[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 1.59 # Lingapurana 1.59 Liṅgapurāṇa 1.59 - **Language:** Sanskrit ## Contents - [1.59.45](https://indike.org/pramana/in.purana.linga.1.59.45) — 1 part ### [1.59.1](https://indike.org/pramana/in.purana.linga.1.59.1) sūta uvāca etacchrutvā tu munayaḥ punastaṃ saṃśayānvitāḥ papracchuruttaraṃ bhūyas tadā te romaharṣaṇam // ### [1.59.2](https://indike.org/pramana/in.purana.linga.1.59.2) ṛṣaya ūcuḥ yadetaduktaṃ bhavatā sūteha vadatāṃ vara etadvistarato brūhi jyotiṣāṃ ca vinirṇayam // ### [1.59.3](https://indike.org/pramana/in.purana.linga.1.59.3) śrutvā tu vacanaṃ teṣāṃ tadā sūtaḥ samāhitaḥ uvāca paramaṃ vākyaṃ teṣāṃ saṃśayanirṇaye // ### [1.59.4](https://indike.org/pramana/in.purana.linga.1.59.4) asminnarthe mahāprājñair yaduktaṃ śāntabuddhibhiḥ etadvo 'haṃ pravakṣyāmi sūryacandramasorgatim // ### [1.59.5](https://indike.org/pramana/in.purana.linga.1.59.5) yathā devagṛhāṇīha sūryacandrādayo grahāḥ ataḥ paraṃ tu trividham agnervakṣye samudbhavam // ### [1.59.6](https://indike.org/pramana/in.purana.linga.1.59.6) divyasya bhautikasyāgner atho 'gneḥ pārthivasya ca vyuṣṭāyāṃ tu rajanyāṃ ca brahmaṇo 'vyaktajanmanaḥ // ### [1.59.7](https://indike.org/pramana/in.purana.linga.1.59.7) avyākṛtamidaṃ tvāsīn naiśena tamasā vṛtam caturbhāgāvaśiṣṭe 'smin loke naṣṭe viśeṣataḥ // ### [1.59.8](https://indike.org/pramana/in.purana.linga.1.59.8) svayaṃbhūrbhagavāṃstatra lokasarvārthasādhakaḥ khadyotavatsa vyacarad āvirbhāvacikīrṣayā // ### [1.59.9](https://indike.org/pramana/in.purana.linga.1.59.9) so 'gniṃ sṛṣṭvātha lokādau pṛthivījalasaṃśritaḥ saṃhṛtya tatprakāśārthaṃ tridhā vyabhajadīśvaraḥ // ### [1.59.10](https://indike.org/pramana/in.purana.linga.1.59.10) pavano yastu loke 'smin pārthivo vahnirucyate yaścāsau lokādau sūrye śuciragnistu sa smṛtaḥ // ### [1.59.11](https://indike.org/pramana/in.purana.linga.1.59.11) vaidyuto 'bjastu vijñeyas teṣāṃ vakṣye tu lakṣaṇam vaidyuto jāṭharaḥ sauro vārigarbhāstrayo 'gnayaḥ // ### [1.59.12](https://indike.org/pramana/in.purana.linga.1.59.12) tasmādapaḥ pibansūryo gobhir dīpyatyasau vibhuḥ jale cābjaḥ samāviṣṭo nādbhir agniḥ praśāmyati // ### [1.59.13](https://indike.org/pramana/in.purana.linga.1.59.13) mānavānāṃ ca kukṣistho nāgniḥ śāmyati pāvakaḥ arciṣmānpavanaḥ so 'gnir niṣprabho jāṭharaḥ smṛtaḥ // ### [1.59.14](https://indike.org/pramana/in.purana.linga.1.59.14) yaścāyaṃ maṇḍalī śuklī nirūṣmā samprajāyate prabhā saurī tu pādena hy astaṃ yāte divākare // ### [1.59.15](https://indike.org/pramana/in.purana.linga.1.59.15) agnimāviśate rātrau tasmāddūrātprakāśate udyantaṃ ca punaḥ sūryam auṣṇyam agneḥ samāviśet // ### [1.59.16](https://indike.org/pramana/in.purana.linga.1.59.16) pādena pārthivasyāgnes tasmādagnistapatyasau prakāśoṣṇasvarūpe ca saurāgneye tu tejasī // ### [1.59.17](https://indike.org/pramana/in.purana.linga.1.59.17) parasparānupraveśād āpyāyete parasparam uttare caiva bhūmyardhe tathā hyagniś ca dakṣiṇe // ### [1.59.18](https://indike.org/pramana/in.purana.linga.1.59.18) uttiṣṭhati punaḥ sūryaḥ punarvai praviśaty apaḥ tasmāttāmrā bhavantyāpo divārātripraveśanāt // ### [1.59.19](https://indike.org/pramana/in.purana.linga.1.59.19) astaṃ yāti punaḥ sūryo 'harvai praviśaty apaḥ tasmānnaktaṃ punaḥ śuklā āpo dṛśyanti bhāsvarāḥ // ### [1.59.20](https://indike.org/pramana/in.purana.linga.1.59.20) etena kramayogena bhūmyardhe dakṣiṇottare udayāstamane nityam ahorātraṃ viśaty apaḥ // ### [1.59.21](https://indike.org/pramana/in.purana.linga.1.59.21) yaścāsau tapate sūryaḥ pibannaṃbho gabhastibhiḥ pārthivāgnivimiśro 'sau divyaḥ śuciriti smṛtaḥ // ### [1.59.22](https://indike.org/pramana/in.purana.linga.1.59.22) sahasrapādasau vahnir vṛttakumbhanibhaḥ smṛtaḥ ādatte sa tu nāḍīnāṃ sahasreṇa samantataḥ // ### [1.59.23](https://indike.org/pramana/in.purana.linga.1.59.23) nādeyīścaiva sāmudrīḥ kūpāścaiva tathā ghanāḥ sthāvarā jaṅgamāścaiva vāpīkulyādikā apaḥ // ### [1.59.24](https://indike.org/pramana/in.purana.linga.1.59.24) tasya raśmisahasraṃ tac chītavarṣoṣṇaniḥsravam tāsāṃ catuḥśatā nāḍyo varṣante citramūrtayaḥ // ### [1.59.25](https://indike.org/pramana/in.purana.linga.1.59.25) bhajanāścaiva mālyāś ca ketanāḥ patanās tathā amṛtā nāmataḥ sarvā raśmayo vṛṣṭisarjanāḥ // ### [1.59.26](https://indike.org/pramana/in.purana.linga.1.59.26) himodvahāś ca tā nāḍyo raśmayas triśatāḥ punaḥ reśā meghāś ca vātsyāś ca hlādinyo himasarjanāḥ // ### [1.59.27](https://indike.org/pramana/in.purana.linga.1.59.27) candrabhā nāmataḥ sarvā pītābhāś ca gabhastayaḥ śuklāś ca kakubhāścaiva gāvo viśvabhṛtas tathā // ### [1.59.28](https://indike.org/pramana/in.purana.linga.1.59.28) śuklāstā nāmataḥ sarvās triśatīrgharmasarjanāḥ somo bibharti tābhistu manuṣyapitṛdevatāḥ // ### [1.59.29](https://indike.org/pramana/in.purana.linga.1.59.29) manuṣyānauṣadheneha svadhayā ca pitṝnapi amṛtena surān sarvāṃs tisṛbhis tarpayatyasau // ### [1.59.30](https://indike.org/pramana/in.purana.linga.1.59.30) vasante caiva grīṣme ca śataiḥ sa tapate tribhiḥ varṣāsvatho śaradi ca caturbhiḥ saṃpravarṣati // ### [1.59.31](https://indike.org/pramana/in.purana.linga.1.59.31) hemante śiśire caiva himamutsṛjate tribhiḥ indro dhātā bhagaḥ pūṣā mitro 'tha varuṇo 'ryamā // ### [1.59.32](https://indike.org/pramana/in.purana.linga.1.59.32) aṃśur vivasvāṃstvaṣṭā ca parjanyo viṣṇureva ca varuṇo māghamāse tu sūrya eva tu phālgune // ### [1.59.33](https://indike.org/pramana/in.purana.linga.1.59.33) caitre māsi bhavedaṃśur dhātā vaiśākhatāpanaḥ jyeṣṭhe māsi bhavedindra āṣāḍhe cāryamā raviḥ // ### [1.59.34](https://indike.org/pramana/in.purana.linga.1.59.34) vivasvān śrāvaṇe māsi prauṣṭhapade bhagaḥ smṛtaḥ parjanyo 'śvayuje māsi tvaṣṭā vai kārtike raviḥ // ### [1.59.35](https://indike.org/pramana/in.purana.linga.1.59.35) mārgaśīrṣe bhavenmitraḥ pauṣe viṣṇuḥ sanātanaḥ pañcaraśmisahasrāṇi varuṇasyārkakarmaṇi // ### [1.59.36](https://indike.org/pramana/in.purana.linga.1.59.36) ṣaḍbhiḥ sahasraiḥ pūṣā tu devo 'ṃśuḥ saptabhis tathā dhātāṣṭabhiḥ sahasraistu navabhistu śatakratuḥ // ### [1.59.37](https://indike.org/pramana/in.purana.linga.1.59.37) vivasvān daśabhir yāti yātyekādaśabhir bhagaḥ saptabhistapate mitras tvaṣṭā caivāṣṭabhiḥ smṛtaḥ // ### [1.59.38](https://indike.org/pramana/in.purana.linga.1.59.38) aryamā daśabhir yāti parjanyo navabhis tathā ṣaḍbhī raśmisahasraistu viṣṇustapati medinīm // ### [1.59.39](https://indike.org/pramana/in.purana.linga.1.59.39) vasaṃte kapilaḥ sūryo grīṣme kāñcanasaprabhaḥ śveto varṣāsu varṇena pāṇḍuḥ śaradi bhāskaraḥ // ### [1.59.40](https://indike.org/pramana/in.purana.linga.1.59.40) hemante tāmravarṇastu śiśire lohito raviḥ iti varṇāḥ samākhyātā mayā sūryasamudbhavāḥ // ### [1.59.41](https://indike.org/pramana/in.purana.linga.1.59.41) oṣadhīṣu balaṃ dhatte svadhayā ca pitṛṣvapi sūryo 'mareṣvapyamṛtaṃ trayaṃ triṣu niyacchati // ### [1.59.42](https://indike.org/pramana/in.purana.linga.1.59.42) evaṃ raśmisahasraṃ tat sauraṃ lokārthasādhakam bhidyate lokamāsādya jalaśītoṣṇaniḥsravam // ### [1.59.43](https://indike.org/pramana/in.purana.linga.1.59.43) ityetanmaṇḍalaṃ śuklaṃ bhāsvaraṃ sūryasaṃjñitam nakṣatragrahasomānāṃ pratiṣṭhāyonireva ca // ### [1.59.44](https://indike.org/pramana/in.purana.linga.1.59.44) candraṛkṣagrahāḥ sarve vijñeyāḥ sūryasaṃbhavāḥ nakṣatrādhipatiḥ somo nayanaṃ vāmamīśituḥ // ### [1.59.45](https://indike.org/pramana/in.purana.linga.1.59.45) nayanaṃ caivam īśasya dakṣiṇaṃ bhāskaraḥ svayam teṣāṃ janānāṃ loke 'smin nayanaṃ nayate yataḥ // ### [1.59.45.p1](https://indike.org/pramana/in.purana.linga.1.59.45.p1) iti śrīliṅgamahāpurāṇe pūrvabhāge sūryaraśmisvarūpakathanaṃ nāmaikonaṣaṣṭitamo 'dhyāyaḥ ## Commentaries (1) - [Śivatosaṇī Liṅgapurāṇaṭīkā](https://indike.org/pramana/in.purana.linga!ganesa.62.4) — Gaṇeśa Bhaṭṭa, Sanskrit ## Linked texts (4) - [Brahmāṇḍapurāṇa](https://indike.org/pramana/in.purana.brahmanda.1.24.1) — Vyāsa, Sanskrit - [Vāyupurāṇa](https://indike.org/pramana/in.purana.vayu.1.53.2) — Vyāsa, Sanskrit - [Sāmbapurāṇa](https://indike.org/pramana/in.purana.upa.surya.samba.6.46) — Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.65.1) — Ativīrarāma Pāṇṭiyar 1500, Sanskrit --- Source: [https://indike.org/pramana/in.purana.linga.1.59](https://indike.org/pramana/in.purana.linga.1.59) · Pramāṇa