[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 1.85 # Lingapurana 1.85 Liṅgapurāṇa 1.85 - **Language:** Sanskrit ## Contents - [1.85.231](https://indike.org/pramana/in.purana.linga.1.85.231) — 1 part ### [1.85.1](https://indike.org/pramana/in.purana.linga.1.85.1) sūta uvāca sarvavrateṣu sampūjya devadevamumāpatim japetpañcākṣarīṃ vidyāṃ vidhinaiva dvijottamāḥ // ### [1.85.2](https://indike.org/pramana/in.purana.linga.1.85.2) japādeva na saṃdeho vratānāṃ vai viśeṣataḥ samāptirnānyathā tasmāj japetpañcākṣarīṃ śubhām // ### [1.85.3](https://indike.org/pramana/in.purana.linga.1.85.3) ṛṣaya ūcuḥ kathaṃ pañcākṣarī vidyā prabhāvo vā kathaṃ vada kramopāyaṃ mahābhāga śrotuṃ kautūhalaṃ hi naḥ // ### [1.85.4](https://indike.org/pramana/in.purana.linga.1.85.4) sūta uvāca purā devena rudreṇa devadevena śaṃbhunā pārvatyāḥ kathitaṃ puṇyaṃ pravadāmi samāsataḥ // ### [1.85.5](https://indike.org/pramana/in.purana.linga.1.85.5) śrīdevyuvāca bhagavandevadeveśa sarvalokamaheśvara pañcākṣarasya māhātmyaṃ śrotumicchāmi tattvataḥ // ### [1.85.6](https://indike.org/pramana/in.purana.linga.1.85.6) śrībhagavānuvāca pañcākṣarasya māhātmyaṃ varṣakoṭiśatairapi na śakyaṃ kathituṃ devi tasmāt saṃkṣepataḥ śṛṇu // ### [1.85.7](https://indike.org/pramana/in.purana.linga.1.85.7) pralaye samanuprāpte naṣṭe sthāvarajaṅgame naṣṭe devāsure caiva naṣṭe coragarākṣase // ### [1.85.8](https://indike.org/pramana/in.purana.linga.1.85.8) sarvaṃ prakṛtimāpannaṃ tvayā pralayameṣyati eko 'haṃ saṃsthito devi na dvitīyo 'sti kutracit // ### [1.85.9](https://indike.org/pramana/in.purana.linga.1.85.9) tasminvedāś ca śāstrāṇi mantre pañcākṣare sthitāḥ te nāśaṃ naiva samprāptā macchaktyā hyanupālitāḥ // ### [1.85.10](https://indike.org/pramana/in.purana.linga.1.85.10) ahameko dvidhāpyāsaṃ prakṛtyātmaprabhedataḥ sa tu nārāyaṇaḥ śete devo māyāmayīṃ tanum // ### [1.85.11](https://indike.org/pramana/in.purana.linga.1.85.11) āsthāya yogaparyaṅkaśayane toyamadhyagaḥ tannābhipaṅkajājjātaḥ pañcavaktraḥ pitāmahaḥ // ### [1.85.12](https://indike.org/pramana/in.purana.linga.1.85.12) sisṛkṣamāṇo lokānvai trīnaśakto 'sahāyavān daśa brahmā sasarjādau mānasānamitaujasaḥ // ### [1.85.13](https://indike.org/pramana/in.purana.linga.1.85.13) teṣāṃ sṛṣṭiprasiddhyarthaṃ māṃ provāca pitāmahaḥ matputrāṇāṃ mahādeva śaktiṃ dehi maheśvara // ### [1.85.14](https://indike.org/pramana/in.purana.linga.1.85.14) iti tena samādiṣṭaḥ pañcavaktradharo hyaham pañcākṣarānpañcamukhaiḥ proktavān padmayonaye // ### [1.85.15](https://indike.org/pramana/in.purana.linga.1.85.15) tānpañcavadanairgṛhṇan brahmā lokapitāmahaḥ vācyavācakabhāvena jñātavānparameśvaram // ### [1.85.16](https://indike.org/pramana/in.purana.linga.1.85.16) vācyaḥ pañcākṣarairdevi śivastrailokyapūjitaḥ vācakaḥ paramo mantras tasya pañcākṣaraḥ sthitaḥ // ### [1.85.17](https://indike.org/pramana/in.purana.linga.1.85.17) jñātvā prayogaṃ vidhinā ca siddhiṃ labdhvā tathā pañcamukho mahātmā provāca putreṣu jagaddhitāya mantraṃ mahārthaṃ kila pañcavarṇam // ### [1.85.18](https://indike.org/pramana/in.purana.linga.1.85.18) te labdhvā mantraratnaṃ tu sākṣāllokapitāmahāt tamārādhayituṃ devaṃ parātparataraṃ śivam // ### [1.85.19](https://indike.org/pramana/in.purana.linga.1.85.19) tatastutoṣa bhagavān trimūrtīnāṃ paraḥ śivaḥ dattavānakhilaṃ jñānam aṇimādiguṇāṣṭakam // ### [1.85.20](https://indike.org/pramana/in.purana.linga.1.85.20) te 'pi labdhvā varānviprās tadārādhanakāṅkṣiṇaḥ merostu śikhare ramye muñjavānnāma parvataḥ // ### [1.85.21](https://indike.org/pramana/in.purana.linga.1.85.21) matpriyaḥ satataṃ śrīmān madbhūtaiḥ parirakṣitaḥ tasyābhyāśe tapastīvraṃ lokasṛṣṭisamutsukāḥ // ### [1.85.22](https://indike.org/pramana/in.purana.linga.1.85.22) divyavarṣasahasraṃ tu vāyubhakṣāḥ samācaran tiṣṭhanto 'nugrahārthāya devi te ṛṣayaḥ purā // ### [1.85.23](https://indike.org/pramana/in.purana.linga.1.85.23) teṣāṃ bhaktimahaṃ dṛṣṭvā sadyaḥ pratyakṣatāmiyām pañcākṣaram ṛṣicchando daivataṃ śaktibījavat // ### [1.85.24](https://indike.org/pramana/in.purana.linga.1.85.24) nyāsaṃ ṣaḍaṅgaṃ digbandhaṃ viniyogamaśeṣataḥ proktavānahamāryāṇāṃ lokānāṃ hitakāmyayā // ### [1.85.25](https://indike.org/pramana/in.purana.linga.1.85.25) tacchrutvā mantramāhātmyam ṛṣayaste tapodhanāḥ mantrasya viniyogaṃ ca kṛtvā sarvamanuṣṭhitāḥ // ### [1.85.26](https://indike.org/pramana/in.purana.linga.1.85.26) tanmāhātmyāt tadā lokān sadevāsuramānuṣān varṇānvarṇavibhāgāṃś ca sarvadharmāṃś ca śobhanān // ### [1.85.27](https://indike.org/pramana/in.purana.linga.1.85.27) pūrvakalpasamudbhūtāñ chrutavanto yathā purā pañcākṣaraprabhāvācca lokā vedā maharṣayaḥ // ### [1.85.28](https://indike.org/pramana/in.purana.linga.1.85.28) tiṣṭhanti śāśvatā dharmā devāḥ sarvamidaṃ jagat tad idānīṃ pravakṣyāmi śṛṇu cāvahitākhilam // ### [1.85.29](https://indike.org/pramana/in.purana.linga.1.85.29) alpākṣaraṃ mahārthaṃ ca vedasāraṃ vimuktidam ājñāsiddhamasaṃdigdhaṃ vākyametacchivātmakam // ### [1.85.30](https://indike.org/pramana/in.purana.linga.1.85.30) nānāsiddhiyutaṃ divyaṃ lokacittānurañjakam suniścitārthaṃ gaṃbhīraṃ vākyaṃ me pārameśvaram // ### [1.85.31](https://indike.org/pramana/in.purana.linga.1.85.31) mantraṃ mukhasukhoccāryam aśeṣārthaprasādhakam tadbījaṃ sarvavidyānāṃ mantramādyaṃ suśobhanam // ### [1.85.32](https://indike.org/pramana/in.purana.linga.1.85.32) atisūkṣmaṃ mahārthaṃ ca jñeyaṃ tadvaṭabījavat vedaḥ sa triguṇātītaḥ sarvajñaḥ sarvakṛtprabhuḥ // ### [1.85.33](https://indike.org/pramana/in.purana.linga.1.85.33) omityekākṣaraṃ mantraṃ sthitaḥ sarvagataḥ śivaḥ mantre ṣaḍakṣare sūkṣme pañcākṣaratanuḥ śivaḥ // ### [1.85.34](https://indike.org/pramana/in.purana.linga.1.85.34) vācyavācakabhāvena sthitaḥ sākṣātsvabhāvataḥ vācyaḥ śivaḥ prameyatvān mantrastadvācakaḥ smṛtaḥ // ### [1.85.35](https://indike.org/pramana/in.purana.linga.1.85.35) vācyavācakabhāvo 'yam anādiḥ saṃsthitastayoḥ vede śivāgame vāpi yatra yatra ṣaḍakṣaraḥ // ### [1.85.36](https://indike.org/pramana/in.purana.linga.1.85.36) mantraḥ sthitaḥ sadā mukhyo loke pañcākṣaro mataḥ kiṃ tasya bahubhir mantraiḥ śāstrairvā bahuvistṛtaiḥ // ### [1.85.37](https://indike.org/pramana/in.purana.linga.1.85.37) yasyaivaṃ hṛdi saṃstho 'yaṃ mantraḥ syātpārameśvaraḥ tenādhītaṃ śrutaṃ tena tena sarvamanuṣṭhitam // ### [1.85.38](https://indike.org/pramana/in.purana.linga.1.85.38) yo vidvānvai japetsamyag adhītyaiva vidhānataḥ etāvaddhi śivajñānam etāvatparamaṃ padam // ### [1.85.39](https://indike.org/pramana/in.purana.linga.1.85.39) etāvad brahmavidyā ca tasmānnityaṃ japedbudhaḥ pañcākṣaraiḥ sapraṇavo mantro 'yaṃ hṛdayaṃ mama // ### [1.85.40](https://indike.org/pramana/in.purana.linga.1.85.40) guhyādguhyataraṃ sākṣān mokṣajñānam anuttamam asya mantrasya vakṣyāmi ṛṣicchando 'dhidaivatam // ### [1.85.41](https://indike.org/pramana/in.purana.linga.1.85.41) bījaṃ śaktiṃ svaraṃ varṇaṃ sthānaṃ caivākṣaraṃ prati vāmadevo nāma ṛṣiḥ paṅktiśchanda udāhṛtaḥ // ### [1.85.42](https://indike.org/pramana/in.purana.linga.1.85.42) devatā śiva evāhaṃ mantrasyāsya varānane nakārādīni bījāni pañcabhūtātmakāni ca // ### [1.85.43](https://indike.org/pramana/in.purana.linga.1.85.43) ātmānaṃ praṇavaṃ viddhi sarvavyāpinamavyayam śaktistvameva deveśi sarvadevanamaskṛte // ### [1.85.44](https://indike.org/pramana/in.purana.linga.1.85.44) tvadīyaṃ praṇavaṃ kiṃcin madīyaṃ praṇavaṃ tathā tvadīyaṃ devi mantrāṇāṃ śaktibhūtaṃ na saṃśayaḥ // ### [1.85.45](https://indike.org/pramana/in.purana.linga.1.85.45) akārokāramakārā madīye praṇave sthitāḥ ukāraṃ ca makāraṃ ca akāraṃ ca krameṇa vai // ### [1.85.46](https://indike.org/pramana/in.purana.linga.1.85.46) tvadīyaṃ praṇavaṃ viddhi trimātraṃ plutamuttamam oṅkārasya svarodātta ṛṣirbrahma sitaṃ vapuḥ // ### [1.85.47](https://indike.org/pramana/in.purana.linga.1.85.47) chando devī ca gāyatrī paramātmādhidevatā udāttaḥ prathamastadvac caturthaś ca dvitīyakaḥ // ### [1.85.48](https://indike.org/pramana/in.purana.linga.1.85.48) pañcamaḥ svaritaścaiva madhyamo niṣadhaḥ smṛtāḥ nakāraḥ pītavarṇaś ca sthānaṃ pūrvamukhaṃ smṛtam // ### [1.85.49](https://indike.org/pramana/in.purana.linga.1.85.49) indro 'dhidaivataṃ chando gāyatrī gautama ṛṣiḥ makāraḥ kṛṣṇavarṇo 'sya sthānaṃ vai dakṣiṇāmukham // ### [1.85.50](https://indike.org/pramana/in.purana.linga.1.85.50) chando 'nuṣṭup ṛṣiścātrī rudro daivatamucyate śikāro dhūmravarṇo 'sya sthānaṃ vai paścimaṃ mukham // ### [1.85.51](https://indike.org/pramana/in.purana.linga.1.85.51) viśvāmitra ṛṣistriṣṭup chando viṣṇustu daivatam vākāro hemavarṇo 'sya sthānaṃ caivottaraṃ mukham // ### [1.85.52](https://indike.org/pramana/in.purana.linga.1.85.52) brahmādhidaivataṃ chando bṛhatī cāṅgirā ṛṣiḥ yakāro raktavarṇaś ca sthānam ūrdhvaṃ mukhaṃ virāṭ // ### [1.85.53](https://indike.org/pramana/in.purana.linga.1.85.53) chanda ṛṣirbharadvājaḥ skando daivatamucyate nyāsamasya pravakṣyāmi sarvasiddhikaraṃ śubham // ### [1.85.54](https://indike.org/pramana/in.purana.linga.1.85.54) sarvapāpaharaṃ caiva trividho nyāsa ucyate utpattisthitisaṃhārabhedatastrividhaḥ smṛtaḥ // ### [1.85.55](https://indike.org/pramana/in.purana.linga.1.85.55) brahmacārigṛhasthānāṃ yatīnāṃ kramaśo bhavet utpattirbrahmacāriṇāṃ gṛhasthānāṃ sthitiḥ sadā // ### [1.85.56](https://indike.org/pramana/in.purana.linga.1.85.56) yatīnāṃ saṃhṛtir nyāsaḥ siddhir bhavati nānyathā aṅganyāsaḥ karanyāso dehanyāsa iti tridhā // ### [1.85.57](https://indike.org/pramana/in.purana.linga.1.85.57) utpattyāditribhedena vakṣyate te varānane nyasetpūrvaṃ karanyāsaṃ dehanyāsam anantaram // ### [1.85.58](https://indike.org/pramana/in.purana.linga.1.85.58) aṅganyāsaṃ tataḥ paścād akṣarāṇāṃ vidhikramāt mūrdhādipādaparyantam utpattinyāsa ucyate // ### [1.85.59](https://indike.org/pramana/in.purana.linga.1.85.59) pādādimūrdhaparyantaṃ saṃhāro bhavati priye hṛdayāsyagalanyāsaḥ sthitinyāsa udāhṛtaḥ // ### [1.85.60](https://indike.org/pramana/in.purana.linga.1.85.60) brahmacārigṛhasthānāṃ yatīnāṃ caiva śobhane saśiraskaṃ tato dehaṃ sarvamantreṇa saṃspṛśet // ### [1.85.61](https://indike.org/pramana/in.purana.linga.1.85.61) sa dehanyāsa ityuktaḥ sarveṣāṃ sama eva sa dakṣiṇāṅguṣṭhamārabhya vāmāṅguṣṭhānta eva hi // ### [1.85.62](https://indike.org/pramana/in.purana.linga.1.85.62) nyasyate yattadutpattir viparītaṃ tu saṃhṛtiḥ aṅguṣṭhādikaniṣṭhāntaṃ nyasyate hastayor dvayoḥ // ### [1.85.63](https://indike.org/pramana/in.purana.linga.1.85.63) atīva bhogado devi sthitinyāsaḥ kuṭuṃbinām karanyāsaṃ purā kṛtvā dehanyāsam anantaram // ### [1.85.64](https://indike.org/pramana/in.purana.linga.1.85.64) aṅganyāsaṃ nyasetpaścād eṣa sādhāraṇo vidhiḥ oṅkāraṃ saṃpuṭīkṛtya sarvāṅgeṣu ca vinyaset // ### [1.85.65](https://indike.org/pramana/in.purana.linga.1.85.65) karayorubhayoścaiva daśāgrāṃguliṣu kramāt prakṣālya pādāvācamya śucirbhūtvā samāhitaḥ // ### [1.85.66](https://indike.org/pramana/in.purana.linga.1.85.66) prāṅmukhodaṅmukho vāpi nyāsakarma samācaret smaret pūrvam ṛṣiṃ chando daivataṃ bījameva ca // ### [1.85.67](https://indike.org/pramana/in.purana.linga.1.85.67) śaktiṃ ca paramātmānaṃ guruṃ caiva varānane mantreṇa pāṇī saṃmṛjya talayoḥ praṇavaṃ nyaset // ### [1.85.68](https://indike.org/pramana/in.purana.linga.1.85.68) aṅgulīnāṃ ca sarveṣāṃ tathā cādyantaparvasu sabindukāni bījāni pañca madhyamaparvasu // ### [1.85.69](https://indike.org/pramana/in.purana.linga.1.85.69) utpattyāditribhedena nyasedāśramataḥ kramāt ubhābhyāmeva pāṇibhyām āpādatalamastakam // ### [1.85.70](https://indike.org/pramana/in.purana.linga.1.85.70) mantreṇa saṃspṛśeddehaṃ praṇavenaiva saṃpuṭam mūrdhni vaktre ca kaṇṭhe ca hṛdaye guhyake tathā // ### [1.85.71](https://indike.org/pramana/in.purana.linga.1.85.71) pādayor ubhayoścaiva guhye ca hṛdaye tathā kaṇṭhe ca mukhamadhye ca mūrdhni ca praṇavādikam // ### [1.85.72](https://indike.org/pramana/in.purana.linga.1.85.72) hṛdaye guhyake caiva pādayormūrdhni vāci vā kaṇṭhe caiva nyasedeva praṇavāditribhedataḥ // ### [1.85.73](https://indike.org/pramana/in.purana.linga.1.85.73) kṛtvāṅganyāsamevaṃ hi mukhāni parikalpayet pūrvādi cordhvaparyantaṃ nakārādi yathākramam // ### [1.85.74](https://indike.org/pramana/in.purana.linga.1.85.74) ṣaḍaṅgāni nyasetpaścād yathāsthānaṃ ca śobhanam namaḥ svāhā vaṣaḍḍhuṃ ca vauṣaṭphaṭkārakaiḥ saha // ### [1.85.75](https://indike.org/pramana/in.purana.linga.1.85.75) praṇavaṃ hṛdayaṃ vidyān nakāraḥ śira ucyate śikhā makāra ākhyātaḥ śikāraḥ kavacaṃ tathā // ### [1.85.76](https://indike.org/pramana/in.purana.linga.1.85.76) ākāro netramastraṃ tu yakāraḥ parikīrtitaḥ itthamaṅgāni vinyasya tato vai bandhayeddiśaḥ // ### [1.85.77](https://indike.org/pramana/in.purana.linga.1.85.77) vighneśo mātaro durgā kṣetrajño devatā diśaḥ āgneyādiṣu koṇeṣu caturṣvapi yathākramam // ### [1.85.78](https://indike.org/pramana/in.purana.linga.1.85.78) aṅguṣṭhatarjanyagrābhyāṃ saṃsthāpya sumukhaṃ śubham rakṣadhvamiti coktvā tu namaskuryātpṛthakpṛthak // ### [1.85.79](https://indike.org/pramana/in.purana.linga.1.85.79) gale madhye tathāṅguṣṭhe tarjanyādyāṅgulīṣu ca aṅguṣṭhena karanyāsaṃ kuryādeva vicakṣaṇaḥ // ### [1.85.80](https://indike.org/pramana/in.purana.linga.1.85.80) evaṃ nyāsamimaṃ proktaṃ sarvapāpaharaṃ śubham sarvasiddhikaraṃ puṇyaṃ sarvarakṣākaraṃ śivam // ### [1.85.81](https://indike.org/pramana/in.purana.linga.1.85.81) nyaste mantre 'tha subhage śaṅkarapratimo bhavet janmāntarakṛtaṃ pāpam api naśyati tatkṣaṇāt // ### [1.85.82](https://indike.org/pramana/in.purana.linga.1.85.82) evaṃ vinyasya medhāvī śuddhakāyo dṛḍhavrataḥ japetpañcākṣaraṃ mantraṃ labdhvācāryaprasādataḥ // ### [1.85.83](https://indike.org/pramana/in.purana.linga.1.85.83) ataḥ paraṃ pravakṣyāmi mantrasaṃgrahaṇaṃ śubhe yaṃ vinā niṣphalaṃ nityaṃ yena vā saphalaṃ bhavet // ### [1.85.84](https://indike.org/pramana/in.purana.linga.1.85.84) ājñāhīnaṃ kriyāhīnaṃ śraddhāhīnam amānasam ājñaptaṃ dakṣiṇāhīnaṃ sadā japtaṃ ca niṣphalam // ### [1.85.85](https://indike.org/pramana/in.purana.linga.1.85.85) ājñāsiddhaṃ kriyāsiddhaṃ śraddhāsiddhaṃ sumānasam evaṃ ca dakṣiṇāsiddhaṃ mantraṃ siddhaṃ yatastataḥ // ### [1.85.86](https://indike.org/pramana/in.purana.linga.1.85.86) upāgamya guruṃ vipraṃ mantratattvārthavedinam jñāninaṃ sadguṇopetaṃ dhyānayogaparāyaṇam // ### [1.85.87](https://indike.org/pramana/in.purana.linga.1.85.87) toṣayettaṃ prayatnena bhāvaśuddhisamanvitaḥ vācā ca manasā caiva kāyena draviṇena ca // ### [1.85.88](https://indike.org/pramana/in.purana.linga.1.85.88) ācāryaṃ pūjayecchiṣyaḥ sarvadātiprayatnataḥ hastyaśvaratharatnāni kṣetrāṇi ca gṛhāṇi ca // ### [1.85.89](https://indike.org/pramana/in.purana.linga.1.85.89) bhūṣaṇāni ca vāsāṃsi dhānyāni vividhāni ca etāni gurave dadyād bhaktyā ca vibhave sati // ### [1.85.90](https://indike.org/pramana/in.purana.linga.1.85.90) vittaśāṭhyaṃ na kurvīta yadīcchetsiddhimātmanaḥ paścānnivedayeddevi ātmānaṃ saparicchadam // ### [1.85.91](https://indike.org/pramana/in.purana.linga.1.85.91) evaṃ sampūjya vidhivad yathāśakti tvavañcayan ādadīta gurormantraṃ jñānaṃ caiva krameṇa tu // ### [1.85.92](https://indike.org/pramana/in.purana.linga.1.85.92) evaṃ tuṣṭo guruḥ śiṣyaṃ pūjitaṃ vatsaroṣitam śuśrūṣum anahaṅkāram upavāsakṛśaṃ śucim // ### [1.85.93](https://indike.org/pramana/in.purana.linga.1.85.93) snāpayitvā tu śiṣyāya brāhmaṇānapi pūjya ca samudratīre nadyāṃ ca goṣṭhe devālaye 'pi vā // ### [1.85.94](https://indike.org/pramana/in.purana.linga.1.85.94) śucau deśe gṛhe vāpi kāle siddhikare tithau nakṣatre śubhayoge ca sarvadā doṣavarjite // ### [1.85.95](https://indike.org/pramana/in.purana.linga.1.85.95) anugṛhya tato dadyāc chivajñānam anuttamam svareṇoccārayet samyag ekānte 'pi prasannadhīḥ // ### [1.85.96](https://indike.org/pramana/in.purana.linga.1.85.96) uccāryoccārayitvā tu ācāryaḥ siddhidaḥ svayam śivaṃ cāstu śubhaṃ cāstu śobhano 'stu priyo 'stviti // ### [1.85.97](https://indike.org/pramana/in.purana.linga.1.85.97) evaṃ labdhvā paraṃ mantraṃ jñānaṃ caiva gurostataḥ japennityaṃ sasaṃkalpaṃ puraścaraṇameva ca // ### [1.85.98](https://indike.org/pramana/in.purana.linga.1.85.98) yāvajjīvaṃ japennityam aṣṭottarasahasrakam anaśnaṃstatparo bhūtvā sa yāti paramāṃ gatim // ### [1.85.99](https://indike.org/pramana/in.purana.linga.1.85.99) japedakṣaralakṣaṃ vai caturguṇitamādarāt naktāśī saṃyamī yaś ca pauraścaraṇikaḥ smṛtaḥ // ### [1.85.100](https://indike.org/pramana/in.purana.linga.1.85.100) puraścaraṇajāpī vā api vā nityajāpakaḥ acirātsiddhikāṅkṣī tu tayoranyataro bhavet // ### [1.85.101](https://indike.org/pramana/in.purana.linga.1.85.101) yaḥ puraścaraṇaṃ kṛtvā nityajāpī bhavennaraḥ tasya nāsti samo loke sa siddhaḥ siddhido vaśī // ### [1.85.102](https://indike.org/pramana/in.purana.linga.1.85.102) āsanaṃ ruciraṃ baddhvā maunī caikāgramānasaḥ prāṅmukhodaṅmukho vāpi japenmantramanuttamam // ### [1.85.103](https://indike.org/pramana/in.purana.linga.1.85.103) ādyāntayor japasyāpi kuryādvai prāṇasaṃyamān tathā cānte japedbījaṃ śatamaṣṭottaraṃ śubham // ### [1.85.104](https://indike.org/pramana/in.purana.linga.1.85.104) catvāriṃśatsamāvṛtti prāṇānāyamya saṃsmaret pañcākṣarasya mantrasya prāṇāyāma udāhṛtaḥ // ### [1.85.105](https://indike.org/pramana/in.purana.linga.1.85.105) prāṇāyāmādbhavetkṣipraṃ sarvapāpaparikṣayaḥ indriyāṇāṃ vaśitvaṃ ca tasmātprāṇāṃś ca saṃyamet // ### [1.85.106](https://indike.org/pramana/in.purana.linga.1.85.106) gṛhe japaḥ samaṃ vidyād goṣṭhe śataguṇaṃ bhavet nadyāṃ śatasahasraṃ tu anantaḥ śivasannidhau // ### [1.85.107](https://indike.org/pramana/in.purana.linga.1.85.107) samudratīre devahrade girau devālayeṣu ca puṇyāśrameṣu sarveṣu japaḥ koṭiguṇo bhavet // ### [1.85.108](https://indike.org/pramana/in.purana.linga.1.85.108) śivasya saṃnidhāne ca sūryasyāgre gurorapi dīpasya gorjalasyāpi japakarma praśasyate // ### [1.85.109](https://indike.org/pramana/in.purana.linga.1.85.109) aṅgulījapasaṃkhyānam ekamekaṃ śubhānane rekhairaṣṭaguṇaṃ proktaṃ putrajīvaphalair daśa // ### [1.85.110](https://indike.org/pramana/in.purana.linga.1.85.110) śataṃ vai śaṅkhamaṇibhiḥ pravālaiś ca sahasrakam sphāṭikair daśasāhasraṃ mauktikairlakṣamucyate // ### [1.85.111](https://indike.org/pramana/in.purana.linga.1.85.111) padmākṣairdaśalakṣaṃ tu sauvarṇaiḥ koṭirucyate kuśagranthyā ca rudrākṣair anantaguṇamucyate // ### [1.85.112](https://indike.org/pramana/in.purana.linga.1.85.112) pañcaviṃśati mokṣārthaṃ saptaviṃśati pauṣṭikam triṃśacca dhanasaṃpattyai pañcāśaccābhicārikam // ### [1.85.113](https://indike.org/pramana/in.purana.linga.1.85.113) tatpūrvābhimukhaṃ vaśyaṃ dakṣiṇaṃ cābhicārikam paścimaṃ dhanadaṃ vidyād uttaraṃ śāntikaṃ bhavet // ### [1.85.114](https://indike.org/pramana/in.purana.linga.1.85.114) aṅguṣṭhaṃ mokṣadaṃ vidyāt tarjanī śatrunāśanī madhyamā dhanadā śāntiṃ karotyeṣā hy anāmikā // ### [1.85.115](https://indike.org/pramana/in.purana.linga.1.85.115) kaniṣṭhā rakṣaṇīyā sā japakarmaṇi śobhane aṅguṣṭhena japejjapyam anyairaṅgulibhiḥ saha // ### [1.85.116](https://indike.org/pramana/in.purana.linga.1.85.116) aṅguṣṭhena vinā karma kṛtaṃ tadaphalaṃ yataḥ śṛṇuṣva sarvayajñebhyo japayajño viśiṣyate // ### [1.85.117](https://indike.org/pramana/in.purana.linga.1.85.117) hiṃsayā te pravartante japayajño na hiṃsayā yāvantaḥ karmayajñāḥ syuḥ pradānāni tapāṃsi ca // ### [1.85.118](https://indike.org/pramana/in.purana.linga.1.85.118) sarve te japayajñasya kalāṃ nārhanti ṣoḍaśīm māhātmyaṃ vācikasyaiva japayajñasya kīrtitam // ### [1.85.119](https://indike.org/pramana/in.purana.linga.1.85.119) tasmācchataguṇopāṃśuḥ sahasro mānasaḥ smṛtaḥ yad uccanīcasvaritaiḥ śabdaiḥ spaṣṭapadākṣaraiḥ // ### [1.85.120](https://indike.org/pramana/in.purana.linga.1.85.120) mantramuccārayedvācā japayajñaḥ sa vācikaḥ śanairuccārayenmantram īṣad oṣṭhau tu cālayet // ### [1.85.121](https://indike.org/pramana/in.purana.linga.1.85.121) kiṃcit karṇāntaraṃ vidyād upāṃśuḥ sa japaḥ smṛtaḥ dhiyā yadakṣaraśreṇyā varṇādvarṇaṃ padātpadam // ### [1.85.122](https://indike.org/pramana/in.purana.linga.1.85.122) śabdārthaṃ cintayedbhūyaḥ sa tūkto mānaso japaḥ trayāṇāṃ japayajñānāṃ śreyān syāduttarottaraḥ // ### [1.85.123](https://indike.org/pramana/in.purana.linga.1.85.123) bhavedyajñaviśeṣeṇa vaiśiṣṭyaṃ tatphalasya ca japena devatā nityaṃ stūyamānā prasīdati // ### [1.85.124](https://indike.org/pramana/in.purana.linga.1.85.124) prasannā vipulān bhogān dadyānmuktiṃ ca śāśvatīm yakṣarakṣaḥpiśācāś ca grahāḥ sarve ca bhīṣaṇāḥ jāpinaṃ nopasarpanti bhayabhītāḥ samantataḥ // ### [1.85.125](https://indike.org/pramana/in.purana.linga.1.85.125) japena bhogān jayate ca mṛtyuṃ japena siddhiṃ labhate ca muktim // ### [1.85.126](https://indike.org/pramana/in.purana.linga.1.85.126) evaṃ labdhvā śivaṃ jñānaṃ jñātvā japavidhikramam // ### [1.85.127](https://indike.org/pramana/in.purana.linga.1.85.127) sadācārī japannityaṃ dhyāyan bhadraṃ samaśnute sadācāraṃ pravakṣyāmi samyagdharmasya sādhanam // ### [1.85.128](https://indike.org/pramana/in.purana.linga.1.85.128) yasmādācārahīnasya sādhanaṃ niṣphalaṃ bhavet ācāraḥ paramo dharma ācāraḥ paramaṃ tapaḥ // ### [1.85.129](https://indike.org/pramana/in.purana.linga.1.85.129) ācāraḥ paramā vidyā ācāraḥ paramā gatiḥ sadācāravatāṃ puṃsāṃ sarvatrāpyabhayaṃ bhavet // ### [1.85.130](https://indike.org/pramana/in.purana.linga.1.85.130) tadvadācārahīnānāṃ sarvatraiva bhayaṃ bhavet sadācāreṇa devatvam ṛṣitvaṃ ca varānane // ### [1.85.131](https://indike.org/pramana/in.purana.linga.1.85.131) upayānti kuyonitvaṃ tadvad ācāralaṅghanāt ācārahīnaḥ puruṣo loke bhavati ninditaḥ // ### [1.85.132](https://indike.org/pramana/in.purana.linga.1.85.132) tasmātsaṃsiddhimanvicchan samyagācāravān bhavet durvṛttaḥ śuddhibhūyiṣṭhaḥ pāpīyān jñānadūṣakaḥ // ### [1.85.133](https://indike.org/pramana/in.purana.linga.1.85.133) varṇāśramavidhānoktaṃ dharmaṃ kurvīta yatnataḥ // ### [1.85.134](https://indike.org/pramana/in.purana.linga.1.85.134) yasya yadvihitaṃ karma tatkurvanmatpriyaḥ sadā saṃdhyopāsanaśīlaḥ syāt sāyaṃ prātaḥ prasannadhīḥ // ### [1.85.135](https://indike.org/pramana/in.purana.linga.1.85.135) udayāstamayātpūrvam āramya vidhinā śuciḥ kāmānmohādbhayāllobhāt saṃdhyāṃ nātikrameddvijaḥ // ### [1.85.136](https://indike.org/pramana/in.purana.linga.1.85.136) saṃdhyātikramaṇādvipro brāhmaṇyātpatate yataḥ asatyaṃ na vadet kiṃcin na satyaṃ ca parityajet // ### [1.85.137](https://indike.org/pramana/in.purana.linga.1.85.137) yatsatyaṃ brahma ityāhur asatyaṃ brahmadūṣaṇam anṛtaṃ paruṣaṃ śāṭhyaṃ paiśunyaṃ pāpahetukam // ### [1.85.138](https://indike.org/pramana/in.purana.linga.1.85.138) paradārānparadravyaṃ parahiṃsāṃ ca sarvadā kvaciccāpi na kurvīta vācā ca manasā tathā // ### [1.85.139](https://indike.org/pramana/in.purana.linga.1.85.139) śūdrānnaṃ yātayāmānnaṃ naivedyaṃ śrāddhameva ca gaṇānnaṃ samudāyānnaṃ rājānnaṃ ca vivarjayet // ### [1.85.140](https://indike.org/pramana/in.purana.linga.1.85.140) annaśuddhau sattvaśuddhir na mṛdā na jalena vai sattvaśuddhau bhavetsiddhis tato 'nnaṃ pariśodhayet // ### [1.85.141](https://indike.org/pramana/in.purana.linga.1.85.141) rājapratigrahair dagdhān brāhmaṇān brahmavādinaḥ svinnānāmapi bījānāṃ punarjanma na vidyate // ### [1.85.142](https://indike.org/pramana/in.purana.linga.1.85.142) rājapratigraho ghoro buddhvā cādau viṣopamaḥ budhena parihartavyaḥ śvamāṃsaṃ cāpi varjayet // ### [1.85.143](https://indike.org/pramana/in.purana.linga.1.85.143) asnātvā na ca bhuñjīyād ajapo 'gnimapūjya ca parṇapṛṣṭhe na bhuñjīyād rātrau dīpaṃ vinā tathā // ### [1.85.144](https://indike.org/pramana/in.purana.linga.1.85.144) bhinnabhāṇḍe ca rathyāyāṃ patitānāṃ ca saṃnidhau śūdraśeṣaṃ na bhuñjīyāt sahānnaṃ śiśukairapi // ### [1.85.145](https://indike.org/pramana/in.purana.linga.1.85.145) śuddhānnaṃ snigdham aśnīyāt saṃskṛtaṃ cābhimantritam bhoktā śiva iti smṛtvā maunī caikāgramānasaḥ // ### [1.85.146](https://indike.org/pramana/in.purana.linga.1.85.146) āsyena na pibettoyaṃ tiṣṭhannañjalināpi vā vāmahastena śayyāyāṃ tathaivānyaṃkareṇa vā // ### [1.85.147](https://indike.org/pramana/in.purana.linga.1.85.147) vibhītakārkakārañjasnuhicchāyāṃ na cāśrayet staṃbhadīpamanuṣyāṇām anyeṣāṃ prāṇināṃ tathā // ### [1.85.148](https://indike.org/pramana/in.purana.linga.1.85.148) eko na gacchedadhvānaṃ bāhubhyāṃ nottarennadīm nāvaroheta kūpādiṃ nāroheduccapādapān // ### [1.85.149](https://indike.org/pramana/in.purana.linga.1.85.149) sūryāgnijaladevānāṃ gurūṇāṃ vimukhaḥ śubhe na kuryādiha kāryāṇi japakarma śubhāni vā // ### [1.85.150](https://indike.org/pramana/in.purana.linga.1.85.150) agnau na tāpayetpādau hastaṃ padbhyāṃ na saṃspṛśet agnernocchrayam āsīta nāgnau kiṃcin malaṃ tyajet // ### [1.85.151](https://indike.org/pramana/in.purana.linga.1.85.151) na jalaṃ tāḍayetpadbhyāṃ nāṃbhasyaṅgamalaṃ tyajet malaṃ prakṣālayet tīre prakṣālya snānamācaret // ### [1.85.152](https://indike.org/pramana/in.purana.linga.1.85.152) nakhāgrakeśanirdhūtasnānavastraghaṭodakam aśrīkaraṃ manuṣyāṇām aśuddhaṃ saṃspṛśedyadi // ### [1.85.153](https://indike.org/pramana/in.purana.linga.1.85.153) ajāśvānakhuroṣṭrāṇāṃ mārjanāt tuṣareṇukān saṃspṛśed yadi mūḍhātmā śriyaṃ hanti harerapi // ### [1.85.154](https://indike.org/pramana/in.purana.linga.1.85.154) mārjāraś ca gṛhe yasya so 'pyantyajasamo naraḥ bhojayedyastu viprendrān mārjārasaṃnidhau yadi // ### [1.85.155](https://indike.org/pramana/in.purana.linga.1.85.155) taccāṇḍālasamaṃ jñeyaṃ nātra kāryā vicāraṇā sphigvātaṃ śūrpavātaṃ ca vātaṃ prāṇamukhānilam // ### [1.85.156](https://indike.org/pramana/in.purana.linga.1.85.156) sukṛtāni harantyete saṃspṛṣṭāḥ puruṣasya tu uṣṇīṣī kañcukī nagno muktakeśo malāvṛtaḥ // ### [1.85.157](https://indike.org/pramana/in.purana.linga.1.85.157) apavitrakaro 'śuddhaḥ pralapanna japet kvacit krodho madaḥ kṣudhā tandrā niṣṭhīvanavijṛmbhaṇe // ### [1.85.158](https://indike.org/pramana/in.purana.linga.1.85.158) śvanīcadarśanaṃ nidrā pralāpāste japadviṣaḥ eteṣāṃ saṃbhave vāpi kuryātsūryādidarśanam // ### [1.85.159](https://indike.org/pramana/in.purana.linga.1.85.159) ācamya vā japeccheṣaṃ kṛtvā vā prāṇasaṃyamam sūryo 'gniścandramāścaiva grahanakṣatratārakāḥ // ### [1.85.160](https://indike.org/pramana/in.purana.linga.1.85.160) ete jyotīṃṣi proktāni vidvadbhir brāhmaṇais tathā prasārya pādau na japet kukkuṭāsana eva ca // ### [1.85.161](https://indike.org/pramana/in.purana.linga.1.85.161) anāsanaḥ śayāno vā rathyāyāṃ śūdrasannidhau raktabhūmyāṃ ca khaṭvāyāṃ na japejjāpakas tathā // ### [1.85.162](https://indike.org/pramana/in.purana.linga.1.85.162) āsanastho japetsamyak mantrārthagatamānasaḥ kauśeyaṃ vyāghracarmaṃ vā cailaṃ taulamathāpi vā // ### [1.85.163](https://indike.org/pramana/in.purana.linga.1.85.163) dāravaṃ tālaparṇaṃ vā āsanaṃ parikalpayet trisaṃdhyaṃ tu guroḥ pūjā kartavyā hitamicchatā // ### [1.85.164](https://indike.org/pramana/in.purana.linga.1.85.164) yo guruḥ sa śivaḥ prokto yaḥ śivaḥ sa guruḥ smṛtaḥ yathā śivas tathā vidyā yathā vidyā tathā guruḥ // ### [1.85.165](https://indike.org/pramana/in.purana.linga.1.85.165) śivavidyāgurostasmād bhaktyā ca sadṛśaṃ phalam sarvadevamayo devi sarvaśaktimayo hi saḥ // ### [1.85.166](https://indike.org/pramana/in.purana.linga.1.85.166) saguṇo nirguṇo vāpi tasyājñāṃ śirasā vahet śreyo 'rthī yastu gurvājñāṃ manasāpi na laṅghayet // ### [1.85.167](https://indike.org/pramana/in.purana.linga.1.85.167) gurvājñāpālakaḥ samyak jñānasaṃpattimaśnute gacchaṃstiṣṭhansvapan bhuñjan yadyatkarma samācaret // ### [1.85.168](https://indike.org/pramana/in.purana.linga.1.85.168) samakṣaṃ yadi tatsarvaṃ kartavyaṃ gurvanujñayā gurordevasamakṣaṃ vā na yatheṣṭāsano bhavet // ### [1.85.169](https://indike.org/pramana/in.purana.linga.1.85.169) gururdevo yataḥ sākṣāt tadgṛhaṃ devamandiram pāpinā ca yathāsaṃgāt tatpāpaiḥ patanaṃ bhavet // ### [1.85.170](https://indike.org/pramana/in.purana.linga.1.85.170) tadvadācāryasaṃgena taddharmaphalabhāgbhavet yathaiva vahnisaṃparkān malaṃ tyajati kāñcanam // ### [1.85.171](https://indike.org/pramana/in.purana.linga.1.85.171) tathaiva gurusaṃparkāt pāpaṃ tyajati mānavaḥ yathā vahnisamīpastho ghṛtakuṃbho vilīyate // ### [1.85.172](https://indike.org/pramana/in.purana.linga.1.85.172) tathā pāpaṃ vilīyeta ācāryasya samīpataḥ yathā prajvalito vahnir viṣṭhāṃ kāṣṭhaṃ ca nirdahet // ### [1.85.173](https://indike.org/pramana/in.purana.linga.1.85.173) gurustuṣṭo dahatyevaṃ pāpaṃ tanmantratejasā brahmā haris tathā rudro devāś ca munayas tathā // ### [1.85.174](https://indike.org/pramana/in.purana.linga.1.85.174) kurvantyanugrahaṃ tuṣṭā gurau tuṣṭe na saṃśayaḥ karmaṇā manasā vācā guroḥ krodhaṃ na kārayet // ### [1.85.175](https://indike.org/pramana/in.purana.linga.1.85.175) tasya krodhena dahyante āyuḥśrījñānasatkriyāḥ tatkrodhaṃ ye kariṣyanti teṣāṃ yajñāś ca niṣphalāḥ // ### [1.85.176](https://indike.org/pramana/in.purana.linga.1.85.176) japānyaniyamāścaiva nātra kāryā vicāraṇā gurorviruddhaṃ yadvākyaṃ na vadetsarvayatnataḥ // ### [1.85.177](https://indike.org/pramana/in.purana.linga.1.85.177) vaded yadi mahāmohād rauravaṃ narakaṃ vrajet cittenaiva ca vittena tathā vācā ca suvratāḥ // ### [1.85.178](https://indike.org/pramana/in.purana.linga.1.85.178) mithyā na kārayeddevi kriyayā ca guroḥ sadā durguṇe khyāpite tasya nairguṇyaśatabhāgbhavet // ### [1.85.179](https://indike.org/pramana/in.purana.linga.1.85.179) guṇe tu khyāpite tasya sārvaguṇyaphalaṃ bhavet gurorhitaṃ priyaṃ kuryād ādiṣṭo vā na vā sadā // ### [1.85.180](https://indike.org/pramana/in.purana.linga.1.85.180) asamakṣaṃ samakṣaṃ vā guroḥ kāryaṃ samācaret gurorhitaṃ priyaṃ kuryān manovākkāyakarmabhiḥ // ### [1.85.181](https://indike.org/pramana/in.purana.linga.1.85.181) kurvanpatatyadho gatvā tatraiva parivartate tasmātsa sarvadopāsyo vandanīyaś ca sarvadā // ### [1.85.182](https://indike.org/pramana/in.purana.linga.1.85.182) samīpastho 'pyanujñāpya vadettadvimukho gurum evamācāravān bhakto nityaṃ japaparāyaṇaḥ // ### [1.85.183](https://indike.org/pramana/in.purana.linga.1.85.183) gurupriyakaro mantraṃ viniyoktuṃ tato 'rhati viniyogaṃ pravakṣyāmi siddhamantraprayojanam // ### [1.85.184](https://indike.org/pramana/in.purana.linga.1.85.184) daurbalyaṃ yāti tanmantraṃ viniyogamajānataḥ yasya yena viyuñjīta kāryeṇa tu viśeṣataḥ // ### [1.85.185](https://indike.org/pramana/in.purana.linga.1.85.185) viniyogaḥ sa vijñeya aihikāmuṣmikaṃ phalam viniyogajamāyuṣyam ārogyaṃ tanunityatā // ### [1.85.186](https://indike.org/pramana/in.purana.linga.1.85.186) rājyaiśvaryaṃ ca vijñānaṃ svargo nirvāṇa eva ca prokṣaṇaṃ cābhiṣekaṃ ca aghamarṣaṇameva ca // ### [1.85.187](https://indike.org/pramana/in.purana.linga.1.85.187) snāne ca saṃdhyayoścaiva kuryādekādaśena vai śuciḥ parvatamāruhya japellakṣamatandritaḥ // ### [1.85.188](https://indike.org/pramana/in.purana.linga.1.85.188) mahānadyāṃ dvilakṣaṃ tu dīrghamāyuravāpnuyāt dūrvāṅkurāstilā vāṇī guḍūcī ghuṭikā tathā // ### [1.85.189](https://indike.org/pramana/in.purana.linga.1.85.189) teṣāṃ tu daśasāhasraṃ homamāyuṣyavardhanam aśvatthavṛkṣamāśritya japellakṣadvayaṃ sudhīḥ // ### [1.85.190](https://indike.org/pramana/in.purana.linga.1.85.190) śanaiścaradine spṛṣṭvā dīrghāyuṣyaṃ labhennaraḥ śanaiścaradine 'śvatthaṃ pāṇibhyāṃ saṃspṛśetsudhīḥ // ### [1.85.191](https://indike.org/pramana/in.purana.linga.1.85.191) japedaṣṭottaraśataṃ somamṛtyuharo bhavet ādityābhimukho bhūtvā japellakṣamananyadhīḥ // ### [1.85.192](https://indike.org/pramana/in.purana.linga.1.85.192) arkairaṣṭaśataṃ japtvā juhvanvyādhervimucyate samastavyādhiśāntyarthaṃ palāśasamidhair naraḥ // ### [1.85.193](https://indike.org/pramana/in.purana.linga.1.85.193) hutvā daśasahasraṃ tu nirogī manujo bhavet nityamaṣṭaśataṃ japtvā pibed ambho 'rkasannidhau // ### [1.85.194](https://indike.org/pramana/in.purana.linga.1.85.194) audaryairvyādhibhiḥ sarvair māsenaikena mucyate ekādaśena bhuñjīyād annaṃ caivābhimantritam // ### [1.85.195](https://indike.org/pramana/in.purana.linga.1.85.195) bhakṣyaṃ cānyattathā peyaṃ viṣamapyamṛtaṃ bhavet japel lakṣaṃ tu pūrvāhṇe hutvā cāṣṭaśatena vai // ### [1.85.196](https://indike.org/pramana/in.purana.linga.1.85.196) sūryaṃ nityamupasthāya samyagārogyamāpnuyāt nadītoyena sampūrṇaṃ ghaṭaṃ saṃspṛśya śobhanam // ### [1.85.197](https://indike.org/pramana/in.purana.linga.1.85.197) japtvāyutaṃ ca tatsnānād rogāṇāṃ bheṣajaṃ bhavet aṣṭāviṃśajjapitvānnam aśnīyād anvahaṃ śuciḥ // ### [1.85.198](https://indike.org/pramana/in.purana.linga.1.85.198) hutvā ca tāvatpālāśair evaṃ vārogyam aśnute candrasūryagrahe pūrvam upoṣya vidhinā śuciḥ // ### [1.85.199](https://indike.org/pramana/in.purana.linga.1.85.199) yāvadgrahaṇamokṣaṃ tu tāvannadyāṃ samāhitaḥ japetsamudragāminyāṃ vimokṣe grahaṇasya tu // ### [1.85.200](https://indike.org/pramana/in.purana.linga.1.85.200) aṣṭottarasahasreṇa pibedbrāhmīrasaṃ dvijāḥ aihikāṃ labhate medhāṃ sarvaśāstradharāṃ śubhām // _First 200 of 233 passages. [Read on](https://indike.org/pramana/in.purana.linga.1.85)_ ## Commentaries (2) - [Śivatosaṇī Liṅgapurāṇaṭīkā](https://indike.org/pramana/in.purana.linga!ganesa.99.1) — Gaṇeśa Bhaṭṭa, Sanskrit - [Śivatoṣiṇī](https://indike.org/pramana/in.purana.linga!ganesa-ballala-natu.99.1) — Gaṇeśa Ballāla Nātū, Sanskrit ## Linked texts (14) - [Kriyāsāra](https://indike.org/pramana/in.sampradaya.saiva.virasaiva.kriyasara.2.1.2245) — Śrīkaṇtha, Sanskrit - [Merutantra](https://indike.org/pramana/in.sampradaya.general.sakta.merutantra.19.45) — Gommaṭa, Sanskrit - [Vīraśaivācārapradīpikā](https://indike.org/pramana/in.sampradaya.saiva.virasaiva.virasaivacarapradipika.412) — Gurudeva 1575, Sanskrit - [Lalitāsahasranāmastotra](https://indike.org/pramana/in.sampradaya.general.devistotra.lalita.lalitasahasranamastotra.146_1821) — Śambhu, Sanskrit - [Śivadharma (Nandiprokta)](https://indike.org/pramana/in.sampradaya.saiva.sivadharma.sivadharmanandiprokta.2.84) — Sanskrit - [Liṅga](https://indike.org/pramana/in.purana.linga-anon.99.2) — Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.99.2) — Ativīrarāma Pāṇṭiyar 1500, Sanskrit - [Śaivaratnākara](https://indike.org/pramana/in.niti.dharma.sampradaya.saivaratnakara.12.1) — Jyotirnātha, Sanskrit - [Merutantra (Śiva)](https://indike.org/pramana/in.sampradaya.general.sakta.merutantra-siva.39.43) — Śiva, Sanskrit - [Nityācārapaddhati (Vidyākara vājapeyin)](https://indike.org/pramana/in.niti.dharma.acara.ahnika.nityacarapaddhati-vidyakara-vajapeyin.10.p22) — Vidyākara vājapeyin, Sanskrit - [Studies in the Purāṇic Records on Hindu Rites and Customs](https://indike.org/pramana/ins.religion.hazra-1940.c7.s9.19) — R. C. Hazra, English - [Vratakhaṇḍa](https://indike.org/pramana/in.niti.dharma.vrata.vratakhanda.4.p1.4) — Hemādri, Sanskrit - [Mantramahārṇava (ed. Ram Kumar Rai)](https://indike.org/pramana/in.sampradaya.saiva.agama.mantramaharnava*rai1990.2.103) — Sanskrit - [Śivadharmottara (another edition)](https://indike.org/pramana/in.sampradaya.saiva.sivadharma.sivadharmottara*alt.1.10.174) — Sanskrit --- Source: [https://indike.org/pramana/in.purana.linga.1.85](https://indike.org/pramana/in.purana.linga.1.85) · Pramāṇa