indike.org/pramana/in.sampradaya.general.stotra.brhatstotraratnakara.362_325) — Sanskrit - [Parameśvarastutiḥ](https://indike.org/pramana/in.sampradaya.general.saura.paramesvarastuti.1) — Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.38.1) — Ativīrarāma Pāṇṭiyar 1500, Sanskrit --- Source: [https://indike.org/pramana/in.purana.linga.1.32](https://indike.org/pramana/in.purana.linga.1.32) · Pramāṇa