[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 1.53 # Lingapurana 1.53 Liṅgapurāṇa 1.53 - **Language:** Sanskrit ## Contents - [1.53.62](https://indike.org/pramana/in.purana.linga.1.53.62) — 1 part ### [1.53.1](https://indike.org/pramana/in.purana.linga.1.53.1) sūta uvāca plakṣadvīpādidvīpeṣu sapta saptasu parvatāḥ ṛjvāyatāḥ pratidiśaṃ niviṣṭā varṣaparvatāḥ // ### [1.53.2](https://indike.org/pramana/in.purana.linga.1.53.2) plakṣadvīpe tu vakṣyāmi sapta divyān mahācalān gomedako 'tra prathamo dvitīyaścāndra ucyate // ### [1.53.3](https://indike.org/pramana/in.purana.linga.1.53.3) tṛtīyo nārado nāma caturtho dundubhiḥ smṛtaḥ pañcamaḥ somako nāma sumanāḥ ṣaṣṭha ucyate // ### [1.53.4](https://indike.org/pramana/in.purana.linga.1.53.4) sa eva vaibhavaḥ prokto vaibhrājaḥ saptamaḥ smṛtaḥ saptaite girayaḥ proktāḥ plakṣadvīpe viśeṣataḥ // ### [1.53.5](https://indike.org/pramana/in.purana.linga.1.53.5) sapta vai śālmalidvīpe tāṃstu vakṣyāmyanukramāt kumudaścottamaścaiva parvataś ca balāhakaḥ // ### [1.53.6](https://indike.org/pramana/in.purana.linga.1.53.6) droṇaḥ kaṅkaś ca mahiṣaḥ kakudmān saptamaḥ smṛtaḥ kuśadvīpe tu saptaiva dvīpāś ca kulaparvatāḥ // ### [1.53.7](https://indike.org/pramana/in.purana.linga.1.53.7) tāṃstu saṃkṣepato vakṣye nāmamātreṇa vai kramāt vidrumaḥ prathamaḥ prokto dvitīyo hemaparvataḥ // ### [1.53.8](https://indike.org/pramana/in.purana.linga.1.53.8) tṛtīyo dyutimānnāma caturthaḥ puṣpitaḥ smṛtaḥ kuśeśayaḥ pañcamastu ṣaṣṭho harigiriḥ smṛtaḥ // ### [1.53.9](https://indike.org/pramana/in.purana.linga.1.53.9) saptamo mandaraḥ śrīmān mahādevaniketanam mandā iti hyapāṃ nāma mandaro dhāraṇād apām // ### [1.53.10](https://indike.org/pramana/in.purana.linga.1.53.10) tatra sākṣādvṛṣāṅkastu viśveśo vimalaḥ śivaḥ somaḥ sanandī bhagavān āste hemagṛhottame // ### [1.53.11](https://indike.org/pramana/in.purana.linga.1.53.11) tapasā toṣitaḥ pūrvaṃ mandareṇa maheśvaraḥ avimukte mahākṣetre lebhe sa paramaṃ varam // ### [1.53.12](https://indike.org/pramana/in.purana.linga.1.53.12) prārthitaś ca mahādevo nivāsārthaṃ sahāṃbayā avimuktādupāgamya cakre vāsaṃ sa mandare // ### [1.53.13](https://indike.org/pramana/in.purana.linga.1.53.13) sanandī sagaṇaḥ somas tenāsau tanna muñcati krauñcadvīpe tu sapteha krauñcādyāḥ kulaparvatāḥ // ### [1.53.14](https://indike.org/pramana/in.purana.linga.1.53.14) krauñco vāmanakaḥ paścāt tṛtīyaścāndhakārakaḥ andhakārātparaścāpi divāvṛnnāma parvataḥ // ### [1.53.15](https://indike.org/pramana/in.purana.linga.1.53.15) divāvṛtaḥ paraścāpi vivindo girirucyate vivindātparataścāpi puṇḍarīko mahāgiriḥ // ### [1.53.16](https://indike.org/pramana/in.purana.linga.1.53.16) puṇḍarīkātparaścāpi procyate dundubhisvanaḥ ete ratnamayāḥ sapta krauñcadvīpasya parvatāḥ // ### [1.53.17](https://indike.org/pramana/in.purana.linga.1.53.17) śākadvīpe ca girayaḥ sapta tāṃstu nibodhata udayo raivataścāpi śyāmako munisattamāḥ // ### [1.53.18](https://indike.org/pramana/in.purana.linga.1.53.18) rājataśca giriḥ śrīmān āṃbikeyaḥ suśobhanaḥ āṃbikeyātparo ramyaḥ sarvauṣadhisamanvitaḥ // ### [1.53.19](https://indike.org/pramana/in.purana.linga.1.53.19) tathaiva kesarītyukto yato vāyuḥ prajāyate puṣkare parvataḥ śrīmān eka eva mahāśilaḥ // ### [1.53.20](https://indike.org/pramana/in.purana.linga.1.53.20) citrairmaṇimayaiḥ kūṭaiḥ śilājālaiḥ samucchritaiḥ dvīpasya tasya pūrvārdhe citrasānusthito mahān // ### [1.53.21](https://indike.org/pramana/in.purana.linga.1.53.21) yojanānāṃ sahasrāṇi ūrdhvaṃ pañcāśaducchritaḥ adhaścaiva catustriṃśat sahasrāṇi mahācalaḥ // ### [1.53.22](https://indike.org/pramana/in.purana.linga.1.53.22) dvīpasyārdhe parikṣiptaḥ parvato mānasottaraḥ sthito velāsamīpe tu navacandra ivoditaḥ // ### [1.53.23](https://indike.org/pramana/in.purana.linga.1.53.23) yojanānāṃ sahasrāṇi ūrdhvaṃ pañcāśaducchritaḥ tāvadeva tu vistīrṇaḥ pārśvataḥ parimaṇḍalaḥ // ### [1.53.24](https://indike.org/pramana/in.purana.linga.1.53.24) sa eva dvīpapaścārdhe mānasaḥ pṛthivīdharaḥ eka eva mahāsānuḥ saṃniveśāddvidhā kṛtaḥ // ### [1.53.25](https://indike.org/pramana/in.purana.linga.1.53.25) tasmindvīpe smṛtau dvau tu puṇyau janapadau śubhau rājatau mānasasyātha parvatasyānumaṇḍalau // ### [1.53.26](https://indike.org/pramana/in.purana.linga.1.53.26) mahāvītaṃ tu yadvarṣaṃ bāhyato mānasasya tu tasyaivābhyantaro yastu dhātakīkhaṇḍa ucyate // ### [1.53.27](https://indike.org/pramana/in.purana.linga.1.53.27) svādūdakenodadhinā puṣkaraḥ parivāritaḥ puṣkaradvīpavistāravistīrṇo 'sau samantataḥ // ### [1.53.28](https://indike.org/pramana/in.purana.linga.1.53.28) vistārānmaṇḍalāccaiva puṣkarasya samena tu evaṃ dvīpāḥ samudraistu saptasaptabhir āvṛtāḥ // ### [1.53.29](https://indike.org/pramana/in.purana.linga.1.53.29) dvīpasyānantaro yastu samudraḥ saptamastu vai evaṃ dvīpasamudrāṇāṃ vṛddhirjñeyā parasparam // ### [1.53.30](https://indike.org/pramana/in.purana.linga.1.53.30) pareṇa puṣkarasyātha anuvṛtya sthito mahān svādūdakasamudrastu samantātpariveṣṭya ca // ### [1.53.31](https://indike.org/pramana/in.purana.linga.1.53.31) pareṇa tasya mahatī dṛśyate lokasaṃsthitiḥ kāñcanī dviguṇā bhūmiḥ sarvā caikaśilopamā // ### [1.53.32](https://indike.org/pramana/in.purana.linga.1.53.32) tasyāḥ pareṇa śailastu maryādāpāramaṇḍalaḥ prakāśaścāprakāśaś ca lokālokaḥ sa ucyate // ### [1.53.33](https://indike.org/pramana/in.purana.linga.1.53.33) dṛśyādṛśyagirir yāvat tāvadeṣā dharā dvijāḥ yojanānāṃ sahasrāṇi daśa tasyocchrayaḥ smṛtaḥ // ### [1.53.34](https://indike.org/pramana/in.purana.linga.1.53.34) tāvāṃś ca vistarastasya lokālokamahāgireḥ arvācīne tu tasyārdhe caranti raviraśmayaḥ // ### [1.53.35](https://indike.org/pramana/in.purana.linga.1.53.35) parārdhe tu tamo nityaṃ lokālokastataḥ smṛtaḥ evaṃ saṃkṣepataḥ prokto bhūrlokasya ca vistaraḥ // ### [1.53.36](https://indike.org/pramana/in.purana.linga.1.53.36) ā bhānorvai bhuvaḥ svastu ā dhruvānmunisattamāḥ āvahādyā niviṣṭāstu vāyorvai sapta nemayaḥ // ### [1.53.37](https://indike.org/pramana/in.purana.linga.1.53.37) āvahaḥ pravahaścaiva tataścānuvahas tathā saṃvaho vivahaścātha tataścordhvaṃ parāvahaḥ // ### [1.53.38](https://indike.org/pramana/in.purana.linga.1.53.38) dvijāḥ parivahaśceti vāyorvai sapta nemayaḥ balāhakās tathā bhānuś candro nakṣatrarāśayaḥ // ### [1.53.39](https://indike.org/pramana/in.purana.linga.1.53.39) grahāṇi ṛṣayaḥ sapta dhruvo viprāḥ kramādiha yojanānāṃ mahīpṛṣṭhād ūrdhvaṃ pañcadaśa ā dhruvāt // ### [1.53.40](https://indike.org/pramana/in.purana.linga.1.53.40) niyutānyekaniyutaṃ bhūpṛṣṭhādbhānumaṇḍalam rathaḥ ṣoḍaśasāhasro bhāskarasya tathopari // ### [1.53.41](https://indike.org/pramana/in.purana.linga.1.53.41) caturaśītisāhasro meruścopari bhūtalāt koṭiyojanamākramya maharloko dhruvāddhruvaḥ // ### [1.53.42](https://indike.org/pramana/in.purana.linga.1.53.42) janaloko maharlokāt tathā koṭidvayaṃ dvijāḥ janalokāttapolokaś catasraḥ koṭayo mataḥ // ### [1.53.43](https://indike.org/pramana/in.purana.linga.1.53.43) prājāpatyādbrahmalokaḥ koṭiṣaṭkaṃ visṛjya tu puṇyalokāstu saptaite hy aṇḍe 'sminkathitā dvijāḥ // ### [1.53.44](https://indike.org/pramana/in.purana.linga.1.53.44) adhaḥ saptatalānāṃ tu narakāṇāṃ hi koṭayaḥ māyāntāścaiva ghorādyā aṣṭāviṃśatireva tu // ### [1.53.45](https://indike.org/pramana/in.purana.linga.1.53.45) pāpinasteṣu pacyante svasvakarmānurūpataḥ avīcyantāni sarvāṇi rauravādyāni teṣu ca // ### [1.53.46](https://indike.org/pramana/in.purana.linga.1.53.46) pratyekaṃ pañcakānyāhur narakāṇi viśeṣataḥ aṇḍamādau mayā proktam aṇḍasyāvaraṇāni ca // ### [1.53.47](https://indike.org/pramana/in.purana.linga.1.53.47) hiraṇyagarbhasargaś ca prasaṃgādbahuvistarāt aṇḍānāmīdṛśānāṃ tu koṭyo jñeyāḥ sahasraśaḥ // ### [1.53.48](https://indike.org/pramana/in.purana.linga.1.53.48) sarvagatvāt pradhānasya tiryag ūrdhvam adhas tathā aṇḍeṣveteṣu sarveṣu bhuvanāni caturdaśa // ### [1.53.49](https://indike.org/pramana/in.purana.linga.1.53.49) pratyaṇḍaṃ dvijaśārdūlās teṣāṃ heturmaheśvaraḥ aṇḍeṣu cāṇḍabāhyeṣu tathāṇḍāvaraṇeṣu ca // ### [1.53.50](https://indike.org/pramana/in.purana.linga.1.53.50) tamo 'nte ca tamaḥpāre cāṣṭamūrtirvyavasthitaḥ asyātmano maheśasya mahādevasya dhīmataḥ // ### [1.53.51](https://indike.org/pramana/in.purana.linga.1.53.51) adehinas tvaho deham akhilaṃ paramātmanaḥ asyāṣṭamūrteḥ śarvasya śivasya gṛhamedhinaḥ // ### [1.53.52](https://indike.org/pramana/in.purana.linga.1.53.52) gṛhiṇī prakṛtirdivyā prajāś ca mahadādayaḥ paśavaḥ kiṅkarāstasya sarve dehābhimāninaḥ // ### [1.53.53](https://indike.org/pramana/in.purana.linga.1.53.53) ādyantahīno bhagavān anantaḥ pumānpradhānapramukhāś ca sapta pradhānamūrtistvatha ṣoḍaśāṅgo maheśvaraścāṣṭatanuḥ sa eva // ### [1.53.54](https://indike.org/pramana/in.purana.linga.1.53.54) ājñābalāttasya dharā sthiteha dharādharā vāridharāḥ samudrāḥ jyotirgaṇaḥ śakramukhāḥ surāś ca vaimānikāḥ sthāvarajaṅgamāś ca // ### [1.53.55](https://indike.org/pramana/in.purana.linga.1.53.55) dṛṣṭvā yakṣaṃ lakṣaṇairhīnamīśaṃ dṛṣṭvā sendrāste kimetattviheti yakṣaṃ gatvā niścayātpāvakādyāḥ śaktikṣīṇāścābhavan yattato 'pi // ### [1.53.56](https://indike.org/pramana/in.purana.linga.1.53.56) dagdhuṃ tṛṇaṃ vāpi samakṣamasya yakṣasya vahnirna śaśāka viprāḥ vāyustṛṇaṃ cālayituṃ tathānye svānsvānprabhāvān sakalāmarendrāḥ // ### [1.53.57](https://indike.org/pramana/in.purana.linga.1.53.57) tadā svayaṃ vṛtraripuḥ surendraiḥ sureśvaraḥ sarvasamṛddhihetuḥ sureśvaraṃ yakṣamuvāca ko vā bhavānitītthaṃ sa kutūhalātmā // ### [1.53.58](https://indike.org/pramana/in.purana.linga.1.53.58) tadā hyadṛśyaṃ gata eva yakṣas tadāṃbikā haimavatī śubhāsyā umā śubhairābharaṇairanekaiḥ suśobhamānā tvanu cāvirāsīt // ### [1.53.59](https://indike.org/pramana/in.purana.linga.1.53.59) kimetadīśe bahuśobhamāne vāṃbike yakṣavapuścakāsti // ### [1.53.60](https://indike.org/pramana/in.purana.linga.1.53.60) praṇemurenāṃ mṛgarājagāminīmumāmajāṃ lohitaśuklakṛṣṇām // ### [1.53.61](https://indike.org/pramana/in.purana.linga.1.53.61) saṃbhāvitā sā sakalāmarendraiḥ sarvapravṛttistu surāsurāṇām ahaṃ purāsaṃ prakṛtiś ca puṃso yakṣasya cājñāvaśagetyathāha // ### [1.53.62](https://indike.org/pramana/in.purana.linga.1.53.62) tasmāddvijāḥ sarvamajasya tasya niyogataścāṇḍamabhūdajādvai ajaś ca aṇḍādakhilaṃ ca tasmāj jyotirgaṇairlokamajātmakaṃ tat // ### [1.53.62.p1](https://indike.org/pramana/in.purana.linga.1.53.62.p1) iti śrīliṅgamahāpurāṇe pūrvabhāge bhuvanakośavinyāsanirṇayo nāma tripañcāśattamo 'dhyāyaḥ ## Commentaries (1) - [Śivatosaṇī Liṅgapurāṇaṭīkā](https://indike.org/pramana/in.purana.linga!ganesa.55.1) — Gaṇeśa Bhaṭṭa, Sanskrit ## Linked texts (6) - [Brahmāṇḍapurāṇa](https://indike.org/pramana/in.purana.brahmanda.1.19.6) — Vyāsa, Sanskrit - [Vāyupurāṇa](https://indike.org/pramana/in.purana.vayu.1.49.7) — Vyāsa, Sanskrit - [Critical edition (BORI)](https://indike.org/pramana/in.lit.mahabharata.vyasa*crit.6.13.9) — Sanskrit - [Tattvaprakāśa](https://indike.org/pramana/in.sampradaya.saiva.siddhanta.darsana.tattvaprakasa.3.18) — Bhoja, Sanskrit - [Pañcarātravyākhyā](https://indike.org/pramana/in.sampradaya.saiva.virasaiva.pancaratravyakhya.35) — Reṇuka, Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.59.2) — Ativīrarāma Pāṇṭiyar 1500, Sanskrit --- Source: [https://indike.org/pramana/in.purana.linga.1.53](https://indike.org/pramana/in.purana.linga.1.53) · Pramāṇa