[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 1.60 # Lingapurana 1.60 Liṅgapurāṇa 1.60 - **Language:** Sanskrit ## Contents - [1.60.26](https://indike.org/pramana/in.purana.linga.1.60.26) — 1 part ### [1.60.1](https://indike.org/pramana/in.purana.linga.1.60.1) sūta uvāca śeṣāḥ pañca grahā jñeyā īśvarāḥ kāmacāriṇaḥ paṭhyate cāgnirāditya udakaṃ candramāḥ smṛtaḥ // ### [1.60.2](https://indike.org/pramana/in.purana.linga.1.60.2) śeṣāṇāṃ prakṛtiṃ samyag vakṣyamāṇāṃ nibodhata surasenāpatiḥ skandaḥ paṭhyate 'ṅgārako grahaḥ // ### [1.60.3](https://indike.org/pramana/in.purana.linga.1.60.3) nārāyaṇaṃ budhaṃ prāhur devaṃ jñānavido janāḥ sarvalokaprabhuḥ sākṣād yamo lokaprabhuḥ svayam // ### [1.60.4](https://indike.org/pramana/in.purana.linga.1.60.4) mahāgraho dvijaśreṣṭhā mandagāmī śanaiścaraḥ devāsuragurū dvau tu bhānumantau mahāgrahau // ### [1.60.5](https://indike.org/pramana/in.purana.linga.1.60.5) prajāpatisutāvuktau tataḥ śukrabṛhaspatī ādityamūlamakhilaṃ trailokyaṃ nātra saṃśayaḥ // ### [1.60.6](https://indike.org/pramana/in.purana.linga.1.60.6) bhavatyasmājjagatkṛtsnaṃ sadevāsuramānuṣam rudrendropendracandrāṇāṃ viprendrāgnidivaukasām // ### [1.60.7](https://indike.org/pramana/in.purana.linga.1.60.7) dyutirdyutimatāṃ kṛtsnaṃ yattejaḥ sarvalaukikam sarvātmā sarvalokeśo mahādevaḥ prajāpatiḥ // ### [1.60.8](https://indike.org/pramana/in.purana.linga.1.60.8) sūrya eva trilokeśo mūlaṃ paramadaivatam tataḥ saṃjāyate sarvaṃ tatraiva pravilīyate // ### [1.60.9](https://indike.org/pramana/in.purana.linga.1.60.9) bhāvābhāvau hi lokānām ādityānniḥsṛtau purā avijñeyo graho viprā dīptimānsuprabho raviḥ // ### [1.60.10](https://indike.org/pramana/in.purana.linga.1.60.10) atra gacchanti nidhanaṃ jāyante ca punaḥ punaḥ kṣaṇā muhūrtā divasā niśāḥ pakṣāś ca kṛtsnaśaḥ // ### [1.60.11](https://indike.org/pramana/in.purana.linga.1.60.11) māsāḥ saṃvatsaraścaiva ṛtavo 'tha yugāni ca tadādityādṛte hyeṣā kālasaṃkhyā na vidyate // ### [1.60.12](https://indike.org/pramana/in.purana.linga.1.60.12) kālādṛte na niyamo na dīkṣā nāhnikakramaḥ ṛtūnāṃ ca vibhāgaś ca puṣpaṃ mūlaṃ phalaṃ kutaḥ // ### [1.60.13](https://indike.org/pramana/in.purana.linga.1.60.13) kutaḥ sasyaviniṣpattis tṛṇauṣadhigaṇo 'pi ca abhāvo vyavahārāṇāṃ jantūnāṃ divi ceha ca // ### [1.60.14](https://indike.org/pramana/in.purana.linga.1.60.14) jagatpratāpanamṛte bhāskaraṃ rudrarūpiṇam sa eṣa kālaścāgniś ca dvādaśātmā prajāpatiḥ // ### [1.60.15](https://indike.org/pramana/in.purana.linga.1.60.15) tapatyeṣa dvijaśreṣṭhās trailokyaṃ sacarācaram sa eṣa tejasāṃ rāśiḥ samastaḥ sārvalaukikaḥ // ### [1.60.16](https://indike.org/pramana/in.purana.linga.1.60.16) uttamaṃ mārgamāsthāya rātryahobhir idaṃ jagat pārśvata ūrdhvam adhaś caiva tāpayatyeṣa sarvaśaḥ // ### [1.60.17](https://indike.org/pramana/in.purana.linga.1.60.17) yathā prabhākaro dīpo gṛhamadhye 'valambitaḥ pārśvata ūrdhvam adhaścaiva tamo nāśayate samam // ### [1.60.18](https://indike.org/pramana/in.purana.linga.1.60.18) tadvatsahasrakiraṇo graharājo jagatprabhuḥ sūryo gobhir jagat sarvam ādīpayati sarvataḥ // ### [1.60.19](https://indike.org/pramana/in.purana.linga.1.60.19) rave raśmisahasraṃ yat prāṅmayā samudāhṛtam teṣāṃ śreṣṭhāḥ punaḥ sapta raśmayo grahayonayaḥ // ### [1.60.20](https://indike.org/pramana/in.purana.linga.1.60.20) suṣumno harikeśaś ca viśvakarmā tathaiva ca viśvavyacāḥ punaścādyaḥ saṃnaddhaś ca tataḥ paraḥ // ### [1.60.21](https://indike.org/pramana/in.purana.linga.1.60.21) sarvāvasuḥ punaścānyaḥ svarāḍanyaḥ prakīrtitaḥ suṣumnaḥ sūryaraśmistu dakṣiṇāṃ rāśim aidhayat // ### [1.60.22](https://indike.org/pramana/in.purana.linga.1.60.22) nyagūrdhvādhaḥ pracāro 'sya suṣumnaḥ parikīrtitaḥ harikeśaḥ purastād yo ṛkṣayoniḥ prakīrtyate // ### [1.60.23](https://indike.org/pramana/in.purana.linga.1.60.23) dakṣiṇe viśvakarmā ca raśmirvardhayate budham viśvavyacāstu yaḥ paścāc chukrayoniḥ smṛto budhaiḥ // ### [1.60.24](https://indike.org/pramana/in.purana.linga.1.60.24) saṃnaddhaś ca tu yo raśmiḥ sa yonir lohitasya tu ṣaṣṭhaḥ sarvāvasū raśmiḥ sa yonistu bṛhaspateḥ // ### [1.60.25](https://indike.org/pramana/in.purana.linga.1.60.25) śanaiścaraṃ punaś cāpi raśmir āpyāyate svarāṭ evaṃ sūryaprabhāvena nakṣatragrahatārakāḥ // ### [1.60.26](https://indike.org/pramana/in.purana.linga.1.60.26) dṛśyante divi tāḥ sarvāḥ viśvaṃ cedaṃ punarjagat na kṣīyante yatastāni tasmānnakṣatratā smṛtā // ### [1.60.26.p1](https://indike.org/pramana/in.purana.linga.1.60.26.p1) iti śrīliṅgamahāpurāṇe pūrvabhāge ṣaṣṭitamo 'dhyāyaḥ ## Linked texts (4) - [Brahmāṇḍapurāṇa](https://indike.org/pramana/in.purana.brahmanda.1.24.47) — Vyāsa, Sanskrit - [Vāyupurāṇa](https://indike.org/pramana/in.purana.vayu.1.53.31) — Vyāsa, Sanskrit - [Sāmbapurāṇa](https://indike.org/pramana/in.purana.upa.surya.samba.7.5) — Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.66.1) — Ativīrarāma Pāṇṭiyar 1500, Sanskrit --- Source: [https://indike.org/pramana/in.purana.linga.1.60](https://indike.org/pramana/in.purana.linga.1.60) · Pramāṇa