[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 1.77 # Lingapurana 1.77 Liṅgapurāṇa 1.77 - **Language:** Sanskrit ## Contents - [1.77.106](https://indike.org/pramana/in.purana.linga.1.77.106) — 1 part ### [1.77.1](https://indike.org/pramana/in.purana.linga.1.77.1) ṛṣaya ūcuḥ liṅgapratiṣṭhāpuṇyaṃ ca liṅgasthāpanameva ca liṅgānāṃ caiva bhedāś ca śrutaṃ tava mukhādiha // ### [1.77.2](https://indike.org/pramana/in.purana.linga.1.77.2) mṛdādiratnaparyantair dravyaiḥ kṛtvā śivālayam yatphalaṃ labhate martyas tatphalaṃ vaktumarhasi // ### [1.77.3](https://indike.org/pramana/in.purana.linga.1.77.3) sūta uvāca yasya bhakto 'pi loke 'smin putradāragṛhādibhiḥ bādhyate jñānayuktaścen na ca tasya gṛhaistu kim // ### [1.77.4](https://indike.org/pramana/in.purana.linga.1.77.4) tathāpi bhaktāḥ parameśvarasya kṛtveṣṭaloṣṭairapi rudralokam prayānti divyaṃ hi vimānavaryaṃ surendrapadmodbhavavanditasya // ### [1.77.5](https://indike.org/pramana/in.purana.linga.1.77.5) gṛhaṃ ca tādṛgvidhamasya śaṃbhoḥ sampūjya rudratvamavāpnuvanti // ### [1.77.6](https://indike.org/pramana/in.purana.linga.1.77.6) tasmātsarvaprayatnena bhaktyā bhaktaiḥ śivālayam kartavyaṃ sarvayatnena dharmakāmārthasiddhaye // ### [1.77.7](https://indike.org/pramana/in.purana.linga.1.77.7) kesaraṃ nāgaraṃ vāpi drāviḍaṃ vā tathāparam kṛtvā rudrālayaṃ bhaktyā śivaloke mahīyate // ### [1.77.8](https://indike.org/pramana/in.purana.linga.1.77.8) kailāsākhyaṃ ca yaḥ kuryāt prāsādaṃ parameṣṭhinaḥ kailāsaśikharākārair vimānair modate sukhī // ### [1.77.9](https://indike.org/pramana/in.purana.linga.1.77.9) mandaraṃ vā prakurvīta śivāya vidhipūrvakam bhaktyā vittānusāreṇa uttamādhamamadhyamam // ### [1.77.10](https://indike.org/pramana/in.purana.linga.1.77.10) mandarādripratīkāśair vimānairviśvatomukhaiḥ apsarogaṇasaṃkīrṇair devadānavadurlabhaiḥ // ### [1.77.11](https://indike.org/pramana/in.purana.linga.1.77.11) gatvā śivapuraṃ ramyaṃ bhuktvā bhogān yathepsitān jñānayogaṃ samāsādya gāṇapatyaṃ labhennaraḥ // ### [1.77.12](https://indike.org/pramana/in.purana.linga.1.77.12) yaḥ kuryānmerunāmānaṃ prāsādaṃ parameṣṭhinaḥ sa yatphalamavāpnoti na tat sarvair mahāmakhaiḥ // ### [1.77.13](https://indike.org/pramana/in.purana.linga.1.77.13) sarvayajñatapodānatīrthavedeṣu yatphalam tatphalaṃ sakalaṃ labdhvā śivavanmodate ciram // ### [1.77.14](https://indike.org/pramana/in.purana.linga.1.77.14) niṣadhaṃ nāma yaḥ kuryāt prāsādaṃ bhaktitaḥ sudhīḥ śivalokamanuprāpya śivavanmodate ciram // ### [1.77.15](https://indike.org/pramana/in.purana.linga.1.77.15) kuryādvā yaḥ śubhaṃ viprā himaśailamanuttamam himaśailopamair yānair gatvā śivapuraṃ śubham // ### [1.77.16](https://indike.org/pramana/in.purana.linga.1.77.16) jñānayogaṃ samāsādya gāṇapatyamavāpnuyāt nīlādriśikharākhyaṃ vā prāsādaṃ yaḥ suśobhanam // ### [1.77.17](https://indike.org/pramana/in.purana.linga.1.77.17) kṛtvā vittānusāreṇa bhaktyā rudrāya śaṃbhave yatphalaṃ labhate martyas tatphalaṃ pravadāmyaham // ### [1.77.18](https://indike.org/pramana/in.purana.linga.1.77.18) himaśaile kṛte bhaktyā yatphalaṃ prāk tavoditam tatphalaṃ sakalaṃ labdhvā sarvadevanamaskṛtaḥ // ### [1.77.19](https://indike.org/pramana/in.purana.linga.1.77.19) rudralokamanuprāpya rudraiḥ sārdhaṃ pramodate mahendraśailanāmānaṃ prāsādaṃ rudrasaṃmatam // ### [1.77.20](https://indike.org/pramana/in.purana.linga.1.77.20) kṛtvā yatphalamāpnoti tatphalaṃ pravadāmyaham mahendraparvatākārair vimānairvṛṣasaṃyutaiḥ // ### [1.77.21](https://indike.org/pramana/in.purana.linga.1.77.21) gatvā śivapuraṃ divyaṃ bhuktvā bhogānyathepsitān jñānaṃ vicāritaṃ rudraiḥ samprāpya munipuṅgavāḥ // ### [1.77.22](https://indike.org/pramana/in.purana.linga.1.77.22) viṣayān viṣavat tyaktvā śivasāyujyamāpnuyāt hemnā yastu prakurvīta prāsādaṃ ratnaśobhitam // ### [1.77.23](https://indike.org/pramana/in.purana.linga.1.77.23) drāviḍaṃ nāgaraṃ vāpi kesaraṃ vā vidhānataḥ kūṭaṃ vā maṇḍapaṃ vāpi samaṃ vā dīrgham eva ca // ### [1.77.24](https://indike.org/pramana/in.purana.linga.1.77.24) na tasya śakyate vaktuṃ puṇyaṃ śatayugairapi jīrṇaṃ vā patitaṃ vāpi khaṇḍitaṃ sphuṭitaṃ tathā // ### [1.77.25](https://indike.org/pramana/in.purana.linga.1.77.25) pūrvavatkārayedyastu dvārādyaiḥ suśubhaṃ dvijāḥ prāsādaṃ maṇḍapaṃ vāpi prākāraṃ gopuraṃ tu vā // ### [1.77.26](https://indike.org/pramana/in.purana.linga.1.77.26) karturapyadhikaṃ puṇyaṃ labhate nātra saṃśayaḥ vṛttyarthaṃ vā prakurvīta naraḥ karma śivālaye // ### [1.77.27](https://indike.org/pramana/in.purana.linga.1.77.27) yaḥ sa yāti na saṃdehaḥ svargalokaṃ sabāndhavaḥ yaścātmabhogasiddhyartham api rudrālaye sakṛt // ### [1.77.28](https://indike.org/pramana/in.purana.linga.1.77.28) karma kuryādyadi sukhaṃ labdhvā cāpi pramodate tasmād āyatanaṃ bhaktyā yaḥ kuryān munisattamāḥ // ### [1.77.29](https://indike.org/pramana/in.purana.linga.1.77.29) kāṣṭheṣṭakādibhir martyaḥ śivaloke mahīyate prasādārthaṃ maheśasya prāsāde munipuṅgavāḥ // ### [1.77.30](https://indike.org/pramana/in.purana.linga.1.77.30) kartavyaḥ sarvayatnena dharmakāmārthamuktaye aśaktaścenmuniśreṣṭhāḥ prāsādaṃ kartumuttamam // ### [1.77.31](https://indike.org/pramana/in.purana.linga.1.77.31) saṃmārjanādibhir vāpi sarvānkāmānavāpnuyāt saṃmārjanaṃ tu yaḥ kuryān mārjanyā mṛdusūkṣmayā // ### [1.77.32](https://indike.org/pramana/in.purana.linga.1.77.32) cāndrāyaṇasahasrasya phalaṃ māsena labhyate yaḥ kuryādvastrapūtena gandhagomayavāriṇā // ### [1.77.33](https://indike.org/pramana/in.purana.linga.1.77.33) ālepanaṃ yathānyāyaṃ varṣacāndrāyaṇaṃ labhet ardhakrośaṃ śivakṣetraṃ śivaliṅgātsamantataḥ // ### [1.77.34](https://indike.org/pramana/in.purana.linga.1.77.34) yas tyajed dustyajān prāṇāñ śivasāyujyam āpnuyāt svāyaṃbhuvasya mānaṃ hi tathā bāṇasya suvratāḥ // ### [1.77.35](https://indike.org/pramana/in.purana.linga.1.77.35) svāyaṃbhuve tadardhaṃ syāt syād ārṣe ca tadardhakam mānuṣe ca tadardhaṃ syāt kṣetramānaṃ dvijottamāḥ // ### [1.77.36](https://indike.org/pramana/in.purana.linga.1.77.36) evaṃ yatīnāmāvāse kṣetramānaṃ dvijottamāḥ rudrāvatāre cādyaṃ yac chiṣye caiva praśiṣyake // ### [1.77.37](https://indike.org/pramana/in.purana.linga.1.77.37) narāvatāre tacchiṣye tacchiṣye ca praśiṣyake śrīparvate mahāpuṇye tasya prānte ca vā dvijāḥ // ### [1.77.38](https://indike.org/pramana/in.purana.linga.1.77.38) tasminvā yastyajetprāṇāñ chivasāyujyamāpnuyāt vārāṇasyāṃ tathāpyevam avimukte viśeṣataḥ // ### [1.77.39](https://indike.org/pramana/in.purana.linga.1.77.39) kedāre ca mahākṣetre prayāge ca viśeṣataḥ kurukṣetre ca yaḥ prāṇān saṃtyajedyāti nirvṛtim // ### [1.77.40](https://indike.org/pramana/in.purana.linga.1.77.40) prabhāse puṣkare 'vantyāṃ tathā caivāmareśvare vaṇīśailākule caiva mṛto yāti śivātmatām // ### [1.77.41](https://indike.org/pramana/in.purana.linga.1.77.41) vārāṇasyāṃ mṛto jantur na jātu jantutāṃ vrajet triviṣṭape vimukte ca kedāre saṃgameśvare // ### [1.77.42](https://indike.org/pramana/in.purana.linga.1.77.42) śālaṅke vā tyajetprāṇāṃs tathā vai jambukeśvare śukreśvare vā gokarṇe bhāskareśe guheśvare // ### [1.77.43](https://indike.org/pramana/in.purana.linga.1.77.43) hiraṇyagarbhe nandīśe sa yāti paramāṃ gatim niyamaiḥ śoṣya yo dehaṃ tyajetkṣetre śivasya tu // ### [1.77.44](https://indike.org/pramana/in.purana.linga.1.77.44) sa yāti śivatāṃ yogī mānuṣe daivike 'pi vā ārṣe vāpi muniśreṣṭhās tathā svāyaṃbhuve 'pi vā // ### [1.77.45](https://indike.org/pramana/in.purana.linga.1.77.45) svayaṃbhūte tathā deve nātra kāryā vicāraṇā ādhāyāgniṃ śivakṣetre sampūjya parameśvaram // ### [1.77.46](https://indike.org/pramana/in.purana.linga.1.77.46) svadehapiṇḍaṃ juhuyād yaḥ sa yāti parāṃ gatim yāvattāvannirāhāro bhūtvā prāṇān parityajet // ### [1.77.47](https://indike.org/pramana/in.purana.linga.1.77.47) śivakṣetre muniśreṣṭhāḥ śivasāyujyamāpnuyāt chittvā pādadvayaṃ cāpi śivakṣetre vasettu yaḥ // ### [1.77.48](https://indike.org/pramana/in.purana.linga.1.77.48) sa yāti śivatāṃ caiva nātra kāryā vicāraṇā kṣetrasya darśanaṃ puṇyaṃ praveśastacchatādhikaḥ // ### [1.77.49](https://indike.org/pramana/in.purana.linga.1.77.49) tasmācchataguṇaṃ puṇyaṃ sparśanaṃ ca pradakṣiṇam tasmācchataguṇaṃ puṇyaṃ jalasnānamataḥ param // ### [1.77.50](https://indike.org/pramana/in.purana.linga.1.77.50) kṣīrasnānaṃ tato viprāḥ śatādhikamanuttamam dadhnā sahasramākhyātaṃ madhunā tacchatādhikam // ### [1.77.51](https://indike.org/pramana/in.purana.linga.1.77.51) ghṛtasnānena cānantaṃ śārkare tacchatādhikam śivakṣetrasamīpasthāṃ nadīṃ prāpyāvagāhya ca // ### [1.77.52](https://indike.org/pramana/in.purana.linga.1.77.52) tyajeddehaṃ vihāyānnaṃ śivaloke mahīyate śivakṣetrasamīpasthā nadyaḥ sarvāḥ suśobhanāḥ // ### [1.77.53](https://indike.org/pramana/in.purana.linga.1.77.53) vāpīkūpataḍāgāś ca śivatīrthā iti smṛtāḥ snātvā teṣu naro bhaktyā tīrtheṣu dvijasattamāḥ // ### [1.77.54](https://indike.org/pramana/in.purana.linga.1.77.54) brahmahatyādibhiḥ pāpair mucyate nātra saṃśayaḥ prātaḥ snātvā muniśreṣṭhāḥ śivatīrtheṣu mānavaḥ // ### [1.77.55](https://indike.org/pramana/in.purana.linga.1.77.55) aśvamedhaphalaṃ prāpya rudralokaṃ sa gacchati madhyāhne śivatīrtheṣu snātvā bhaktyā sakṛnnaraḥ // ### [1.77.56](https://indike.org/pramana/in.purana.linga.1.77.56) gaṅgāsnānasamaṃ puṇyaṃ labhate nātra saṃśayaḥ astaṃ gate tathā cārke snātvā gacchecchivaṃ padam // ### [1.77.57](https://indike.org/pramana/in.purana.linga.1.77.57) pāpakañcukamutsṛjya śivatīrtheṣu mānavaḥ dvijās triṣavaṇaṃ snātvā śivatīrthe sakṛnnaraḥ // ### [1.77.58](https://indike.org/pramana/in.purana.linga.1.77.58) śivasāyujyamāpnoti nātra kāryā vicāraṇā purātha sūkaraḥ kaścit śvānaṃ dṛṣṭvā bhayātpathi // ### [1.77.59](https://indike.org/pramana/in.purana.linga.1.77.59) prasaṃgādvāramekaṃ tu śivatīrthe 'vagāhya ca mṛtaḥ svayaṃ dvijaśreṣṭhā gāṇapatyamavāptavān // ### [1.77.60](https://indike.org/pramana/in.purana.linga.1.77.60) yaḥ prātardevadeveśaṃ śivaṃ liṅgasvarūpiṇam paśyetsa yāti sarvasmād adhikāṃ gatimeva ca // ### [1.77.61](https://indike.org/pramana/in.purana.linga.1.77.61) madhyāhne ca mahādevaṃ dṛṣṭvā yajñaphalaṃ labhet sāyāhne sarvayajñānāṃ phalaṃ prāpya vimucyate // ### [1.77.62](https://indike.org/pramana/in.purana.linga.1.77.62) mānasairvācikaiḥ pāpaiḥ kāyikaiś ca mahattaraiḥ tathopapātakaiścaiva pāpaiścaivānupātakaiḥ // ### [1.77.63](https://indike.org/pramana/in.purana.linga.1.77.63) saṃkrame devamīśānaṃ dṛṣṭvā liṅgākṛtiṃ prabhum māsena yatkṛtaṃ pāpaṃ tyaktvā yāti śivaṃ padam // ### [1.77.64](https://indike.org/pramana/in.purana.linga.1.77.64) ayane cārdhamāsena dakṣiṇe cottarāyaṇe viṣuve caiva sampūjya prayāti paramāṃ gatim // ### [1.77.65](https://indike.org/pramana/in.purana.linga.1.77.65) pradakṣiṇatrayaṃ kuryād yaḥ prāsādaṃ samantataḥ savyāpasavyanyāyena mṛdugatyā śucirnaraḥ // ### [1.77.66](https://indike.org/pramana/in.purana.linga.1.77.66) pade pade 'śvamedhasya yajñasya phalamāpnuyāt vācā yastu śivaṃ nityaṃ saṃrauti parameśvaram // ### [1.77.67](https://indike.org/pramana/in.purana.linga.1.77.67) so 'pi yāti śivaṃ sthānaṃ prāpya kiṃ punareva ca kṛtvā maṇḍalakaṃ kṣetraṃ gandhagomayavāriṇā // ### [1.77.68](https://indike.org/pramana/in.purana.linga.1.77.68) muktāphalamayaiścūrṇair indranīlamayais tathā padmarāgamayaiścaiva sphāṭikaiś ca suśobhanaiḥ // ### [1.77.69](https://indike.org/pramana/in.purana.linga.1.77.69) tathā mārakataiścaiva sauvarṇai rājatais tathā tadvarṇair laukikaiścaiva cūrṇairvittavivarjitaiḥ // ### [1.77.70](https://indike.org/pramana/in.purana.linga.1.77.70) ālikhya kamalaṃ bhadraṃ daśahastapramāṇataḥ sakarṇikaṃ mahābhāgā mahādevasamīpataḥ // ### [1.77.71](https://indike.org/pramana/in.purana.linga.1.77.71) tatrāvāhya mahādevaṃ navaśaktisamanvitam pañcabhiśca tathā ṣaḍbhir aṣṭābhiśceṣṭadaṃ param // ### [1.77.72](https://indike.org/pramana/in.purana.linga.1.77.72) punaraṣṭābhir īśānaṃ daśāre daśabhis tathā punarbāhye ca daśabhiḥ sampūjya praṇipatya ca // ### [1.77.73](https://indike.org/pramana/in.purana.linga.1.77.73) nivedya devadevāya kṣitidānaphalaṃ labhet śālipiṣṭādibhir vāpi padmamālikhya nirdhanaḥ // ### [1.77.74](https://indike.org/pramana/in.purana.linga.1.77.74) pūrvoktamakhilaṃ puṇyaṃ labhate nātra saṃśayaḥ dvādaśāraṃ tathālikhya maṇḍalaṃ padam uttamam // ### [1.77.75](https://indike.org/pramana/in.purana.linga.1.77.75) ratnacūrṇādibhiścūrṇais tathā dvādaśamūrtibhiḥ maṇḍalasya ca madhye tu bhāskaraṃ sthāpya pūjayet // ### [1.77.76](https://indike.org/pramana/in.purana.linga.1.77.76) grahaiś ca saṃvṛtaṃ vāpi sūryasāyujyamuttamam evaṃ prākṛtam apyārthyāṃ ṣaḍasraṃ parikalpya ca // ### [1.77.77](https://indike.org/pramana/in.purana.linga.1.77.77) madhyadeśe ca deveśīṃ prakṛtiṃ brahmarūpiṇīm dakṣiṇe sattvamūrtiṃ ca vāmataś ca rajoguṇam // ### [1.77.78](https://indike.org/pramana/in.purana.linga.1.77.78) agratastu tamomūrtiṃ madhye devīṃ tathāṃbikām pañcabhūtāni tanmātrāpañcakaṃ caiva dakṣiṇe // ### [1.77.79](https://indike.org/pramana/in.purana.linga.1.77.79) karmendriyāṇi pañcaiva tathā buddhīndriyāṇi ca uttare vidhivatpūjya ṣaḍasre caiva pūjayet // ### [1.77.80](https://indike.org/pramana/in.purana.linga.1.77.80) ātmānaṃ cāntarātmānaṃ yugalaṃ buddhimeva ca ahaṅkāraṃ ca mahatā sarvayajñaphalaṃ labhet // ### [1.77.81](https://indike.org/pramana/in.purana.linga.1.77.81) evaṃ vaḥ kathitaṃ sarvaṃ prākṛtaṃ maṇḍalaṃ param ato vakṣyāmi viprendrāḥ sarvakāmārthasādhanam // ### [1.77.82](https://indike.org/pramana/in.purana.linga.1.77.82) gocarmamātramālikhya maṇḍalaṃ gomayena tu caturaśraṃ vidhānena cādbhir abhyukṣya mantravit // ### [1.77.83](https://indike.org/pramana/in.purana.linga.1.77.83) alaṃkṛtya vitānādyaiś chatrair vāpi manoramaiḥ budbudairardhacandraiś ca haimairaśvatthapatrakaiḥ // ### [1.77.84](https://indike.org/pramana/in.purana.linga.1.77.84) sitairvikasitaiḥ padmai raktair nīlotpalais tathā muktādāmair vitānānte lambitastu sitairdhvajaiḥ // ### [1.77.85](https://indike.org/pramana/in.purana.linga.1.77.85) sitamṛtpātrakaiścaiva suślakṣṇaiḥ pūrṇakumbhakaiḥ phalapallavamālābhir vaijayantībhir aṃśukaiḥ // ### [1.77.86](https://indike.org/pramana/in.purana.linga.1.77.86) pañcāśaddīpamālābhir dhūpaiḥ pañcavidhais tathā pañcāśaddalasaṃyuktam ālikhetpadmamuttamam // ### [1.77.87](https://indike.org/pramana/in.purana.linga.1.77.87) tattadvarṇais tathā cūrṇaiḥ śvetacūrṇairathāpi vā ekahastapramāṇena kṛtvā padmaṃ vidhānataḥ // ### [1.77.88](https://indike.org/pramana/in.purana.linga.1.77.88) karṇikāyāṃ nyased devaṃ devyā deveśvaraṃ bhavam varṇāni ca nyasetpatre rudraiḥ prāgādyanukramāt // ### [1.77.89](https://indike.org/pramana/in.purana.linga.1.77.89) praṇavādinamo 'ntāni sarvavarṇāni suvratāḥ sampūjyaivaṃ muniśreṣṭhā gandhapuṣpādibhiḥ kramāt // ### [1.77.90](https://indike.org/pramana/in.purana.linga.1.77.90) brāhmaṇān bhojayettatra pañcāśadvidhipūrvakam akṣamālopavītaṃ ca kuṇḍalaṃ ca kamaṇḍalum // ### [1.77.91](https://indike.org/pramana/in.purana.linga.1.77.91) āsanaṃ ca tathā daṇḍam uṣṇīṣaṃ vastrameva ca dattvā teṣāṃ munīndrāṇāṃ devadevāya śaṃbhave // ### [1.77.92](https://indike.org/pramana/in.purana.linga.1.77.92) mahācaruṃ nivedyaivaṃ kṛṣṇaṃ gomithunaṃ tathā ante ca devadevāya dāpayeccūrṇamaṇḍalam // ### [1.77.93](https://indike.org/pramana/in.purana.linga.1.77.93) yāgopayogadravyāṇi śivāya vinivedayet oṅkārādyaṃ japeddhīmān prativarṇam anukramāt // ### [1.77.94](https://indike.org/pramana/in.purana.linga.1.77.94) evamālikhya yo bhaktyā sarvamaṇḍalamuttamam yatphalaṃ labhate martyas tadvadāmi samāsataḥ // ### [1.77.95](https://indike.org/pramana/in.purana.linga.1.77.95) sāṅgān vedān yathānyāyam adhītya vidhipūrvakam iṣṭvā yajñairyathānyāyaṃ jyotiṣṭomādibhiḥ kramāt // ### [1.77.96](https://indike.org/pramana/in.purana.linga.1.77.96) tato viśvajidantaiś ca putrānutpādya tādṛśān vānaprasthāśramaṃ gatvā sadāraḥ sāgnireva ca // ### [1.77.97](https://indike.org/pramana/in.purana.linga.1.77.97) cāndrāyaṇādikāḥ sarvāḥ kṛtvā nyasya kriyā dvijāḥ brahmavidyāmadhītyaiva jñānamāsādya yatnataḥ // ### [1.77.98](https://indike.org/pramana/in.purana.linga.1.77.98) jñānena jñeyam ālokya yogī yatkāmamāpnuyāt tatphalaṃ labhate sarvaṃ varṇamaṇḍaladarśanāt // ### [1.77.99](https://indike.org/pramana/in.purana.linga.1.77.99) yena kenāpi vā martyaḥ pralipyāyatanāgrataḥ uttare dakṣiṇe vāpi pṛṣṭhato vā dvijottamāḥ // ### [1.77.100](https://indike.org/pramana/in.purana.linga.1.77.100) catuṣkoṇaṃ tu vā cūrṇair alaṃkṛtya samantataḥ puṣpākṣatādibhiḥ pūjya sarvapāpaiḥ pramucyate // ### [1.77.101](https://indike.org/pramana/in.purana.linga.1.77.101) yastu garbhagṛhaṃ bhaktyā sakṛdālipya sarvataḥ candanādyaiḥ sakarpūrair gandhadravyaiḥ samantataḥ // ### [1.77.102](https://indike.org/pramana/in.purana.linga.1.77.102) vikīrya gandhakusumair dhūpairdhūpya caturvidhaiḥ prārthayeddevamīśānaṃ śivalokaṃ sa gacchati // ### [1.77.103](https://indike.org/pramana/in.purana.linga.1.77.103) tatra bhuktvā mahābhogān kalpakoṭiśataṃ naraḥ svadehagandhakusumaiḥ pūrayañchivamandiram // ### [1.77.104](https://indike.org/pramana/in.purana.linga.1.77.104) kramādgāndharvamāsādya gandharvaiś ca supūjitaḥ kramādāgatya loke 'smin rājā bhavati vīryavān // ### [1.77.105](https://indike.org/pramana/in.purana.linga.1.77.105) ādidevo mahādevaḥ pralayasthitikārakaḥ sargaś ca bhuvanādhīśaḥ śarvavyāpī sadāśivaḥ śivabrahmāmṛtaṃ grāhyaṃ mokṣasādhanam uttamam // ### [1.77.106](https://indike.org/pramana/in.purana.linga.1.77.106) vyaktāvyaktaṃ sadā nityam acintyam arcayet prabhum // ### [1.77.106.p1](https://indike.org/pramana/in.purana.linga.1.77.106.p1) iti śrīliṅgamahāpurāṇe pūrvabhāge upalepanādikathanaṃ nāma saptasaptatitamo 'dhyāyaḥ ## Commentaries (1) - [Śivatosaṇī Liṅgapurāṇaṭīkā](https://indike.org/pramana/in.purana.linga!ganesa.89.35) — Gaṇeśa Bhaṭṭa, Sanskrit ## Linked texts (7) - [Śivadharma (Nandiprokta)](https://indike.org/pramana/in.sampradaya.saiva.sivadharma.sivadharmanandiprokta.2.64) — Sanskrit - [Revākhaṇḍa (Skandapurāṇa)](https://indike.org/pramana/in.purana.skanda.revakhanda.94.5) — Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.90.1) — Ativīrarāma Pāṇṭiyar 1500, Sanskrit - [Nityācārapradīpa](https://indike.org/pramana/in.niti.dharma.acara.ahnika.nityacarapradipa.10.p5) — Narasiṃha Vājapeyin, Sanskrit - [Nityācārapaddhati (Vidyākara vājapeyin)](https://indike.org/pramana/in.niti.dharma.acara.ahnika.nityacarapaddhati-vidyakara-vajapeyin.1.p163) — Vidyākara vājapeyin, Sanskrit - [Vratakāṇḍa](https://indike.org/pramana/in.niti.dharma.vrata.vratakanda.6.p345) — Lakṣmīdhara, Sanskrit - [Kṛtyaratnākara (Caṇḍeśvara)](https://indike.org/pramana/in.niti.dharma.nibandha.krtya.krtyaratnakara.6.p79) — Caṇḍeśvara, Sanskrit --- Source: [https://indike.org/pramana/in.purana.linga.1.77](https://indike.org/pramana/in.purana.linga.1.77) · Pramāṇa