[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 1.69 # Lingapurana 1.69 Liṅgapurāṇa 1.69 - **Language:** Sanskrit ## Contents - [1.69.94](https://indike.org/pramana/in.purana.linga.1.69.94) — 1 part ### [1.69.1](https://indike.org/pramana/in.purana.linga.1.69.1) sūta uvāca sātvataḥ satyasampannaḥ prajajñe caturaḥ sutān bhajanaṃ bhrājamānaṃ ca divyaṃ devāvṛdhaṃ nṛpam // ### [1.69.2](https://indike.org/pramana/in.purana.linga.1.69.2) andhakaṃ ca mahābhāgaṃ vṛṣṇiṃ ca yadunandanam teṣāṃ nisargāṃścaturaḥ śṛṇudhvaṃ vistareṇa vai // ### [1.69.3](https://indike.org/pramana/in.purana.linga.1.69.3) sṛñjayyāṃ bhajanāccaiva bhrājamānādvijajñire ayutāyuḥ śatāyuś ca balavān harṣakṛtsmṛtaḥ // ### [1.69.4](https://indike.org/pramana/in.purana.linga.1.69.4) teṣāṃ devāvṛdho rājā cacāra paramaṃ tapaḥ putraḥ sarvaguṇopeto mama bhūyāditi smaran // ### [1.69.5](https://indike.org/pramana/in.purana.linga.1.69.5) tasya babhruriti khyātaḥ puṇyaśloko nṛpottamaḥ anuvaṃśapurāṇajñā gāyantīti pariśrutam // ### [1.69.6](https://indike.org/pramana/in.purana.linga.1.69.6) guṇāndevāvṛdhasyātha kīrtayanto mahātmanaḥ yathaiva śṛṇumo dūrāt saṃpaśyāmastathāntikāt // ### [1.69.7](https://indike.org/pramana/in.purana.linga.1.69.7) babhruḥ śreṣṭho manuṣyāṇāṃ devairdevāvṛdhaḥ samaḥ puruṣāḥ pañca ṣaṣṭistu ṣaṭ sahasrāṇi cāṣṭa ca // ### [1.69.8](https://indike.org/pramana/in.purana.linga.1.69.8) ye 'mṛtatvamanuprāptā babhrordevāvṛdhādapi yajvā dānamatirvīro brahmaṇyastu dṛḍhavrataḥ // ### [1.69.9](https://indike.org/pramana/in.purana.linga.1.69.9) kīrtimāṃś ca mahātejāḥ sātvatānāṃ mahārathaḥ tasyānvavāye sambhūtā bhojā vai daivatopamāḥ // ### [1.69.10](https://indike.org/pramana/in.purana.linga.1.69.10) gāndhārī caiva mādrī ca vṛṣṇibhārye babhūvatuḥ gāndhārī janayāmāsa sumitraṃ mitranandanam // ### [1.69.11](https://indike.org/pramana/in.purana.linga.1.69.11) mādrī lebhe ca taṃ putraṃ tataḥ sā devamīḍhuṣam anamitraṃ śiniṃ caiva tāvubhau puruṣottamau // ### [1.69.12](https://indike.org/pramana/in.purana.linga.1.69.12) anamitrasuto nighno nighnasya dvau babhūvatuḥ prasenaś ca mahābhāgaḥ satrājicca sutāvubhau // ### [1.69.13](https://indike.org/pramana/in.purana.linga.1.69.13) tasya satrājitaḥ sūryaḥ sakhā prāṇasamo 'bhavat syamantako nāma maṇir dattastasmai vivasvatā // ### [1.69.14](https://indike.org/pramana/in.purana.linga.1.69.14) pṛthivyāṃ sarvaratnānām asau rājābhavanmaṇiḥ kadācinmṛgayāṃ yātaḥ prasenena sahaiva saḥ // ### [1.69.15](https://indike.org/pramana/in.purana.linga.1.69.15) vadhaṃ prāpto 'sahāyaś ca siṃhādeva sudāruṇāt atha putraḥ śinerjajñe kaniṣṭhād vṛṣṇinandanāt // ### [1.69.16](https://indike.org/pramana/in.purana.linga.1.69.16) satyavāk satyasampannaḥ satyakastasya cātmajaḥ sātyakiryuyudhānastu śinernaptā pratāpavān // ### [1.69.17](https://indike.org/pramana/in.purana.linga.1.69.17) asaṃgo yuyudhānasya kuṇistasya suto 'bhavat kuṇer yugaṃdharaḥ putraḥ śaineyā iti kīrtitāḥ // ### [1.69.18](https://indike.org/pramana/in.purana.linga.1.69.18) mādryāḥ sutasya saṃjajñe suto vārṣṇiryudhājitaḥ śvaphalka iti vikhyātas trailokyahitakārakaḥ // ### [1.69.19](https://indike.org/pramana/in.purana.linga.1.69.19) śvaphalkaś ca mahārājo dharmātmā yatra vartate nāsti vyādhibhayaṃ tatra nāvṛṣṭibhayamapyuta // ### [1.69.20](https://indike.org/pramana/in.purana.linga.1.69.20) śvaphalkaḥ kāśirājasya sutāṃ bhāryāmavāpa saḥ gāndinīṃ nāma kāśyo hi dadau tasmai svakanyakām // ### [1.69.21](https://indike.org/pramana/in.purana.linga.1.69.21) sā māturudarasthā vai bahūnvarṣagaṇānkila vasantī na ca saṃjajñe garbhasthā tāṃ pitābravīt // ### [1.69.22](https://indike.org/pramana/in.purana.linga.1.69.22) jāyasva śīghraṃ bhadraṃ te kimarthaṃ cābhitiṣṭhasi provāca cainaṃ garbhasthā sā kanyā gāndinī tadā // ### [1.69.23](https://indike.org/pramana/in.purana.linga.1.69.23) varṣatrayaṃ pratidinaṃ gāmekāṃ brāhmaṇāya tu yadi dadyāstataḥ kukṣer nirgamiṣyāmyahaṃ pitaḥ // ### [1.69.24](https://indike.org/pramana/in.purana.linga.1.69.24) tathetyuvāca tasyā vai pitā kāmamapūrayat dātā śūraś ca yajvā ca śrutavānatithipriyaḥ // ### [1.69.25](https://indike.org/pramana/in.purana.linga.1.69.25) tasyāḥ putraḥ smṛto 'krūraḥ śvaphalkādbhūridakṣiṇaḥ ratnā kanyā ca śaivasya hy akrūrastāmavāptavān // ### [1.69.26](https://indike.org/pramana/in.purana.linga.1.69.26) asyāmutpādayāmāsa tanayāṃstānnibodhata upamanyus tathā māṅgur vṛtastu janamejayaḥ // ### [1.69.27](https://indike.org/pramana/in.purana.linga.1.69.27) girirakṣastathopekṣaḥ śatrughno yo 'rimardanaḥ dharmabhṛd vṛṣṭadharmā ca godhano 'tha varas tathā // ### [1.69.28](https://indike.org/pramana/in.purana.linga.1.69.28) āvāhaprativāhau ca sudhārā ca varāṅganā akrūrasyograsenyāṃ tu putrau dvau kulanandanau // ### [1.69.29](https://indike.org/pramana/in.purana.linga.1.69.29) devavānupadevaś ca jajñāte devasaṃmatau sumitrasya suto jajñe citrakaś ca mahāyaśāḥ // ### [1.69.30](https://indike.org/pramana/in.purana.linga.1.69.30) citrakasyābhavanputrā vipṛthuḥ pṛthureva ca aśvagrīvaḥ subāhuś ca sudhāsūkagavekṣaṇau // ### [1.69.31](https://indike.org/pramana/in.purana.linga.1.69.31) ariṣṭanemiraśvaś ca dharmo dharmabhṛdeva ca subhūmirbahubhūmiś ca śraviṣṭhāśravaṇe striyau // ### [1.69.32](https://indike.org/pramana/in.purana.linga.1.69.32) andhakātkāśyaduhitā lebhe ca caturaḥ sutān kukuraṃ bhajamānaṃ ca śuciṃ kambalabarhiṣam // ### [1.69.33](https://indike.org/pramana/in.purana.linga.1.69.33) kukurasya suto vṛṣṇir vṛṣṇeḥ śūrastato 'bhavat kapotaromātibalas tasya putro vilomakaḥ // ### [1.69.34](https://indike.org/pramana/in.purana.linga.1.69.34) tasyāsīt tumburusakho vidvānputro nalaḥ kila khyāyate sa sunāmnā tu candanānakadundubhiḥ // ### [1.69.35](https://indike.org/pramana/in.purana.linga.1.69.35) tasmādapyabhijitputra utpanno 'sya punarvasuḥ aśvamedhaṃ sa putrārtham ājahāra narottamaḥ // ### [1.69.36](https://indike.org/pramana/in.purana.linga.1.69.36) tasya madhye 'tirātrasya sadomadhyātsamutthitaḥ tatastu vidvān sarvajño dātā yajvā punarvasuḥ // ### [1.69.37](https://indike.org/pramana/in.purana.linga.1.69.37) tasyāpi putramithunaṃ babhūvābhijitaḥ kila āhukaścāhukī caiva khyātau kīrtimatāṃ varau // ### [1.69.38](https://indike.org/pramana/in.purana.linga.1.69.38) āhukāt kāśyaduhitur dvau putrau saṃbabhūvatuḥ devakaścograsenaś ca devagarbhasamāvubhau // ### [1.69.39](https://indike.org/pramana/in.purana.linga.1.69.39) devakasya sutā rājño jajñire tridaśopamāḥ devavān upadevaś ca sudevo devarakṣitaḥ // ### [1.69.40](https://indike.org/pramana/in.purana.linga.1.69.40) teṣāṃ svasāraḥ saptāsan vasudevāya tā dadau vṛṣadevopadevā ca tathānyā devarakṣitā // ### [1.69.41](https://indike.org/pramana/in.purana.linga.1.69.41) śrīdevā śāntidevā ca sahadevā tathāparā devakī cāpi tāsāṃ ca variṣṭhābhūtsumadhyamā // ### [1.69.42](https://indike.org/pramana/in.purana.linga.1.69.42) navograsenasya sutās teṣāṃ kaṃsastu pūrvajaḥ teṣāṃ putrāśca pautrāś ca śataśo 'tha sahasraśaḥ // ### [1.69.43](https://indike.org/pramana/in.purana.linga.1.69.43) devakasya sutā patnī vasudevasya dhīmataḥ babhūva vandyā pūjyā ca devairapi pativratā // ### [1.69.44](https://indike.org/pramana/in.purana.linga.1.69.44) rohiṇī ca mahābhāgā patnī cānakadundubheḥ pauravī bāhlikasutā saṃpūjyāsītsurairapi // ### [1.69.45](https://indike.org/pramana/in.purana.linga.1.69.45) asūta rohiṇī rāmaṃ balaśreṣṭhaṃ halāyudham āśritaṃ kaṃsabhītyā ca svātmānaṃ śāntatejasam // ### [1.69.46](https://indike.org/pramana/in.purana.linga.1.69.46) jāte rāme 'tha nihate ṣaḍgarbhe cātidakṣiṇe vasudevo hariṃ dhīmān devakyāmudapādayat // ### [1.69.47](https://indike.org/pramana/in.purana.linga.1.69.47) sa eva paramātmāsau devadevo janārdanaḥ halāyudhaś ca bhagavān ananto rajataprabhaḥ // ### [1.69.48](https://indike.org/pramana/in.purana.linga.1.69.48) bhṛguśāpachalenaiva mānayanmānuṣīṃ tanum babhūva tasyāṃ devakyāṃ vāsudevo janārdana // ### [1.69.49](https://indike.org/pramana/in.purana.linga.1.69.49) umādehasamudbhūtā yoganidrā ca kauśikī niyogāddevadevasya yaśodātanayā hyabhūt // ### [1.69.50](https://indike.org/pramana/in.purana.linga.1.69.50) sā caiva prakṛtiḥ sākṣāt sarvadevanamaskṛtā puruṣo bhagavānkṛṣṇo dharmamokṣaphalapradaḥ // ### [1.69.51](https://indike.org/pramana/in.purana.linga.1.69.51) tāṃ kanyāṃ jagṛhe rakṣan kaṃsātsvasyātmajaṃ tadā caturbhujaṃ viśālākṣaṃ śrīvatsakṛtalāñchanam // ### [1.69.52](https://indike.org/pramana/in.purana.linga.1.69.52) śaṅkhacakragadāpadmaṃ dhārayantaṃ janārdanam yaśodāyai pradattvā tu vasudevaś ca buddhimān // ### [1.69.53](https://indike.org/pramana/in.purana.linga.1.69.53) dattvainaṃ nandagopasya rakṣatāmiti cābravīt rakṣakaṃ jagatāṃ viṣṇuṃ svecchayā dhṛtavigraham // ### [1.69.54](https://indike.org/pramana/in.purana.linga.1.69.54) prasādāccaiva devasya śivasyāmitatejasaḥ rāmeṇa sārdhaṃ taṃ dattvā varadaṃ parameśvaram // ### [1.69.55](https://indike.org/pramana/in.purana.linga.1.69.55) bhūbhāranigrahārthaṃ ca hy avatīrṇaṃ jagadgurum ato vai sarvakalyāṇaṃ yādavānāṃ bhaviṣyati // ### [1.69.56](https://indike.org/pramana/in.purana.linga.1.69.56) ayaṃ sa garbho devakyā yo naḥ kleśyānhariṣyati ugrasenātmajāyātha kaṃsāyānakadundubhiḥ // ### [1.69.57](https://indike.org/pramana/in.purana.linga.1.69.57) nivedayāmāsa tadā jātāṃ kanyāṃ sulakṣaṇām asyāstavāṣṭamo garbho devakyāḥ kaṃsa suvrata // ### [1.69.58](https://indike.org/pramana/in.purana.linga.1.69.58) mṛtyur eva na saṃdeha iti vāṇī purātanī tatastāṃ hantumārebhe kaṃsaḥ sollaṅghya cāṃbaram // ### [1.69.59](https://indike.org/pramana/in.purana.linga.1.69.59) uvācāṣṭabhujā devī meghagaṃbhīrayā girā rakṣasva tatsvakaṃ deham āyāto mṛtyureva te // ### [1.69.60](https://indike.org/pramana/in.purana.linga.1.69.60) rakṣamāṇasya dehasya māyāvī kaṃsarūpiṇaḥ kiṃ kṛtaṃ duṣkṛtaṃ mūrkha jātaḥ khalu tavāntakṛt // ### [1.69.61](https://indike.org/pramana/in.purana.linga.1.69.61) devakyāḥ sa bhayātkaṃso jaghānaivāṣṭamaṃ tviti smaranti vihito mṛtyur devakyās tanayo 'ṣṭamaḥ // ### [1.69.62](https://indike.org/pramana/in.purana.linga.1.69.62) yastatpratikṛtau yatno bhojasyāsīdvṛthā hareḥ prabhāvānmuniśārdūlās tayā caiva jaḍīkṛtaḥ // ### [1.69.63](https://indike.org/pramana/in.purana.linga.1.69.63) kaṃso 'pi nihatastena kṛṣṇenākliṣṭakarmaṇā nihatā bahavaścānye devabrāhmaṇaghātinaḥ // ### [1.69.64](https://indike.org/pramana/in.purana.linga.1.69.64) tasya kṛṣṇasya tanayāḥ pradyumnapramukhās tathā bahavaḥ parisaṃkhyātāḥ sarve yuddhaviśāradāḥ // ### [1.69.65](https://indike.org/pramana/in.purana.linga.1.69.65) kṛṣṇaputrāḥ samākhyātāḥ kṛṣṇena sadṛśāḥ sutāḥ putreṣveteṣu sarveṣu cārudeṣṇādayo hareḥ // ### [1.69.66](https://indike.org/pramana/in.purana.linga.1.69.66) viśiṣṭā balavantaś ca raukmiṇeyārisūdanāḥ ṣoḍaśastrīsahasrāṇi śatamekaṃ tathādhikam // ### [1.69.67](https://indike.org/pramana/in.purana.linga.1.69.67) kṛṣṇasya tāsu sarvāsu priyā jyeṣṭhā ca rukmiṇī tayā dvādaśavarṣāṇi kṛṣṇenākliṣṭakarmaṇā // ### [1.69.68](https://indike.org/pramana/in.purana.linga.1.69.68) uṣyatā vāyubhakṣeṇa putrārthaṃ pūjito haraḥ cārudeṣṇaḥ sucāruś ca cāruveṣo yaśodharaḥ // ### [1.69.69](https://indike.org/pramana/in.purana.linga.1.69.69) cāruśravāścāruyaśāḥ pradyumnaḥ sāmba eva ca ete labdhāstu kṛṣṇena śūlapāṇiprasādataḥ // ### [1.69.70](https://indike.org/pramana/in.purana.linga.1.69.70) tān dṛṣṭvā tanayānvīrān raukmiṇeyāṃś ca rukmiṇīm jāmbavatyabravītkṛṣṇaṃ bhāryā kṛṣṇasya dhīmataḥ // ### [1.69.71](https://indike.org/pramana/in.purana.linga.1.69.71) mama tvaṃ puṇḍarīkākṣa viśiṣṭaṃ guṇavattaram sureśasaṃmitaṃ putraṃ prasanno dātumarhasi // ### [1.69.72](https://indike.org/pramana/in.purana.linga.1.69.72) jāmbavatyā vacaḥ śrutvā jagannāthastato hariḥ tapastaptuṃ samārebhe taponidhiraninditaḥ // ### [1.69.73](https://indike.org/pramana/in.purana.linga.1.69.73) so 'tha nārāyaṇaḥ kṛṣṇaḥ śaṅkhacakragadādharaḥ vyāghrapādasya ca muner gatvā caivāśramottamam // ### [1.69.74](https://indike.org/pramana/in.purana.linga.1.69.74) ṛṣiṃ dṛṣṭvā tvaṅgirasaṃ praṇipatya janārdanaḥ divyaṃ pāśupataṃ yogaṃ labdhavāṃstasya cājñayā // ### [1.69.75](https://indike.org/pramana/in.purana.linga.1.69.75) praluptaśmaśrukeśaś ca ghṛtākto muñjamekhalī dīkṣito bhagavānkṛṣṇas tatāpa ca paraṃtapaḥ // ### [1.69.76](https://indike.org/pramana/in.purana.linga.1.69.76) ūrdhvabāhur nirālaṃbaḥ pādāṅguṣṭhāgradhiṣṭhitaḥ phalāmbanilabhojī ca ṛtutrayam adhokṣajaḥ // ### [1.69.77](https://indike.org/pramana/in.purana.linga.1.69.77) tapasā tasya saṃtuṣṭo dadau rudro bahūn varān sāmbaṃ jāṃbavatīputraṃ kṛṣṇāya ca mahātmane // ### [1.69.78](https://indike.org/pramana/in.purana.linga.1.69.78) tathā jāṃbavatī caiva sāṃbaṃ bhāryā hareḥ sutam praharṣamatulaṃ lebhe labdhvādityaṃ yathāditiḥ // ### [1.69.79](https://indike.org/pramana/in.purana.linga.1.69.79) bāṇasya ca tadā tena cheditaṃ munipuṅgavāḥ bhujānāṃ caiva sāhasraṃ śāpādrudrasya dhīmataḥ // ### [1.69.80](https://indike.org/pramana/in.purana.linga.1.69.80) atha daityavadhaṃ cakre halāyudhasahāyavān tathā duṣṭakṣitīśānāṃ līlayaiva raṇājire // ### [1.69.81](https://indike.org/pramana/in.purana.linga.1.69.81) sa hatvā devasambhūtaṃ narakaṃ daityapuṅgavam brāhmaṇasyordhvacakrasya varadānānmahātmanaḥ // ### [1.69.82](https://indike.org/pramana/in.purana.linga.1.69.82) svopabhogyāni kanyānāṃ ṣoḍaśātulavikramaḥ śatādhikāni jagrāha sahasrāṇi mahābalaḥ // ### [1.69.83](https://indike.org/pramana/in.purana.linga.1.69.83) śāpavyājena viprāṇām upasaṃhṛtavān kulam saṃhṛtya tatkulaṃ caiva prabhāse 'tiṣṭhadacyutaḥ // ### [1.69.84](https://indike.org/pramana/in.purana.linga.1.69.84) tadā tasyaiva tu gataṃ varṣāṇāmadhikaṃ śatam kṛṣṇasya dvārakāyāṃ vai jarākleśāpahāriṇaḥ // ### [1.69.85](https://indike.org/pramana/in.purana.linga.1.69.85) viśvāmitrasya kaṇvasya nāradasya ca dhīmataḥ śāpaṃ piṇḍārake 'rakṣad vaco durvāsasastadā // ### [1.69.86](https://indike.org/pramana/in.purana.linga.1.69.86) tyaktvā ca mānuṣaṃ rūpaṃ jarakāstracchalena tu anugṛhya ca kṛṣṇo 'pi lubdhakaṃ prayayau divam // ### [1.69.87](https://indike.org/pramana/in.purana.linga.1.69.87) aṣṭāvakrasya śāpena bhāryāḥ kṛṣṇasya dhīmataḥ cauraiścāpahṛtāḥ sarvās tasya māyābalena ca // ### [1.69.88](https://indike.org/pramana/in.purana.linga.1.69.88) balabhadro 'pi saṃtyajya nāgo bhūtvā jagāma ca mahiṣyastasya kṛṣṇasya rukmiṇīpramukhāḥ śubhāḥ // ### [1.69.89](https://indike.org/pramana/in.purana.linga.1.69.89) sahāgniṃ viviśuḥ sarvāḥ kṛṣṇenākliṣṭakarmaṇā revatī ca tathā devī balabhadreṇa dhīmatā // ### [1.69.90](https://indike.org/pramana/in.purana.linga.1.69.90) praviṣṭā pāvakaṃ viprāḥ sā ca bhartṛpathaṃ gatā pretakāryaṃ hareḥ kṛtvā pārthaḥ paramavīryavān // ### [1.69.91](https://indike.org/pramana/in.purana.linga.1.69.91) rāmasya ca tathānyeṣāṃ vṛṣṇīnāmapi suvrataḥ kandamūlaphalaistasya balikāryaṃ cakāra saḥ // ### [1.69.92](https://indike.org/pramana/in.purana.linga.1.69.92) dravyābhāvāt svayaṃ pārtho bhrātṛbhiś ca divaṃ gataḥ evaṃ saṃkṣepataḥ proktaḥ kṛṣṇasyākliṣṭakarmaṇaḥ // ### [1.69.93](https://indike.org/pramana/in.purana.linga.1.69.93) prabhāvo vilayaścaiva svecchayaiva mahātmanaḥ ityetatsomavaṃśānāṃ nṛpāṇāṃ caritaṃ dvijāḥ // ### [1.69.94](https://indike.org/pramana/in.purana.linga.1.69.94) yaḥ paṭhecchṛṇuyādvāpi brāhmaṇān śrāvayedapi sa yāti vaiṣṇavaṃ lokaṃ nātra kāryā vicāraṇā // ### [1.69.94.p1](https://indike.org/pramana/in.purana.linga.1.69.94.p1) iti śrīliṅgamahāpurāṇe pūrvabhāge somavaṃśānukīrtanaṃ nāmaikonasaptatitamo 'dhyāyaḥ ## Linked texts (12) - [Brahmāṇḍapurāṇa](https://indike.org/pramana/in.purana.brahmanda.2.71.6) — Vyāsa, Sanskrit - [Vāyupurāṇa](https://indike.org/pramana/in.purana.vayu.2.34.7) — Vyāsa, Sanskrit - [Kūrmapurāṇa](https://indike.org/pramana/in.purana.kurma.1.23.36) — Vyāsa, Sanskrit - [Padmapurāṇa](https://indike.org/pramana/in.purana.padma.1.13.35) — Vyāsa, Sanskrit - [Matsyapurāṇa](https://indike.org/pramana/in.purana.matsya.44.51) — Vyāsa, Sanskrit - [Brahmapurāṇa](https://indike.org/pramana/in.purana.brahma.15.41) — Vyāsa, Sanskrit - [Critical edition (BORI)](https://indike.org/pramana/in.lit.mahabharata.harivamsa*crit.27.12) — Sanskrit - [Bhāgavatapurāṇa](https://indike.org/pramana/in.purana.bhagavata.9.24.9) — Vyāsa, Sanskrit - [Vulgate (Nīlakaṇṭha's text)](https://indike.org/pramana/in.lit.mahabharata.vyasa*vulgate.3.38.26) — Sanskrit - [Mudgalapurāṇa](https://indike.org/pramana/in.purana.upa.surya.mudgala.3.38.37) — Sanskrit - [Agnipurāṇa](https://indike.org/pramana/in.purana.agni.274.40) — Vyāsa, Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.78.1) — Ativīrarāma Pāṇṭiyar 1500, Sanskrit --- Source: [https://indike.org/pramana/in.purana.linga.1.69](https://indike.org/pramana/in.purana.linga.1.69) · Pramāṇa