[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 1.44 # Lingapurana 1.44 Liṅgapurāṇa 1.44 - **Language:** Sanskrit ## Contents - [1.44.49](https://indike.org/pramana/in.purana.linga.1.44.49) — 1 part ### [1.44.1](https://indike.org/pramana/in.purana.linga.1.44.1) śailādiruvāca smaraṇādeva rudrasya samprāptāś ca gaṇeśvarāḥ sarve sahasrahastāś ca sahasrāyudhapāṇayaḥ // ### [1.44.2](https://indike.org/pramana/in.purana.linga.1.44.2) trinetrāś ca mahātmānas tridaśairapi vanditāḥ koṭikālāgnisaṃkāśā jaṭāmukuṭadhāriṇaḥ // ### [1.44.3](https://indike.org/pramana/in.purana.linga.1.44.3) daṃṣṭrākarālavadanā nityā buddhāś ca nirmalāḥ koṭikoṭigaṇaistulyair ātmanā ca gaṇeśvarāḥ asaṃkhyātā mahātmānas tatrājagmurmudā yutāḥ // ### [1.44.4](https://indike.org/pramana/in.purana.linga.1.44.4) gāyantaś ca dravantaś ca nṛtyantaś ca mahābalāḥ mukhāḍambaravādyāni vādayantastathaiva ca // ### [1.44.5](https://indike.org/pramana/in.purana.linga.1.44.5) rathairnāgairhayaiścaiva siṃhamarkaṭavāhanāḥ vimāneṣu tathārūḍhā hemacitreṣu vai gaṇāḥ // ### [1.44.6](https://indike.org/pramana/in.purana.linga.1.44.6) bherīmṛdaṅgakādyaiś ca paṇavānakagomukhaiḥ vāditrairvividhaiścānyaiḥ paṭahairekapuṣkaraiḥ // ### [1.44.7](https://indike.org/pramana/in.purana.linga.1.44.7) bherīmurajasaṃnādair āḍambarakaḍiṇḍimaiḥ mardalairveṇuvīṇābhir vividhaistālaniḥsvanaiḥ // ### [1.44.8](https://indike.org/pramana/in.purana.linga.1.44.8) darduraistalaghātaiś ca kacchapaiḥ paṇavairapi vādyamānairmahāyogā ājagmurdevasaṃsadam // ### [1.44.9](https://indike.org/pramana/in.purana.linga.1.44.9) te gaṇeśā mahāsattvāḥ sarvadeveśvareśvarāḥ praṇamya devaṃ devīṃ ca idaṃ vacanam abruvan // ### [1.44.10](https://indike.org/pramana/in.purana.linga.1.44.10) bhagavandevadeveśa triyaṃbaka vṛṣadhvaja kimarthaṃ ca smṛtā deva ājñāpaya mahādyute // ### [1.44.11](https://indike.org/pramana/in.purana.linga.1.44.11) kiṃ sāgarāñśoṣayāmo yamaṃ vā saha kiṅkaraiḥ hanmo mṛtyusutāṃ mṛtyuṃ paśuvaddhanma padmajam // ### [1.44.12](https://indike.org/pramana/in.purana.linga.1.44.12) baddhvendraṃ saha devaiś ca saha viṣṇuṃ ca vāyunā ānayāmaḥ susaṃkruddhā daityānvā saha dānavaiḥ // ### [1.44.13](https://indike.org/pramana/in.purana.linga.1.44.13) kasyādya vyasanaṃ ghoraṃ kariṣyāmastavājñayā kasya vādyotsavo deva sarvakāmasamṛddhaye // ### [1.44.14](https://indike.org/pramana/in.purana.linga.1.44.14) tāṃstathāvādinaḥ sarvān gaṇeśān sarvasaṃmatān uvāca devaḥ sampūjya koṭikoṭiśatānprabhuḥ // ### [1.44.15](https://indike.org/pramana/in.purana.linga.1.44.15) śṛṇudhvaṃ yatkṛte yūyam ihāhūtā jagaddhitāḥ śrutvā ca prayatātmānaḥ kurudhvaṃ tadaśaṅkitāḥ // ### [1.44.16](https://indike.org/pramana/in.purana.linga.1.44.16) nandīśvaro 'yaṃ putro naḥ sarveṣāmīśvareśvaraḥ vipro 'yaṃ nāyakaścaiva senānīr vaḥ samṛddhimān // ### [1.44.17](https://indike.org/pramana/in.purana.linga.1.44.17) tamimaṃ mama saṃdeśād yūyaṃ sarve 'pi saṃmatāḥ senānyam abhiṣiñcadhvaṃ mahāyogapatiṃ patim // ### [1.44.18](https://indike.org/pramana/in.purana.linga.1.44.18) evamuktā bhagavatā gaṇapāḥ sarva eva te evamastviti saṃmantrya saṃbhārānāharaṃstataḥ // ### [1.44.19](https://indike.org/pramana/in.purana.linga.1.44.19) tasya sarvāśrayaṃ divyaṃ jāṃbūnadamayaṃ śubham āsanaṃ merusaṃkāśaṃ manoharam upāharan // ### [1.44.20](https://indike.org/pramana/in.purana.linga.1.44.20) naikastaṃbhamayaṃ cāpi cāmīkaravaraprabham muktādāmāvalambaṃ ca maṇiratnāvabhāsitam // ### [1.44.21](https://indike.org/pramana/in.purana.linga.1.44.21) staṃbhaiś ca vaiḍūryamayaiḥ kiṅkiṇījālasaṃvṛtam cāruratnakasaṃyuktaṃ maṇḍapaṃ viśvatomukham // ### [1.44.22](https://indike.org/pramana/in.purana.linga.1.44.22) kṛtvā vinyasya tanmadhye tadāsanavaraṃ śubham tasyāgrataḥ pādapīṭhaṃ nīlavajrāvabhāsitam // ### [1.44.23](https://indike.org/pramana/in.purana.linga.1.44.23) cakruḥ pādapratiṣṭhārthaṃ kalaśau cāsya pārśvagau sampūrṇau paramāmbhobhir aravindāvṛtānanau // ### [1.44.24](https://indike.org/pramana/in.purana.linga.1.44.24) kalaśānāṃ sahasraṃ tu sauvarṇaṃ rājataṃ tathā tāmrajaṃ mṛnmayaṃ caiva sarvatīrthāmbupūritam // ### [1.44.25](https://indike.org/pramana/in.purana.linga.1.44.25) vāsoyugaṃ tathā divyaṃ gandhaṃ divyaṃ tathaiva ca keyūre kuṇḍale caiva mukuṭaṃ hārameva ca // ### [1.44.26](https://indike.org/pramana/in.purana.linga.1.44.26) chatraṃ śataśalākaṃ ca vālavyajanameva ca dattaṃ mahātmanā tena brahmaṇā parameṣṭhinā // ### [1.44.27](https://indike.org/pramana/in.purana.linga.1.44.27) śaṅkhahārāṅgagaureṇa pṛṣṭhenāpi virājitam vyajanaṃ candraśubhraṃ ca hemadaṇḍaṃ sucāmaram // ### [1.44.28](https://indike.org/pramana/in.purana.linga.1.44.28) airāvataḥ supratīko gajāvetau supūjitau mukuṭaṃ kāñcanaṃ caiva nirmitaṃ viśvakarmaṇā // ### [1.44.29](https://indike.org/pramana/in.purana.linga.1.44.29) kuṇḍale cāmale divye vajraṃ caiva varāyudham jāṃbūnadamayaṃ sūtraṃ keyūradvayameva ca // ### [1.44.30](https://indike.org/pramana/in.purana.linga.1.44.30) sambhārāṇi tathānyāni vividhāni bahūnyapi samantān ninyur avyagrā gaṇapā devasaṃmatāḥ // ### [1.44.31](https://indike.org/pramana/in.purana.linga.1.44.31) tato devāś ca sendrāś ca nārāyaṇamukhās tathā munayo bhagavānbrahmā navabrahmāṇa eva ca // ### [1.44.32](https://indike.org/pramana/in.purana.linga.1.44.32) devaiś ca lokāḥ sarve te tato jagmurmudā yutāḥ teṣvāgateṣu sarveṣu bhagavānparameśvaraḥ // ### [1.44.33](https://indike.org/pramana/in.purana.linga.1.44.33) sarvakāryavidhiṃ kartum ādideśa pitāmaham pitāmaho 'pi bhagavān niyogādeva tasya tu // ### [1.44.34](https://indike.org/pramana/in.purana.linga.1.44.34) cakāra sarvaṃ bhagavān abhiṣekaṃ samāhitaḥ arcayitvā tato brahmā svayamevābhyaṣecayat // ### [1.44.35](https://indike.org/pramana/in.purana.linga.1.44.35) tato viṣṇustataḥ śakro lokapālāstathaiva ca abhyaṣiñcanta vidhivad gaṇendraṃ śivaśāsanāt // ### [1.44.36](https://indike.org/pramana/in.purana.linga.1.44.36) ṛṣayastuṣṭuvuścaiva pitā mahapurogamāḥ stutavatsu tatasteṣu viṣṇuḥ sarvajagatpatiḥ // ### [1.44.37](https://indike.org/pramana/in.purana.linga.1.44.37) śirasyañjalimādāya tuṣṭāva ca samāhitaḥ prāñjaliḥ praṇato bhūtvā jayaśabdaṃ cakāra ca // ### [1.44.38](https://indike.org/pramana/in.purana.linga.1.44.38) tato gaṇādhipāḥ sarve tato devāstato 'surāḥ evaṃ stutaścābhiṣikto devaiḥ sabrahmakaistadā // ### [1.44.39](https://indike.org/pramana/in.purana.linga.1.44.39) udvāhaś ca kṛtastatra niyogātparameṣṭhinaḥ marutāṃ ca sutā devī suyaśākhyā babhūva yā // ### [1.44.40](https://indike.org/pramana/in.purana.linga.1.44.40) labdhaṃ śaśiprabhaṃ chatraṃ tayā tatra vibhūṣitam cāmare cāmarāsaktahastāgraiḥ strīgaṇairyutā // ### [1.44.41](https://indike.org/pramana/in.purana.linga.1.44.41) siṃhāsanaṃ ca paramaṃ tayā cādhiṣṭhitaṃ mayā alaṃkṛtā mahālakṣmyā mukuṭādyaiḥ subhūṣaṇaiḥ // ### [1.44.42](https://indike.org/pramana/in.purana.linga.1.44.42) labdho hāraś ca paramo devyāḥ kaṇṭhagatas tathā vṛṣendraś ca sito nāgaḥ siṃhaḥ siṃhadhvajas tathā // ### [1.44.43](https://indike.org/pramana/in.purana.linga.1.44.43) rathaś ca hemacchatraṃ ca candrabiṃbasamaprabham adyāpi sadṛśaḥ kaścin mayā nāsti vibhuḥ kvacit // ### [1.44.44](https://indike.org/pramana/in.purana.linga.1.44.44) sānvayaṃ ca gṛhītveśas tathā saṃbandhibāndhavaiḥ āruhya vṛṣamīśāno mayā devyā gataḥ śivaḥ // ### [1.44.45](https://indike.org/pramana/in.purana.linga.1.44.45) tadā devīṃ bhavaṃ dṛṣṭvā mayā ca prārthayan gaṇaiḥ munidevarṣayaḥ siddhā ājñāṃ pāśupatīṃ dvijāḥ // ### [1.44.46](https://indike.org/pramana/in.purana.linga.1.44.46) athājñāṃ pradadau teṣām arhāṇām ājñayā vibhoḥ nandiko nagajābhartus teṣāṃ pāśupatīṃ śubhām // ### [1.44.47](https://indike.org/pramana/in.purana.linga.1.44.47) tasmāddhi munayo labdhvā tadājñāṃ munipuṅgavāt bhavabhaktāstadā cāsaṃs tasmādevaṃ samarcayet // ### [1.44.48](https://indike.org/pramana/in.purana.linga.1.44.48) namaskāravihīnastu nāma udgirayedbhave brahmaghnadaśasaṃtulyaṃ tasya pāpaṃ garīyasam // ### [1.44.49](https://indike.org/pramana/in.purana.linga.1.44.49) tasmātsarvaprakāreṇa namaskārādimuccaret ādau kuryānnamaskāraṃ tadante śivatāṃ vrajet // ### [1.44.49.p1](https://indike.org/pramana/in.purana.linga.1.44.49.p1) iti śrīliṅgamahāpurāṇe pūrvabhāge nandikeśvarābhiṣeko nāma catuścatvāriṃśo 'dhyāyaḥ ## Commentaries (2) - [Śivatosaṇī Liṅgapurāṇaṭīkā](https://indike.org/pramana/in.purana.linga!ganesa.47.1) — Gaṇeśa Bhaṭṭa, Sanskrit - [Śivatoṣiṇī](https://indike.org/pramana/in.purana.linga!ganesa-ballala-natu.47.1) — Gaṇeśa Ballāla Nātū, Sanskrit ## Linked texts (6) - [Skandapurāṇa (early; "Ambikākhaṇḍa")](https://indike.org/pramana/in.purana.skanda*early.23.71) — Sanskrit - [Liṅga](https://indike.org/pramana/in.purana.linga-anon.50.1) — Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.50.1) — Ativīrarāma Pāṇṭiyar 1500, Sanskrit - [Ambikākhaṇḍa](https://indike.org/pramana/in.purana.upa.sakta.ambikakhanda.24.75) — Sanskrit - [Śivatattvaratnākara](https://indike.org/pramana/in.niti.dharma.rajadharma.sivatattvaratnakara.31.121) — Basappa Nāyaka 1684, Sanskrit - [Śivattvaratnākara](https://indike.org/pramana/in.med.pasu.sivattvaratnakara.31.121) — Basava, Sanskrit --- Source: [https://indike.org/pramana/in.purana.linga.1.44](https://indike.org/pramana/in.purana.linga.1.44) · Pramāṇa