[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 1.63 # Lingapurana 1.63 Liṅgapurāṇa 1.63 - **Language:** Sanskrit ## Contents - [1.63.95](https://indike.org/pramana/in.purana.linga.1.63.95) — 1 part ### [1.63.1](https://indike.org/pramana/in.purana.linga.1.63.1) ṛṣaya ūcuḥ devānāṃ dānavānāṃ ca gandharvoragarakṣasām utpattiṃ brūhi sūtādya yathākramamanuttamam // ### [1.63.2](https://indike.org/pramana/in.purana.linga.1.63.2) sūta uvāca saṃkalpāddarśanātsparśāt pūrveṣāṃ sṛṣṭirucyate dakṣātprācetasādūrdhvaṃ sṛṣṭirmaithunasaṃbhavā // ### [1.63.3](https://indike.org/pramana/in.purana.linga.1.63.3) yadā tu sṛjatastasya devarṣigaṇapannagān na vṛddhimagamallokas tadā maithunayogataḥ // ### [1.63.4](https://indike.org/pramana/in.purana.linga.1.63.4) dakṣaḥ putrasahasrāṇi pañca sūtyāmajījanat tāṃstu dṛṣṭvā mahābhāgān sisṛkṣurvividhāḥ prajāḥ // ### [1.63.5](https://indike.org/pramana/in.purana.linga.1.63.5) nāradaḥ prāha haryaśvān dakṣaputrān samāgatān bhuvaḥ pramāṇaṃ sarvaṃ tu jñātvordhvamadha eva ca // ### [1.63.6](https://indike.org/pramana/in.purana.linga.1.63.6) tataḥ sṛṣṭiṃ viśeṣeṇa kurudhvaṃ munisattamāḥ te tu tadvacanaṃ śrutvā prayātāḥ sarvatodiśam // ### [1.63.7](https://indike.org/pramana/in.purana.linga.1.63.7) adyāpi na nivartante samudrādiva sindhavaḥ haryaśveṣu ca naṣṭeṣu punardakṣaḥ prajāpatiḥ // ### [1.63.8](https://indike.org/pramana/in.purana.linga.1.63.8) sūtyāmeva ca putrāṇāṃ sahasramasṛjatprabhuḥ śabalā nāma te viprāḥ sametāḥ sṛṣṭihetavaḥ // ### [1.63.9](https://indike.org/pramana/in.purana.linga.1.63.9) nārado 'nugatānprāha punastānsūryavarcasaḥ bhuvaḥ pramāṇaṃ sarvaṃ tu jñātvā bhrātṝn punaḥ punaḥ // ### [1.63.10](https://indike.org/pramana/in.purana.linga.1.63.10) āgatya vātha sṛṣṭiṃ vai kariṣyatha viśeṣataḥ te 'pi tenaiva mārgeṇa jagmurbhrātṛgatiṃ tathā // ### [1.63.11](https://indike.org/pramana/in.purana.linga.1.63.11) tatasteṣvapi naṣṭeṣu ṣaṣṭikanyāḥ prajāpatiḥ vairiṇyāṃ janayāmāsa dakṣaḥ prācetasastadā // ### [1.63.12](https://indike.org/pramana/in.purana.linga.1.63.12) prādātsa daśakaṃ dharme kaśyapāya trayodaśa viṃśatsapta ca somāya catasro 'riṣṭanemaye // ### [1.63.13](https://indike.org/pramana/in.purana.linga.1.63.13) dve caiva bhṛguputrāya dve kṛśāśvāya dhīmate dve caivāṅgirase tadvat tāsāṃ nāmāni vistarāt // ### [1.63.14](https://indike.org/pramana/in.purana.linga.1.63.14) śṛṇudhvaṃ devamātṝṇāṃ prajāvistāramāditaḥ marutvatī vasūr yāmir lambā bhānurarundhatī // ### [1.63.15](https://indike.org/pramana/in.purana.linga.1.63.15) saṃkalpā ca muhūrtā ca sādhyā viśvā ca bhāminī dharmapatnyaḥ samākhyātās tāsāṃ putrānvadāmi vaḥ // ### [1.63.16](https://indike.org/pramana/in.purana.linga.1.63.16) viśvedevāstu viśvāyāḥ sādhyā sādhyānajījanat marutvatyāṃ marutvanto vasostu vasavas tathā // ### [1.63.17](https://indike.org/pramana/in.purana.linga.1.63.17) bhānostu bhānavaḥ proktā muhūrtāyā muhūrtakāḥ lambāyā ghoṣanāmāno nāgavīthistu yāmijaḥ // ### [1.63.18](https://indike.org/pramana/in.purana.linga.1.63.18) saṃkalpāyāstu saṃkalpo vasusargaṃ vadāmi vaḥ jyotiṣmantastu ye devā vyāpakāḥ sarvatodiśam // ### [1.63.19](https://indike.org/pramana/in.purana.linga.1.63.19) vasavaste samākhyātāḥ sarvabhūtahitaiṣiṇaḥ āpo dhruvaś ca somaś ca dharaścaivānilo 'nalaḥ // ### [1.63.20](https://indike.org/pramana/in.purana.linga.1.63.20) pratyūṣaś ca prabhāsaś ca vasavo 'ṣṭau prakīrtitāḥ ajaikapād ahirbudhnyo virūpākṣaḥ sabhairavaḥ // ### [1.63.21](https://indike.org/pramana/in.purana.linga.1.63.21) haraś ca bahurūpaś ca tryaṃbakaś ca sureśvaraḥ sāvitraś ca jayantaś ca pinākī cāparājitaḥ // ### [1.63.22](https://indike.org/pramana/in.purana.linga.1.63.22) ete rudrāḥ samākhyātā ekādaśa gaṇeśvarāḥ kaśyapasya pravakṣyāmi patnībhyaḥ putrapautrakam // ### [1.63.23](https://indike.org/pramana/in.purana.linga.1.63.23) aditiś ca ditiścaiva ariṣṭā surasā muniḥ surabhir vinatā tāmrā tadvat krodhavaśā ilā // ### [1.63.24](https://indike.org/pramana/in.purana.linga.1.63.24) kadrūstviṣā danustadvat tāsāṃ putrānvadāmi vaḥ tuṣitā nāma ye devāś cākṣuṣasyāntare manoḥ // ### [1.63.25](https://indike.org/pramana/in.purana.linga.1.63.25) vaivasvatāntare te vai ādityā dvādaśa smṛtāḥ indro dhātā bhagastvaṣṭa mitro 'tha varuṇo 'ryamā // ### [1.63.26](https://indike.org/pramana/in.purana.linga.1.63.26) vivasvānsavitā pūṣā aṃśumān viṣṇureva ca ete sahasrakiraṇā ādityā dvādaśa smṛtāḥ // ### [1.63.27](https://indike.org/pramana/in.purana.linga.1.63.27) ditiḥ putradvayaṃ lebhe kaśyapāditi naḥ śrutam hiraṇyakaśipuṃ caiva hiraṇyākṣaṃ tathaiva ca // ### [1.63.28](https://indike.org/pramana/in.purana.linga.1.63.28) danuḥ putraśataṃ lebhe kaśyapād baladarpitam vipracittiḥ pradhāno 'bhūt teṣāṃ madhye dvijottamāḥ // ### [1.63.29](https://indike.org/pramana/in.purana.linga.1.63.29) tāmrā ca janayāmāsa ṣaṭ kanyā dvijapuṅgavāḥ śukīṃ śyenīṃ ca bhāsīṃ ca sugrīvīṃ gṛdhrikāṃ śucim // ### [1.63.30](https://indike.org/pramana/in.purana.linga.1.63.30) śukī śukānulūkāṃś ca janayāmāsa dharmataḥ śyenī śyenāṃs tathā bhāsī kuraṅgāṃś ca vyajījanat // ### [1.63.31](https://indike.org/pramana/in.purana.linga.1.63.31) gṛdhrī gṛdhrān kapotāṃś ca pārāvatī vihaṃgamān haṃsasārasakāraṇḍaplavāñchucirajījanat // ### [1.63.32](https://indike.org/pramana/in.purana.linga.1.63.32) ajāśvameṣoṣṭrakharān sugrīvī cāpyajījanat vinatā janayāmāsa garuḍaṃ cāruṇaṃ śubhā // ### [1.63.33](https://indike.org/pramana/in.purana.linga.1.63.33) saudāminīṃ tathā kanyāṃ sarvalokabhayaṅkarīm surasāyāḥ sahasraṃ tu sarpāṇāmabhavatpurā // ### [1.63.34](https://indike.org/pramana/in.purana.linga.1.63.34) kadrūḥ sahasraśirasāṃ sahasraṃ prāpa suvratā pradhānāsteṣu vikhyātāḥ ṣaḍviṃśatiranuttamāḥ // ### [1.63.35](https://indike.org/pramana/in.purana.linga.1.63.35) śeṣavāsukikarkoṭaśaṅkhairāvatakambalāḥ dhanañjayamahānīlapadmāśvataratakṣakāḥ // ### [1.63.36](https://indike.org/pramana/in.purana.linga.1.63.36) elāpatramahāpadmadhṛtarāṣṭrabalāhakāḥ śaṅkhapālamahāśaṅkhapuṣpadaṃṣṭraśubhānanāḥ // ### [1.63.37](https://indike.org/pramana/in.purana.linga.1.63.37) śaṅkhalomā ca nahuṣo vāmanaḥ phaṇitas tathā kapilo durmukhaścāpi patañjaliriti smṛtaḥ // ### [1.63.38](https://indike.org/pramana/in.purana.linga.1.63.38) rakṣogaṇaṃ krodhavaśā mahāmāyaṃ vyajījanat rudrāṇāṃ ca gaṇaṃ tadvad gomahiṣyau varāṅganā // ### [1.63.39](https://indike.org/pramana/in.purana.linga.1.63.39) surabhir janayāmāsa kaśyapāditi naḥ śrutam munirmunīnāṃ ca gaṇaṃ gaṇamapsarasāṃ tathā // ### [1.63.40](https://indike.org/pramana/in.purana.linga.1.63.40) tathā kiṃnaragandharvān ariṣṭājanayadbahūn tṛṇavṛkṣalatāgulmam ilā sarvamajījanat // ### [1.63.41](https://indike.org/pramana/in.purana.linga.1.63.41) tviṣā tu yakṣarakṣāṃsi janayāmāsa koṭiśaḥ ete tu kāśyapeyāś ca saṃkṣepātparikīrtitāḥ // ### [1.63.42](https://indike.org/pramana/in.purana.linga.1.63.42) eteṣāṃ putrapautrādivaṃśāś ca bahavaḥ smṛtāḥ evaṃ prajāsu sṛṣṭāsu kaśyapena mahātmanā // ### [1.63.43](https://indike.org/pramana/in.purana.linga.1.63.43) pratiṣṭhitāsu sarvāsu carāsu sthāvarāsu ca abhiṣicyādhipatyeṣu teṣāṃ mukhyānprajāpatiḥ // ### [1.63.44](https://indike.org/pramana/in.purana.linga.1.63.44) tato manuṣyādhipatiṃ cakre vaivasvataṃ manum svāyaṃbhuve 'ntare pūrvaṃ brahmaṇā ye 'bhiṣecitāḥ // ### [1.63.45](https://indike.org/pramana/in.purana.linga.1.63.45) tairiyaṃ pṛthivī sarvā saptadvīpā saparvatā yathopadeśamadyāpi dharmeṇa pratipālyate // ### [1.63.46](https://indike.org/pramana/in.purana.linga.1.63.46) svāyaṃbhuve 'ntare pūrve brahmaṇā ye 'bhiṣecitāḥ te hyete cābhiṣicyante manavaś ca bhavanti te // ### [1.63.47](https://indike.org/pramana/in.purana.linga.1.63.47) manvantareṣvatīteṣu gatā hyeteṣu pārthivāḥ evamanye 'bhiṣicyante prāpte manvantare tataḥ // ### [1.63.48](https://indike.org/pramana/in.purana.linga.1.63.48) atītānāgatāḥ sarve nṛpā manvantare smṛtāḥ etānutpādya putrāṃstu prajāsaṃtānakāraṇāt // ### [1.63.49](https://indike.org/pramana/in.purana.linga.1.63.49) kaśyapo gotrakāmastu cacāra sa punastapaḥ putro gotrakaro mahyaṃ bhavatād iti cintayan // ### [1.63.50](https://indike.org/pramana/in.purana.linga.1.63.50) tasyaivaṃ dhyāyamānasya kaśyapasya mahātmanaḥ brahmayogātsutau paścāt prādurbhūtau mahaujasau // ### [1.63.51](https://indike.org/pramana/in.purana.linga.1.63.51) vatsaraścāsitaścaiva tāvubhau brahmavādinau vatsarānnaidhruvo jajñe raibhyaś ca sumahāyaśāḥ // ### [1.63.52](https://indike.org/pramana/in.purana.linga.1.63.52) raibhyasya raibhyā vijñeyā naidhruvasya vadāmi vaḥ cyavanasya tu kanyāyāṃ sumedhāḥ samapadyata // ### [1.63.53](https://indike.org/pramana/in.purana.linga.1.63.53) naidhruvasya tu sā patnī mātā vai kuṇḍapāyinām asitasyaikaparṇāyāṃ brahmiṣṭhaḥ samapadyata // ### [1.63.54](https://indike.org/pramana/in.purana.linga.1.63.54) śāṇḍilyānāṃ varaḥ śrīmān devalaḥ sumahātapāḥ śāṇḍilyā naidhruvā raibhyās trayaḥ pakṣāstu kāśyapāḥ // ### [1.63.55](https://indike.org/pramana/in.purana.linga.1.63.55) nava prakṛtayo devāḥ pulastyasya vadāmi vaḥ caturyuge hyatikrānte manorekādaśe prabhoḥ // ### [1.63.56](https://indike.org/pramana/in.purana.linga.1.63.56) ardhāvaśiṣṭe tasmiṃstu dvāpare sampravartite mānavasya nariṣyantaḥ putra āsīd damaḥ kila // ### [1.63.57](https://indike.org/pramana/in.purana.linga.1.63.57) damasya tasya dāyādas tṛṇabinduriti smṛtaḥ tretāyugamukhe rājā tṛtīye saṃbabhūva ha // ### [1.63.58](https://indike.org/pramana/in.purana.linga.1.63.58) tasya kanyā tvilavilā rūpeṇāpratimābhavat pulastyāya sa rājarṣis tāṃ kanyāṃ pratyapādayat // ### [1.63.59](https://indike.org/pramana/in.purana.linga.1.63.59) ṛṣir airavilo yasyāṃ viśravāḥ samapadyata tasya patnyaścatasrastu paulastyakulavardhanāḥ // ### [1.63.60](https://indike.org/pramana/in.purana.linga.1.63.60) bṛhaspateḥ śubhā kanyā nāmnā vai devavarṇinī puṣpotkaṭā balākā ca sute mālyavataḥ smṛteḥ // ### [1.63.61](https://indike.org/pramana/in.purana.linga.1.63.61) kaikasī mālinaḥ kanyā tāsāṃ vai śṛṇuta prajāḥ jyeṣṭhaṃ vaiśravaṇaṃ tasmāt suṣuve devavarṇinī // ### [1.63.62](https://indike.org/pramana/in.purana.linga.1.63.62) kaikasī cāpyajanayad rāvaṇaṃ rākṣasādhipam kumbhakarṇaṃ śūrpaṇakhāṃ dhīmantaṃ ca vibhīṣaṇam // ### [1.63.63](https://indike.org/pramana/in.purana.linga.1.63.63) puṣpotkaṭā hyajanayat putrāṃstasmāddvijottamāḥ mahodaraṃ prahastaṃ ca mahāpārśvaṃ kharaṃ tathā // ### [1.63.64](https://indike.org/pramana/in.purana.linga.1.63.64) kumbhīnasīṃ tathā kanyāṃ balāyāḥ śṛṇuta prajāḥ triśirā dūṣaṇaścaiva vidyujjihvaś ca rākṣasaḥ // ### [1.63.65](https://indike.org/pramana/in.purana.linga.1.63.65) kanyā vai mālikā cāpi balāyāḥ prasavaḥ smṛtaḥ ityete krūrakarmāṇaḥ paulastyā rākṣasā nava // ### [1.63.66](https://indike.org/pramana/in.purana.linga.1.63.66) vibhīṣaṇo 'tiśuddhātmā dharmajñaḥ parikīrtitaḥ pulastyasya mṛgāḥ putrāḥ sarve vyāghrāś ca daṃṣṭriṇaḥ // ### [1.63.67](https://indike.org/pramana/in.purana.linga.1.63.67) bhūtāḥ piśācāḥ sarpāś ca sūkarā hastinas tathā vānarāḥ kiṃnarāścaiva ye ca kiṃpuruṣās tathā // ### [1.63.68](https://indike.org/pramana/in.purana.linga.1.63.68) anapatyaḥ kratustasmin smṛto vaivasvate 'ntare atreḥ patnyo daśaivāsan suṃdaryaś ca pativratāḥ // ### [1.63.69](https://indike.org/pramana/in.purana.linga.1.63.69) bhadrāśvasya ghṛtācyāṃ vai daśāpsarasi sūnavaḥ bhadrābhadrā ca jaladā mandā nandā tathaiva ca // ### [1.63.70](https://indike.org/pramana/in.purana.linga.1.63.70) balābalā ca viprendrā yā ca gopābalā smṛtā tathā tāmarasā caiva varakrīḍā ca vai daśa // ### [1.63.71](https://indike.org/pramana/in.purana.linga.1.63.71) ātreyavaṃśaprabhavās tāsāṃ bhartā prabhākaraḥ svarbhānupihite sūrye patite 'smindivo mahīm // ### [1.63.72](https://indike.org/pramana/in.purana.linga.1.63.72) tamo 'bhibhūte loke 'smin prabhā yena pravartitā svastyastu hi tavetyukte patanniha divākaraḥ // ### [1.63.73](https://indike.org/pramana/in.purana.linga.1.63.73) brahmarṣervacanāttasya papāta na vibhurdivaḥ tataḥ prabhākaretyuktaḥ prabhuratrirmaharṣibhiḥ // ### [1.63.74](https://indike.org/pramana/in.purana.linga.1.63.74) bhadrāyāṃ janayāmāsa somaṃ putraṃ yaśasvinam sa tāsu janayāmāsa punaḥ putrāṃstapodhanaḥ // ### [1.63.75](https://indike.org/pramana/in.purana.linga.1.63.75) svastyātreyā iti khyātā ṛṣayo vedapāragāḥ teṣāṃ dvau khyātayaśasau brahmiṣṭhau ca mahaujasau // ### [1.63.76](https://indike.org/pramana/in.purana.linga.1.63.76) datto hyatrivaro jyeṣṭho durvāsāstasya cānujaḥ yavīyasī svasā teṣām amalā brahmavādinī // ### [1.63.77](https://indike.org/pramana/in.purana.linga.1.63.77) tasya gotradvaye jātāś catvāraḥ prathitā bhuvi śyāvaś ca pratvasaścaiva vavalguścātha gahvaraḥ // ### [1.63.78](https://indike.org/pramana/in.purana.linga.1.63.78) ātreyāṇāṃ ca catvāraḥ smṛtāḥ pakṣā mahātmanām kāśyapo nāradaścaiva parvatānuddhatas tathā // ### [1.63.79](https://indike.org/pramana/in.purana.linga.1.63.79) jajñire mānasā hyete arundhatyā nibodhata nāradastu vasiṣṭhāyā-rundhatīṃ pratyapādayat // ### [1.63.80](https://indike.org/pramana/in.purana.linga.1.63.80) ūrdhvaretā mahātejā dakṣaśāpāttu nāradaḥ purā devāsure yuddhe ghore vai tārakāmaye // ### [1.63.81](https://indike.org/pramana/in.purana.linga.1.63.81) anāvṛṣṭyā hate loke hy ugre lokeśvaraiḥ saha vasiṣṭhastapasā dhīmān dhārayāmāsa vai prajāḥ // ### [1.63.82](https://indike.org/pramana/in.purana.linga.1.63.82) annodakaṃ mūlaphalam oṣadhīś ca pravartayan tānetāñjīvayāmāsa kāruṇyādauṣadhena ca // ### [1.63.83](https://indike.org/pramana/in.purana.linga.1.63.83) arundhatyāṃ vasiṣṭhastu sutān utpādayacchatam jyāyaso 'janayacchakter adṛśyantī parāśaram // ### [1.63.84](https://indike.org/pramana/in.purana.linga.1.63.84) rakṣasā bhakṣite śaktau rudhireṇa tu vai tadā kālī parāśarājjajñe kṛṣṇadvaipāyanaṃ prabhum // ### [1.63.85](https://indike.org/pramana/in.purana.linga.1.63.85) dvaipāyano hyaraṇyāṃ vai śukam utpādayatsutam upamanyuṃ ca pīvaryāṃ viddhīme śukasūnavaḥ // ### [1.63.86](https://indike.org/pramana/in.purana.linga.1.63.86) bhūriśravāḥ prabhuḥ śaṃbhuḥ kṛṣṇo gaurastu pañcamaḥ kanyā kīrtimatī caiva yogamātā dhṛtavratā // ### [1.63.87](https://indike.org/pramana/in.purana.linga.1.63.87) jananī brahmadattasya patnī sā tvanuhasya ca śvetaḥ kṛṣṇaś ca gauraś ca śyāmo dhūmrastathāruṇaḥ // ### [1.63.88](https://indike.org/pramana/in.purana.linga.1.63.88) nīlo bādarikaścaiva sarve caite parāśarāḥ parāśarāṇāmaṣṭau te pakṣāḥ proktā mahātmanām // ### [1.63.89](https://indike.org/pramana/in.purana.linga.1.63.89) ata ūrdhvaṃ nibodhadhvam indrapramitisaṃbhavam vasiṣṭhasya kapiñjalyo ghṛtācyāmudapadyata // ### [1.63.90](https://indike.org/pramana/in.purana.linga.1.63.90) trimūrtiryaḥ samākhyāta indrapramitirucyate pṛthoḥ sutāyāṃ sambhūto bhadrastasyā bhavadvasuḥ // ### [1.63.91](https://indike.org/pramana/in.purana.linga.1.63.91) upamanyuḥ sutastasya bahavo hyaupamanyavaḥ mitrāvaruṇayoścaiva kauṇḍinyā ye pariśrutāḥ // ### [1.63.92](https://indike.org/pramana/in.purana.linga.1.63.92) ekārṣeyās tathā cānye vāsiṣṭhā nāma viśrutāḥ ete pakṣā vasiṣṭhānāṃ smṛtā daśa mahātmanām // ### [1.63.93](https://indike.org/pramana/in.purana.linga.1.63.93) ityete brahmaṇaḥ putrā mānasā viśrutā bhuvi bhartāraś ca mahābhāgā eṣāṃ vaṃśāḥ prakīrtitāḥ // ### [1.63.94](https://indike.org/pramana/in.purana.linga.1.63.94) trilokadhāraṇe śaktā devarṣikulasaṃbhavāḥ teṣāṃ putrāś ca pautrāś ca śataśo 'tha sahasraśaḥ // ### [1.63.95](https://indike.org/pramana/in.purana.linga.1.63.95) yaistu vyāptāstrayo lokāḥ sūryasyeva gabhastibhiḥ // ### [1.63.95.p1](https://indike.org/pramana/in.purana.linga.1.63.95.p1) iti śrīliṅgamahāpurāṇe pūrvabhāge devādisṛṣṭikathanaṃ nāma triṣaṣṭitamo 'dhyāyaḥ ## Linked texts (9) - [Vāyupurāṇa](https://indike.org/pramana/in.purana.vayu.2.2.46) — Vyāsa, Sanskrit - [Matsyapurāṇa](https://indike.org/pramana/in.purana.matsya.5.2) — Vyāsa, Sanskrit - [Brahmāṇḍapurāṇa](https://indike.org/pramana/in.purana.brahmanda.2.2.11) — Vyāsa, Sanskrit - [Padmapurāṇa](https://indike.org/pramana/in.purana.padma.1.6.2) — Vyāsa, Sanskrit - [Kūrmapurāṇa](https://indike.org/pramana/in.purana.kurma.1.15.18) — Vyāsa, Sanskrit - [Mudgalapurāṇa](https://indike.org/pramana/in.purana.upa.surya.mudgala.2.28.35) — Sanskrit - [Critical edition (BORI)](https://indike.org/pramana/in.lit.mahabharata.harivamsa*crit.2.49) — Sanskrit - [Brahmapurāṇa](https://indike.org/pramana/in.purana.brahma.3.18) — Vyāsa, Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.70.2) — Ativīrarāma Pāṇṭiyar 1500, Sanskrit --- Source: [https://indike.org/pramana/in.purana.linga.1.63](https://indike.org/pramana/in.purana.linga.1.63) · Pramāṇa