[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 1.5 # Lingapurana 1.5 Liṅgapurāṇa 1.5 - **Language:** Sanskrit ### [1.5.1](https://indike.org/pramana/in.purana.linga.1.5.1) sūta uvāca yadā sraṣṭuṃ matiṃ cakre mohaścāsīnmahātmanaḥ dvijāś ca buddhipūrvaṃ tu brahmaṇo 'vyaktajanmanaḥ // ### [1.5.2](https://indike.org/pramana/in.purana.linga.1.5.2) tamo moho mahāmohas tāmisraścāndhasaṃjñitaḥ avidyā pañcadhā hyeṣā prādurbhūtā svayambhuvaḥ // ### [1.5.3](https://indike.org/pramana/in.purana.linga.1.5.3) avidyayā munergrastaḥ sargo mukhya iti smṛtaḥ asādhaka iti smṛtvā sargo mukhyaḥ prajāpatiḥ // ### [1.5.4](https://indike.org/pramana/in.purana.linga.1.5.4) abhyamanyata so 'nyaṃ vai nagā mukhyodbhavāḥ smṛtāḥ tridhā kaṇṭho munestasya dhyāyato vai hyavartata // ### [1.5.5](https://indike.org/pramana/in.purana.linga.1.5.5) prathamaṃ tasya vai jajñe tiryaksroto mahātmanaḥ ūrdhvasrotaḥ parastasya sāttvikaḥ sa iti smṛtaḥ // ### [1.5.6](https://indike.org/pramana/in.purana.linga.1.5.6) arvāksroto 'nugrahaś ca tathā bhūtādikaḥ punaḥ brahmaṇo mahatastvādyo dvitīyo bhautikas tathā // ### [1.5.7](https://indike.org/pramana/in.purana.linga.1.5.7) sargastṛtīyaścaindriyas turīyo mukhya ucyate tiryagyonyaḥ pañcamastu ṣaṣṭho daivika ucyate // ### [1.5.8](https://indike.org/pramana/in.purana.linga.1.5.8) saptamo mānuṣo viprā aṣṭamo 'nugrahaḥ smṛtaḥ navamaścaiva kaumāraḥ prākṛtā vaikṛtāstvime // ### [1.5.9](https://indike.org/pramana/in.purana.linga.1.5.9) purastādasṛjaddevaḥ sanandaṃ sanakaṃ tathā sanātanaṃ muniśreṣṭhā naiṣkarmyeṇa gatāḥ param // ### [1.5.10](https://indike.org/pramana/in.purana.linga.1.5.10) marīcibhṛgvaṅgirasaḥ pulastyaṃ pulahaṃ kratum dakṣamatriṃ vasiṣṭhaṃ ca so 'sṛjadyogavidyayā // ### [1.5.11](https://indike.org/pramana/in.purana.linga.1.5.11) navaite brahmaṇaḥ putrā brahmajñā brāhmaṇottamāḥ brahmavādina evaite brahmaṇaḥ sadṛśāḥ smṛtāḥ // ### [1.5.12](https://indike.org/pramana/in.purana.linga.1.5.12) saṃkalpaścaiva dharmaś ca hy adharmo dharmasaṃnidhiḥ dvādaśaiva prajāstvetā brahmaṇo 'vyaktajanmanaḥ // ### [1.5.13](https://indike.org/pramana/in.purana.linga.1.5.13) ṛbhuṃ sanatkumāraṃ ca sasarjādau sanātanaḥ tāvūrdhvaretasau divyau cāgrajau brahmavādinau // ### [1.5.14](https://indike.org/pramana/in.purana.linga.1.5.14) kumārau brahmaṇas tulyau sarvajñau sarvabhāvinau vakṣye bhāryākulaṃ teṣāṃ munīnāmagrajanmanām // ### [1.5.15](https://indike.org/pramana/in.purana.linga.1.5.15) samāsato muniśreṣṭhāḥ prajāsambhūtimeva ca śatarūpāṃ tu vai rājñīṃ virājamasṛjatprabhuḥ // ### [1.5.16](https://indike.org/pramana/in.purana.linga.1.5.16) svāyambhuvāttu vai rājñī śatarūpā tvayonijā lebhe putradvayaṃ puṇyā tathā kanyādvayaṃ ca sā // ### [1.5.17](https://indike.org/pramana/in.purana.linga.1.5.17) uttānapādo hyavaro dhīmāñjyeṣṭhaḥ priyavrataḥ jyeṣṭhā variṣṭhā tvākūtiḥ prasūtiścānujā smṛtā // ### [1.5.18](https://indike.org/pramana/in.purana.linga.1.5.18) upayeme tadākūtiṃ rucirnāma prajāpatiḥ prasūtiṃ bhagavāndakṣo lokadhātrīṃ ca yoginīm // ### [1.5.19](https://indike.org/pramana/in.purana.linga.1.5.19) dakṣiṇāsahitaṃ yajñam ākūtiḥ suṣuve tathā dakṣiṇā janayāmāsa divyā dvādaśa putrikāḥ // ### [1.5.20](https://indike.org/pramana/in.purana.linga.1.5.20) prasūtiḥ suṣuve dakṣāc caturviṃśatikanyakāḥ śraddhāṃ lakṣmīṃ dhṛtiṃ puṣṭiṃ tuṣṭiṃ medhāṃ kriyāṃ tathā // ### [1.5.21](https://indike.org/pramana/in.purana.linga.1.5.21) buddhiṃ lajjāṃ vapuḥśāntiṃ siddhiṃ kīrtiṃ mahātapāḥ khyātiṃ śāntiṃ ca sambhūtiṃ smṛtiṃ prītiṃ kṣamāṃ tathā // ### [1.5.22](https://indike.org/pramana/in.purana.linga.1.5.22) saṃnatiṃ cānasūyāṃ ca ūrjāṃ svāhāṃ surāraṇim svadhāṃ caiva mahābhāgāṃ pradadau ca yathākramam // ### [1.5.23](https://indike.org/pramana/in.purana.linga.1.5.23) śraddhādyāścaiva kīrtyantās trayodaśa sudārikāḥ dharmaṃ prajāpatiṃ jagmuḥ patiṃ paramadurlabhāḥ // ### [1.5.24](https://indike.org/pramana/in.purana.linga.1.5.24) upayeme bhṛgurdhīmān khyātiṃ tāṃ bhārgavāraṇim sambhūtiṃ ca marīcistu smṛtiṃ caivāṅgirā muniḥ // ### [1.5.25](https://indike.org/pramana/in.purana.linga.1.5.25) prītiṃ pulastyaḥ puṇyātmā kṣamāṃ tāṃ pulaho muniḥ kratuś ca saṃnatiṃ dhīmān atristāṃ cānasūyakām // ### [1.5.26](https://indike.org/pramana/in.purana.linga.1.5.26) ūrjāṃ vasiṣṭho bhagavān variṣṭho vārijekṣaṇām vibhāvasus tathā svāhāṃ svadhāṃ vai pitaras tathā // ### [1.5.27](https://indike.org/pramana/in.purana.linga.1.5.27) putrīkṛtā satī yā sā mānasī śivasambhavā dakṣeṇa jagatāṃ dhātrī rudramevāsthitā patim // ### [1.5.28](https://indike.org/pramana/in.purana.linga.1.5.28) ardhanārīśvaraṃ dṛṣṭvā sargādau kanakāṇḍajaḥ vibhajasveti cāhādau yadā jātā tadābhavat // ### [1.5.29](https://indike.org/pramana/in.purana.linga.1.5.29) tasyāścaivāṃśajāḥ sarvāḥ striyastribhuvane tathā ekādaśāvidhā rudrās tasya cāṃśodbhavās tathā // ### [1.5.30](https://indike.org/pramana/in.purana.linga.1.5.30) strīliṅgamakhilaṃ sā vai puṃliṅgaṃ nīlalohitaḥ taṃ dṛṣṭvā bhagavān brahmā dakṣamālokya suvratām // ### [1.5.31](https://indike.org/pramana/in.purana.linga.1.5.31) bhajasva dhātrīṃ jagatāṃ mamāpi ca tavāpi ca punnāmno narakāttrāti iti putrītvihoktitaḥ // ### [1.5.32](https://indike.org/pramana/in.purana.linga.1.5.32) praśastā tava kānteyaṃ syāt putrī viśvamātṛkā tasmāt putrī satī nāmnā tavaiṣā ca bhaviṣyati // ### [1.5.33](https://indike.org/pramana/in.purana.linga.1.5.33) evamuktastadā dakṣo niyogādbrahmaṇo muniḥ labdhvā putrīṃ dadau sākṣāt satīṃ rudrāya sādaram // ### [1.5.34](https://indike.org/pramana/in.purana.linga.1.5.34) dharmasya patnyaḥ śraddhādyāḥ kīrtitā vai trayodaśa tāsu dharmaprajāṃ vakṣye yathākramamanuttamam // ### [1.5.35](https://indike.org/pramana/in.purana.linga.1.5.35) kāmo darpo 'tha niyamaḥ saṃtoṣo lobha eva ca śrutastu daṇḍaḥ samayo bodhaścaiva mahādyutiḥ // ### [1.5.36](https://indike.org/pramana/in.purana.linga.1.5.36) apramādaś ca vinayo vyavasāyo dvijottamāḥ kṣemaṃ sukhaṃ yaśaścaiva dharmaputrāś ca tāsu vai // ### [1.5.37](https://indike.org/pramana/in.purana.linga.1.5.37) dharmasya vai kriyāyāṃ tu daṇḍaḥ samaya eva ca apramādas tathā bodho buddherdharmasya tau sutau // ### [1.5.38](https://indike.org/pramana/in.purana.linga.1.5.38) tasmātpañcadaśaivaite tāsu dharmātmajāstviha bhṛgupatnī ca suṣuve khyātirviṣṇoḥ priyāṃ śriyam // ### [1.5.39](https://indike.org/pramana/in.purana.linga.1.5.39) dhātāraṃ ca vidhātāraṃ merorjāmātarau sutau prabhūtirnāma yā patnī marīceḥ suṣuve sutau // ### [1.5.40](https://indike.org/pramana/in.purana.linga.1.5.40) pūrṇamāsaṃ tu mārīcaṃ tataḥ kanyācatuṣṭayam tuṣṭirjyeṣṭhā ca vai dṛṣṭiḥ kṛṣiścāpacitis tathā // ### [1.5.41](https://indike.org/pramana/in.purana.linga.1.5.41) kṣamā ca suṣuve putrān putrīṃ ca pulahācchubhām kardamaṃ ca varīyāṃsaṃ sahiṣṇuṃ munisattamāḥ // ### [1.5.42](https://indike.org/pramana/in.purana.linga.1.5.42) tathā kanakapītāṃ sa pīvarīṃ pṛthivīsamām prītyāṃ pulastyaś ca tathā janayāmāsa vai sutān // ### [1.5.43](https://indike.org/pramana/in.purana.linga.1.5.43) dattorṇaṃ vedabāhuṃ ca putrīṃ cānyāṃ dṛṣadvatīm putrāṇāṃ ṣaṣṭisāhasraṃ saṃnatiḥ suṣuve śubhā // ### [1.5.44](https://indike.org/pramana/in.purana.linga.1.5.44) kratostu bhāryā sarve te vālakhilyā iti śrutāḥ sinīvālīṃ kuhūṃ caiva rākāṃ cānumatiṃ tathā // ### [1.5.45](https://indike.org/pramana/in.purana.linga.1.5.45) smṛtiś ca suṣuve patnī muneścāṅgirasas tathā labdhānubhāvamagniṃ ca kīrtimantaṃ ca suvratā // ### [1.5.46](https://indike.org/pramana/in.purana.linga.1.5.46) atrerbhāryānasūyā vai suṣuve ṣaṭprajāstu yāḥ tāsvekā kanyakā nāmnā śrutiḥ sā sūnupañcakam // ### [1.5.47](https://indike.org/pramana/in.purana.linga.1.5.47) satyanetro munirbhavyo mūrtirāpaḥ śanaiścaraḥ somaś ca vai śrutiḥ ṣaṣṭhī pañcātreyāstu sūnavaḥ // ### [1.5.48](https://indike.org/pramana/in.purana.linga.1.5.48) ūrjā vasiṣṭhādvai lebhe sutāṃś ca sutavatsalā jyāyasī puṇḍarīkākṣān vāsiṣṭhān varalocanā // ### [1.5.49](https://indike.org/pramana/in.purana.linga.1.5.49) rajaḥ suhotro bāhuś ca savanaścānaghas tathā sutapāḥ śukra ityete munervai sapta sūnavaḥ // ### [1.5.50](https://indike.org/pramana/in.purana.linga.1.5.50) yaścābhimānī bhagavān bhavātmā paitāmaho vahnirasuḥ prajānām svāhā ca tasmātsuṣuve sutānāṃ trayaṃ trayāṇāṃ jagatāṃ hitāya // ## Linked texts (3) - [Kālikāpurāṇa](https://indike.org/pramana/in.purana.upa.sakta.kalika.3.249) — Sanskrit - [Viṣṇupurāṇa (critical edition)](https://indike.org/pramana/in.purana.visnu*crit.1.10.13) — Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.6.1) — Ativīrarāma Pāṇṭiyar 1500, Sanskrit --- Source: [https://indike.org/pramana/in.purana.linga.1.5](https://indike.org/pramana/in.purana.linga.1.5) · Pramāṇa