[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 1.4 # Lingapurana 1.4 Liṅgapurāṇa 1.4 - **Language:** Sanskrit ### [1.4.1](https://indike.org/pramana/in.purana.linga.1.4.1) sūta uvāca atha prāthamikasyeha yaḥ kālastadahaḥ smṛtam sargasya tādṛśī rātriḥ prākṛtasya samāsataḥ // ### [1.4.2](https://indike.org/pramana/in.purana.linga.1.4.2) divā sṛṣṭiṃ vikurute rajanyāṃ pralayaṃ vibhuḥ aupacārikamasyaitad ahorātraṃ na vidyate // ### [1.4.3](https://indike.org/pramana/in.purana.linga.1.4.3) divā vikṛtayaḥ sarve vikārā viśvadevatāḥ prajānāṃ patayaḥ sarve tiṣṭhantyanye maharṣayaḥ // ### [1.4.4](https://indike.org/pramana/in.purana.linga.1.4.4) rātrau sarve pralīyante niśānte sambhavanti ca ahastu tasya vaikalpo rātristādṛgvidhā smṛtā // ### [1.4.5](https://indike.org/pramana/in.purana.linga.1.4.5) caturyugasahasrānte manavastu caturdaśa catvāri tu sahasrāṇi vatsarāṇāṃ kṛtaṃ dvijāḥ // ### [1.4.6](https://indike.org/pramana/in.purana.linga.1.4.6) tāvacchatī ca vai saṃdhyā saṃdhyāṃśaś ca kṛtasya tu triśatī dviśatī saṃdhyā tathā caikaśatī kramāt // ### [1.4.7](https://indike.org/pramana/in.purana.linga.1.4.7) aṃśakaḥ ṣaṭśataṃ tasmāt kṛtasaṃdhyāṃśakaṃ vinā tridvyekasāhasramito vinā saṃdhyāṃśakena tu // ### [1.4.8](https://indike.org/pramana/in.purana.linga.1.4.8) tretādvāparatiṣyāṇāṃ kṛtasya kathayāmi vaḥ nimeṣapañcadaśakā kāṣṭhā svasthasya suvratāḥ // ### [1.4.9](https://indike.org/pramana/in.purana.linga.1.4.9) martyasya cākṣṇostasyāś ca tatas triṃśatikā kalā kalātriṃśatiko viprā muhūrta iti kalpitaḥ // ### [1.4.10](https://indike.org/pramana/in.purana.linga.1.4.10) muhūrtapañcadaśikā rajanī tādṛśaṃ tvahaḥ pitrye rātryahanī māsaḥ pravibhāgastayoḥ punaḥ // ### [1.4.11](https://indike.org/pramana/in.purana.linga.1.4.11) kṛṣṇapakṣastvahasteṣāṃ śuklaḥ svapnāya śarvarī triṃśadye mānuṣā māsāḥ pitryo māsastu sa smṛtaḥ // ### [1.4.12](https://indike.org/pramana/in.purana.linga.1.4.12) śatāni trīṇi māsānāṃ ṣaṣṭyā cāpyadhikāni vai pitryaḥ saṃvatsaro hyeṣa mānuṣeṇa vibhāvyate // ### [1.4.13](https://indike.org/pramana/in.purana.linga.1.4.13) mānuṣeṇaiva mānena varṣāṇāṃ yacchataṃ bhavet pitṝṇāṃ trīṇi varṣāṇi saṃkhyātānīha tāni vai // ### [1.4.14](https://indike.org/pramana/in.purana.linga.1.4.14) daśa vai dvyadhikā māsāḥ pitṛsaṃkhyeha saṃsmṛtā laukikenaiva mānena abdo yo mānuṣaḥ smṛtaḥ // ### [1.4.15](https://indike.org/pramana/in.purana.linga.1.4.15) etaddivyamahorātram iti laiṅge 'tra paṭhyate divye rātryahanī varṣaṃ pravibhāgastayoḥ punaḥ // ### [1.4.16](https://indike.org/pramana/in.purana.linga.1.4.16) ahastatrodagayanaṃ rātriḥ syāddakṣiṇāyanam ete rātryahanī divye prasaṃkhyāte viśeṣataḥ // ### [1.4.17](https://indike.org/pramana/in.purana.linga.1.4.17) triṃśadyāni tu varṣāṇi divyo māsastu sa smṛtaḥ mānuṣaṃ tu śataṃ viprā divyamāsāstrayastu te // ### [1.4.18](https://indike.org/pramana/in.purana.linga.1.4.18) daśa caiva tathāhāni divyo hyeṣa vidhiḥ smṛtaḥ trīṇi varṣaśatānyeva ṣaṣṭivarṣāṇi yāni tu // ### [1.4.19](https://indike.org/pramana/in.purana.linga.1.4.19) divyaḥ saṃvatsaro hyeṣa mānuṣeṇa prakīrtitaḥ trīṇi varṣasahasrāṇi mānuṣāṇi pramāṇataḥ // ### [1.4.20](https://indike.org/pramana/in.purana.linga.1.4.20) triṃśadanyāni varṣāṇi mataḥ saptarṣivatsaraḥ nava yāni sahasrāṇi varṣāṇāṃ mānuṣāṇi tu // ### [1.4.21](https://indike.org/pramana/in.purana.linga.1.4.21) anyāni navatīścaiva dhrauvaḥ saṃvatsarastu saḥ ṣaṭtriṃśattu sahasrāṇi varṣāṇāṃ mānuṣāṇi tu // ### [1.4.22](https://indike.org/pramana/in.purana.linga.1.4.22) varṣāṇāṃ tacchataṃ jñeyaṃ divyo hyeṣa vidhiḥ smṛtaḥ trīṇyeva niyutānyāhur varṣāṇāṃ mānuṣāṇi tu // ### [1.4.23](https://indike.org/pramana/in.purana.linga.1.4.23) ṣaṣṭiścaiva sahasrāṇi saṃkhyātāni tu saṃkhyayā divyaṃ varṣasahasraṃ tu prāhuḥ saṃkhyāvido janāḥ // ### [1.4.24](https://indike.org/pramana/in.purana.linga.1.4.24) divyenaiva pramāṇena yugasaṃkhyāprakalpanam pūrvaṃ kṛtayugaṃ nāma tatastretā vidhīyate // ### [1.4.25](https://indike.org/pramana/in.purana.linga.1.4.25) dvāparaśca kaliścaiva yugānyetāni suvratāḥ atha saṃvatsarā dṛṣṭā mānuṣeṇa pramāṇataḥ // ### [1.4.26](https://indike.org/pramana/in.purana.linga.1.4.26) kṛtasyādyasya viprendrā divyamānena kīrtitam sahasrāṇāṃ śatānyāsaṃś caturdaśa ca saṃkhyayā // ### [1.4.27](https://indike.org/pramana/in.purana.linga.1.4.27) catvāriṃśatsahasrāṇi tathānyāni kṛtaṃ yugam tathā daśasahasrāṇāṃ varṣāṇāṃ śatasaṃkhyayā // ### [1.4.28](https://indike.org/pramana/in.purana.linga.1.4.28) aśītiś ca sahasrāṇi kālastretāyugasya ca saptaiva niyutānyāhur varṣāṇāṃ mānuṣāṇi tu // ### [1.4.29](https://indike.org/pramana/in.purana.linga.1.4.29) viṃśatiś ca sahasrāṇi kālastu dvāparasya ca tathā śatasahasrāṇi varṣāṇāṃ trīṇi saṃkhyayā // ### [1.4.30](https://indike.org/pramana/in.purana.linga.1.4.30) ṣaṣṭiścaiva sahasrāṇi kālaḥ kaliyugasya tu evaṃ caturyugaḥ kāla ṛte saṃdhyāṃśakātsmṛtaḥ // ### [1.4.31](https://indike.org/pramana/in.purana.linga.1.4.31) niyutānyeva ṣaṭtriṃśan niraṃśāni tu tāni vai catvāriṃśattathā trīṇi niyutānīha saṃkhyayā // ### [1.4.32](https://indike.org/pramana/in.purana.linga.1.4.32) viṃśatiś ca sahasrāṇi saṃdhyāṃśaś ca caturyugaḥ evaṃ caturyugākhyānāṃ sādhikā hyekasaptatiḥ // ### [1.4.33](https://indike.org/pramana/in.purana.linga.1.4.33) kṛtatretādiyuktānāṃ manorantaramucyate manvantarasya saṃkhyā ca varṣāgreṇa prakīrtitā // ### [1.4.34](https://indike.org/pramana/in.purana.linga.1.4.34) triṃśatkoṭyastu varṣāṇāṃ mānuṣeṇa dvijottamāḥ saptaṣaṣṭistathānyāni niyutānyadhikāni tu // ### [1.4.35](https://indike.org/pramana/in.purana.linga.1.4.35) viṃśatiś ca sahasrāṇi kālo 'yam adhikaṃ vinā manvantarasya saṃkhyaiṣā laiṅge 'sminkīrtitā dvijāḥ // ### [1.4.36](https://indike.org/pramana/in.purana.linga.1.4.36) caturyugasya ca tathā varṣasaṃkhyā prakīrtitā caturyugasahasraṃ vai kalpaścaiko dvijottamāḥ // ### [1.4.37](https://indike.org/pramana/in.purana.linga.1.4.37) niśānte sṛjate lokān naśyante niśi jantavaḥ tatra vaimānikānāṃ tu aṣṭāviṃśatikoṭayaḥ // ### [1.4.38](https://indike.org/pramana/in.purana.linga.1.4.38) manvantareṣu vai saṃkhyā sāntareṣu yathātathā trīṇi koṭiśatānyāsan koṭyo dvinavatis tathā // ### [1.4.39](https://indike.org/pramana/in.purana.linga.1.4.39) kalpe 'tīte tu vai viprāḥ sahasrāṇāṃ tu saptatiḥ punastathāṣṭasāhasraṃ sarvatraiva samāsataḥ // ### [1.4.40](https://indike.org/pramana/in.purana.linga.1.4.40) kalpāvasānikāṃstyaktvā pralaye samupasthite maharlokāt prayāntyete janalokaṃ janāstataḥ // ### [1.4.41](https://indike.org/pramana/in.purana.linga.1.4.41) koṭīnāṃ dve sahasre tu aṣṭau koṭiśatāni tu dviṣaṣṭiś ca tathā koṭyo niyutāni ca saptatiḥ // ### [1.4.42](https://indike.org/pramana/in.purana.linga.1.4.42) kalpārdhasaṃkhyā divyā vai kalpamevaṃ tu kalpayet kalpānāṃ vai sahasraṃ tu varṣamekamajasya tu // ### [1.4.43](https://indike.org/pramana/in.purana.linga.1.4.43) varṣāṇāmaṣṭasāhasraṃ brāhmaṃ vai brahmaṇo yugam savanaṃ yugasāhasraṃ sarvadevodbhavasya tu // ### [1.4.44](https://indike.org/pramana/in.purana.linga.1.4.44) savanānāṃ sahasraṃ tu trividhaṃ triguṇaṃ tathā brahmaṇastu tathā proktaḥ kālaḥ kālātmanaḥ prabho // ### [1.4.45](https://indike.org/pramana/in.purana.linga.1.4.45) bhavodbhavastapaścaiva bhavyo rambhaḥ kratuḥ punaḥ ṛturvahnirhavyavāhaḥ sāvitraḥ śuddha eva ca // ### [1.4.46](https://indike.org/pramana/in.purana.linga.1.4.46) uśikaḥ kuśikaścaiva gāndhāro munisattamāḥ ṛṣabhaś ca tathā ṣaḍjo majjālīyaś ca madhyamaḥ // ### [1.4.47](https://indike.org/pramana/in.purana.linga.1.4.47) vairājo vai niṣādaś ca mukhyo vai meghavāhanaḥ pañcamaścitrakaścaiva ākūtir jñāna eva ca // ### [1.4.48](https://indike.org/pramana/in.purana.linga.1.4.48) manaḥ sudarśo bṛṃhaś ca tathā vai śvetalohitaḥ raktaś ca pītavāsāś ca asitaḥ sarvarūpakaḥ // ### [1.4.49](https://indike.org/pramana/in.purana.linga.1.4.49) evaṃ kalpāstu saṃkhyātā brahmaṇo 'vyaktajanmanaḥ koṭikoṭisahasrāṇi kalpānāṃ munisattamāḥ // ### [1.4.50](https://indike.org/pramana/in.purana.linga.1.4.50) gatāni tāvaccheṣāṇi aharniśyāni vai punaḥ parānte vai vikārāṇi vikāraṃ yānti viśvataḥ // ### [1.4.51](https://indike.org/pramana/in.purana.linga.1.4.51) vikārasya śivasyājñāvaśenaiva tu saṃhṛtiḥ saṃhṛte tu vikāre ca pradhāne cātmani sthite // ### [1.4.52](https://indike.org/pramana/in.purana.linga.1.4.52) sādharmyeṇāvatiṣṭhete pradhānapuruṣāvubhau guṇānāṃ caiva vaiṣamye viprāḥ sṛṣṭiriti smṛtā // ### [1.4.53](https://indike.org/pramana/in.purana.linga.1.4.53) sāmye layo guṇānāṃ tu tayorheturmaheśvaraḥ līlayā devadevena sargāstvīdṛgvidhāḥ kṛtāḥ // ### [1.4.54](https://indike.org/pramana/in.purana.linga.1.4.54) asaṃkhyātāś ca saṃkṣepāt pradhānād anvadhiṣṭhitāt asaṃkhyātāś ca kalpākhyā hy asaṃkhyātāḥ pitāmahāḥ // ### [1.4.55](https://indike.org/pramana/in.purana.linga.1.4.55) harayaścāpyasaṃkhyātās tv eka eva maheśvaraḥ pradhānādipravṛttāni līlayā prākṛtāni tu // ### [1.4.56](https://indike.org/pramana/in.purana.linga.1.4.56) guṇātmikā ca tadvṛttis tasya devasya vai tridhā aprākṛtasya tasyādir madhyāntaṃ nāsti cātmanaḥ // ### [1.4.57](https://indike.org/pramana/in.purana.linga.1.4.57) pitāmahasyātha paraḥ parārdhadvayasaṃmitaḥ divā sṛṣṭaṃ tu yatsarvaṃ niśi naśyati cāsya tat // ### [1.4.58](https://indike.org/pramana/in.purana.linga.1.4.58) bhūrbhuvaḥsvarmahastatra naśyate cordhvato na ca rātrau caikārṇave brahmā naṣṭe sthāvarajaṅgame // ### [1.4.59](https://indike.org/pramana/in.purana.linga.1.4.59) suṣvāpāmbhasi yastasmān nārāyaṇa iti smṛtaḥ śarvaryante prabuddho vai dṛṣṭvā śūnyaṃ carācaram // ### [1.4.60](https://indike.org/pramana/in.purana.linga.1.4.60) sraṣṭuṃ tadā matiṃ cakre brahmā brahmavidāṃ varaḥ udakairāplutāṃ kṣmāṃ tāṃ samādāya sanātanaḥ // ### [1.4.61](https://indike.org/pramana/in.purana.linga.1.4.61) pūrvavatsthāpayāmāsa vārāhaṃ rūpamāsthitaḥ nadīnadasamudrāṃś ca pūrvavaccākarotprabhuḥ // ### [1.4.62](https://indike.org/pramana/in.purana.linga.1.4.62) kṛtvā dharāṃ prayatnena nimnonnativivarjitām dharāyāṃ so 'cinotsarvān girīn dagdhān purāgninā // ### [1.4.63](https://indike.org/pramana/in.purana.linga.1.4.63) bhūrādyāṃś caturo lokān kalpayāmāsa pūrvavat sraṣṭuṃ ca bhagavāṃścakre tadā sraṣṭā punarmatim // ## Commentaries (1) - [Śivatosaṇī Liṅgapurāṇaṭīkā](https://indike.org/pramana/in.purana.linga!ganesa.4.30) — Gaṇeśa Bhaṭṭa, Sanskrit ## Linked texts (2) - [Devībhāgavatapurāṇa](https://indike.org/pramana/in.purana.upa.sakta.devibhagavata.5.31.10) — Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.5.1) — Ativīrarāma Pāṇṭiyar 1500, Sanskrit --- Source: [https://indike.org/pramana/in.purana.linga.1.4](https://indike.org/pramana/in.purana.linga.1.4) · Pramāṇa