[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 1.54 # Lingapurana 1.54 Liṅgapurāṇa 1.54 - **Language:** Sanskrit ## Contents - [1.54.68](https://indike.org/pramana/in.purana.linga.1.54.68) — 1 part ### [1.54.1](https://indike.org/pramana/in.purana.linga.1.54.1) sūta uvāca jyotirgaṇapracāraṃ vai saṃkṣipyāṇḍe bravīmyaham devakṣetrāṇi cālokya grahacāraprasiddhaye // ### [1.54.2](https://indike.org/pramana/in.purana.linga.1.54.2) mānasopari māhendrī prācyāṃ meroḥ purī sthitā dakṣiṇe bhānuputrasya varuṇasya ca vāruṇī // ### [1.54.3](https://indike.org/pramana/in.purana.linga.1.54.3) saumye somasya vipulā tāsu digdevatāḥ sthitāḥ amarāvatī saṃyamanī sukhā caiva vibhā kramāt // ### [1.54.4](https://indike.org/pramana/in.purana.linga.1.54.4) lokapālopariṣṭāt tu sarvato dakṣiṇāyane kāṣṭhāṃ gatasya sūryasya gatir yā tāṃ nibodhata // ### [1.54.5](https://indike.org/pramana/in.purana.linga.1.54.5) dakṣiṇaprakrame bhānuḥ kṣipteṣuriva dhāvati jyotiṣāṃ cakramādāya satataṃ parigacchati // ### [1.54.6](https://indike.org/pramana/in.purana.linga.1.54.6) purāntago yadā bhānuḥ śakrasya bhavati prabhuḥ sarvaiḥ sāyamanaiḥ sauro hy udayo dṛśyate dvijāḥ // ### [1.54.7](https://indike.org/pramana/in.purana.linga.1.54.7) sa eva sukhavatyāṃ tu niśāntasthaḥ pradṛśyate astameti punaḥ sūryo vibhāyāṃ viśvadṛg vibhuḥ // ### [1.54.8](https://indike.org/pramana/in.purana.linga.1.54.8) mayā prokto 'marāvatyāṃ yathāsau vāritaskaraḥ tathā saṃyamanīṃ prāpya sukhāṃ caiva vibhāṃ khagaḥ // ### [1.54.9](https://indike.org/pramana/in.purana.linga.1.54.9) yadāparāhṇastvāgneyyāṃ pūrvāhṇo nairṛte dvijāḥ tadā tvapararātraś ca vāyubhāge sudāruṇaḥ // ### [1.54.10](https://indike.org/pramana/in.purana.linga.1.54.10) īśānyāṃ pūrvarātrastu gatireṣā ca sarvataḥ evaṃ puṣkaramadhye tu yadā sarpati vāripaḥ // ### [1.54.11](https://indike.org/pramana/in.purana.linga.1.54.11) triṃśāṃśakaṃ tu medinyāṃ muhūrtenaiva gacchati yojanānāṃ muhūrtasya imāṃ saṃkhyāṃ nibodhata // ### [1.54.12](https://indike.org/pramana/in.purana.linga.1.54.12) pūrṇā śatasahasrāṇām ekatriṃśattu sā smṛtā pañcāśacca tathānyāni sahasrāṇyadhikāni tu // ### [1.54.13](https://indike.org/pramana/in.purana.linga.1.54.13) mauhūrtikī gatirhyeṣā bhāskarasya mahātmanaḥ etena gatiyogena yadā kāṣṭhāṃ tu dakṣiṇām // ### [1.54.14](https://indike.org/pramana/in.purana.linga.1.54.14) paryapṛcchet pataṅgo 'pi saumyāśāṃ cottare 'hani madhye tu puṣkarasyātha bhramate dakṣiṇāyane // ### [1.54.15](https://indike.org/pramana/in.purana.linga.1.54.15) mānasottaraśaile tu mahātejā vibhāvasuḥ maṇḍalānāṃ śataṃ pūrṇaṃ tadaśītyadhikaṃ vibhuḥ // ### [1.54.16](https://indike.org/pramana/in.purana.linga.1.54.16) bāhyaṃ cābhyantaraṃ proktam uttarāyaṇadakṣiṇe pratyahaṃ carate tāni sūryo vai maṇḍalāni tu // ### [1.54.17](https://indike.org/pramana/in.purana.linga.1.54.17) kulālacakraparyanto yathā śīghraṃ pravartate dakṣiṇaprakrame devas tathā śīghraṃ pravartate // ### [1.54.18](https://indike.org/pramana/in.purana.linga.1.54.18) tasmātprakṛṣṭāṃ bhūmiṃ tu kālenālpena gacchati sūryo dvādaśabhiḥ śīghraṃ muhūrtairdakṣiṇāyane // ### [1.54.19](https://indike.org/pramana/in.purana.linga.1.54.19) trayodaśārdhamṛkṣāṇām ahnā tu carate raviḥ muhūrtaistāvadṛkṣāṇi naktamaṣṭādaśaiścaran // ### [1.54.20](https://indike.org/pramana/in.purana.linga.1.54.20) kulālacakramadhyaṃ tu yathā mandaṃ prasarpati tathodagayane sūryaḥ sarpate mandavikramaḥ // ### [1.54.21](https://indike.org/pramana/in.purana.linga.1.54.21) tasmāddīrgheṇa kālena bhūmimalpāṃ tu gacchati sa ratho dhiṣṭhito bhānor ādityairmunibhis tathā // ### [1.54.22](https://indike.org/pramana/in.purana.linga.1.54.22) gandharvairapsarobhiś ca grāmaṇīsarparākṣasaiḥ pradīpayan sahasrāṃśur agrataḥ pṛṣṭhato 'pyadhaḥ // ### [1.54.23](https://indike.org/pramana/in.purana.linga.1.54.23) ūrdhvataś ca karaṃ tyaktvā sabhāṃ brāhmīmanuttamām aṃbhobhir munibhistyaktaiḥ saṃdhyāyāṃ tu niśācarān // ### [1.54.24](https://indike.org/pramana/in.purana.linga.1.54.24) hatvā hatvā tu samprāptān brāhmaṇaiścarate raviḥ aṣṭādaśa muhūrtaṃ tu uttarāyaṇapaścimam // ### [1.54.25](https://indike.org/pramana/in.purana.linga.1.54.25) aharbhavati taccāpi carate mandavikramaḥ trayodaśārdham ṛkṣāṇi naktaṃ dvādaśabhī raviḥ muhūrtais tāvad ṛkṣāṇi divāṣṭādaśabhiścaran // ### [1.54.26](https://indike.org/pramana/in.purana.linga.1.54.26) tato mandataraṃ nābhyāṃ cakraṃ bhramati vai yathā mṛtpiṇḍa iva madhyastho dhruvo bhramati vai tathā // ### [1.54.27](https://indike.org/pramana/in.purana.linga.1.54.27) triṃśanmuhūrtair evāhur ahorātraṃ purāvidaḥ ubhayoḥ kāṣṭhayormadhye bhramato maṇḍalāni tu // ### [1.54.28](https://indike.org/pramana/in.purana.linga.1.54.28) kulālacakranābhistu yathā tatraiva vartate auttānapādo bhramati grahaiḥ sārdhaṃ grahāgraṇīḥ // ### [1.54.29](https://indike.org/pramana/in.purana.linga.1.54.29) gaṇo munijyotiṣāṃ tu manasā tasya sarpati adhiṣṭhitaḥ punastena bhānustvādāya tiṣṭhati // ### [1.54.30](https://indike.org/pramana/in.purana.linga.1.54.30) kiraṇaiḥ sarvatastoyaṃ devo vai sasamīraṇaḥ auttānapādasya sadā dhruvatvaṃ vai prasādataḥ // ### [1.54.31](https://indike.org/pramana/in.purana.linga.1.54.31) viṣṇorauttānapādena cāptaṃ tātasya hetunā āpaḥ pītāstu sūryeṇa kramante śaśinaḥ kramāt // ### [1.54.32](https://indike.org/pramana/in.purana.linga.1.54.32) niśākarānnisravante jīmūtānpratyapaḥ kramāt vṛndaṃ jalamucāṃ caiva śvasanenābhitāḍitam // ### [1.54.33](https://indike.org/pramana/in.purana.linga.1.54.33) kṣmāyāṃ sṛṣṭiṃ visṛjate 'bhāsayattena bhāskaraḥ toyasya nāsti vai nāśaḥ tadaiva parivartate // ### [1.54.34](https://indike.org/pramana/in.purana.linga.1.54.34) hitāya sarvajantūnāṃ gatiḥ śarveṇa nirmitā bhūrbhuvaḥ svas tathā hyāpo hy annaṃ cāmṛtameva ca // ### [1.54.35](https://indike.org/pramana/in.purana.linga.1.54.35) prāṇā vai jagatāmāpo bhūtāni bhuvanāni ca bahunātra kimuktena carācaramidaṃ jagat // ### [1.54.36](https://indike.org/pramana/in.purana.linga.1.54.36) apāṃ śivasya bhagavān ādhipatye vyavasthitaḥ apāṃ tvadhipatirdevo bhava ityeva kīrtitaḥ // ### [1.54.37](https://indike.org/pramana/in.purana.linga.1.54.37) bhavātmakaṃ jagatsarvam iti kiṃ ceha cādbhutam nārāyaṇatvaṃ devasya hareścādbhiḥ kṛtaṃ vibhoḥ jagatāmālayo viṣṇus tv āpastasyālayāni tu // ### [1.54.38](https://indike.org/pramana/in.purana.linga.1.54.38) dandahyamāneṣu carācareṣu godhūmabhūtās tvathaniṣkramanti yā yā ūrdhvaṃ māruteneritā vai tāstāstvabhrāṇyagninā vāyunā ca // ### [1.54.39](https://indike.org/pramana/in.purana.linga.1.54.39) ato dhūmāgnivātānāṃ saṃyogastvabhramucyate vārīṇi varṣatītyabhram abhrasyeśaḥ sahasradṛk // ### [1.54.40](https://indike.org/pramana/in.purana.linga.1.54.40) yajñadhūmodbhavaṃ cāpi dvijānāṃ hitakṛtsadā dāvāgnidhūmasambhūtam abhraṃ vanahitaṃ smṛtam // ### [1.54.41](https://indike.org/pramana/in.purana.linga.1.54.41) mṛtadhūmodbhavaṃ tvabhram aśubhāya bhaviṣyati abhicārāgnidhūmotthaṃ bhūtanāśāya vai dvijāḥ // ### [1.54.42](https://indike.org/pramana/in.purana.linga.1.54.42) evaṃ dhūmaviśeṣeṇa jagatāṃ vai hitāhitam tasmādācchādayeddhūmam abhicārakṛtaṃ naraḥ // ### [1.54.43](https://indike.org/pramana/in.purana.linga.1.54.43) anāchādya dvijaḥ kuryād dhūmaṃ yaścābhicārikam evamuddiśya lokasya kṣayakṛcca bhaviṣyati // ### [1.54.44](https://indike.org/pramana/in.purana.linga.1.54.44) apāṃ nidhānaṃ jīmūtāḥ ṣaṇmāsāniha suvratāḥ varṣayantyeva jagatāṃ hitāya pavanājñayā // ### [1.54.45](https://indike.org/pramana/in.purana.linga.1.54.45) stanitaṃ ceha vāyavyaṃ vaidyutaṃ pāvakodbhavam tridhā teṣāmihotpattir abhrāṇāṃ munipuṅgavāḥ // ### [1.54.46](https://indike.org/pramana/in.purana.linga.1.54.46) na bhraśyanti yato 'bhrāṇi mehanānmegha ucyate kāṣṭhāvāhāś ca vairiñcyāḥ pakṣāścaiva pṛthagvidhāḥ // ### [1.54.47](https://indike.org/pramana/in.purana.linga.1.54.47) ājyānāṃ kāṣṭhasaṃyogād agnerdhūmaḥ pravartitaḥ dvitīyānāṃ ca saṃbhūtir viriñcocchvāsavāyunā // ### [1.54.48](https://indike.org/pramana/in.purana.linga.1.54.48) bhūbhṛtāṃ tvatha pakṣaistu maghavaccheditaistataḥ vāhneyāstvatha jīmūtās tv āvahasthānagāḥ śubhāḥ // ### [1.54.49](https://indike.org/pramana/in.purana.linga.1.54.49) viriñcocchvāsajāḥ sarve pravahaskandhajāstataḥ pakṣajāḥ puṣkarādyāś ca varṣanti ca yadā jalam // ### [1.54.50](https://indike.org/pramana/in.purana.linga.1.54.50) mūkāḥ saśabdaduṣṭāśās tv etaiḥ kṛtyaṃ yathākramam kṣāmavṛṣṭipradā dīrghakālaṃ śītasamīriṇaḥ // ### [1.54.51](https://indike.org/pramana/in.purana.linga.1.54.51) jīvakāś ca tathā kṣīṇā vidyuddhvanivivarjitāḥ tiṣṭhantyākrośamātre tu dharāpṛṣṭhāditastataḥ // ### [1.54.52](https://indike.org/pramana/in.purana.linga.1.54.52) ardhakrośe tu sarve vai jīmūtā girivāsinaḥ meghā yojanamātraṃ tu sādhyatvād bahutoyadāḥ // ### [1.54.53](https://indike.org/pramana/in.purana.linga.1.54.53) dharāpṛṣṭhāddvijāḥ kṣmāyāṃ vidyudguṇasamanvitāḥ teṣāṃ teṣāṃ vṛṣṭisargaṃ tredhā kathitamatra tu // ### [1.54.54](https://indike.org/pramana/in.purana.linga.1.54.54) pakṣajāḥ kalpajāḥ sarve parvatānāṃ mahattamāḥ kalpānte te ca varṣanti rātrau nāśāya śāradāḥ // ### [1.54.55](https://indike.org/pramana/in.purana.linga.1.54.55) pakṣajāḥ puṣkarādyāś ca varṣanti ca yadā jalam tadārṇavamabhūtsarvaṃ tatra śete niśīśvaraḥ // ### [1.54.56](https://indike.org/pramana/in.purana.linga.1.54.56) āgneyānāṃ śvāsajānāṃ pakṣajānāṃ dvijarṣabhāḥ jaladānāṃ sadā dhūmo hy āpyāyana iti smṛtaḥ // ### [1.54.57](https://indike.org/pramana/in.purana.linga.1.54.57) pauṇḍrāstu vṛṣṭayaḥ sarvā vaidyutāḥ śītaśasyadāḥ puṇḍradeśeṣu patitā nāgānāṃ śīkarā himāḥ // ### [1.54.58](https://indike.org/pramana/in.purana.linga.1.54.58) gāṅgā gaṅgāmbusambhūtā parjanyena parāvahaiḥ nagānāṃ ca nadīnāṃ ca diggajānāṃ samākulam // ### [1.54.59](https://indike.org/pramana/in.purana.linga.1.54.59) meghānāṃ ca pṛthagbhūtaṃ jalaṃ prāyādagādagam parāvaho yaḥ śvasanaś cānayatyambikāgurum // ### [1.54.60](https://indike.org/pramana/in.purana.linga.1.54.60) menāpatimatikramya vṛṣṭiśeṣaṃ dvijāḥ param abhyeti bhārate varṣe tv aparāntavivṛddhaye // ### [1.54.61](https://indike.org/pramana/in.purana.linga.1.54.61) vṛṣṭayaḥ kathitā hyadya dvidhā vastu vivṛddhaye sasyadvayasya saṃkṣepāt prabravīmi yathāmati // ### [1.54.62](https://indike.org/pramana/in.purana.linga.1.54.62) sraṣṭā bhānurmahātejā vṛṣṭīnāṃ viśvadṛg vibhuḥ so 'pi sākṣāddvijaśreṣṭhāś ceśānaḥ paramaḥ śivaḥ // ### [1.54.63](https://indike.org/pramana/in.purana.linga.1.54.63) sa eva tejastvojastu balaṃ viprā yaśaḥ svayam cakṣuḥ śrotraṃ mano mṛtyur ātmā manyur vidig diśaḥ // ### [1.54.64](https://indike.org/pramana/in.purana.linga.1.54.64) satyaṃ ṛtaṃ tathā vāyur aṃbaraṃ khacaraś ca saḥ lokapālo harirbrahmā rudraḥ sākṣānmaheśvaraḥ // ### [1.54.65](https://indike.org/pramana/in.purana.linga.1.54.65) sahasrakiraṇaḥ śrīmān aṣṭahastaḥ sumaṅgalaḥ ardhanārivapuḥ sākṣāt trinetras tridaśādhipaḥ // ### [1.54.66](https://indike.org/pramana/in.purana.linga.1.54.66) asyaiveha prasādāttu vṛṣṭirnānābhavaddvijāḥ sahasraguṇamutsraṣṭum ādatte kiraṇairjalam // ### [1.54.67](https://indike.org/pramana/in.purana.linga.1.54.67) jalasya nāśo vṛddhirvā nāstyevāsya vicārataḥ dhruveṇādhiṣṭhito vāyur vṛṣṭiṃ saṃharate punaḥ // ### [1.54.68](https://indike.org/pramana/in.purana.linga.1.54.68) grahān niḥsṛtya sūryāt tu kṛtsne nakṣatramaṇḍale cārasyānte viśatyarke dhruveṇa samadhiṣṭhitā // ### [1.54.68.p1](https://indike.org/pramana/in.purana.linga.1.54.68.p1) iti śrīliṅgamahāpurāṇe pūrvabhāge jyotiścakre sūryagatyādikathanaṃ nāma catuḥpañcāśattamo 'dhyāyaḥ ## Commentaries (1) - [Śivatosaṇī Liṅgapurāṇaṭīkā](https://indike.org/pramana/in.purana.linga!ganesa.57.57) — Gaṇeśa Bhaṭṭa, Sanskrit ## Linked texts (5) - [Vāyupurāṇa](https://indike.org/pramana/in.purana.vayu.1.50.92) — Vyāsa, Sanskrit - [Brahmāṇḍapurāṇa](https://indike.org/pramana/in.purana.brahmanda.1.21.35) — Vyāsa, Sanskrit - [Viṣṇupurāṇa (critical edition)](https://indike.org/pramana/in.purana.visnu*crit.2.8.32) — Sanskrit - [Pañcarātravyākhyā](https://indike.org/pramana/in.sampradaya.saiva.virasaiva.pancaratravyakhya.36) — Reṇuka, Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.60.1) — Ativīrarāma Pāṇṭiyar 1500, Sanskrit --- Source: [https://indike.org/pramana/in.purana.linga.1.54](https://indike.org/pramana/in.purana.linga.1.54) · Pramāṇa