[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 1.48 # Lingapurana 1.48 Liṅgapurāṇa 1.48 - **Language:** Sanskrit ## Contents - [1.48.35](https://indike.org/pramana/in.purana.linga.1.48.35) — 1 part ### [1.48.1](https://indike.org/pramana/in.purana.linga.1.48.1) suta uvāca asya dvīpasya madhye tu merur nāma mahāgiriḥ nānāratnamayaiḥ śṛṅgaiḥ sthitaḥ sthitimatāṃ varaḥ // ### [1.48.2](https://indike.org/pramana/in.purana.linga.1.48.2) caturaśītisāhasram utsedhena prakīrtitaḥ praviṣṭaḥ ṣoḍaśādhastād vistṛtaḥ ṣoḍaśaiva tu // ### [1.48.3](https://indike.org/pramana/in.purana.linga.1.48.3) śarāvavat saṃsthitatvād dvātriṃśanmūrdhni vistṛtaḥ vistārāt triguṇaś cāsya pariṇāho 'numaṇḍalaḥ // ### [1.48.4](https://indike.org/pramana/in.purana.linga.1.48.4) haimīkṛto maheśasya śubhāṅgasparśanena ca dhattūrapuṣpasaṃkāśaḥ sarvadevaniketanaḥ // ### [1.48.5](https://indike.org/pramana/in.purana.linga.1.48.5) krīḍābhūmiś ca devānām anekāścaryasaṃyutaḥ lakṣayojana āyāmas tasyaivaṃ tu mahāgireḥ // ### [1.48.6](https://indike.org/pramana/in.purana.linga.1.48.6) tataḥ ṣoḍaśasāhasraṃ yojanāni kṣiteradhaḥ śeṣaṃ copari viprendrā dharāyāstasya śṛṅgiṇaḥ // ### [1.48.7](https://indike.org/pramana/in.purana.linga.1.48.7) mūlāyāmapramāṇaṃ tu vistārān mūlato gireḥ ūcurvistāramasyaiva dviguṇaṃ mūlato gireḥ // ### [1.48.8](https://indike.org/pramana/in.purana.linga.1.48.8) pūrvataḥ padmarāgābho dakṣiṇe hemasannibhaḥ paścime nīlasaṃkāśa uttare vidrumaprabhaḥ // ### [1.48.9](https://indike.org/pramana/in.purana.linga.1.48.9) amarāvatī pūrvabhāge nānāprāsādasaṃkulā nānādevagaṇaiḥ kīrṇā maṇijālasamāvṛtā // ### [1.48.10](https://indike.org/pramana/in.purana.linga.1.48.10) gopurairvividhākārair hemaratnavibhūṣitaiḥ toraṇair hemacitraistu maṇikḷptaiḥ pathi sthitaiḥ // ### [1.48.11](https://indike.org/pramana/in.purana.linga.1.48.11) saṃlāpālāpakuśalaiḥ sarvābharaṇabhūṣitaiḥ stanabhāravinamraiś ca madaghūrṇitalocanaiḥ // ### [1.48.12](https://indike.org/pramana/in.purana.linga.1.48.12) strīsahasraiḥ samākīrṇā cāpsarobhiḥ samantataḥ dīrghikābhirvicitrābhiḥ phullāmbhoruhasaṃkulaiḥ // ### [1.48.13](https://indike.org/pramana/in.purana.linga.1.48.13) hemasopānasaṃyuktair hemasaikatarāśibhiḥ nīlotpalaiścotpalaiś ca haimaiścāpi sugandhibhiḥ // ### [1.48.14](https://indike.org/pramana/in.purana.linga.1.48.14) evaṃvidhaistaṭākaiś ca nadībhiś ca nadairyutā virājate purī śubhrā tayāsau parvataḥ śubhaḥ // ### [1.48.15](https://indike.org/pramana/in.purana.linga.1.48.15) tejasvinī nāma purī āgneyyāṃ pāvakasya tu amarāvatīsamā divyā sarvabhogasamanvitā // ### [1.48.16](https://indike.org/pramana/in.purana.linga.1.48.16) vaivasvatī dakṣiṇe tu yamasya yamināṃ varāḥ bhavanairāvṛtā divyair jāṃbūnadamayaiḥ śubhaiḥ // ### [1.48.17](https://indike.org/pramana/in.purana.linga.1.48.17) nairṛte kṛṣṇavarṇā ca tathā śuddhavatī śubhā tādṛśī gandhavantī ca vāyavyāṃ diśi śobhanā // ### [1.48.18](https://indike.org/pramana/in.purana.linga.1.48.18) mahodayā cottare ca aiśānyāṃ tu yaśovatī parvatasya diganteṣu śobhate divi sarvadā // ### [1.48.19](https://indike.org/pramana/in.purana.linga.1.48.19) brahmaviṣṇumaheśānāṃ tathānyeṣāṃ niketanam sarvabhogayutaṃ puṇyaṃ dīrghikābhirnagottamam // ### [1.48.20](https://indike.org/pramana/in.purana.linga.1.48.20) siddhairyakṣaistu sampūrṇaṃ gandharvairmunipuṅgavaiḥ tathānyairvividhākārair bhūtasaṃghaiś caturvidhaiḥ // ### [1.48.21](https://indike.org/pramana/in.purana.linga.1.48.21) girerupari viprendrāḥ śuddhasphaṭikasannibham sahasrabhaumaṃ vistīrṇaṃ vimānaṃ vāmataḥ sthitam // ### [1.48.22](https://indike.org/pramana/in.purana.linga.1.48.22) tasminmahābhujaḥ śarvaḥ somasūryāgnilocanaḥ siṃhāsane maṇimaye devyāste ṣaṇmukhena ca // ### [1.48.23](https://indike.org/pramana/in.purana.linga.1.48.23) harestadardhaṃ vistīrṇaṃ vimānaṃ tatra so 'pi ca padmarāgamayaṃ divyaṃ padmajasya ca dakṣiṇe // ### [1.48.24](https://indike.org/pramana/in.purana.linga.1.48.24) tasmin śakrasya vipulaṃ puraṃ ramyaṃ yamasya ca somasya varuṇasyātha nirṛteḥ pāvakasya ca // ### [1.48.25](https://indike.org/pramana/in.purana.linga.1.48.25) vāyoścaiva tu rudrasya śarvālayasamantataḥ teṣāṃ teṣāṃ vimāneṣu divyeṣu vividheṣu ca // ### [1.48.26](https://indike.org/pramana/in.purana.linga.1.48.26) īśānyāmīśvarakṣetre nityārcā ca vyavasthitā siddheśvaraiś ca bhagavāñ chailādiḥ śiṣyasaṃmataḥ // ### [1.48.27](https://indike.org/pramana/in.purana.linga.1.48.27) sanatkumāraḥ siddhaistu sukhāsīnaḥ sureśvaraḥ sanakaś ca sanandaś ca sadṛśāś ca sahasraśaḥ // ### [1.48.28](https://indike.org/pramana/in.purana.linga.1.48.28) yogabhūmiḥ kvacittasmin bhogabhūmiḥ kvacitkvacit bālasūryapratīkāśaṃ vimānaṃ tatra śobhanam // ### [1.48.29](https://indike.org/pramana/in.purana.linga.1.48.29) śailādinaḥ śubhaṃ cāsti tasminnāste gaṇeśvaraḥ ṣaṇmukhasya gaṇeśasya gaṇānāṃ tu sahasraśaḥ // ### [1.48.30](https://indike.org/pramana/in.purana.linga.1.48.30) suyaśāyāḥ sunetrāyāḥ mātṝṇāṃ madanasya ca tasya jambūnadī nāma mūlamāveṣṭya saṃsthitā // ### [1.48.31](https://indike.org/pramana/in.purana.linga.1.48.31) tasya dakṣiṇapārśve tu jambūvṛkṣaḥ suśobhanaḥ atyucchritaḥ suvistīrṇaḥ sarvakālaphalapradaḥ // ### [1.48.32](https://indike.org/pramana/in.purana.linga.1.48.32) meroḥ samantādvistīrṇaṃ śubhaṃ varṣamilāvṛtam tatra jambūphalāhārāḥ keciccāmṛtabhojanāḥ // ### [1.48.33](https://indike.org/pramana/in.purana.linga.1.48.33) jāṃbūnadasamaprakhyā nānāvarṇāś ca bhoginaḥ merupādāśrito viprā dvīpo 'yaṃ madhyamaḥ śubhaḥ // ### [1.48.34](https://indike.org/pramana/in.purana.linga.1.48.34) navavarṣānvitaścaiva nadīnadagirīśvaraiḥ navavarṣaṃ tu vakṣyāmi jaṃbūdvīpaṃ yathātatham // ### [1.48.35](https://indike.org/pramana/in.purana.linga.1.48.35) vistārānmaṇḍalāccaiva yojanaiś ca nibodhata // ### [1.48.35.p1](https://indike.org/pramana/in.purana.linga.1.48.35.p1) iti śrīliṅgamahāpurāṇe pūrvabhāge 'ṣṭacatvāriṃśo 'dhyāyaḥ ## Commentaries (1) - [Śivatosaṇī Liṅgapurāṇaṭīkā](https://indike.org/pramana/in.purana.linga!ganesa.51.1) — Gaṇeśa Bhaṭṭa, Sanskrit ## Linked texts (5) - [Critical edition (BORI)](https://indike.org/pramana/in.lit.mahabharata.vyasa*crit.6.7.15) — Sanskrit - [Varāhapurāṇa](https://indike.org/pramana/in.purana.varaha.75.1) — Vyāsa, Sanskrit - [Brahmāṇḍapurāṇa](https://indike.org/pramana/in.purana.brahmanda.1.15.8) — Vyāsa, Sanskrit - [Vāyupurāṇa](https://indike.org/pramana/in.purana.vayu.1.34.11) — Vyāsa, Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.54.1) — Ativīrarāma Pāṇṭiyar 1500, Sanskrit --- Source: [https://indike.org/pramana/in.purana.linga.1.48](https://indike.org/pramana/in.purana.linga.1.48) · Pramāṇa