[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 1.49 # Lingapurana 1.49 Liṅgapurāṇa 1.49 - **Language:** Sanskrit ## Contents - [1.49.69](https://indike.org/pramana/in.purana.linga.1.49.69) — 1 part ### [1.49.1](https://indike.org/pramana/in.purana.linga.1.49.1) sūta uvāca śatamekaṃ sahasrāṇāṃ yojanānāṃ sa tu smṛtaḥ anu dvīpaṃ sahasrāṇāṃ dviguṇaṃ dviguṇottaram // ### [1.49.2](https://indike.org/pramana/in.purana.linga.1.49.2) pañcāśatkoṭivistīrṇā sasamudrā dharā smṛtā dvīpaiś ca saptabhir yuktā lokālokāvṛtā śubhā // ### [1.49.3](https://indike.org/pramana/in.purana.linga.1.49.3) nīlastathottare meroḥ śvetastasyottare punaḥ śṛṅgī tasyottare viprās trayaste varṣaparvatāḥ // ### [1.49.4](https://indike.org/pramana/in.purana.linga.1.49.4) jaṭharo devakūṭaś ca pūrvasyāṃ diśi parvatau niṣadho dakṣiṇe meros tasya dakṣiṇato giriḥ hemakūṭa iti khyāto himavāṃstasya dakṣiṇe // ### [1.49.5](https://indike.org/pramana/in.purana.linga.1.49.5) meroḥ paścimataścaiva parvatau dvau dharādharau mālyavāngandhamādaś ca dvāvetāvudagāyatau // ### [1.49.6](https://indike.org/pramana/in.purana.linga.1.49.6) ete parvatarājānaḥ siddhacāraṇasevitāḥ teṣām antaraviṣkambho navasāhasramekaśaḥ // ### [1.49.7](https://indike.org/pramana/in.purana.linga.1.49.7) idaṃ haimavataṃ varṣaṃ bhārataṃ nāma viśrutam hemakūṭaṃ paraṃ tasmān nāmnā kiṃpuruṣaṃ smṛtam // ### [1.49.8](https://indike.org/pramana/in.purana.linga.1.49.8) naiṣadhaṃ hemakūṭāttu harivarṣaṃ taducyate harivarṣātparaṃ caiva meroḥ śubhamilāvṛtam // ### [1.49.9](https://indike.org/pramana/in.purana.linga.1.49.9) ilāvṛtātparaṃ nīlaṃ ramyakaṃ nāma viśrutam ramyātparataraṃ śvetaṃ vikhyātaṃ taddhiraṇmayam // ### [1.49.10](https://indike.org/pramana/in.purana.linga.1.49.10) hiraṇmayātparaṃ cāpi śṛṅgī caiva kuruḥ smṛtaḥ dhanuḥsaṃsthe tu vijñeye dve varṣe dakṣiṇottare // ### [1.49.11](https://indike.org/pramana/in.purana.linga.1.49.11) dīrghāṇi tatra catvāri madhyatastadilāvṛtam meroḥ paścimapūrveṇa dve tu dīrghetare smṛte // ### [1.49.12](https://indike.org/pramana/in.purana.linga.1.49.12) arvāktu niṣadhasyātha vedyardhaṃ cottaraṃ smṛtam vedyardhe dakṣiṇe trīṇi varṣāṇi trīṇi cottare // ### [1.49.13](https://indike.org/pramana/in.purana.linga.1.49.13) tayormadhye ca vijñeyaṃ merumadhyamilāvṛtam dakṣiṇena tu nīlasya niṣadhasyottareṇa tu // ### [1.49.14](https://indike.org/pramana/in.purana.linga.1.49.14) udagāyato mahāśailo mālyavānnāma parvataḥ yojanānāṃ sahasre dve upariṣṭāttu vistṛtaḥ // ### [1.49.15](https://indike.org/pramana/in.purana.linga.1.49.15) āyāmataścatustriṃśat sahasrāṇi prakīrtitaḥ tasya pratīcyāṃ vijñeyaḥ parvato gandhamādanaḥ // ### [1.49.16](https://indike.org/pramana/in.purana.linga.1.49.16) āyāmataḥ sa vijñeyo mālyavāniva vistṛtaḥ jambūdvīpasya vistārāt samena tu samantataḥ // ### [1.49.17](https://indike.org/pramana/in.purana.linga.1.49.17) prāgāyatāḥ suparvāṇaḥ ṣaḍete varṣaparvatāḥ avagāḍhāścobhayataḥ samudrau pūrvapaścimau // ### [1.49.18](https://indike.org/pramana/in.purana.linga.1.49.18) himaprāyastu himavān hemakūṭastu hemavān taruṇādityasaṃkāśo hairaṇyo niṣadhaḥ smṛtaḥ // ### [1.49.19](https://indike.org/pramana/in.purana.linga.1.49.19) caturvarṇaḥ sasauvarṇo meruścordhvāyataḥ smṛtaḥ vṛttākṛtiparīṇāhaś caturasraḥ samutthitaḥ // ### [1.49.20](https://indike.org/pramana/in.purana.linga.1.49.20) nīlaś ca vaiḍūryamayaḥ śvetaḥ śuklo hiraṇmayaḥ mayūrabarhavarṇastu śātakuṃbhas triśṛṅgavān // ### [1.49.21](https://indike.org/pramana/in.purana.linga.1.49.21) evaṃ saṃkṣepataḥ proktāḥ punaḥ śṛṇu girīśvarān mandaro devakūṭaś ca pūrvasyāṃ diśi parvatau // ### [1.49.22](https://indike.org/pramana/in.purana.linga.1.49.22) kailāso gandhamādaś ca hemavāṃścaiva parvatau pūrvataś cāyatāvetāv arṇavāntarvyavasthitau // ### [1.49.23](https://indike.org/pramana/in.purana.linga.1.49.23) niṣadhaḥ pāriyātraś ca dvāvetau varaparvatau yathā pūrvau tathā yāmyāv etau paścimataḥ śritau // ### [1.49.24](https://indike.org/pramana/in.purana.linga.1.49.24) triśṛṅgo jāruciścaiva uttarau varaparvatau pūrvataś cāyatāvetāv arṇavāntarvyavasthitau // ### [1.49.25](https://indike.org/pramana/in.purana.linga.1.49.25) maryādāparvatān etān aṣṭāvāhurmanīṣiṇaḥ yo 'sau merurdvijaśreṣṭhāḥ prāṃśuḥ kanakaparvataḥ // ### [1.49.26](https://indike.org/pramana/in.purana.linga.1.49.26) tasya pādāstu catvāraś caturdikṣu nagottamāḥ yairviṣṭabdhā na calati saptadvīpavatī mahī // ### [1.49.27](https://indike.org/pramana/in.purana.linga.1.49.27) daśayojanasāhasram āyāmas teṣu paṭhyate pūrve tu mandaro nāma dakṣiṇe gandhamādanaḥ // ### [1.49.28](https://indike.org/pramana/in.purana.linga.1.49.28) vipulaḥ paścime pārśve supārśvaścottare smṛtaḥ mahāvṛkṣāḥ samutpannāś catvāro dvīpaketavaḥ // ### [1.49.29](https://indike.org/pramana/in.purana.linga.1.49.29) mandarasya gireḥ śṛṅge mahāvṛkṣaḥ saketurāṭ pralambaśākhāśikharaḥ kadambaś caityapādapaḥ // ### [1.49.30](https://indike.org/pramana/in.purana.linga.1.49.30) dakṣiṇasyāpi śailasya śikhare devasevitā jambūḥ sadā puṇyaphalā sadā mālyopaśobhitā // ### [1.49.31](https://indike.org/pramana/in.purana.linga.1.49.31) saketur dakṣiṇe dvīpe jambūrlokeṣu viśrutā vipulasyāpi śailasya paścime ca mahātmanaḥ // ### [1.49.32](https://indike.org/pramana/in.purana.linga.1.49.32) saṃjātaḥ śikhare 'śvatthaḥ sa mahān caityapādapaḥ supārśvasyottarasyāpi śṛṅge jāto mahādrumaḥ // ### [1.49.33](https://indike.org/pramana/in.purana.linga.1.49.33) nyagrodho vipulaskandho 'nekayojanamaṇḍalaḥ teṣāṃ caturṇāṃ vakṣyāmi śailendrāṇāṃ yathākramam // ### [1.49.34](https://indike.org/pramana/in.purana.linga.1.49.34) amānuṣyāṇi ramyāṇi sarvakālartukāni ca manoharāṇi catvāri devakrīḍanakāni ca // ### [1.49.35](https://indike.org/pramana/in.purana.linga.1.49.35) vanāni vai caturdikṣu nāmatastu nibodhata pūrve caitrarathaṃ nāma dakṣiṇe gandhamādanam // ### [1.49.36](https://indike.org/pramana/in.purana.linga.1.49.36) vaibhrājaṃ paścime vidyād uttare saviturvanam mitreśvaraṃ tu pūrve tu ṣaṣṭheśvaram ataḥ param // ### [1.49.37](https://indike.org/pramana/in.purana.linga.1.49.37) varyeśvaraṃ paścime tu uttare cāmrakeśvaram mahāsarāṃsi ca tathā catvāri munipuṅgavāḥ // ### [1.49.38](https://indike.org/pramana/in.purana.linga.1.49.38) yatra krīḍanti munayaḥ parvateṣu vaneṣu ca aruṇodaṃ saraḥ pūrvaṃ dakṣiṇaṃ mānasaṃ smṛtam // ### [1.49.39](https://indike.org/pramana/in.purana.linga.1.49.39) sitodaṃ paścimasaro mahābhadraṃ tathottaram śākhasya dakṣiṇe kṣetraṃ viśākhasya ca paścime // ### [1.49.40](https://indike.org/pramana/in.purana.linga.1.49.40) uttare naigameyasya kumārasya ca pūrvataḥ aruṇodasya pūrveṇa śailendrā nāmataḥ smṛtāḥ // ### [1.49.41](https://indike.org/pramana/in.purana.linga.1.49.41) tāṃstu saṃkṣepato vakṣye na śakyaṃ vistareṇa tu sitāntaś ca kuraṇḍaś ca kuraraścācalottamaḥ // ### [1.49.42](https://indike.org/pramana/in.purana.linga.1.49.42) vikaro maṇiśailaś ca vṛkṣavāṃścācalottamaḥ mahānīlo 'tha rucakaḥ sabindurdarduras tathā // ### [1.49.43](https://indike.org/pramana/in.purana.linga.1.49.43) veṇumāṃś ca sameghaś ca niṣadho devaparvataḥ ityete parvatavarā hy anye ca girayas tathā // ### [1.49.44](https://indike.org/pramana/in.purana.linga.1.49.44) pūrveṇa mandarasyaite siddhāvāsā udāhṛtāḥ teṣu teṣu girīndreṣu guhāsu ca vaneṣu ca // ### [1.49.45](https://indike.org/pramana/in.purana.linga.1.49.45) rudrakṣetrāṇi divyāni viṣṇornārāyaṇasya ca saraso mānasasyeha dakṣiṇena mahācalāḥ // ### [1.49.46](https://indike.org/pramana/in.purana.linga.1.49.46) ye kīrtyamānāstānsarvān saṃkṣipya pravadāmyaham śailaś ca viśirāścaiva śikharaścācalottamaḥ // ### [1.49.47](https://indike.org/pramana/in.purana.linga.1.49.47) ekaśṛṅgo mahāśūlo gajaśailaḥ piśācakaḥ pañcaśailo 'tha kailāso himavāṃścācalottamaḥ // ### [1.49.48](https://indike.org/pramana/in.purana.linga.1.49.48) ityete devacaritā utkaṭāḥ parvatottamāḥ teṣu teṣu ca sarveṣu parvateṣu vaneṣu ca // ### [1.49.49](https://indike.org/pramana/in.purana.linga.1.49.49) rudrakṣetrāṇi divyāni sthāpitāni surottamaiḥ digbhāge dakṣiṇe proktāḥ paścime ca vadāmi vaḥ // ### [1.49.50](https://indike.org/pramana/in.purana.linga.1.49.50) apareṇa sitodaś ca surapaś ca mahābalaḥ kumudo madhumāṃścaiva hy añjano mukuṭas tathā // ### [1.49.51](https://indike.org/pramana/in.purana.linga.1.49.51) kṛṣṇaś ca pāṇḍuraścaiva sahasraśikharaś ca yaḥ pārijātaś ca śailendraḥ śrīśṛṅgaścācalottamaḥ // ### [1.49.52](https://indike.org/pramana/in.purana.linga.1.49.52) ityete devacaritā utkaṭāḥ parvatottamāḥ sarve paścimadigbhāge rudrakṣetrasamanvitāḥ // ### [1.49.53](https://indike.org/pramana/in.purana.linga.1.49.53) mahābhadrasya sarasaś cottare ca mahābalāḥ ye sthitāḥ kīrtyamānāṃstān saṃkṣipyeha nibodhata // ### [1.49.54](https://indike.org/pramana/in.purana.linga.1.49.54) śaṅkhakūṭo mahāśailo vṛṣabho haṃsaparvataḥ nāgaś ca kapilaścaiva indraśailaś ca sānumān // ### [1.49.55](https://indike.org/pramana/in.purana.linga.1.49.55) nīlaḥ kaṇṭakaśṛṅgaś ca śataśṛṅgaś ca parvataḥ puṣpakośaḥ praśailaś ca virajaścācalottamaḥ // ### [1.49.56](https://indike.org/pramana/in.purana.linga.1.49.56) varāhaparvataścaiva mayūraścācalottamaḥ jārudhiścaiva śailendra eta uttarasaṃsthitāḥ // ### [1.49.57](https://indike.org/pramana/in.purana.linga.1.49.57) teṣu śaileṣu divyeṣu devadevasya śūlinaḥ asaṃkhyātāni divyāni vimānāni sahasraśaḥ // ### [1.49.58](https://indike.org/pramana/in.purana.linga.1.49.58) eteṣāṃ śailamukhyānām antareṣu yathākramam santi caivāntaradroṇyaḥ sarāṃsyupavanāni ca // ### [1.49.59](https://indike.org/pramana/in.purana.linga.1.49.59) vasanti devā munayaḥ siddhāś ca śivabhāvitāḥ kṛtavāsāḥ sapatnīkāḥ prasādātparameṣṭhinaḥ // ### [1.49.60](https://indike.org/pramana/in.purana.linga.1.49.60) lakṣmyādyānāṃ bilvavane kakubhe kaśyapādayaḥ tathā tālavane proktam indropendroragātmanām // ### [1.49.61](https://indike.org/pramana/in.purana.linga.1.49.61) uduṃbare kardamasya tathānyeṣāṃ mahātmanām vidyādharāṇāṃ siddhānāṃ puṇye tvāmravane śubhe // ### [1.49.62](https://indike.org/pramana/in.purana.linga.1.49.62) nāgānāṃ siddhasaṃghānāṃ tathā niṃbavane sthitiḥ sūryasya kiṃśukavane tathā rudragaṇasya ca // ### [1.49.63](https://indike.org/pramana/in.purana.linga.1.49.63) bījapūravane puṇye devācāryo vyavasthitaḥ kaumude tu vane viṣṇupramukhānāṃ mahātmanām // ### [1.49.64](https://indike.org/pramana/in.purana.linga.1.49.64) sthalapadmavanāntasthanyagrodhe 'śeṣabhoginaḥ śeṣastvaśeṣajagatāṃ patirāste 'tigarvitaḥ // ### [1.49.65](https://indike.org/pramana/in.purana.linga.1.49.65) sa eva jagatāṃ kālaḥ pātāle ca vyavasthitaḥ viṣṇorviśvagurormūrtir divyaḥ sākṣāddhalāyudhaḥ // ### [1.49.66](https://indike.org/pramana/in.purana.linga.1.49.66) śayanaṃ devadevasya sa hareḥ kaṅkaṇaṃ vibhoḥ vane panasavṛkṣāṇāṃ saśukrā dānavādayaḥ // ### [1.49.67](https://indike.org/pramana/in.purana.linga.1.49.67) kinnarairuragāścaiva viśākhakavane sthitāḥ manoharavane vṛkṣāḥ sarvakoṭisamanvitāḥ // ### [1.49.68](https://indike.org/pramana/in.purana.linga.1.49.68) nandīśvaro gaṇavaraiḥ stūyamāno vyavasthitaḥ saṃtānakasthalīmadhye sākṣāddevī sarasvatī // ### [1.49.69](https://indike.org/pramana/in.purana.linga.1.49.69) evaṃ saṃkṣepataḥ proktā vaneṣu vanavāsinaḥ asaṃkhyātā mayāpyatra vaktuṃ no vistareṇa tu // ### [1.49.69.p1](https://indike.org/pramana/in.purana.linga.1.49.69.p1) iti śrīliṅgamahāpurāṇe pūrvabhāge ekonapañcāśattamo 'dhyāyaḥ ## Commentaries (1) - [Śivatosaṇī Liṅgapurāṇaṭīkā](https://indike.org/pramana/in.purana.linga!ganesa.52.65) — Gaṇeśa Bhaṭṭa, Sanskrit ## Linked texts (5) - [Vāyupurāṇa](https://indike.org/pramana/in.purana.vayu.1.34.23) — Vyāsa, Sanskrit - [Varāhapurāṇa](https://indike.org/pramana/in.purana.varaha.75.19) — Vyāsa, Sanskrit - [Brahmāṇḍapurāṇa](https://indike.org/pramana/in.purana.brahmanda.1.15.23) — Vyāsa, Sanskrit - [Viṣṇupurāṇa (critical edition)](https://indike.org/pramana/in.purana.visnu*crit.2.2.43) — Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.55.1) — Ativīrarāma Pāṇṭiyar 1500, Sanskrit --- Source: [https://indike.org/pramana/in.purana.linga.1.49](https://indike.org/pramana/in.purana.linga.1.49) · Pramāṇa