[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 1.37 # Lingapurana 1.37 Liṅgapurāṇa 1.37 - **Language:** Sanskrit ## Contents - [1.37.40](https://indike.org/pramana/in.purana.linga.1.37.40) — 1 part ### [1.37.1](https://indike.org/pramana/in.purana.linga.1.37.1) sanatkumāra uvāca bhavānkathamanuprāpto mahādevamumāpatim śrotumicchāmi tatsarvaṃ vaktumarhasi me prabho // ### [1.37.2](https://indike.org/pramana/in.purana.linga.1.37.2) śailādiruvāca prajākāmaḥ śilādo 'bhūt pitā mama mahāmune so 'pyandhaḥ suciraṃ kalaṃ tapastepe suduścaram // ### [1.37.3](https://indike.org/pramana/in.purana.linga.1.37.3) tapatastasya tapasā saṃtuṣṭo vajradhṛk prabhuḥ śilādamāha tuṣṭo 'smi varayasva varāniti // ### [1.37.4](https://indike.org/pramana/in.purana.linga.1.37.4) tataḥ praṇamya deveśaṃ sahasrākṣaṃ sahāmaraiḥ provāca muniśārdūla kṛtāñjalipuṭo harim // ### [1.37.5](https://indike.org/pramana/in.purana.linga.1.37.5) śilāda uvāca bhagavandevatārighna sahasrākṣa varaprada ayonijaṃ mṛtyuhīnaṃ putramicchāmi suvrata // ### [1.37.6](https://indike.org/pramana/in.purana.linga.1.37.6) śakra uvāca putraṃ dāsyāmi viprarṣe yonijaṃ mṛtyusaṃyutam anyathā te na dāsyāmi mṛtyuhīnā na santi vai // ### [1.37.7](https://indike.org/pramana/in.purana.linga.1.37.7) na dāsyati sutaṃ te 'tra mṛtyuhīnamayonijam pitāmaho 'pi bhagavān kimutānye mahāmune // ### [1.37.8](https://indike.org/pramana/in.purana.linga.1.37.8) so 'pi devaḥ svayaṃ brahmā mṛtyuhīno na ceśvaraḥ yonijaś ca mahātejāś cāṇḍajaḥ padmasaṃbhavaḥ // ### [1.37.9](https://indike.org/pramana/in.purana.linga.1.37.9) maheśvarāṅgajaścaiva bhavānyāstanayaḥ prabhuḥ tasyāpyāyuḥ samākhyātaṃ parārdhadvayasaṃmitam // ### [1.37.10](https://indike.org/pramana/in.purana.linga.1.37.10) koṭikoṭisahasrāṇi aharbhūtāni yāni vai samatītāni kalpānāṃ tāvaccheṣāparatraye // ### [1.37.11](https://indike.org/pramana/in.purana.linga.1.37.11) tasmādayonije putre mṛtyuhīne prayatnataḥ parityajāśāṃ viprendra gṛhāṇātmasamaṃ sutam // ### [1.37.12](https://indike.org/pramana/in.purana.linga.1.37.12) śailādiruvāca tasya tadvacanaṃ śrutvā pitā me lokaviśrutaḥ śilāda iti puṇyātmā punaḥ prāha śacīpatim // ### [1.37.13](https://indike.org/pramana/in.purana.linga.1.37.13) śilāda uvāca bhagavannaṇḍayonitvaṃ padmayonitvameva ca maheśvarāṅgayonitvaṃ śrutaṃ vai brahmaṇo mayā // ### [1.37.14](https://indike.org/pramana/in.purana.linga.1.37.14) purā mahendradāyādād gadataścāsya pūrvajāt nāradādvai mahābāho kathamatrāśu no vada // ### [1.37.15](https://indike.org/pramana/in.purana.linga.1.37.15) dākṣāyaṇī sā dakṣo 'pi devaḥ padmodbhavātmajaḥ pautrīkanakagarbhasya kathaṃ tasyāḥ suto vibhuḥ // ### [1.37.16](https://indike.org/pramana/in.purana.linga.1.37.16) śakra uvāca sthāne saṃśayituṃ vipra tava vakṣyāmi kāraṇam kalpe tatpuruṣe vṛttaṃ brahmaṇaḥ parameṣṭhinaḥ // ### [1.37.17](https://indike.org/pramana/in.purana.linga.1.37.17) sasarja sakalaṃ dhyātvā brahmāṇaṃ parameśvaraḥ janārdano jagannāthaḥ kalpe vai meghavāhane // ### [1.37.18](https://indike.org/pramana/in.purana.linga.1.37.18) divyaṃ varṣasahasraṃ tu megho bhūtvāvahaddharam nārāyaṇo mahādevaṃ bahumānena sādaram // ### [1.37.19](https://indike.org/pramana/in.purana.linga.1.37.19) dṛṣṭvā bhāvaṃ mahādevo hareḥ svātmani śaṅkaraḥ pradadau tasya sakalaṃ sraṣṭuṃ vai brahmaṇā saha // ### [1.37.20](https://indike.org/pramana/in.purana.linga.1.37.20) tadā taṃ kalpamāhurvai meghavāhanasaṃjñayā hiraṇyagarbhastaṃ dṛṣṭvā tasya dehodbhavastadā // ### [1.37.21](https://indike.org/pramana/in.purana.linga.1.37.21) janārdanasutaḥ prāha tapasā prāpya śaṅkaram tava vāmāṅgajo viṣṇur dakṣiṇāṅgabhavo hyaham // ### [1.37.22](https://indike.org/pramana/in.purana.linga.1.37.22) mayā saha jagatsarvaṃ tathāpyasṛjadacyutaḥ jaganmayo 'vahadyasmān megho bhūtvā divāniśam // ### [1.37.23](https://indike.org/pramana/in.purana.linga.1.37.23) bhavantamavahadviṣṇur devadevaṃ jagadgurum nārāyaṇādapi vibho bhakto 'haṃ tava śaṅkara // ### [1.37.24](https://indike.org/pramana/in.purana.linga.1.37.24) prasīda dehi me sarvaṃ sarvātmatvaṃ tava prabho tadātha labdhvā bhagavān bhavātsarvātmatāṃ kṣaṇāt // ### [1.37.25](https://indike.org/pramana/in.purana.linga.1.37.25) tvaramāṇo 'tha saṃgamya dadarśa puruṣottamam ekārṇavālaye śubhre tv andhakāre sudāruṇe // ### [1.37.26](https://indike.org/pramana/in.purana.linga.1.37.26) hemaratnacite divye manasā ca vinirmite duṣprāpye durjanaiḥ puṇyaiḥ sanakādyairagocare // ### [1.37.27](https://indike.org/pramana/in.purana.linga.1.37.27) jagadāvāsahṛdayaṃ dadarśa puruṣaṃ tvajaḥ anantabhogaśayyāyāṃ śāyinaṃ paṅkajekṣaṇam // ### [1.37.28](https://indike.org/pramana/in.purana.linga.1.37.28) śaṅkhacakragadāpadmaṃ dhārayantaṃ caturbhujam sarvābharaṇasaṃyuktaṃ śaśimaṇḍalasannibham // ### [1.37.29](https://indike.org/pramana/in.purana.linga.1.37.29) śrīvatsalakṣaṇaṃ devaṃ prasannāsyaṃ janārdanam ramāmṛdukarāmbhojasparśaraktapadāmbujam // ### [1.37.30](https://indike.org/pramana/in.purana.linga.1.37.30) paramātmānamīśānaṃ tamasā kālarūpiṇam rajasā sarvalokānāṃ sargalīlāpravartakam // ### [1.37.31](https://indike.org/pramana/in.purana.linga.1.37.31) sattvena sarvabhūtānāṃ sthāpakaṃ parameśvaram sarvātmānaṃ mahātmānaṃ paramātmānamīśvaram // ### [1.37.32](https://indike.org/pramana/in.purana.linga.1.37.32) kṣīrārṇave 'mṛtamaye śāyinaṃ yoganidrayā taṃ dṛṣṭvā prāha vai brahmā bhagavantaṃ janārdanam // ### [1.37.33](https://indike.org/pramana/in.purana.linga.1.37.33) grasāmi tvāṃ prasādena yathāpūrvaṃ bhavānaham smayamānastu bhagavān pratibudhya pitāmaham // ### [1.37.34](https://indike.org/pramana/in.purana.linga.1.37.34) udaikṣata mahābāhuḥ smitamīṣaccakāra saḥ viveśa cāṇḍajaṃ taṃ tu grastastena mahātmanā // ### [1.37.35](https://indike.org/pramana/in.purana.linga.1.37.35) tatastaṃ cāsṛjadbrahmā bhruvormadhyena cācyutam sṛṣṭastena hariḥ prekṣya sthitastasyātha saṃnidhau // ### [1.37.36](https://indike.org/pramana/in.purana.linga.1.37.36) etasminnantare rudraḥ sarvadevabhavodbhavaḥ vikṛtaṃ rūpamāsthāya purā dattavarastayoḥ // ### [1.37.37](https://indike.org/pramana/in.purana.linga.1.37.37) āgacchadyatra vai viṣṇur viśvātmā parameśvaraḥ prasādamatulaṃ kartuṃ brahmaṇaś ca hareḥ prabhuḥ // ### [1.37.38](https://indike.org/pramana/in.purana.linga.1.37.38) tataḥ sametya tau devau sarvadevabhavodbhavam apaśyatāṃ bhavaṃ devaṃ kālāgnisadṛśaṃ prabhum // ### [1.37.39](https://indike.org/pramana/in.purana.linga.1.37.39) tau taṃ tuṣṭuvatuścaiva śarvamugraṃ kapardinam praṇematuś ca varadaṃ bahumānena dūrataḥ // ### [1.37.40](https://indike.org/pramana/in.purana.linga.1.37.40) bhavo 'pi bhagavān devam anugṛhya pitāmaham janārdanaṃ jagannāthas tatraivāntaradhīyata // ### [1.37.40.p1](https://indike.org/pramana/in.purana.linga.1.37.40.p1) iti śrīliṅgamahāpurāṇe pūrvabhāge brahmaṇo varapradānaṃ nāma saptatriṃśo 'dhyāyaḥ ## Linked texts (1) - [Liṅgapurāṇa](https://indike.org/pramana/in.vernacular.tamil.kappiyam.lingapurana.43.1) — Ativīrarāma Pāṇṭiyar 1500, Sanskrit --- Source: [https://indike.org/pramana/in.purana.linga.1.37](https://indike.org/pramana/in.purana.linga.1.37) · Pramāṇa