[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 1.64 # Lingapurana 1.64 Liṅgapurāṇa 1.64 - **Language:** Sanskrit ## Contents - [1.64.123](https://indike.org/pramana/in.purana.linga.1.64.123) — 1 part ### [1.64.1](https://indike.org/pramana/in.purana.linga.1.64.1) ṛṣaya ūcuḥ kathaṃ hi rakṣasā śaktir bhakṣitaḥ so 'nujaiḥ saha vāsiṣṭho vadatāṃ śreṣṭha sūta vaktumihārhasi // ### [1.64.2](https://indike.org/pramana/in.purana.linga.1.64.2) sūta uvāca rākṣaso rudhiro nāma vasiṣṭhasya sutaṃ purā śaktiṃ sa bhakṣayāmāsa śakteḥ śāpātsahānujaiḥ // ### [1.64.3](https://indike.org/pramana/in.purana.linga.1.64.3) vasiṣṭhayājyaṃ viprendrās tadādiśyaiva bhūpatim kalmāṣapādaṃ rudhiro viśvāmitreṇa coditaḥ // ### [1.64.4](https://indike.org/pramana/in.purana.linga.1.64.4) bhakṣitaḥ sa iti śrutvā vasiṣṭhastena rakṣasā śaktiḥ śaktimatāṃ śreṣṭho bhrātṛbhiḥ saha dharmavit // ### [1.64.5](https://indike.org/pramana/in.purana.linga.1.64.5) hā putra putra putreti krandamāno muhurmuhuḥ arundhatyā saha muniḥ papāta bhuvi duḥkhitaḥ // ### [1.64.6](https://indike.org/pramana/in.purana.linga.1.64.6) naṣṭaṃ kulamiti śrutvā martuṃ cakre matiṃ tadā smaranputraśataṃ caiva śaktijyeṣṭhaṃ ca śaktimān // ### [1.64.7](https://indike.org/pramana/in.purana.linga.1.64.7) na taṃ vināhaṃ jīviṣye iti niścitya duḥkhitaḥ // ### [1.64.8](https://indike.org/pramana/in.purana.linga.1.64.8) āruhya mūrdhānam ajātmajo 'sau tayātmavān sarvavid ātmavicca dharādharasyaiva tadā dharāyāṃ papāta patnyā saha sāśrudṛṣṭiḥ // ### [1.64.9](https://indike.org/pramana/in.purana.linga.1.64.9) dharādharāttaṃ patitaṃ dharā tadā dadhāra tatrāpi vicitrakaṇṭhī karāṃbujābhyāṃ karikhelagāminī rudantamādāya ruroda sā ca // ### [1.64.10](https://indike.org/pramana/in.purana.linga.1.64.10) tadā tasya snuṣā prāha patnī śaktermahāmunim vasiṣṭhaṃ vadatāṃ śreṣṭhaṃ rudantī bhayavihvalā // ### [1.64.11](https://indike.org/pramana/in.purana.linga.1.64.11) bhagavanbrāhmaṇaśreṣṭha tava deham idaṃ śubham pālayasva vibho draṣṭuṃ tava pautraṃ mamātmajam // ### [1.64.12](https://indike.org/pramana/in.purana.linga.1.64.12) na tyājyaṃ tava viprendra dehametatsuśobhanam garbhastho mama sarvārthasādhakaḥ śaktijo yataḥ // ### [1.64.13](https://indike.org/pramana/in.purana.linga.1.64.13) evamuktvātha dharmajñā karābhyāṃ kamalekṣaṇā utthāpya śvaśuraṃ natvā netre saṃmṛjya vāriṇā // ### [1.64.14](https://indike.org/pramana/in.purana.linga.1.64.14) duḥkhitāpi paritrātuṃ śvaśuraṃ duḥkhitaṃ tadā arundhatīṃ ca kalyāṇīṃ prārthayāmāsa duḥkhitām // ### [1.64.15](https://indike.org/pramana/in.purana.linga.1.64.15) snuṣāvākyaṃ tataḥ śrutvā vasiṣṭha utthāya bhūtalāt saṃjñāmavāpya cāliṅgya sā papāta suduḥkhitā // ### [1.64.16](https://indike.org/pramana/in.purana.linga.1.64.16) arundhatī karābhyāṃ tāṃ saṃspṛśyāsrākulekṣaṇām ruroda muniśārdūlo bhāryayā sutavatsalaḥ // ### [1.64.17](https://indike.org/pramana/in.purana.linga.1.64.17) atha nābhyaṃbuje viṣṇor yathā tasyāścaturmukhaḥ āsīno garbhaśayyāyāṃ kumāra ṛcamāha saḥ // ### [1.64.18](https://indike.org/pramana/in.purana.linga.1.64.18) tato niśamya bhagavān vasiṣṭha ṛcamādarāt kenoktamiti saṃcintya tadātiṣṭhatsamāhitaḥ // ### [1.64.19](https://indike.org/pramana/in.purana.linga.1.64.19) vyomāṅgaṇastho 'tha hariḥ puṇḍarīkanibhekṣaṇaḥ vasiṣṭhamāha viśvātmā ghṛṇayā sa ghṛṇānidhiḥ // ### [1.64.20](https://indike.org/pramana/in.purana.linga.1.64.20) bho vatsa vatsa viprendra vasiṣṭha sutavatsala tava pautramukhāmbhojād ṛg eṣādya viniḥsṛtā // ### [1.64.21](https://indike.org/pramana/in.purana.linga.1.64.21) matsamastava pautro 'sau śaktijaḥ śaktimānmune tasmāduttiṣṭha saṃtyajya śokaṃ brahmasutottama // ### [1.64.22](https://indike.org/pramana/in.purana.linga.1.64.22) rudrabhaktaś ca garbhastho rudrapūjāparāyaṇaḥ rudradevaprabhāveṇa kulaṃ te saṃtariṣyati // ### [1.64.23](https://indike.org/pramana/in.purana.linga.1.64.23) evamuktvā ghṛṇī vipraṃ bhagavān puruṣottamaḥ vasiṣṭhaṃ muniśārdūlaṃ tatraivāntaradhīyata // ### [1.64.24](https://indike.org/pramana/in.purana.linga.1.64.24) tataḥ praṇamya śirasā vasiṣṭho vārijekṣaṇam adṛśyantyā mahātejāḥ pasparśodaramādarāt // ### [1.64.25](https://indike.org/pramana/in.purana.linga.1.64.25) hā putra putra putreti papāta ca suduḥkhitaḥ lalāpārundhatī prekṣya tadāsau rudatīṃ dvijāḥ // ### [1.64.26](https://indike.org/pramana/in.purana.linga.1.64.26) svaputraṃ ca smaran duḥkhāt punarehyehi putraka tava putramimaṃ dṛṣṭvā bho śakte kuladhāraṇam // ### [1.64.27](https://indike.org/pramana/in.purana.linga.1.64.27) tavāntikaṃ gamiṣyāmi tava mātrā na saṃśayaḥ evamuktvā rudanvipra āliṅgyārundhatīṃ tadā // ### [1.64.28](https://indike.org/pramana/in.purana.linga.1.64.28) papāta tāḍayantīva svasya kukṣī kareṇa vai adṛśyantī jaghānātha śaktijasyālayaṃ śubhā // ### [1.64.29](https://indike.org/pramana/in.purana.linga.1.64.29) svodaraṃ duḥkhitā bhūmau lalāpa ca papāta ca arundhati tadā bhītā vasiṣṭhaś ca mahāmatiḥ // ### [1.64.30](https://indike.org/pramana/in.purana.linga.1.64.30) samutthāpya snuṣāṃ bālām ūcaturbhayavihvalau // ### [1.64.31](https://indike.org/pramana/in.purana.linga.1.64.31) vicāramugdhe tava garbhamaṇḍalaṃ karāṃbujābhyāṃ vinihatya durlabham kulaṃ vasiṣṭhasya samastamapyaho nihantumārye kathamudyatā vada // ### [1.64.32](https://indike.org/pramana/in.purana.linga.1.64.32) tavātmajaṃ śaktisutaṃ ca dṛṣṭvā cāsvādya vaktrāmṛtam āryasūnoḥ trātuṃ yato dehamimaṃ munīndraḥ suniścitaḥ pāhi tataḥ śarīram // ### [1.64.33](https://indike.org/pramana/in.purana.linga.1.64.33) sūta uvāca evaṃ snuṣāmupālabhya muniṃ cārundhatī sthitā arundhatī vasiṣṭhasya prāha cārteti vihvalā // ### [1.64.34](https://indike.org/pramana/in.purana.linga.1.64.34) tvayyeva jīvitaṃ cāsya muner yat suvrate mama jīvitaṃ rakṣa dehasya dhātrī ca kuru yaddhitam // ### [1.64.35](https://indike.org/pramana/in.purana.linga.1.64.35) adṛśyantyuvāca mayā yadi muniśreṣṭhas trātuṃ vai niścitaṃ svakam mamāśubhaṃ śubhaṃ dehaṃ kathaṃcit pālayāmyaham // ### [1.64.36](https://indike.org/pramana/in.purana.linga.1.64.36) priyaduḥkhamahaṃ prāptā hy asatī nātra saṃśayaḥ mune duḥkhādahaṃ dagdhā yataḥ putrī mune tava // ### [1.64.37](https://indike.org/pramana/in.purana.linga.1.64.37) aho 'dbhutaṃ mayā dṛṣṭaṃ duḥkhapātrī hyahaṃ vibho duḥkhatrātā bhava brahman brahmasūno jagadguro // ### [1.64.38](https://indike.org/pramana/in.purana.linga.1.64.38) tathāpi bhartṛrahitā dīnā nārī bhavediha pāhi māṃ tata āryendra paribhūtā bhaviṣyati // ### [1.64.39](https://indike.org/pramana/in.purana.linga.1.64.39) pitā mātā ca putrāśca pautrāḥ śvaśura eva ca ete na bāndhavāḥ strīṇāṃ bhartā bandhuḥ parā gatiḥ // ### [1.64.40](https://indike.org/pramana/in.purana.linga.1.64.40) ātmano yaddhi kathitam apyardhamiti paṇḍitaiḥ tadapyatra mṛṣā hyāsīd gataḥ śaktirahaṃ sthitā // ### [1.64.41](https://indike.org/pramana/in.purana.linga.1.64.41) aho mamātra kāṭhinyaṃ manaso munipuṅgava patiṃ prāṇasamaṃ tyaktvā sthitā yatra kṣaṇaṃ yataḥ // ### [1.64.42](https://indike.org/pramana/in.purana.linga.1.64.42) vasiṣṭhāśvatthamāśritya hy amṛtā tu yathā latā nirmūlāpyamṛtā bhartrā tyaktā dīnā sthitāpyaham // ### [1.64.43](https://indike.org/pramana/in.purana.linga.1.64.43) snuṣāvākyaṃ niśamyaiva vasiṣṭho bhāryayā saha tadā cakre matiṃ dhīmān yātuṃ svāśramamāśramī // ### [1.64.44](https://indike.org/pramana/in.purana.linga.1.64.44) kṛcchrātsabhāryo bhagavān vasiṣṭhaḥ svāśramaṃ kṣaṇāt adṛśyantyā ca puṇyātmā saṃviveśa sa cintayan // ### [1.64.45](https://indike.org/pramana/in.purana.linga.1.64.45) sā garbhaṃ pālayāmāsa kathaṃcinmunipuṅgavāḥ kulasaṃdhāraṇārthāya śaktipatnī pativratā // ### [1.64.46](https://indike.org/pramana/in.purana.linga.1.64.46) tataḥ sāsūta tanayaṃ daśame māsi suprabham śaktipatnī yathā śaktiṃ śaktimantamarundhatī // ### [1.64.47](https://indike.org/pramana/in.purana.linga.1.64.47) asūta sā ditirviṣṇuṃ yathā svāhā guhaṃ sutam agniṃ yathāraṇiḥ patnī śakteḥ sākṣātparāśaram // ### [1.64.48](https://indike.org/pramana/in.purana.linga.1.64.48) yadā tadā śaktisūnur avatīrṇo mahītale śaktistyaktvā tadā duḥkhaṃ pitṝṇāṃ samatāṃ yayau // ### [1.64.49](https://indike.org/pramana/in.purana.linga.1.64.49) bhrātṛbhiḥ saha puṇyātmā ādityair iva bhāskaraḥ rarāja pitṛlokastho vāsiṣṭho munipuṅgavāḥ // ### [1.64.50](https://indike.org/pramana/in.purana.linga.1.64.50) jagustadā ca pitaro nanṛtuś ca pitāmahāḥ prapitāmahāś ca viprendrā hy avatīrṇe parāśare // ### [1.64.51](https://indike.org/pramana/in.purana.linga.1.64.51) ye brahmavādino bhūmau nanṛtur divi devatāḥ puṣkarādyāś ca sasṛjuḥ puṣpavarṣaṃ ca khecarāḥ // ### [1.64.52](https://indike.org/pramana/in.purana.linga.1.64.52) pureṣu rākṣasānāṃ ca praṇādaṃ viṣamaṃ dvijāḥ āśramasthāś ca munayaḥ samūhurharṣasaṃtatim // ### [1.64.53](https://indike.org/pramana/in.purana.linga.1.64.53) avatīrṇo yathā hyaṇḍād bhānuḥ so 'pi parāśaraḥ adṛśyantyāścaturvaktro meghajālāddivākaraḥ // ### [1.64.54](https://indike.org/pramana/in.purana.linga.1.64.54) sukhaṃ ca duḥkhamabhavad adṛśyantyāstathā dvijāḥ dṛṣṭvā putraṃ patiṃ smṛtvā arundhatyā munestathā // ### [1.64.55](https://indike.org/pramana/in.purana.linga.1.64.55) dṛṣṭvā ca tanayaṃ bālā parāśaramatidyutim lalāpa vihvalā bālā sannakaṇṭhī papāta ca // ### [1.64.56](https://indike.org/pramana/in.purana.linga.1.64.56) sā parāśaramaho mahāmatiṃ devadānavagaṇaiś ca pūjitam jātamātram anaghaṃ śucismitā budhya sāśrunayanā lalāpa ca // ### [1.64.57](https://indike.org/pramana/in.purana.linga.1.64.57) hā vasiṣṭhasuta kutracidgataḥ paśya putramanaghaṃ tavātmajam tyajya dīnavadanāṃ vanāntare putradarśanaparāmimāṃ prabho // ### [1.64.58](https://indike.org/pramana/in.purana.linga.1.64.58) śakte svaṃ ca sutaṃ paśya bhrātṛbhiḥ saha ṣaṇmukham yathā maheśvaro 'paśyat sagaṇo hṛṣitānanaḥ // ### [1.64.59](https://indike.org/pramana/in.purana.linga.1.64.59) atha tasyāstadālāpaṃ vasiṣṭho munisattamaḥ śrutvā snuṣāmuvācedaṃ mā rodīr iti duḥkhitaḥ // ### [1.64.60](https://indike.org/pramana/in.purana.linga.1.64.60) ājñayā tasya sā śokaṃ vasiṣṭhasya kulāṅganā tyaktvā hyapālayadbālaṃ bālā bālamṛgekṣaṇā // ### [1.64.61](https://indike.org/pramana/in.purana.linga.1.64.61) dṛṣṭvā tāmabalāṃ prāha maṅgalābharaṇair vinā āsīnāmākulāṃ sādhvīṃ bāṣpaparyākulekṣaṇām // ### [1.64.62](https://indike.org/pramana/in.purana.linga.1.64.62) śākteya uvāca amba maṅgalavibhūṣaṇair vinā dehayaṣṭiranaghe na śobhate vaktumarhasi tavādya kāraṇaṃ candrabiṃbarahiteva śarvarī // ### [1.64.63](https://indike.org/pramana/in.purana.linga.1.64.63) mātarmātaḥ kathaṃ tyaktvā maṅgalābharaṇāni vai āsīnā bhartṛhīneva vaktumarhasi śobhane // ### [1.64.64](https://indike.org/pramana/in.purana.linga.1.64.64) adṛśyantī tadā vākyaṃ śrutvā tasya sutasya sā na kiṃcid abravīt putraṃ śubhaṃ vā yadi vetarat // ### [1.64.65](https://indike.org/pramana/in.purana.linga.1.64.65) adṛśyantīṃ punaḥ prāha śākteyo bhagavānmama mātaḥ kutra mahātejāḥ pitā vada vadeti tām // ### [1.64.66](https://indike.org/pramana/in.purana.linga.1.64.66) śrutvā ruroda sā vākyaṃ putrasyātīva vihvalā bhakṣito rakṣasā tātas taveti nipapāta ca // ### [1.64.67](https://indike.org/pramana/in.purana.linga.1.64.67) śrutvā vasiṣṭho 'pi papāta bhūmau pautrasya vākyaṃ sa rudandayāluḥ arundhatī cāśramavāsinastadā munervasiṣṭhasya munīśvarāś ca // ### [1.64.68](https://indike.org/pramana/in.purana.linga.1.64.68) bhakṣito rakṣasā mātuḥ pitā tava mukhāditi śrutvā parāśaro dhīmān prāha cāsrāvilekṣaṇaḥ // ### [1.64.69](https://indike.org/pramana/in.purana.linga.1.64.69) parāśara uvāca abhyarcya devadeveśaṃ trailokyaṃ sacarācaram kṣaṇena mātaḥ pitaraṃ darśayāmīti me matiḥ // ### [1.64.70](https://indike.org/pramana/in.purana.linga.1.64.70) sā niśamya vacanaṃ tadā śubhaṃ sasmitā tanayamāha vismitā tathyam etaditi taṃ nirīkṣya sā putra putra bhavamarcayeti ca // ### [1.64.71](https://indike.org/pramana/in.purana.linga.1.64.71) jñātvā śaktisutasyāsya saṃkalpaṃ munipuṅgavaḥ vasiṣṭho bhagavānprāha pautraṃ dhīmān ghṛṇānidhiḥ // ### [1.64.72](https://indike.org/pramana/in.purana.linga.1.64.72) sthāne pautra muniśreṣṭha saṃkalpastava suvrata tathāpi śṛṇu lokasya kṣayaṃ kartuṃ na cārhasi // ### [1.64.73](https://indike.org/pramana/in.purana.linga.1.64.73) rākṣasānāmabhāvāya kuru sarveśvarārcanam trailokyaṃ śṛṇu śākteya aparādhyati kiṃ tava // ### [1.64.74](https://indike.org/pramana/in.purana.linga.1.64.74) tatastasya vasiṣṭhasya niyogācchaktinandanaḥ rākṣasānāmabhāvāya matiṃ cakre mahāmatiḥ // ### [1.64.75](https://indike.org/pramana/in.purana.linga.1.64.75) adṛśyantīṃ vasiṣṭhaṃ ca praṇamyārundhatīṃ tataḥ kṛtvaikaliṅgaṃ kṣaṇikaṃ pāṃsunā munisannidhau // ### [1.64.76](https://indike.org/pramana/in.purana.linga.1.64.76) sampūjya śivasūktena tryaṃbakena śubhena ca japtvā tvaritarudraṃ ca śivasaṃkalpameva ca // ### [1.64.77](https://indike.org/pramana/in.purana.linga.1.64.77) nīlarudraṃ ca śākteyas tathā rudraṃ ca śobhanam vāmīyaṃ pavamānaṃ ca pañcabrahma tathaiva ca // ### [1.64.78](https://indike.org/pramana/in.purana.linga.1.64.78) hotāraṃ liṅgasūktaṃ ca atharvaśira eva ca aṣṭāṅgamarghyaṃ rudrāya dattvābhyarcya yathāvidhi // ### [1.64.79](https://indike.org/pramana/in.purana.linga.1.64.79) parāśara uvāca bhagavanrakṣasā rudra bhakṣito rudhireṇa vai pitā mama mahātejā bhrātṛbhiḥ saha śaṅkara // ### [1.64.80](https://indike.org/pramana/in.purana.linga.1.64.80) draṣṭumicchāmi bhagavan pitaraṃ bhrātṛbhiḥ saha evaṃ vijñāpayāṃlliṅgaṃ praṇipatya muhurmuhuḥ // ### [1.64.81](https://indike.org/pramana/in.purana.linga.1.64.81) hā rudra rudra rudreti ruroda nipapāta ca taṃ dṛṣṭvā bhagavānrudro devīmāha ca śaṅkaraḥ // ### [1.64.82](https://indike.org/pramana/in.purana.linga.1.64.82) paśya bālaṃ mahābhāge bāṣpaparyākulekṣaṇam mamānusmaraṇe yuktaṃ madārādhanatatparam // ### [1.64.83](https://indike.org/pramana/in.purana.linga.1.64.83) sā ca dṛṣṭvā mahādevī parāśaramaninditā duḥkhāt saṃklinnasarvāṅgam asrākulavilocanam // ### [1.64.84](https://indike.org/pramana/in.purana.linga.1.64.84) liṅgārcanavidhau saktaṃ hara rudreti vādinam prāha bhartāramīśānaṃ śaṅkaraṃ jagatāmumā // ### [1.64.85](https://indike.org/pramana/in.purana.linga.1.64.85) īpsitaṃ yaccha sakalaṃ prasīda parameśvara niśamya vacanaṃ tasyāḥ śaṅkaraḥ parameśvaraḥ // ### [1.64.86](https://indike.org/pramana/in.purana.linga.1.64.86) bhāryāmāryāmumāṃ prāha tato hālāhalāśanaḥ rakṣāmyenaṃ dvijaṃ bālaṃ phullendīvaralocanam // ### [1.64.87](https://indike.org/pramana/in.purana.linga.1.64.87) dadāmi dṛṣṭiṃ madrūpadarśanakṣama eṣa vai evamuktvā gaṇair divyair bhagavānnīlalohitaḥ // ### [1.64.88](https://indike.org/pramana/in.purana.linga.1.64.88) brahmendraviṣṇurudrādyaiḥ saṃvṛtaḥ parameśvaraḥ dadau ca darśanaṃ tasmai muniputrāya dhīmate // ### [1.64.89](https://indike.org/pramana/in.purana.linga.1.64.89) so 'pi dṛṣṭvā mahādevam ānandāsrāvilekṣaṇaḥ nipapāta ca hṛṣṭātmā pādayostasya sādaram // ### [1.64.90](https://indike.org/pramana/in.purana.linga.1.64.90) punarbhavānyāḥ pādau ca nandinaś ca mahātmanaḥ saphalaṃ jīvitaṃ me 'dya brahmādyāṃstāṃstadāha saḥ // ### [1.64.91](https://indike.org/pramana/in.purana.linga.1.64.91) rakṣārthamāgatastvadya mama bālendubhūṣaṇaḥ ko 'nyaḥ samo mayā loke devo vā dānavo 'pi vā // ### [1.64.92](https://indike.org/pramana/in.purana.linga.1.64.92) atha tasminkṣaṇādeva dadarśa divi saṃsthitam pitaraṃ bhrātṛbhiḥ sārdhaṃ śākteyastu parāśaraḥ // ### [1.64.93](https://indike.org/pramana/in.purana.linga.1.64.93) sūryamaṇḍalasaṃkāśe vimāne viśvatomukhe bhrātṛbhiḥ sahitaṃ dṛṣṭvā nanāma ca jaharṣa ca // ### [1.64.94](https://indike.org/pramana/in.purana.linga.1.64.94) tadā vṛṣadhvajo devaḥ sabhāryaḥ sagaṇeśvaraḥ vasiṣṭhaputraṃ prāhedaṃ putradarśanatatparam // ### [1.64.95](https://indike.org/pramana/in.purana.linga.1.64.95) śrīdeva uvāca śakte paśya sutaṃ bālam ānandāsrāvilekṣaṇam adṛśyantīṃ ca viprendra vasiṣṭhaṃ pitaraṃ tava // ### [1.64.96](https://indike.org/pramana/in.purana.linga.1.64.96) arundhatīṃ mahābhāgāṃ kalyāṇīṃ devatopamām mātaraṃ pitaraṃ cobhau namaskuru mahāmate // ### [1.64.97](https://indike.org/pramana/in.purana.linga.1.64.97) tadā haraṃ praṇamyāśu devadevamumāṃ tathā vasiṣṭhaṃ ca tadā śreṣṭhaṃ śaktir vai śaṅkarājñayā // ### [1.64.98](https://indike.org/pramana/in.purana.linga.1.64.98) mātaraṃ ca mahābhāgāṃ kalyāṇīṃ patidevatām arundhatīṃ jagannāthaniyogātprāha śaktimān // ### [1.64.99](https://indike.org/pramana/in.purana.linga.1.64.99) vāsiṣṭha uvāca bho vatsa vatsa viprendra parāśara mahādyute rakṣito 'haṃ tvayā tāta garbhasthena mahātmanā // ### [1.64.100](https://indike.org/pramana/in.purana.linga.1.64.100) aṇimādiguṇaiśvaryaṃ mayā vatsa parāśara labdhamadyānanaṃ dṛṣṭaṃ tava bāla mamājñayā // ### [1.64.101](https://indike.org/pramana/in.purana.linga.1.64.101) adṛśyantīṃ mahābhāgāṃ rakṣa vatsa mahāmate arundhatīṃ ca pitaraṃ vasiṣṭhaṃ mama sarvadā // ### [1.64.102](https://indike.org/pramana/in.purana.linga.1.64.102) anvayaḥ sakalo vatsa mama saṃtāritastvayā putreṇa lokāñjayatīty uktaṃ sadbhiḥ sadaiva hi // ### [1.64.103](https://indike.org/pramana/in.purana.linga.1.64.103) īpsitaṃ varayeśānaṃ jagatāṃ prabhavaṃ prabhum gamiṣyāmyabhivandyeśaṃ bhrātṛbhiḥ saha śaṅkaram // ### [1.64.104](https://indike.org/pramana/in.purana.linga.1.64.104) evaṃ putramupāmantrya praṇamya ca maheśvaram nirīkṣya bhāryāṃ sadasi jagāma pitaraṃ vaśī // ### [1.64.105](https://indike.org/pramana/in.purana.linga.1.64.105) gataṃ dṛṣṭvātha pitaraṃ tadābhyarcyaiva śaṅkaram tuṣṭāva vāgbhir iṣṭābhiḥ śākteyaḥ śaśibhūṣaṇam // ### [1.64.106](https://indike.org/pramana/in.purana.linga.1.64.106) tatastuṣṭo mahādevo manmathāndhakamardanaḥ anugṛhyātha śākteyaṃ tatraivāntaradhīyata // ### [1.64.107](https://indike.org/pramana/in.purana.linga.1.64.107) gate maheśvare sāṃbe praṇamya ca maheśvaram dadāha rākṣasānāṃ tu kulaṃ mantreṇa mantravit // ### [1.64.108](https://indike.org/pramana/in.purana.linga.1.64.108) tadāha pautraṃ dharmajño vasiṣṭho munibhir vṛtaḥ alam atyantakopena tāta manyumimaṃ jahi // ### [1.64.109](https://indike.org/pramana/in.purana.linga.1.64.109) rākṣasā nāparādhyanti pitus te vihitaṃ tathā mūḍhānāmeva bhavati krodho buddhimatāṃ na hi // ### [1.64.110](https://indike.org/pramana/in.purana.linga.1.64.110) hanyate tāta kaḥ kena yataḥ svakṛtabhukpumān saṃcitasyātimahatā vatsa kleśena mānavaiḥ // ### [1.64.111](https://indike.org/pramana/in.purana.linga.1.64.111) yaśasastapasaścaiva krodho nāśakaraḥ smṛtaḥ alaṃ hi rākṣasair dagdhair dīnair anaparādhibhiḥ // ### [1.64.112](https://indike.org/pramana/in.purana.linga.1.64.112) satraṃ te viramatvetat kṣamāsārā hi sādhavaḥ evaṃ vasiṣṭhavākyena śākteyo munipuṅgavaḥ // ### [1.64.113](https://indike.org/pramana/in.purana.linga.1.64.113) upasaṃhṛtavān satraṃ sadyastadvākyagauravāt tataḥ prītaś ca bhagavān vasiṣṭho munisattamaḥ // ### [1.64.114](https://indike.org/pramana/in.purana.linga.1.64.114) samprāptaś ca tadā satraṃ pulastyo brahmaṇaḥ sutaḥ vasiṣṭhena tu dattārghyaḥ kṛtāsanaparigrahaḥ // ### [1.64.115](https://indike.org/pramana/in.purana.linga.1.64.115) parāśaramuvācedaṃ praṇipatya sthitaṃ muniḥ vaire mahati yadvākyād guror adyāśritā kṣamā // ### [1.64.116](https://indike.org/pramana/in.purana.linga.1.64.116) tvayā tasmātsamastāni bhavāñchāstrāṇi vetsyati saṃtatermama na chedaḥ kruddhenāpi yataḥ kṛtaḥ // ### [1.64.117](https://indike.org/pramana/in.purana.linga.1.64.117) tvayā tasmānmahābhāga dadāmyanyaṃ mahāvaram purāṇasaṃhitākartā bhavānvatsa bhaviṣyati // ### [1.64.118](https://indike.org/pramana/in.purana.linga.1.64.118) devatāparamārthaṃ ca yathāvadvetsyate bhavān pravṛttau vā nivṛttau vā karmaṇas te 'malā matiḥ // ### [1.64.119](https://indike.org/pramana/in.purana.linga.1.64.119) matprasādādasaṃdigdhā tava vatsa bhaviṣyati tataś ca prāha bhagavān vasiṣṭho vadatāṃ varaḥ // ### [1.64.120](https://indike.org/pramana/in.purana.linga.1.64.120) pulastyena yaduktaṃ te sarvametadbhaviṣyati atha tasya pulastyasya vasiṣṭhasya ca dhīmataḥ // ### [1.64.121](https://indike.org/pramana/in.purana.linga.1.64.121) prasādādvaiṣṇavaṃ cakre purāṇaṃ vai parāśaraḥ ṣaṭprakāraṃ samastārthasādhakaṃ jñānasaṃcayam // ### [1.64.122](https://indike.org/pramana/in.purana.linga.1.64.122) ṣaṭsāhasramitaṃ sarvaṃ vedārthena ca saṃyutam caturthaṃ hi purāṇānāṃ saṃhitāsu suśobhanam // ### [1.64.123](https://indike.org/pramana/in.purana.linga.1.64.123) eṣa vaḥ kathitaḥ sarvo vāsiṣṭhānāṃ samāsataḥ prabhavaḥ śaktisūnoś ca prabhāvo munipuṅgavāḥ // ### [1.64.123.p1](https://indike.org/pramana/in.purana.linga.1.64.123.p1) iti śrīliṅgamahāpurāṇe pūrvabhāge vāsiṣṭhakathanaṃ nāma catuḥṣaṣṭitamo 'dhyāyaḥ ## Commentaries (1) - [Śivatosaṇī Liṅgapurāṇaṭīkā](https://indike.org/pramana/in.purana.linga!ganesa.69.31) — Gaṇeśa Bhaṭṭa, Sanskrit ## Linked texts (4) - [Viṣṇupurāṇa (vulgate)](https://indike.org/pramana/in.purana.visnu*vulgate.1.1.17) — Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.71.1) — Ativīrarāma Pāṇṭiyar 1500, Sanskrit - [Kṛtyakalpataru](https://indike.org/pramana/in.niti.dharma.nibandha.mahanibandha.krtyakalpataru.27.p114) — Lakṣmīdhara Bhaṭṭa, Sanskrit - [Jayasīṃhakalpadruma](https://indike.org/pramana/in.niti.dharma.nibandha.mahanibandha.jayasimhakalpadruma.9.p3.3) — Ratnākara 1688, Sanskrit --- Source: [https://indike.org/pramana/in.purana.linga.1.64](https://indike.org/pramana/in.purana.linga.1.64) · Pramāṇa