[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 1.57 # Lingapurana 1.57 Liṅgapurāṇa 1.57 - **Language:** Sanskrit ## Contents - [1.57.39](https://indike.org/pramana/in.purana.linga.1.57.39) — 1 part ### [1.57.1](https://indike.org/pramana/in.purana.linga.1.57.1) sūta uvāca aṣṭabhiś ca hayairyuktaḥ somaputrasya vai rathaḥ vāritejomayaścātha piśaṅgaiścaiva śobhanaiḥ // ### [1.57.2](https://indike.org/pramana/in.purana.linga.1.57.2) daśabhiścākṛśairaśvair nānāvarṇai rathaḥ smṛtaḥ śukrasya kṣmāmayairyukto daityācāryasya dhīmataḥ // ### [1.57.3](https://indike.org/pramana/in.purana.linga.1.57.3) aṣṭāśvaścātha bhaumasya ratho haimaḥ suśobhanaḥ jīvasya haimaścāṣṭāśvo mandasyāyasanirmitaḥ // ### [1.57.4](https://indike.org/pramana/in.purana.linga.1.57.4) ratha āpomayairaśvair daśabhistu sitetaraiḥ svarbhānorbhāskarāreś ca tathā cāṣṭahayaḥ smṛtaḥ // ### [1.57.5](https://indike.org/pramana/in.purana.linga.1.57.5) sarve dhruvanibaddhā vai grahāste vātaraśmibhiḥ etena bhrāmyamāṇāś ca yathāyogaṃ vrajanti vai // ### [1.57.6](https://indike.org/pramana/in.purana.linga.1.57.6) yāvantyaścaiva tārāś ca tāvantaścaiva raśmayaḥ sarve dhruvanibaddhāś ca bhramanto bhrāmayanti tam // ### [1.57.7](https://indike.org/pramana/in.purana.linga.1.57.7) alātacakravadyānti vātacakreritāni tu yasmādvahati jyotīṃṣi pravahastena sa smṛtaḥ // ### [1.57.8](https://indike.org/pramana/in.purana.linga.1.57.8) nakṣatrasūryāś ca tathā grahatārāgaṇaiḥ saha unmukhābhimukhāḥ sarve cakrabhūtāḥ śritā divi // ### [1.57.9](https://indike.org/pramana/in.purana.linga.1.57.9) dhruveṇādhiṣṭhitāścaiva dhruvameva pradakṣiṇam prayānti ceśvaraṃ draṣṭuṃ meḍhībhūtaṃ dhruvaṃ divi // ### [1.57.10](https://indike.org/pramana/in.purana.linga.1.57.10) navayojanasāhasro viṣkambhaḥ savituḥ smṛtaḥ triguṇastasya vistāro maṇḍalasya pramāṇataḥ // ### [1.57.11](https://indike.org/pramana/in.purana.linga.1.57.11) dviguṇaḥ sūryavistārād vistāraḥ śaśinaḥ smṛtaḥ tulyastayostu svarbhānur bhūtvādhastātprasarpati // ### [1.57.12](https://indike.org/pramana/in.purana.linga.1.57.12) uddhṛtya pṛthivīchāyāṃ nirmitāṃ maṇḍalākṛtim svarbhānostu bṛhatsthānaṃ tṛtīyaṃ yat tamomayam // ### [1.57.13](https://indike.org/pramana/in.purana.linga.1.57.13) candrasya ṣoḍaśo bhāgo bhārgavasya vidhīyate viṣkambhānmaṇḍalāccaiva yojanācca pramāṇataḥ // ### [1.57.14](https://indike.org/pramana/in.purana.linga.1.57.14) bhārgavātpādahīnastu vijñeyo vai bṛhaspatiḥ pādahīnau vakrasaurī tathāyāmapramāṇataḥ // ### [1.57.15](https://indike.org/pramana/in.purana.linga.1.57.15) vistārānmaṇḍalāccaiva pādahīnastayorbudhaḥ tārānakṣatrarūpāṇi vapuṣmantīha yāni vai // ### [1.57.16](https://indike.org/pramana/in.purana.linga.1.57.16) budhena tāni tulyāni vistārānmaṇḍalādapi prāyaśaścandrayogīni vidyādṛkṣāṇi tattvavit // ### [1.57.17](https://indike.org/pramana/in.purana.linga.1.57.17) tārānakṣatrarūpāṇi hīnāni tu parasparam śatāni pañca catvāri trīṇi dve caiva yojane // ### [1.57.18](https://indike.org/pramana/in.purana.linga.1.57.18) sarvopari nikṛṣṭāni tārakāmaṇḍalāni tu yojanadvayamātrāṇi tebhyo hrasvaṃ na vidyate // ### [1.57.19](https://indike.org/pramana/in.purana.linga.1.57.19) upariṣṭāttrayasteṣāṃ grahā ye dūrasarpiṇaḥ sauro 'ṅgirāś ca vakraś ca jñeyā mandavicāriṇaḥ // ### [1.57.20](https://indike.org/pramana/in.purana.linga.1.57.20) tebhyo 'dhastāttu catvāraḥ punaranye mahāgrahāḥ sūryaḥ somo budhaścaiva bhārgavaścaiva śīghragāḥ // ### [1.57.21](https://indike.org/pramana/in.purana.linga.1.57.21) tāvantyastārakāḥ koṭyo yāvantyṛkṣāṇi sarvaśaḥ dhruvāt tu niyamāccaiṣām ṛkṣamārge vyavasthitiḥ // ### [1.57.22](https://indike.org/pramana/in.purana.linga.1.57.22) saptāśvasyaiva sūryasya nīcoccatvamanukramāt uttarāyaṇamārgastho yadā parvasu candramāḥ // ### [1.57.23](https://indike.org/pramana/in.purana.linga.1.57.23) uccatvāddṛśyate śīghraṃ nātivyaktairgabhastibhiḥ tadā dakṣiṇamārgastho nīcāṃ vīthimupāśritaḥ // ### [1.57.24](https://indike.org/pramana/in.purana.linga.1.57.24) bhūmirekhāvṛtaḥ sūryaḥ paurṇimāvāsyayos tadā dadṛśe ca yathākālaṃ śīghramastamupaiti ca // ### [1.57.25](https://indike.org/pramana/in.purana.linga.1.57.25) tasmāduttaramārgastho hy amāvāsyāṃ niśākaraḥ dadṛśe dakṣiṇe mārge niyamāddṛśyate na ca // ### [1.57.26](https://indike.org/pramana/in.purana.linga.1.57.26) jyotiṣāṃ gatiyogena sūryasya tamasā vṛtaḥ samānakālāstamayau viṣuvatsu samodayau // ### [1.57.27](https://indike.org/pramana/in.purana.linga.1.57.27) uttarāsu ca vīthīṣu vyantarāstamanodayau paurṇimāvāsyayor jñeyau jyotiścakrānuvartinau // ### [1.57.28](https://indike.org/pramana/in.purana.linga.1.57.28) dakṣiṇāyanamārgastho yadā carati raśmivān grahāṇāṃ caiva sarveṣāṃ sūryo 'dhastāt prasarpati // ### [1.57.29](https://indike.org/pramana/in.purana.linga.1.57.29) vistīrṇaṃ maṇḍalaṃ kṛtvā tasyordhvaṃ carate śaśī nakṣatramaṇḍalaṃ kṛtsnaṃ somādūrdhvaṃ prasarpati // ### [1.57.30](https://indike.org/pramana/in.purana.linga.1.57.30) nakṣatrebhyo budhaścordhvaṃ budhādūrdhvaṃ tu bhārgavaḥ vakrastu bhārgavādūrdhvaṃ vakrād ūrdhvaṃ bṛhaspatiḥ // ### [1.57.31](https://indike.org/pramana/in.purana.linga.1.57.31) tasmācchanaiścaraścordhvaṃ tasmātsaptarṣimaṇḍalam ṛṣīṇāṃ caiva saptānāṃ dhruvasyordhvaṃ vyavasthitiḥ // ### [1.57.32](https://indike.org/pramana/in.purana.linga.1.57.32) taṃ viṣṇulokaṃ paramaṃ jñātvā mucyeta kilbiṣāt dviguṇeṣu sahasreṣu yojanānāṃ śateṣu ca // ### [1.57.33](https://indike.org/pramana/in.purana.linga.1.57.33) grahanakṣatratārāsu upariṣṭādyathākramam grahāś ca candrasūryau ca yutau divyena tejasā // ### [1.57.34](https://indike.org/pramana/in.purana.linga.1.57.34) nityamṛkṣeṣu yujyante gacchanto 'harniśaṃ kramāt grahanakṣatrasūryās te nīcoccaṛjusaṃsthitāḥ // ### [1.57.35](https://indike.org/pramana/in.purana.linga.1.57.35) samāgame ca bhede ca paśyanti yugapatprajāḥ ṛtavaḥ ṣaṭ smṛtāḥ sarve samāgacchanti pañcadhā // ### [1.57.36](https://indike.org/pramana/in.purana.linga.1.57.36) parasparāsthitā hyete yujyante ca parasparam asaṃkareṇa vijñeyas teṣāṃ yogastu vai budhaiḥ // ### [1.57.37](https://indike.org/pramana/in.purana.linga.1.57.37) evaṃ saṃkṣipya kathitaṃ grahāṇāṃ gamanaṃ dvijāḥ bhāskarapramukhānāṃ ca yathādṛṣṭaṃ yathāśrutam // ### [1.57.38](https://indike.org/pramana/in.purana.linga.1.57.38) grahādhipatye bhagavān brahmaṇā padmayoninā abhiṣiktaḥ sahasrāṃśū rudreṇa tu yathā guhaḥ // ### [1.57.39](https://indike.org/pramana/in.purana.linga.1.57.39) tasmādgrahārcanā kāryā agnau codyaṃ yathāvidhi ādityagrahapīḍāyāṃ sadbhiḥ kāryārthasiddhaye // ### [1.57.39.p1](https://indike.org/pramana/in.purana.linga.1.57.39.p1) iti śrīliṅgamahāpurāṇe pūrvabhāge jyotiścakre grahacārakathanaṃ nāma saptapañcāśattamo 'dhyāyaḥ ## Commentaries (1) - [Śivatosaṇī Liṅgapurāṇaṭīkā](https://indike.org/pramana/in.purana.linga!ganesa.60.2) — Gaṇeśa Bhaṭṭa, Sanskrit ## Linked texts (3) - [Vāyupurāṇa](https://indike.org/pramana/in.purana.vayu.1.52.90) — Vyāsa, Sanskrit - [Brahmāṇḍapurāṇa](https://indike.org/pramana/in.purana.brahmanda.1.23.98) — Vyāsa, Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.63.1) — Ativīrarāma Pāṇṭiyar 1500, Sanskrit --- Source: [https://indike.org/pramana/in.purana.linga.1.57](https://indike.org/pramana/in.purana.linga.1.57) · Pramāṇa