[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 1.70 # Lingapurana 1.70 Liṅgapurāṇa 1.70 - **Language:** Sanskrit ## Contents - [1.70.348](https://indike.org/pramana/in.purana.linga.1.70.348) — 1 part ### [1.70.1](https://indike.org/pramana/in.purana.linga.1.70.1) ṛṣaya ūcuḥ ādisargastvayā sūta sūcito na prakāśitaḥ sāṃprataṃ vistareṇaiva vaktumarhasi suvrata // ### [1.70.2](https://indike.org/pramana/in.purana.linga.1.70.2) sūta uvāca maheśvaro mahādevaḥ prakṛteḥ puruṣasya ca paratve saṃsthito devaḥ paramātmā munīśvarāḥ // ### [1.70.3](https://indike.org/pramana/in.purana.linga.1.70.3) avyaktaṃ ceśvarāttasmād abhavatkāraṇaṃ param pradhānaṃ prakṛtiśceti yadāhustattvacintakāḥ // ### [1.70.4](https://indike.org/pramana/in.purana.linga.1.70.4) gandhavarṇarasair hīnaṃ śabdasparśavivarjitam ajaraṃ dhruvamakṣayyaṃ nityaṃ svātmanyavasthitam // ### [1.70.5](https://indike.org/pramana/in.purana.linga.1.70.5) jagadyoniṃ mahābhūtaṃ paraṃ brahma sanātanam vigrahaḥ sarvabhūtānām īśvarājñāpracoditam // ### [1.70.6](https://indike.org/pramana/in.purana.linga.1.70.6) anādyantamajaṃ sūkṣmaṃ triguṇaṃ prabhavāvyayam aprakāśamavijñeyaṃ brahmāgre samavartata // ### [1.70.7](https://indike.org/pramana/in.purana.linga.1.70.7) asyātmanā sarvamidaṃ vyāptaṃ tvāsīcchivecchayā guṇasāmye tadā tasminn avibhāge tamomaye // ### [1.70.8](https://indike.org/pramana/in.purana.linga.1.70.8) sargakāle pradhānasya kṣetrajñādhiṣṭhitasya vai guṇabhāvādvyajyamāno mahān prādurbabhūva ha // ### [1.70.9](https://indike.org/pramana/in.purana.linga.1.70.9) sūkṣmeṇa mahatā cātha avyaktena samāvṛtam sattvodrikto mahānagre sattāmātraprakāśakaḥ // ### [1.70.10](https://indike.org/pramana/in.purana.linga.1.70.10) mano mahāṃstu vijñeyam ekaṃ tatkāraṇaṃ smṛtam samutpannaṃ liṅgamātraṃ kṣetrajñādhiṣṭhitaṃ hi tat // ### [1.70.11](https://indike.org/pramana/in.purana.linga.1.70.11) dharmādīni ca rūpāṇi lokatattvārthahetavaḥ mahān sṛṣṭiṃ vikurute codyamānaḥ sisṛkṣayā // ### [1.70.12](https://indike.org/pramana/in.purana.linga.1.70.12) mano mahānmatirbrahma pūrbuddhiḥ khyātirīśvaraḥ prajñā citiḥ smṛtiḥ saṃvid viśveśaśceti sa smṛtaḥ // ### [1.70.13](https://indike.org/pramana/in.purana.linga.1.70.13) manute sarvabhūtānāṃ yasmācceṣṭā phalaṃ tataḥ saukṣmyāttena vibhaktaṃ tu yena tanmana ucyate // ### [1.70.14](https://indike.org/pramana/in.purana.linga.1.70.14) tattvānām agrajo yasmān mahāṃś ca parimāṇataḥ viśeṣebhyo guṇebhyo 'pi mahāniti tataḥ smṛtaḥ // ### [1.70.15](https://indike.org/pramana/in.purana.linga.1.70.15) bibharti mānaṃ manute vibhāgaṃ manyate 'pi ca puruṣo bhogasaṃbandhāt tena cāsau matiḥ smṛtaḥ // ### [1.70.16](https://indike.org/pramana/in.purana.linga.1.70.16) bṛhattvād bṛṃhaṇatvācca bhāvānāṃ sakalāśrayāt yasmāddhārayate bhāvān brahma tena nirucyate // ### [1.70.17](https://indike.org/pramana/in.purana.linga.1.70.17) yaḥ pūrayati yasmācca kṛtsnāndevānanugrahaiḥ nayate tattvabhāvaṃ ca tena pūriti cocyate // ### [1.70.18](https://indike.org/pramana/in.purana.linga.1.70.18) budhyate puruṣaścātra sarvān bhāvān hitaṃ tathā yasmādbodhayate caiva buddhistena nirucyate // ### [1.70.19](https://indike.org/pramana/in.purana.linga.1.70.19) khyātiḥ pratyupabhogaś ca yasmātsaṃvartate tataḥ bhogasya jñānaniṣṭhatvāt tena khyātiriti smṛtaḥ // ### [1.70.20](https://indike.org/pramana/in.purana.linga.1.70.20) khyāyate tadguṇair vāpi jñānādibhir anekaśaḥ tasmācca mahataḥ saṃjñā khyātirityabhidhīyate // ### [1.70.21](https://indike.org/pramana/in.purana.linga.1.70.21) sākṣātsarvaṃ vijānāti mahātmā tena ceśvaraḥ yasmājjñānānugaścaiva prajñā tena sa ucyate // ### [1.70.22](https://indike.org/pramana/in.purana.linga.1.70.22) jñānādīni ca rūpāṇi bahukarmaphalāni ca cinoti yasmādbhogārthaṃ tenāsau citirucyate // ### [1.70.23](https://indike.org/pramana/in.purana.linga.1.70.23) vartamānavyatītāni tathaivānāgatānyapi smarate sarvakāryāṇi tenāsau smṛtirucyate // ### [1.70.24](https://indike.org/pramana/in.purana.linga.1.70.24) kṛtsnaṃ ca vindate jñānaṃ yasmānmāhātmyamuttamam tasmād vinder videścaiva saṃvidityabhidhīyate // ### [1.70.25](https://indike.org/pramana/in.purana.linga.1.70.25) vidyate 'pi ca sarvatra tasminsarvaṃ ca vindati tasmātsaṃviditi prokto mahadbhir munisattamāḥ // ### [1.70.26](https://indike.org/pramana/in.purana.linga.1.70.26) jānāter jñānam ityāhur bhagavān jñānasaṃnidhiḥ bandhanādiparībhāvād īśvaraḥ procyate budhaiḥ // ### [1.70.27](https://indike.org/pramana/in.purana.linga.1.70.27) paryāyavācakaiḥ śabdais tattvam ādyam anuttamam vyākhyātaṃ tattvabhāvajñair devasadbhāvacetakaiḥ // ### [1.70.28](https://indike.org/pramana/in.purana.linga.1.70.28) mahānsṛṣṭiṃ vikurute codyamānaḥ sisṛkṣayā saṃkalpo 'dhyavasāyaś ca tasya vṛttidvayaṃ smṛtam // ### [1.70.29](https://indike.org/pramana/in.purana.linga.1.70.29) triguṇād rajasodriktād ahaṅkārastato 'bhavat mahatā ca vṛtaḥ sargo bhūtādir bāhyatastu saḥ // ### [1.70.30](https://indike.org/pramana/in.purana.linga.1.70.30) tasmādeva tamodriktād ahaṅkārādajāyata bhūtatanmātrasargastu bhūtādistāmasastu saḥ // ### [1.70.31](https://indike.org/pramana/in.purana.linga.1.70.31) bhūtādistu vikurvāṇaḥ śabdamātraṃ sasarja ha ākāśaṃ suṣiraṃ tasmād utpannaṃ śabdalakṣaṇam // ### [1.70.32](https://indike.org/pramana/in.purana.linga.1.70.32) ākāśaṃ śabdamātraṃ tu sparśamātraṃ samāvṛṇot vāyuścāpi vikurvāṇo rūpamātraṃ sasarja ha // ### [1.70.33](https://indike.org/pramana/in.purana.linga.1.70.33) jyotirutpadyate vāyos tadrūpaguṇam ucyate sparśamātrastu vai vāyū rūpamātraṃ samāvṛṇot // ### [1.70.34](https://indike.org/pramana/in.purana.linga.1.70.34) jyotiścāpi vikurvāṇaṃ rasamātraṃ sasarja ha sambhavanti tato hyāpas tā vai sarvarasātmikāḥ // ### [1.70.35](https://indike.org/pramana/in.purana.linga.1.70.35) rasamātrāstu tā hyāpo rūpamātro 'gnir āvṛṇot āpaścāpi vikurvatyo gandhamātraṃ sasarjire // ### [1.70.36](https://indike.org/pramana/in.purana.linga.1.70.36) saṃghāto jāyate tasmāt tasya gandho guṇo mataḥ tasmiṃstasmiṃś ca tanmātraṃ tena tanmātratā smṛtā // ### [1.70.37](https://indike.org/pramana/in.purana.linga.1.70.37) aviśeṣavācakatvād aviśeṣās tatas tu te praśāntaghoramūḍhatvād aviśeṣāstataḥ punaḥ // ### [1.70.38](https://indike.org/pramana/in.purana.linga.1.70.38) bhūtatanmātrasargo 'yaṃ vijñeyastu parasparam vaikārikādahaṅkārāt sattvodriktāttu sāttvikāt // ### [1.70.39](https://indike.org/pramana/in.purana.linga.1.70.39) vaikārikaḥ sa sargastu yugapat sampravartate buddhīndriyāṇi pañcaiva pañca karmendriyāṇi ca // ### [1.70.40](https://indike.org/pramana/in.purana.linga.1.70.40) sādhakānīndriyāṇi syur devā vaikārikā daśa ekādaśaṃ manastatra svaguṇenobhayātmakam // ### [1.70.41](https://indike.org/pramana/in.purana.linga.1.70.41) śrotraṃ tvak cakṣuṣī jihvā nāsikā caiva pañcamī śabdādīnāmavāptyarthaṃ buddhiyuktāni tāni vai // ### [1.70.42](https://indike.org/pramana/in.purana.linga.1.70.42) pādau pāyurupasthaś ca hastau vāgdaśamī bhavet gatirvisargo hyānandaḥ śilpaṃ vākyaṃ ca karma tat // ### [1.70.43](https://indike.org/pramana/in.purana.linga.1.70.43) ākāśaṃ śabdamātraṃ ca sparśamātraṃ samāviśat dviguṇastu tato vāyuḥ śabdasparśātmako 'bhavat // ### [1.70.44](https://indike.org/pramana/in.purana.linga.1.70.44) rūpaṃ tathaiva viśataḥ śabdasparśaguṇāvubhau triguṇastu tatastvagniḥ saśabdasparśarūpavān // ### [1.70.45](https://indike.org/pramana/in.purana.linga.1.70.45) saśabdasparśarūpaṃ ca rasamātraṃ samāviśat tasmāccaturguṇā āpo vijñeyāstu rasātmikāḥ // ### [1.70.46](https://indike.org/pramana/in.purana.linga.1.70.46) śabdasparśaṃ ca rūpaṃ ca raso vai gandhamāviśat saṃgatā gandhamātreṇa āviśanto mahīmimām // ### [1.70.47](https://indike.org/pramana/in.purana.linga.1.70.47) tasmātpañcaguṇā bhūmiḥ sthūlā bhūteṣu śasyate śāntā ghorāś ca mūḍhāś ca viśeṣāstena te smṛtāḥ // ### [1.70.48](https://indike.org/pramana/in.purana.linga.1.70.48) parasparānupraveśād dhārayanti parasparam bhūmerantastvidaṃ sarvaṃ lokālokācalāvṛtam // ### [1.70.49](https://indike.org/pramana/in.purana.linga.1.70.49) viśeṣāścendriyagrāhyā niyatatvācca te smṛtāḥ guṇaṃ pūrvasya sargasya prāpnuvantyuttarottarāḥ // ### [1.70.50](https://indike.org/pramana/in.purana.linga.1.70.50) teṣāṃ yāvacca tad yacca yacca tāvadguṇaṃ smṛtam upalabhyāpsu vai gandhaṃ kecid brūyur apāṃ guṇam // ### [1.70.51](https://indike.org/pramana/in.purana.linga.1.70.51) pṛthivyāmeva taṃ vidyād apāṃ vāyoś ca saṃśrayāt ete sapta mahātmāno hy anyonyasya samāśrayāt // ### [1.70.52](https://indike.org/pramana/in.purana.linga.1.70.52) puruṣādhiṣṭhitatvācca avyaktānugraheṇa ca mahādayo viśeṣāntā hy aṇḍamutpādayanti te // ### [1.70.53](https://indike.org/pramana/in.purana.linga.1.70.53) ekakālasamutpannaṃ jalabudbudavacca tat viśeṣebhyo 'ṇḍam abhavan mahat tad udakeśayam // ### [1.70.54](https://indike.org/pramana/in.purana.linga.1.70.54) adbhir daśaguṇābhistu bāhyato 'ṇḍaṃ samāvṛtam āpo daśaguṇenaitās tejasā bāhyato vṛtāḥ // ### [1.70.55](https://indike.org/pramana/in.purana.linga.1.70.55) tejo daśaguṇenaiva vāyunā bāhyato vṛtam vāyurdaśaguṇenaiva bāhyato nabhasā vṛtaḥ // ### [1.70.56](https://indike.org/pramana/in.purana.linga.1.70.56) ākāśenāvṛto vāyuḥ khaṃ tu bhūtādināvṛtam bhūtādirmahatā cāpi avyaktenāvṛto mahān // ### [1.70.57](https://indike.org/pramana/in.purana.linga.1.70.57) śarvaścāṇḍakapālastho bhavaścāṃbhasi suvratāḥ rudro 'gnimadhye bhagavān ugro vāyau punaḥ smṛtaḥ // ### [1.70.58](https://indike.org/pramana/in.purana.linga.1.70.58) bhīmaścāvanimadhyastho hy ahaṅkāre maheśvaraḥ buddhau ca bhagavānīśaḥ sarvataḥ parameśvaraḥ // ### [1.70.59](https://indike.org/pramana/in.purana.linga.1.70.59) etairāvaraṇairaṇḍaṃ saptabhiḥ prākṛtair vṛtam etā āvṛtya cānyonyam aṣṭau prakṛtayaḥ sthitāḥ // ### [1.70.60](https://indike.org/pramana/in.purana.linga.1.70.60) prasargakāle sthitvā tu grasantyetāḥ parasparam evaṃ parasparotpannā dhārayanti parasparam // ### [1.70.61](https://indike.org/pramana/in.purana.linga.1.70.61) ādhārādheyabhāvena vikārāste vikāriṣu maheśvaraḥ paro 'vyaktād aṇḍam avyaktasaṃbhavam // ### [1.70.62](https://indike.org/pramana/in.purana.linga.1.70.62) aṇḍājjajñe sa eveśaḥ puruṣo 'rkasamaprabhaḥ tasminkāryasya karaṇaṃ saṃsiddhaṃ svecchayaiva tu // ### [1.70.63](https://indike.org/pramana/in.purana.linga.1.70.63) sa vai śarīrī prathamaḥ sa vai puruṣa ucyate tasya vāmāṅgajo viṣṇuḥ sarvadevanamaskṛtaḥ // ### [1.70.64](https://indike.org/pramana/in.purana.linga.1.70.64) lakṣmyā devyā hyabhūddeva icchayā parameṣṭhinaḥ dakṣiṇāṅgabhavo brahmā sarasvatyā jagadguruḥ // ### [1.70.65](https://indike.org/pramana/in.purana.linga.1.70.65) tasminnaṇḍe ime lokā antarviśvamidaṃ jagat candrādityau sanakṣatrau sagrahau saha vāyunā // ### [1.70.66](https://indike.org/pramana/in.purana.linga.1.70.66) lokālokadvayaṃ kiṃcid aṇḍe hyasminsamarpitam yattu sṛṣṭau prasaṃkhyātaṃ mayā kālāntaraṃ dvijāḥ // ### [1.70.67](https://indike.org/pramana/in.purana.linga.1.70.67) etatkālāntaraṃ jñeyam aharvai pārameśvaram rātriścaitāvatī jñeyā parameśasya kṛtsnaśaḥ // ### [1.70.68](https://indike.org/pramana/in.purana.linga.1.70.68) ahastasya tu yā sṛṣṭiḥ rātriś ca pralayaḥ smṛtaḥ nāhastu vidyate tasya na rātririti dhārayet // ### [1.70.69](https://indike.org/pramana/in.purana.linga.1.70.69) upacārastu kriyate lokānāṃ hitakāmyayā indriyāṇīndriyārthāś ca mahābhūtāni pañca ca // ### [1.70.70](https://indike.org/pramana/in.purana.linga.1.70.70) tasmāt sarvāṇi bhūtāni buddhiś ca saha daivataiḥ ahastiṣṭhanti sarvāṇi parameśasya dhīmataḥ // ### [1.70.71](https://indike.org/pramana/in.purana.linga.1.70.71) aharante pralīyante rātryante viśvasaṃbhavaḥ svātmanyavasthite vyakte vikāre pratisaṃhṛte // ### [1.70.72](https://indike.org/pramana/in.purana.linga.1.70.72) sādharmyeṇāvatiṣṭhete pradhānapuruṣāvubhau tamaḥsattvarajopetau samatvena vyavasthitau // ### [1.70.73](https://indike.org/pramana/in.purana.linga.1.70.73) anupṛktāvabhūtāṃ tāv otaprotau parasparam guṇasāmye layo jñeyo vaiṣamye sṛṣṭirucyate // ### [1.70.74](https://indike.org/pramana/in.purana.linga.1.70.74) tile yathā bhavettailaṃ ghṛtaṃ payasi vā sthitam tathā tamasi sattve ca rajasyanusṛtaṃ jagat // ### [1.70.75](https://indike.org/pramana/in.purana.linga.1.70.75) upāsya rajanīṃ kṛtsnāṃ parāṃ māheśvarīṃ tathā arhamukhe pravṛttaś ca paraḥ prakṛtisaṃbhavaḥ // ### [1.70.76](https://indike.org/pramana/in.purana.linga.1.70.76) kṣobhayāmāsa yogena pareṇa parameśvaraḥ pradhānaṃ puruṣaṃ caiva praviśya sa maheśvaraḥ // ### [1.70.77](https://indike.org/pramana/in.purana.linga.1.70.77) maheśvarāttrayo devā jajñire jagadīśvarāt śāśvatāḥ paramā guhyaḥ sarvātmānaḥ śarīriṇaḥ // ### [1.70.78](https://indike.org/pramana/in.purana.linga.1.70.78) eta eva trayo devā eta eva trayo guṇāḥ eta eva trayo lokā eta eva trayo 'gnayaḥ // ### [1.70.79](https://indike.org/pramana/in.purana.linga.1.70.79) parasparāśritā hyete parasparamanuvratāḥ paraspareṇa vartante dhārayanti parasparam // ### [1.70.80](https://indike.org/pramana/in.purana.linga.1.70.80) anyonyamithunā hyete anyonyamupajīvinaḥ kṣaṇaṃ viyogo na hyeṣāṃ na tyajanti parasparam // ### [1.70.81](https://indike.org/pramana/in.purana.linga.1.70.81) īśvarastu paro devo viṣṇuś ca mahataḥ paraḥ brahmā ca rajasā yuktaḥ sargādau hi pravartate // ### [1.70.82](https://indike.org/pramana/in.purana.linga.1.70.82) paraḥ sa puruṣo jñeyaḥ prakṛtiḥ sā parā smṛtā // ### [1.70.83](https://indike.org/pramana/in.purana.linga.1.70.83) adhiṣṭhitā sā hi maheśvareṇa pravartate codyamane samantāt anupravṛttastu mahāṃstadenāṃ cirasthiratvād viṣayaṃ śriyaḥ svayam // ### [1.70.84](https://indike.org/pramana/in.purana.linga.1.70.84) pradhānaguṇavaiṣamyāt sargakālaḥ pravartate īśvarādhiṣṭhitātpūrvaṃ tasmātsadasadātmakāt // ### [1.70.85](https://indike.org/pramana/in.purana.linga.1.70.85) saṃsiddhaḥ kāryakaraṇe rudraścāgre hyavartata tejasāpratimo dhīmān avyaktaḥ samprakāśakaḥ // ### [1.70.86](https://indike.org/pramana/in.purana.linga.1.70.86) sa vai śarīrī prathamaḥ sa vai puruṣa ucyate brahmā ca bhagavāṃstasmāc caturvaktraḥ prajāpatiḥ // ### [1.70.87](https://indike.org/pramana/in.purana.linga.1.70.87) saṃsiddhaḥ kāryakāraṇe tathā vai samavartata eka eva mahādevas tridhaivaṃ sa vyavasthitaḥ // ### [1.70.88](https://indike.org/pramana/in.purana.linga.1.70.88) apratīpena jñānena aiśvaryeṇa samanvitaḥ dharmeṇa cāpratīpena vairāgyeṇa ca te 'nvitāḥ // ### [1.70.89](https://indike.org/pramana/in.purana.linga.1.70.89) avyaktājjāyate teṣāṃ manasā yadyadīhitam vaśīkṛtatvāttraiguṇyaṃ sāpekṣatvātsvabhāvataḥ // ### [1.70.90](https://indike.org/pramana/in.purana.linga.1.70.90) caturmukhastu brahmatve kālatve cāntakaḥ smṛtaḥ sahasramūrdhā puruṣas tisro 'vasthāḥ svayaṃbhuvaḥ // ### [1.70.91](https://indike.org/pramana/in.purana.linga.1.70.91) brahmatve sṛjate lokān kālatve saṃkṣipatyapi puruṣatve hyudāsīnas tisro 'vasthāḥ prajāpateḥ // ### [1.70.92](https://indike.org/pramana/in.purana.linga.1.70.92) brahmā kamalagarbhābho rudraḥ kālāgnisannibhaḥ puruṣaḥ puṇḍarīkākṣo rūpaṃ tatparamātmanaḥ // ### [1.70.93](https://indike.org/pramana/in.purana.linga.1.70.93) ekadhā sa dvidhā caiva tridhā ca bahudhā punaḥ maheśvaraḥ śarīrāṇi karoti vikaroti ca // ### [1.70.94](https://indike.org/pramana/in.purana.linga.1.70.94) nānākṛtikriyārūpanāmavanti svalīlayā maheśvaraḥ śarīrāṇi karoti vikaroti ca // ### [1.70.95](https://indike.org/pramana/in.purana.linga.1.70.95) tridhā yadvartate loke tasmāttriguṇa ucyate caturdhā pravibhaktatvāc caturvyūhaḥ prakīrtitaḥ // ### [1.70.96](https://indike.org/pramana/in.purana.linga.1.70.96) yadāpnoti yadādatte yaccātti viṣayānayam yaccāsya satataṃ bhāvas tasmādātmā nirucyate // ### [1.70.97](https://indike.org/pramana/in.purana.linga.1.70.97) ṛṣiḥ sarvagatatvācca śarīrī so 'sya yatprabhuḥ svāmitvamasya yatsarvaṃ viṣṇuḥ sarvapraveśanāt // ### [1.70.98](https://indike.org/pramana/in.purana.linga.1.70.98) bhagavān bhagavadbhāvān nirmalatvācchivaḥ smṛtaḥ paramaḥ samprakṛṣṭatvād avanād omiti smṛtaḥ // ### [1.70.99](https://indike.org/pramana/in.purana.linga.1.70.99) sarvajñaḥ sarvavijñānāt sarvaḥ sarvamayo yataḥ tridhā vibhajya cātmānaṃ trailokyaṃ sampravartate // ### [1.70.100](https://indike.org/pramana/in.purana.linga.1.70.100) sṛjate grasate caiva rakṣate ca tribhiḥ svayam āditvād ādidevo 'sāv ajātatvād ajaḥ smṛtaḥ // ### [1.70.101](https://indike.org/pramana/in.purana.linga.1.70.101) pāti yasmātprajāḥ sarvāḥ prajāpatir iti smṛtaḥ deveṣu ca mahāndevo mahādevastataḥ smṛtaḥ // ### [1.70.102](https://indike.org/pramana/in.purana.linga.1.70.102) sarvagatvācca devānām avaśyatvācca īśvaraḥ bṛhattvācca smṛto brahmā bhūtatvādbhūta ucyate // ### [1.70.103](https://indike.org/pramana/in.purana.linga.1.70.103) kṣetrajñaḥ kṣetravijñānād ekatvātkevalaḥ smṛtaḥ yasmātpuryāṃ sa śete ca tasmātpūruṣa ucyate // ### [1.70.104](https://indike.org/pramana/in.purana.linga.1.70.104) anāditvācca pūrvatvāt svayaṃbhūriti saṃsmṛtaḥ yājyatvāducyate yajñaḥ kavir vikrāntadarśanāt // ### [1.70.105](https://indike.org/pramana/in.purana.linga.1.70.105) kramaṇaḥ kramaṇīyatvāt pālakaścāpi pālanāt ādityasaṃjñaḥ kapilo hy agrajo 'gniriti smṛtaḥ // ### [1.70.106](https://indike.org/pramana/in.purana.linga.1.70.106) hiraṇyamasya garbho 'bhūd dhiraṇyasyāpi garbhajaḥ tasmāddhiraṇyagarbhatvaṃ purāṇe 'sminnirucyate // ### [1.70.107](https://indike.org/pramana/in.purana.linga.1.70.107) svayaṃbhuvo 'pi vṛttasya kālo viśvātmanastu yaḥ na śakyaḥ parisaṃkhyātum api varṣaśatairapi // ### [1.70.108](https://indike.org/pramana/in.purana.linga.1.70.108) kālasaṃkhyāvivṛttasya parārdho brahmaṇaḥ smṛtaḥ tāvaccheṣo 'sya kālo 'nyas tasyānte pratisṛjyate // ### [1.70.109](https://indike.org/pramana/in.purana.linga.1.70.109) koṭikoṭisahasrāṇi aharbhūtāni yāni vai samatītāni kalpānāṃ tāvaccheṣāḥ pare tu ye yastvayaṃ vartate kalpo vārāhastaṃ nibodhata // ### [1.70.110](https://indike.org/pramana/in.purana.linga.1.70.110) prathamaḥ sāṃpratasteṣāṃ kalpo 'yaṃ vartate dvijāḥ yasminsvāyaṃbhuvādyāstu manavaste caturdaśa // ### [1.70.111](https://indike.org/pramana/in.purana.linga.1.70.111) atītā vartamānāś ca bhaviṣyā ye ca vai punaḥ tairiyaṃ pṛthivī sarvā saptadvīpā saparvatā // ### [1.70.112](https://indike.org/pramana/in.purana.linga.1.70.112) pūrṇaṃ yugasahasraṃ vai paripālyā maheśvaraiḥ prajābhistapasā caiva teṣāṃ śṛṇuta vistaram // ### [1.70.113](https://indike.org/pramana/in.purana.linga.1.70.113) manvantareṇa caikena sarvāṇyevāntarāṇi ca kathitāni bhaviṣyanti kalpaḥ kalpena caiva hi // ### [1.70.114](https://indike.org/pramana/in.purana.linga.1.70.114) atītāni ca kalpāni sodarkāṇi sahānvayaiḥ anāgateṣu tadvacca tarkaḥ kāryo vijānatā // ### [1.70.115](https://indike.org/pramana/in.purana.linga.1.70.115) āpo hyagre samabhavan naṣṭe ca pṛthivītale śāntatāraikanīre 'smin na prājñāyata kiṃcana // ### [1.70.116](https://indike.org/pramana/in.purana.linga.1.70.116) ekārṇave tadā tasmin naṣṭe sthāvarajaṅgame tadā bhavati vai brahmā sahasrākṣaḥ sahasrapāt // ### [1.70.117](https://indike.org/pramana/in.purana.linga.1.70.117) sahasraśīrṣā puruṣo rukmavarṇas tvatīndriyaḥ brahmā nārāyaṇākhyastu suṣvāpa salile tadā // ### [1.70.118](https://indike.org/pramana/in.purana.linga.1.70.118) sattvodrekātprabuddhastu śūnyaṃ lokamudaikṣata imaṃ codāharantyatra ślokaṃ nārāyaṇaṃ prati // ### [1.70.119](https://indike.org/pramana/in.purana.linga.1.70.119) āpo nārāś ca sūnava ityapāṃ nāma śuśrumaḥ āpūrya tābhir ayanaṃ kṛtavānātmano yataḥ // ### [1.70.120](https://indike.org/pramana/in.purana.linga.1.70.120) apsu śete yatastasmāt tato nārāyaṇaḥ smṛtaḥ caturyugasahasrasya naiśaṃ kālam upāsyataḥ // ### [1.70.121](https://indike.org/pramana/in.purana.linga.1.70.121) śarvaryante prakurute brahmatvaṃ sargakāraṇāt brahmā tu salile tasmin vāyurbhūtvā samācarat // ### [1.70.122](https://indike.org/pramana/in.purana.linga.1.70.122) niśāyāmiva khadyotaḥ prāvṛṭkāle tatastu saḥ tatas tu salile tasmin vijñāyāntargatāṃ mahīm // ### [1.70.123](https://indike.org/pramana/in.purana.linga.1.70.123) anumānād asaṃmūḍho bhūmeruddharaṇaṃ punaḥ akarotsa tanūmanyāṃ kalpādiṣu yathāpurā // ### [1.70.124](https://indike.org/pramana/in.purana.linga.1.70.124) tato mahātmā bhagavān divyarūpam acintayat salilenāplutāṃ bhūmiṃ dṛṣṭvā sa tu samantataḥ // ### [1.70.125](https://indike.org/pramana/in.purana.linga.1.70.125) kiṃnu rūpamahaṃ kṛtvā uddhareyaṃ mahīmimām jalakrīḍānusadṛśaṃ vārāhaṃ rūpamāviśat // ### [1.70.126](https://indike.org/pramana/in.purana.linga.1.70.126) adhṛṣyaṃ sarvabhūtānāṃ vāṅmayaṃ brahmasaṃjñitam pṛthivyuddharaṇārthāya praviveśa rasātalam // ### [1.70.127](https://indike.org/pramana/in.purana.linga.1.70.127) adbhiḥ saṃchāditāṃ bhūmiṃ sa tāmāśu prajāpatiḥ upagamyojjahārainām āpaścāpi samāviśat // ### [1.70.128](https://indike.org/pramana/in.purana.linga.1.70.128) sāmudrā vai samudreṣu nādeyāś ca nadīṣu ca rasātalatale magnāṃ rasātalapuṭe gatām // ### [1.70.129](https://indike.org/pramana/in.purana.linga.1.70.129) prabhurlokahitārthāya daṃṣṭrayābhyujjahāra gām tataḥ svasthānamānīya pṛthivīṃ pṛthivīdharaḥ // ### [1.70.130](https://indike.org/pramana/in.purana.linga.1.70.130) mumoca pūrvavad asau dhārayitvā dharādharaḥ tasyopari jalaughasya mahatī nauriva sthitā // ### [1.70.131](https://indike.org/pramana/in.purana.linga.1.70.131) tatsamā hyurudehatvān na mahī yāti saṃplavam tata utkṣipya tāṃ devo jagataḥ sthāpanecchayā // ### [1.70.132](https://indike.org/pramana/in.purana.linga.1.70.132) pṛthivyāḥ pravibhāgāya manaścakre 'mbujekṣaṇaḥ pṛthivīṃ ca samāṃ kṛtvā pṛthivyāṃ so 'cinod girīn // ### [1.70.133](https://indike.org/pramana/in.purana.linga.1.70.133) prāksarge dahyamāne tu tadā saṃvartakāgninā tenāgninā viśīrṇāste parvatā bhūrivistarāḥ // ### [1.70.134](https://indike.org/pramana/in.purana.linga.1.70.134) śaityādekārṇave tasmin vāyunā tena saṃhatāḥ niṣiktā yatra yatrāsaṃs tatra tatrācalābhavan // ### [1.70.135](https://indike.org/pramana/in.purana.linga.1.70.135) tadācalatvād acalāḥ parvabhiḥ parvatāḥ smṛtāḥ girayo hi nigīrṇatvāc chayānatvācchiloccayāḥ // ### [1.70.136](https://indike.org/pramana/in.purana.linga.1.70.136) tatasteṣu vikīrṇeṣu koṭiśo hi giriṣvatha viśvakarmā vibhajate kalpādiṣu punaḥ punaḥ // ### [1.70.137](https://indike.org/pramana/in.purana.linga.1.70.137) sasamudrāmimāṃ pṛthvīṃ saptadvīpāṃ saparvatām bhūrādyāṃś caturo lokān punaḥ so 'tha vyakalpayat // ### [1.70.138](https://indike.org/pramana/in.purana.linga.1.70.138) lokān prakalpayitvātha prajāsargaṃ sasarja ha brahmā svayaṃbhūrbhagavān sisṛkṣurvividhāḥ prajāḥ // ### [1.70.139](https://indike.org/pramana/in.purana.linga.1.70.139) sasarja sṛṣṭiṃ tadrūpāṃ kalpādiṣu yathāpurā tasyābhidhyāyataḥ sargaṃ tathā vai buddhipūrvakam // ### [1.70.140](https://indike.org/pramana/in.purana.linga.1.70.140) buddhyāś ca samakāle vai prādurbhūtas tamomayaḥ tamomoho mahāmohas tāmisraścāndhasaṃjñitaḥ // ### [1.70.141](https://indike.org/pramana/in.purana.linga.1.70.141) avidyā pañcaparvaiṣā prādurbhūtā mahātmanaḥ pañcadhāvasthitaḥ sargo dhyāyataḥ so 'bhimāninaḥ // ### [1.70.142](https://indike.org/pramana/in.purana.linga.1.70.142) saṃvṛtastamasā caiva bījāṅkuravadāvṛtaḥ bahirantaścāprakāśas tabdho niḥsaṃjña eva ca // ### [1.70.143](https://indike.org/pramana/in.purana.linga.1.70.143) yasmātteṣāṃ vṛtā buddhir duḥkhāni karaṇāni ca tasmātte saṃvṛtātmāno nagā mukhyāḥ prakīrtitāḥ // ### [1.70.144](https://indike.org/pramana/in.purana.linga.1.70.144) mukhyasargaṃ tathābhūtaṃ dṛṣṭvā brahmā hyasādhakam aprasannamanāḥ so 'tha tato 'nyaṃ so hyamanyata // ### [1.70.145](https://indike.org/pramana/in.purana.linga.1.70.145) tasyābhidhyāyataścaiva tiryaksrotā hyavartata tasmāt tiryakpravṛttaḥ sa tiryaksrotās tataḥ smṛtaḥ // ### [1.70.146](https://indike.org/pramana/in.purana.linga.1.70.146) paśvādayaste vikhyātā utpathagrāhiṇo dvijāḥ tasyābhidhyāyato 'nyaṃ vai sāttvikaḥ samavartata // ### [1.70.147](https://indike.org/pramana/in.purana.linga.1.70.147) ūrdhvasrotāstṛtīyastu sa vai cordhvaṃ vyavasthitaḥ yasmātpravartate cordhvam ūrdhvasrotāstataḥ smṛtaḥ // ### [1.70.148](https://indike.org/pramana/in.purana.linga.1.70.148) te sukhaprītibahulā bahirantaś ca saṃvṛtāḥ prakāśā bahirantaś ca ūrdhvasrotobhavāḥ smṛtāḥ // ### [1.70.149](https://indike.org/pramana/in.purana.linga.1.70.149) te sattvasya ca yogena sṛṣṭāḥ sattvodbhavāḥ smṛtāḥ ūrdhvasrotāstṛtīyo vai devasargastu sa smṛtaḥ // ### [1.70.150](https://indike.org/pramana/in.purana.linga.1.70.150) prakāśād bahirantaś ca ūrdhvasrotodbhavāḥ smṛtāḥ te ūrdhvasrotaso jñeyās tuṣṭātmāno budhaiḥ smṛtāḥ // ### [1.70.151](https://indike.org/pramana/in.purana.linga.1.70.151) ūrdhvasrotaḥsu sṛṣṭeṣu deveṣu varadaḥ prabhuḥ prītimānabhavadbrahmā tato 'nyaṃ so 'bhyamanyata // ### [1.70.152](https://indike.org/pramana/in.purana.linga.1.70.152) sasarja sargamanyaṃ hi sādhakaṃ prabhurīśvaraḥ tato 'bhidhyāyatastasya satyābhidhyāyinastadā // ### [1.70.153](https://indike.org/pramana/in.purana.linga.1.70.153) prādurāsīttadā vyaktād arvāksrotāstu sādhakaḥ yasmād arvāṅnyavartanta tato 'rvāksrotasas tu te // ### [1.70.154](https://indike.org/pramana/in.purana.linga.1.70.154) te ca prakāśabahulās tamaḥpṛktā rajo 'dhikāḥ tasmātte duḥkhabahulā bhūyobhūyaś ca kāriṇaḥ // ### [1.70.155](https://indike.org/pramana/in.purana.linga.1.70.155) saṃvṛtā bahirantaś ca manuṣyāḥ sādhakāś ca te // ### [1.70.156](https://indike.org/pramana/in.purana.linga.1.70.156) lakṣaṇaistārakādyaiste hy aṣṭadhā tu vyavasthitāḥ // ### [1.70.157](https://indike.org/pramana/in.purana.linga.1.70.157) siddhātmāno manuṣyāste gandharvasahadharmiṇaḥ ityeṣa taijasaḥ sargo hy arvāksrotaḥprakīrtitaḥ // ### [1.70.158](https://indike.org/pramana/in.purana.linga.1.70.158) pañcamo 'nugrahaḥ sargaś caturdhā tu vyavasthitaḥ viparyayeṇa śaktyā ca siddhyā tuṣṭyā tathaiva ca // ### [1.70.159](https://indike.org/pramana/in.purana.linga.1.70.159) sthāvareṣu viparyāsas tiryagyoniṣu śaktitaḥ siddhātmāno manuṣyāstu ṛṣideveṣu kṛtsnaśaḥ // ### [1.70.160](https://indike.org/pramana/in.purana.linga.1.70.160) ityeṣa prākṛtaḥ sargo vaikṛto navamaḥ smṛtaḥ bhūtādikānāṃ bhūtānāṃ ṣaṣṭhaḥ sargaḥ sa ucyate // ### [1.70.161](https://indike.org/pramana/in.purana.linga.1.70.161) nivṛttaṃ vartamānaṃ ca teṣāṃ jānanti vai punaḥ bhūtādikānāṃ bhūtānāṃ saptamaḥ sarga eva ca // ### [1.70.162](https://indike.org/pramana/in.purana.linga.1.70.162) te parigrāhiṇaḥ sarve saṃvibhāgaratāḥ punaḥ svādanāś cāpyaśīlāś ca jñeyā bhūtādikāś ca te // ### [1.70.163](https://indike.org/pramana/in.purana.linga.1.70.163) viparyayeṇa bhūtādir aśaktyā ca vyavasthitaḥ prathamo mahataḥ sargo vijñeyo brahmaṇaḥ smṛtaḥ // ### [1.70.164](https://indike.org/pramana/in.purana.linga.1.70.164) tanmātrāṇāṃ dvitīyastu bhūtasargaḥ sa ucyate vaikārikastṛtīyastu sarga aindriyakaḥ smṛtaḥ // ### [1.70.165](https://indike.org/pramana/in.purana.linga.1.70.165) ityeṣa prākṛtaḥ sargaḥ sambhūto buddhipūrvakaḥ mukhyasargaścaturthaś ca mukhyā vai sthāvarāḥ smṛtāḥ // ### [1.70.166](https://indike.org/pramana/in.purana.linga.1.70.166) tato 'rvāksrotasāṃ sargaḥ saptamaḥ sa tu mānuṣaḥ aṣṭamo 'nugrahaḥ sargaḥ sāttvikastāmasaś ca saḥ // ### [1.70.167](https://indike.org/pramana/in.purana.linga.1.70.167) pañcaite vaikṛtāḥ sargāḥ prākṛtāstu trayaḥ smṛtāḥ prākṛto vaikṛtaścaiva kaumāro navamaḥ smṛtaḥ // ### [1.70.168](https://indike.org/pramana/in.purana.linga.1.70.168) abuddhipūrvakāḥ sargāḥ prākṛtāstu trayaḥ smṛtāḥ buddhipūrvaṃ pravartante ṣaṭ punarbrahmaṇastu te // ### [1.70.169](https://indike.org/pramana/in.purana.linga.1.70.169) vistarānugrahaḥ sargaḥ kīrtyamāno nibodhata caturdhāvasthitaḥ so 'tha sarvabhūteṣu kṛtsnaśaḥ // ### [1.70.170](https://indike.org/pramana/in.purana.linga.1.70.170) ityete prākṛtāścaiva vaikṛtāś ca nava smṛtāḥ parasparānuraktāś ca kāraṇaiś ca budhaiḥ smṛtāḥ // ### [1.70.171](https://indike.org/pramana/in.purana.linga.1.70.171) agre sasarja vai brahmā mānasānātmanaḥ samān ṛbhuḥ sanatkumāraś ca dvāvetāvūrdhvaretasau // ### [1.70.172](https://indike.org/pramana/in.purana.linga.1.70.172) pūrvotpannau purā tebhyaḥ sarveṣāmapi pūrvajau vyatīte tvaṣṭame kalpe purāṇau lokasākṣiṇau // ### [1.70.173](https://indike.org/pramana/in.purana.linga.1.70.173) tau vārāhe tu bhūrloke tejaḥ saṃkṣipya dhiṣṭhitau tāvubhau mokṣakarmāṇāv āropyātmānamātmani // ### [1.70.174](https://indike.org/pramana/in.purana.linga.1.70.174) prajāṃ dharmaṃ ca kāmaṃ ca tyaktvā vairāgyamāsthitau yathotpannastathaiveha kumāraḥ sa ihocyate // ### [1.70.175](https://indike.org/pramana/in.purana.linga.1.70.175) tasmāt sanatkumāreti nāmāsyeha prakīrtitam sanandaṃ sanakaṃ caiva vidvāṃsaṃ ca sanātanam // ### [1.70.176](https://indike.org/pramana/in.purana.linga.1.70.176) vijñānena nivṛttāste vyavartanta mahaujasaḥ saṃbuddhāścaiva nānātve apravṛttāś ca yoginaḥ // ### [1.70.177](https://indike.org/pramana/in.purana.linga.1.70.177) asṛṣṭvaiva prajāsargaṃ pratisargaṃ gatāḥ punaḥ tatasteṣu vyatīteṣu tato 'nyān sādhakān sutān // ### [1.70.178](https://indike.org/pramana/in.purana.linga.1.70.178) mānasānasṛjadbrahmā punaḥ sthānābhimāninaḥ ā bhūtasamplavāvasthā yairiyaṃ vidhṛtā mahī // ### [1.70.179](https://indike.org/pramana/in.purana.linga.1.70.179) āpo 'gniṃ pṛthivīṃ vāyum antarikṣaṃ divaṃ tathā samudrāṃś ca nadīścaiva tathā śailavanaspatīn // ### [1.70.180](https://indike.org/pramana/in.purana.linga.1.70.180) oṣadhīnāṃ tathātmāno vallīnāṃ vṛkṣavīrudhām latāḥ kāṣṭhāḥ kalāścaiva muhūrtāḥ saṃdhirātryahān // ### [1.70.181](https://indike.org/pramana/in.purana.linga.1.70.181) ardhamāsāṃś ca māsāṃś ca ayanābdayugāni ca sthānābhimāninaḥ sarve sthānākhyāścaiva te smṛtāḥ // ### [1.70.182](https://indike.org/pramana/in.purana.linga.1.70.182) devānṛṣīṃś ca mahato gadatastān nibodhata marīcibhṛgvaṅgirasaṃ pulastyaṃ pulahaṃ kratum // ### [1.70.183](https://indike.org/pramana/in.purana.linga.1.70.183) dakṣamatriṃ vasiṣṭhaṃ ca so 'sṛjanmānasān nava nava brahmāṇa ityete purāṇe niścayaṃ gatāḥ // ### [1.70.184](https://indike.org/pramana/in.purana.linga.1.70.184) teṣāṃ brahmātmakānāṃ vai sarveṣāṃ brahmavādinām sthānāni kalpayāmāsa pūrvavatpadmasaṃbhavaḥ // ### [1.70.185](https://indike.org/pramana/in.purana.linga.1.70.185) tato 'sṛjacca saṃkalpaṃ dharmaṃ caiva sukhāvaham so 'sṛjad vyavasāyāttu dharmaṃ devo maheśvaraḥ // ### [1.70.186](https://indike.org/pramana/in.purana.linga.1.70.186) saṃkalpaṃ caiva saṃkalpāt sarvalokapitāmahaḥ mānasaś ca rucirnāma vijajñe brahmaṇaḥ prabhoḥ // ### [1.70.187](https://indike.org/pramana/in.purana.linga.1.70.187) prāṇādbrahmāsṛjaddakṣaṃ cakṣurbhyāṃ ca marīcinam bhṛgustu hṛdayājjajñe ṛṣiḥ salilajanmanaḥ // ### [1.70.188](https://indike.org/pramana/in.purana.linga.1.70.188) śiraso 'ṅgirasaścaiva śrotrādatriṃ tathāsṛjat pulastyaṃ ca tathodānād vyānācca pulahaṃ punaḥ // ### [1.70.189](https://indike.org/pramana/in.purana.linga.1.70.189) samānajo vasiṣṭhaś ca apānānnirmame kratum ityete brahmaṇaḥ putrā divyā ekādaśā smṛtāḥ // ### [1.70.190](https://indike.org/pramana/in.purana.linga.1.70.190) dharmādayaḥ prathamajāḥ sarve te brahmaṇaḥ sutāḥ bhṛgvādayastu te sṛṣṭā navaite brahmavādinaḥ // ### [1.70.191](https://indike.org/pramana/in.purana.linga.1.70.191) gṛhamedhinaḥ purāṇās te dharmas taiḥ sampravartitaḥ teṣāṃ dvādaśa te vaṃśā divyā devaguṇānvitāḥ // ### [1.70.192](https://indike.org/pramana/in.purana.linga.1.70.192) kriyāvantaḥ prajāvanto maharṣibhir alaṃkṛtāḥ ṛbhuḥ sanatkumāraś ca dvāvetāvūrdhvaretasau // ### [1.70.193](https://indike.org/pramana/in.purana.linga.1.70.193) pūrvotpannau paraṃ tebhyaḥ sarveṣāmapi pūrvajau vyatīte tvaṣṭame kalpe purāṇau lokasākṣiṇau // ### [1.70.194](https://indike.org/pramana/in.purana.linga.1.70.194) virājetāmubhau loke tejaḥ saṃkṣipya dhiṣṭhitau tāvubhau yogakarmāṇāv āropyātmānam ātmani // ### [1.70.195](https://indike.org/pramana/in.purana.linga.1.70.195) prajāṃ dharmaṃ ca kāmaṃ ca tyaktvā vairāgyamāsthitau yathotpannaḥ sa eveha kumāraḥ sa ihocyate // ### [1.70.196](https://indike.org/pramana/in.purana.linga.1.70.196) tasmātsanatkumāreti nāmāsyeha pratiṣṭhitam tato 'bhidhyāyatastasya jajñire mānasāḥ prajāḥ // ### [1.70.197](https://indike.org/pramana/in.purana.linga.1.70.197) taccharīrasamutpannaiḥ kāryaistaiḥ kāraṇaiḥ saha kṣetrajñāḥ samavartanta gātrebhyastasya dhīmataḥ // ### [1.70.198](https://indike.org/pramana/in.purana.linga.1.70.198) tato devāsurapitṝn mānuṣāṃś ca catuṣṭayam sisṛkṣur ambhāṃsyetāni svam ātmānam ayūyujat // ### [1.70.199](https://indike.org/pramana/in.purana.linga.1.70.199) tatastu yuñjatastasya tamomātrasamudbhavam samabhidhyāyataḥ sargaṃ prayatnena prajāpateḥ // ### [1.70.200](https://indike.org/pramana/in.purana.linga.1.70.200) tato 'sya jaghanātpūrvam asurā jajñire sutāḥ asuḥ prāṇaḥ smṛto viprās tajjanmānas tato 'surāḥ // _First 200 of 350 passages. [Read on](https://indike.org/pramana/in.purana.linga.1.70)_ ## Commentaries (1) - [Śivatosaṇī Liṅgapurāṇaṭīkā](https://indike.org/pramana/in.purana.linga!ganesa.76.1) — Gaṇeśa Bhaṭṭa, Sanskrit ## Linked texts (18) - [Mārkaṇḍeyapurāṇa](https://indike.org/pramana/in.purana.markandeya.45.42) — Vyāsa, Sanskrit - [Viṣṇupurāṇa (vulgate)](https://indike.org/pramana/in.purana.visnu*vulgate.1.2.40) — Sanskrit - [Saurapurāṇa](https://indike.org/pramana/in.purana.upa.saiva.saura.8.17) — Sanskrit - [Narasiṃhapurāṇa](https://indike.org/pramana/in.purana.upa.vaisnava.narasimha.1.47) — Sanskrit - [Padmapurāṇa](https://indike.org/pramana/in.purana.padma.1.16.62) — Vyāsa, Sanskrit - [Agnipurāṇa](https://indike.org/pramana/in.purana.agni.382.71.p120) — Vyāsa, Sanskrit - [Agnipurāṇa (Nag Publishers edition, Delhi)](https://indike.org/pramana/in.purana.agni*nag.20.19) — Sanskrit - [Garuḍapurāṇa](https://indike.org/pramana/in.purana.garuda.1.4.20) — Vyāsa, Sanskrit - [Tārāsahasranāmavyākhyā Abhidhārthacintāmaṇi](https://indike.org/pramana/in.sampradaya.general.sakta.tarasahasranamavyakhyabhidharthacintamani.52) — Sanskrit - [Vulgate (Nīlakaṇṭha's text)](https://indike.org/pramana/in.lit.mahabharata.vyasa*vulgate.3.272.50) — Sanskrit - [Īśānaśivagurudevapaddhati](https://indike.org/pramana/in.sampradaya.saiva.siddhanta.paddhati.isanasivagurudevapaddhati.3.1.93) — Īśānaśivagurudeva, Sanskrit - [Brahmapurāṇa](https://indike.org/pramana/in.purana.brahma.34.81) — Vyāsa, Sanskrit - [Kālikāpurāṇa](https://indike.org/pramana/in.purana.upa.sakta.kalika.3.336) — Sanskrit - [Vīraśaivācārapradīpikā](https://indike.org/pramana/in.sampradaya.saiva.virasaiva.virasaivacarapradipika.159) — Gurudeva 1575, Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.79.1) — Ativīrarāma Pāṇṭiyar 1500, Sanskrit - [Kūrmapurāṇa](https://indike.org/pramana/in.vernacular.tamil.kappiyam.kurmapurana.4.p3) — Ativīrarāma Pāṇṭiyar, Sanskrit - [Ṭoḍarānanda](https://indike.org/pramana/in.niti.dharma.nibandha.mahanibandha.todarananda.1.95) — Ṭoḍaramalla 1564, Sanskrit - [Kṛtyakalpataru](https://indike.org/pramana/in.niti.dharma.nibandha.mahanibandha.krtyakalpataru.27.p153) — Lakṣmīdhara Bhaṭṭa, Sanskrit --- Source: [https://indike.org/pramana/in.purana.linga.1.70](https://indike.org/pramana/in.purana.linga.1.70) · Pramāṇa