Lingapurana 1.74
Liṅgapurāṇa 1.74
- Language
- Sanskrit
Contents
- 1.74.30 — 1 part
1.74.1
sūta uvāca
liṅgāni kalpayitvaivaṃ svādhikārānurūpataḥ
viśvakarmā dadau teṣāṃ niyogādbrahmaṇaḥ prabhoḥ //
1.74.2
indranīlamayaṃ liṅgaṃ viṣṇunā pūjitaṃ sadā
padmarāgamayaṃ śakro haimaṃ viśravasaḥ sutaḥ //
1.74.3
viśvedevās tathā raupyaṃ vasavaḥ kāntikaṃ śubham
ārakūṭamayaṃ vāyur aśvinau pārthivaṃ sadā //
1.74.4
sphāṭikaṃ varuṇo rājā ādityāstāmranirmitam
mauktikaṃ somarāḍ dhīmāṃs tathā liṅgamanuttamam //
1.74.5
anantādyā mahānāgāḥ pravālakamayaṃ śubham
daityā hyayomayaṃ liṅgaṃ rākṣasāś ca mahātmanaḥ //
1.74.6
trailohikaṃ guhyakāś ca sarvalohamayaṃ gaṇāḥ
cāmuṇḍā saikataṃ sākṣān mātaraś ca dvijottamāḥ //
1.74.7
dārujaṃ nairṛtir bhaktyā yamo mārakataṃ śubham
nīlādyāś ca tathā rudrāḥ śuddhaṃ bhasmamayaṃ śubham //
1.74.8
lakṣmīvṛkṣamayaṃ lakṣmīr guho vai gomayātmakam
munayo muniśārdūlāḥ kuśāgramayam uttamam //
1.74.9
vāmādyāḥ puṣpaliṅgaṃ tu gandhaliṅgaṃ manonmanī
sarasvatī ca ratnena kṛtaṃ rudrasya vāgbhavā //
1.74.10
durgā haimaṃ mahādevaṃ savedikamanuttamam
ugrā piṣṭamayaṃ sarve mantrā hyājyamayaṃ śubham //
1.74.11
vedāḥ sarve dadhimayaṃ piśācāḥ sīsanirmitam
lebhire ca yathāyogyaṃ prasādādbrahmaṇaḥ padam //
1.74.12
bahunātra kimuktena carācaramidaṃ jagat
śivaliṅgaṃ samabhyarcya sthitamatra na saṃśayaḥ //
1.74.13
ṣaḍvidhaṃ liṅgamityāhur dravyāṇāṃ ca prabhedataḥ
teṣāṃ bhedāścaturyuktacatvāriṃśaditi smṛtāḥ //
1.74.14
śailajaṃ prathamaṃ proktaṃ taddhi sākṣāccaturvidham
dvitīyaṃ ratnajaṃ tacca saptadhā munisattamāḥ //
1.74.15
tṛtīyaṃ dhātujaṃ liṅgam aṣṭadhā parameṣṭhinaḥ
turīyaṃ dārujaṃ liṅgaṃ tattu ṣoḍaśadhocyate //
1.74.16
mṛnmayaṃ pañcamaṃ liṅgaṃ dvidhā bhinnaṃ dvijottamāḥ
ṣaṣṭhaṃ tu kṣaṇikaṃ liṅgaṃ saptadhā parikīrtitam //
1.74.17
śrīpradaṃ ratnajaṃ liṅgaṃ śailajaṃ sarvasiddhidam
dhātujaṃ dhanadaṃ sākṣād dārujaṃ bhogasiddhidam //
1.74.18
mṛnmayaṃ caiva viprendrāḥ sarvasiddhikaraṃ śubham
śailajaṃ cottamaṃ proktaṃ madhyamaṃ caiva dhātujam //
1.74.19
bahudhā liṅgabhedāś ca nava caiva samāsataḥ
mūle brahmā tathā madhye viṣṇustribhuvaneśvaraḥ //
1.74.20
rudropari mahādevaḥ praṇavākhyaḥ sadāśivaḥ
liṅgavedī mahādevī triguṇā trimayāṃbikā //
1.74.21
tayā ca pūjayedyastu devī devaś ca pūjitau
śailajaṃ ratnajaṃ vāpi dhātujaṃ vāpi dārujam //
1.74.22
mṛnmayaṃ kṣaṇikaṃ vāpi bhaktyā sthāpya phalaṃ śubham
surendrāmbhojagarbhāgniyamāmbupadhaneśvaraiḥ //
1.74.23
siddhavidyādharāhīndrair yakṣadānavakinnaraiḥ
stūyamānaḥ supuṇyātmā devadundubhiniḥsvanaiḥ //
1.74.24
bhūrbhūvaḥsvarmaharlokān kramād vai janataḥ param
tapaḥ satyaṃ parākramya bhāsayan svena tejasā //
1.74.25
liṅgasthāpanasanmārganihitasvāyatāsinā
āśu brahmāṇḍamudbhidya nirgacchannirviśaṅkayā //
1.74.26
śailajaṃ ratnajaṃ vāpi dhātujaṃ vāpi dārujam
mṛnmayaṃ kṣaṇikaṃ tyaktvā sthāpayetsakalaṃ vapuḥ //
1.74.27
vidhinā caiva kṛtvā tu skandomāsahitaṃ śubham
kundagokṣīrasaṃkāśaṃ liṅgaṃ yaḥ sthāpayennaraḥ //
1.74.28
nṛṇāṃ tanuṃ samāsthāya sthito rudro na saṃśayaḥ
darśanātsparśanāttasya labhante nirvṛtiṃ narāḥ //
1.74.29
tasya puṇyaṃ mayā vaktuṃ samyagyugaśatairapi
śakyate naiva viprendrās tasmād vai sthāpayet tathā //
1.74.30
sarveṣāmeva martyānāṃ vibhordivyaṃ vapuḥ śubham
sakalaṃ bhāvanāyogyaṃ yogināmeva niṣkalam //
1.74.30.p1
iti śrīliṅgamahāpurāṇe pūrvabhāge śivaliṅgabhedasaṃsthāpanādivarṇanaṃ nāma catuḥsaptatitamo 'dhyāyaḥ
Linked texts (2)
- Prāṇatoṣiṇī — Rāmatoṣaṇa Śarman 1796, Sanskrit
- Liṅgapurāṇa — Ativīrarāma Pāṇṭiyar 1500, Sanskrit