[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 1.83 # Lingapurana 1.83 Liṅgapurāṇa 1.83 - **Language:** Sanskrit ## Contents - [1.83.55](https://indike.org/pramana/in.purana.linga.1.83.55) — 1 part ### [1.83.1](https://indike.org/pramana/in.purana.linga.1.83.1) ṛṣaya ūcuḥ vyapohanastavaṃ puṇyaṃ śrutamasmābhir ādarāt prasaṃgālliṅgadānasya vratānyapi vadasva naḥ // ### [1.83.2](https://indike.org/pramana/in.purana.linga.1.83.2) sūta uvāca vratāni vaḥ pravakṣyāmi śubhāni munisattamāḥ nandinā kathitānīha brahmaputrāya dhīmate // ### [1.83.3](https://indike.org/pramana/in.purana.linga.1.83.3) tāni vyāsādupaśrutya yuṣmākaṃ pravadāmyaham aṣṭamyāṃ ca caturdaśyāṃ pakṣayorubhayorapi // ### [1.83.4](https://indike.org/pramana/in.purana.linga.1.83.4) varṣamekaṃ tu bhuñjāno naktaṃ yaḥ pūjayecchivam sarvayajñaphalaṃ prāpya sa yāti paramāṃ gatim // ### [1.83.5](https://indike.org/pramana/in.purana.linga.1.83.5) pṛthivīṃ bhājanaṃ kṛtvā bhuktvā parvasu mānavaḥ ahorātreṇa caikena trirātraphalamaśnute // ### [1.83.6](https://indike.org/pramana/in.purana.linga.1.83.6) dvayor māsasya pañcamyor dvayoḥ pratipadornaraḥ kṣīradhārāvrataṃ kuryāt so 'śvamedhaphalaṃ labhet // ### [1.83.7](https://indike.org/pramana/in.purana.linga.1.83.7) kṛṣṇāṣṭamyāṃ tu naktena yāvatkṛṣṇacaturdaśī bhuñjanbhogānavāpnoti brahmalokaṃ ca gacchati // ### [1.83.8](https://indike.org/pramana/in.purana.linga.1.83.8) yo 'bdamekaṃ prakurvīta naktaṃ parvasu parvasu brahmacārī jitakrodhaḥ śivadhyānaparāyaṇaḥ // ### [1.83.9](https://indike.org/pramana/in.purana.linga.1.83.9) saṃvatsarānte viprendrān bhojayedvidhipūrvakam sa yāti śāṅkaraṃ lokaṃ nātra kāryā vicāraṇā // ### [1.83.10](https://indike.org/pramana/in.purana.linga.1.83.10) upavāsāt paraṃ bhaikṣyaṃ bhaikṣyāt param ayācitam ayācitāt paraṃ naktaṃ tasmān naktena vartayet // ### [1.83.11](https://indike.org/pramana/in.purana.linga.1.83.11) devairbhuktaṃ tu pūrvāhṇe madhyāhne ṛṣibhis tathā aparāhṇe ca pitṛbhiḥ saṃdhyāyāṃ guhyakādibhiḥ // ### [1.83.12](https://indike.org/pramana/in.purana.linga.1.83.12) sarvavelāmatikramya naktabhojanamuttamam haviṣyabhojanaṃ snānaṃ satyamāhāralāghavam // ### [1.83.13](https://indike.org/pramana/in.purana.linga.1.83.13) agnikāryamadhaḥśayyāṃ naktabhojī samācaret pratimāsaṃ pravakṣyāmi śivavratamanuttamam // ### [1.83.14](https://indike.org/pramana/in.purana.linga.1.83.14) dharmakāmārthamokṣārthaṃ sarvapāpaviśuddhaye puṣyamāse ca sampūjya yaḥ kuryānnaktabhojanam // ### [1.83.15](https://indike.org/pramana/in.purana.linga.1.83.15) satyavādī jitakrodhaḥ śāligodhūmagorasaiḥ pakṣayoraṣṭamīṃ yatnād upavāsena vartayet // ### [1.83.16](https://indike.org/pramana/in.purana.linga.1.83.16) bhūmiśayyāṃ ca māsānte paurṇamāsyāṃ ghṛtādibhiḥ snāpya rudraṃ mahādevaṃ sampūjya vidhipūrvakam // ### [1.83.17](https://indike.org/pramana/in.purana.linga.1.83.17) yāvakaṃ caudanaṃ dattvā sakṣīraṃ saghṛtaṃ dvijāḥ bhojayed brāhmaṇāñśiṣṭāñ japecchāntiṃ viśeṣataḥ // ### [1.83.18](https://indike.org/pramana/in.purana.linga.1.83.18) tathā gomithunaṃ caiva kapilaṃ vinivedayet bhavāya devadevāya śivāya parameṣṭhine // ### [1.83.19](https://indike.org/pramana/in.purana.linga.1.83.19) sa yāti muniśārdūla vāhneyaṃ lokamuttamam bhuktvā sa vipulān lokān tatraiva sa vimucyate // ### [1.83.20](https://indike.org/pramana/in.purana.linga.1.83.20) māghamāse tu sampūjya yaḥ kuryān naktabhojanam kṛśaraṃ ghṛtasaṃyuktaṃ bhuñjānaḥ saṃyatendriyaḥ // ### [1.83.21](https://indike.org/pramana/in.purana.linga.1.83.21) sopavāsaṃ caturdaśyāṃ bhavedubhayapakṣayoḥ rudrāya paurṇamāsyāṃ tu dadyādvai ghṛtakambalam // ### [1.83.22](https://indike.org/pramana/in.purana.linga.1.83.22) kṛṣṇaṃ gomithunaṃ dadyāt pūjayeccaiva śaṃkaram bhojayedbrāhmaṇāṃścaiva yathāvibhavavistaram // ### [1.83.23](https://indike.org/pramana/in.purana.linga.1.83.23) yāmyamāsādya vai lokaṃ yamena saha modate phālgune caiva samprāpte kuryādvai naktabhojanam // ### [1.83.24](https://indike.org/pramana/in.purana.linga.1.83.24) śyāmākānnaghṛtakṣīrair jitakrodho jitendriyaḥ caturdaśyāmathāṣṭamyām upavāsaṃ ca kārayet // ### [1.83.25](https://indike.org/pramana/in.purana.linga.1.83.25) paurṇamāsyāṃ mahādevaṃ snāpya sampūjya śaṅkaram dadyādgomithunaṃ vāpi tāmrābhaṃ śūlapāṇaye // ### [1.83.26](https://indike.org/pramana/in.purana.linga.1.83.26) brāhmaṇān bhojayitvā tu prārthayetparameśvaram sa yāti candrasāyujyaṃ nātra kāryā vicāraṇā // ### [1.83.27](https://indike.org/pramana/in.purana.linga.1.83.27) caitre 'pi rudramabhyarcya kuryādvai naktabhojanam śālyannaṃ payasā yuktaṃ ghṛtena ca yathāsukham // ### [1.83.28](https://indike.org/pramana/in.purana.linga.1.83.28) goṣṭhaśāyī muniśreṣṭhāḥ kṣitau niśi bhavaṃ smaret paurṇamāsyāṃ śivaṃ snāpya dadyādgomithunaṃ sitam // ### [1.83.29](https://indike.org/pramana/in.purana.linga.1.83.29) brāhmaṇān bhojayeccaiva nirṛteḥ sthānamāpnuyāt vaiśākhe ca tathā māse kṛtvā vai naktabhojanam // ### [1.83.30](https://indike.org/pramana/in.purana.linga.1.83.30) paurṇamāsyāṃ bhavaṃ snāpya pañcagavyaghṛtādibhiḥ śvetaṃ gomithunaṃ dattvā so 'śvamedhaphalaṃ labhet // ### [1.83.31](https://indike.org/pramana/in.purana.linga.1.83.31) jyeṣṭhe māse ca deveśaṃ bhavaṃ śarvamumāpatim sampūjya śraddhayā bhaktyā kṛtvā vai naktabhojanam // ### [1.83.32](https://indike.org/pramana/in.purana.linga.1.83.32) raktaśālyannamadhvā ca adbhiḥ pūtaṃ ghṛtādibhiḥ vīrāsano niśārdhaṃ ca gavāṃ śuśrūṣaṇe rataḥ // ### [1.83.33](https://indike.org/pramana/in.purana.linga.1.83.33) paurṇamāsyāṃ tu sampūjya devadevamumāpatim snāpya śaktyā yathānyāyaṃ caruṃ dadyāc ca śūline // ### [1.83.34](https://indike.org/pramana/in.purana.linga.1.83.34) brāhmaṇān bhojayitvā ca yathāvibhavavistaram dhūmraṃ gomithunaṃ dattvā vāyuloke mahīyate // ### [1.83.35](https://indike.org/pramana/in.purana.linga.1.83.35) āṣāḍhe māsi cāpyevaṃ naktabhojanatatparaḥ bhūrikhaṇḍājyasaṃmiśraṃ saktubhiścaiva gorasam // ### [1.83.36](https://indike.org/pramana/in.purana.linga.1.83.36) paurṇamāsyāṃ ghṛtādyaistu snāpya pūjya yathāvidhi brāhmaṇān bhojayitvā ca śrotriyān vedapāragān // ### [1.83.37](https://indike.org/pramana/in.purana.linga.1.83.37) dadyādgomithunaṃ gauraṃ vāruṇaṃ lokamāpnuyāt śrāvaṇe ca dvijā māse kṛtvā vai naktabhojanam // ### [1.83.38](https://indike.org/pramana/in.purana.linga.1.83.38) kṣīraṣaṣṭikabhaktena sampūjya vṛṣabhadhvajam paurṇamāsyāṃ ghṛtādyaistu snāpya pūjya yathāvidhi // ### [1.83.39](https://indike.org/pramana/in.purana.linga.1.83.39) brāhmaṇān bhojayitvā ca śrotriyān vedapāragān śvetāgrapādaṃ pauṇḍraṃ ca dadyādgomithunaṃ punaḥ // ### [1.83.40](https://indike.org/pramana/in.purana.linga.1.83.40) sa yāti vāyusāyujyaṃ vāyuvatsarvago bhavet prāpte bhādrapade māse kṛtvaivaṃ naktabhojanam // ### [1.83.41](https://indike.org/pramana/in.purana.linga.1.83.41) hutaśeṣaṃ ca viprendrān vṛkṣamūlāśrito divā paurṇamāsyāṃ tu deveśaṃ snāpya sampūjya śaṅkaram // ### [1.83.42](https://indike.org/pramana/in.purana.linga.1.83.42) nīlaskandhaṃ vṛṣaṃ gāṃ ca dattvā bhaktyā yathāvidhi brāhmaṇān bhojayitvā ca vedavedāṅgapāragān // ### [1.83.43](https://indike.org/pramana/in.purana.linga.1.83.43) yakṣalokamanuprāpya yakṣarājo bhavennaraḥ tataścāśvayuje māsi kṛtvaivaṃ naktabhojanam // ### [1.83.44](https://indike.org/pramana/in.purana.linga.1.83.44) saghṛtaṃ śaṅkaraṃ pūjya paurṇamāsyāṃ ca pūrvavat brāhmaṇān bhojayitvā ca śivabhaktān sadā śucīn // ### [1.83.45](https://indike.org/pramana/in.purana.linga.1.83.45) vṛṣabhaṃ nīlavarṇābham urodeśasamunnatam gāṃ ca dattvā yathānyāyam aiśānaṃ lokamāpnuyāt // ### [1.83.46](https://indike.org/pramana/in.purana.linga.1.83.46) kārtike ca tathā māse kṛtvā vai naktabhojanam kṣīraudanena sājyena sampūjya ca bhavaṃ prabhum // ### [1.83.47](https://indike.org/pramana/in.purana.linga.1.83.47) paurṇamāsyāṃ ca vidhivat snāpya dattvā caruṃ punaḥ brāhmaṇān bhojayitvā ca yathāvibhavavistaram // ### [1.83.48](https://indike.org/pramana/in.purana.linga.1.83.48) dattvā gomithunaṃ caiva kāpilaṃ pūrvavad dvijāḥ sūryasāyujyamāpnoti nātra kāryā vicāraṇā // ### [1.83.49](https://indike.org/pramana/in.purana.linga.1.83.49) mārgaśīrṣe ca māse 'pi kṛtvaivaṃ naktabhojanam yavānnena yathānyāyam ājyakṣīrādibhiḥ samam // ### [1.83.50](https://indike.org/pramana/in.purana.linga.1.83.50) paurṇamāsyāṃ ca pūrvoktaṃ kṛtvā śarvāya śaṃbhave brāhmaṇān bhojayitvā ca daridrānvedapāragān // ### [1.83.51](https://indike.org/pramana/in.purana.linga.1.83.51) dattvā gomithunaṃ caiva pāṇḍuraṃ vidhipūrvakam somalokamanuprāpya somena saha modate // ### [1.83.52](https://indike.org/pramana/in.purana.linga.1.83.52) ahiṃsā satyamasteyaṃ brahmacaryaṃ kṣamā dayā triḥsnānaṃ cāgnihotraṃ ca bhūśayyā naktabhojanam // ### [1.83.53](https://indike.org/pramana/in.purana.linga.1.83.53) pakṣayorupavāsaṃ ca caturdaśyaṣṭamīṣu ca // ### [1.83.54](https://indike.org/pramana/in.purana.linga.1.83.54) ityetadakhilaṃ proktaṃ pratimāsaṃ śivavratam // ### [1.83.55](https://indike.org/pramana/in.purana.linga.1.83.55) kuryādvarṣaṃ krameṇaiva vyutkrameṇāpi vā dvijāḥ sa yāti śivasāyujyaṃ jñānayogamavāpnuyāt // ### [1.83.55.p1](https://indike.org/pramana/in.purana.linga.1.83.55.p1) iti śrīliṅgamahāpurāṇe pūrvabhāge śivavratakathanaṃ nāma tryaśītitamo 'dhyāyaḥ ## Commentaries (1) - [Śivatosaṇī Liṅgapurāṇaṭīkā](https://indike.org/pramana/in.purana.linga!ganesa.97.1) — Gaṇeśa Bhaṭṭa, Sanskrit ## Linked texts (8) - [Śivadharmaśāstra (IFP/EFEO 860 copied from R2442 G.O.N.L., Madras)](https://indike.org/pramana/in.sampradaya.saiva.sivadharma.sivadharmasastra*ms-ifp-efeo-860-copied.2.325) — Sanskrit - [Śivadharmottara](https://indike.org/pramana/in.sampradaya.saiva.sivadharma.sivadharmottara.1161) — Sanskrit - [Kāmikāgama](https://indike.org/pramana/in.sampradaya.saiva.agama.siva.kamika.2.9.1) — Sanskrit - [Acintyaviśvasādākhyatantra](https://indike.org/pramana/in.sampradaya.saiva.agama.siva.acintyavisvasadakhyatantra.9.1055) — Sanskrit - [Revākhaṇḍa (Skandapurāṇa)](https://indike.org/pramana/in.purana.skanda.revakhanda.104.67) — Sanskrit - [Dīptāgama](https://indike.org/pramana/in.sampradaya.saiva.agama.siva.dipta.25.168) — Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.97.1) — Ativīrarāma Pāṇṭiyar 1500, Sanskrit - [Tīrthacintāmaṇi](https://indike.org/pramana/in.niti.dharma.tirtha.tirthacintamani.9.p127) — Vācaspatimiśra, Sanskrit --- Source: [https://indike.org/pramana/in.purana.linga.1.83](https://indike.org/pramana/in.purana.linga.1.83) · Pramāṇa