[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 1.8 # Lingapurana 1.8 Liṅgapurāṇa 1.8 - **Language:** Sanskrit ### [1.8.1](https://indike.org/pramana/in.purana.linga.1.8.1) sūta uvāca saṃkṣepataḥ pravakṣyāmi yogasthānāni sāmpratam kalpitāni śivenaiva hitāya jagatāṃ dvijāḥ // ### [1.8.2](https://indike.org/pramana/in.purana.linga.1.8.2) galādadho vitastyā yan nābherupari cottamam yogasthānamadho nābher āvartaṃ madhyamaṃ bhruvoḥ // ### [1.8.3](https://indike.org/pramana/in.purana.linga.1.8.3) sarvārthajñānaniṣpattir ātmano yoga ucyate ekāgratā bhaveccaiva sarvadā tatprasādataḥ // ### [1.8.4](https://indike.org/pramana/in.purana.linga.1.8.4) prasādasya svarūpaṃ yat svasaṃvedyaṃ dvijottamāḥ vaktuṃ na śakyaṃ brahmādyaiḥ kramaśo jāyate nṛṇām // ### [1.8.5](https://indike.org/pramana/in.purana.linga.1.8.5) yogaśabdena nirvāṇaṃ māheśaṃ padamucyate tasya heturṛṣerjñānaṃ jñānaṃ tasya prasādataḥ // ### [1.8.6](https://indike.org/pramana/in.purana.linga.1.8.6) jñānena nirdahetpāpaṃ nirudhya viṣayān sadā niruddhendriyavṛttestu yogasiddhirbhaviṣyati // ### [1.8.7](https://indike.org/pramana/in.purana.linga.1.8.7) yogo nirodho vṛtteṣu cittasya dvijasattamāḥ sādhanānyaṣṭadhā cāsya kathitānīha siddhaye // ### [1.8.8](https://indike.org/pramana/in.purana.linga.1.8.8) yamastu prathamaḥ prokto dvitīyo niyamas tathā tṛtīyamāsanaṃ proktaṃ prāṇāyāmastataḥ param // ### [1.8.9](https://indike.org/pramana/in.purana.linga.1.8.9) pratyāhāraṃ pañcamo vai dhāraṇā ca tataḥ parā dhyānaṃ saptamamityuktaṃ samādhistvaṣṭamaḥ smṛtaḥ // ### [1.8.10](https://indike.org/pramana/in.purana.linga.1.8.10) tapasyuparamaścaiva yama ityabhidhīyate ahiṃsā prathamo hetur yamasya yamināṃ varāḥ // ### [1.8.11](https://indike.org/pramana/in.purana.linga.1.8.11) satyamasteyamaparaṃ brahmacaryāparigrahau niyamasyāpi vai mūlaṃ yama eva na saṃśayaḥ // ### [1.8.12](https://indike.org/pramana/in.purana.linga.1.8.12) ātmavat sarvabhūtānāṃ hitāyaiva pravartanam ahiṃsaiṣā samākhyātā yā cātmajñānasiddhidā // ### [1.8.13](https://indike.org/pramana/in.purana.linga.1.8.13) dṛṣṭaṃ śrutaṃ cānumitaṃ svānubhūtaṃ yathārthataḥ kathanaṃ satyamityuktaṃ parapīḍāvivarjitam // ### [1.8.14](https://indike.org/pramana/in.purana.linga.1.8.14) nāślīlaṃ kīrtayedevaṃ brāhmaṇānāmiti śrutiḥ paradoṣān parijñāya na vadediti cāparam // ### [1.8.15](https://indike.org/pramana/in.purana.linga.1.8.15) anādānaṃ parasvānām āpadyapi vicārataḥ manasā karmaṇā vācā tadasteyaṃ samāsataḥ // ### [1.8.16](https://indike.org/pramana/in.purana.linga.1.8.16) maithunasyāpravṛttirhi manovākkāyakarmaṇā brahmacaryamiti proktaṃ yatīnāṃ brahmacāriṇām // ### [1.8.17](https://indike.org/pramana/in.purana.linga.1.8.17) iha vaikhānasānāṃ ca vidārāṇāṃ viśeṣataḥ sadārāṇāṃ gṛhasthānaṃ tathaiva ca vadāmi vaḥ // ### [1.8.18](https://indike.org/pramana/in.purana.linga.1.8.18) svadāre vidhivatkṛtvā nivṛttiścānyataḥ sadā manasā karmaṇā vācā brahmacaryamiti smṛtam // ### [1.8.19](https://indike.org/pramana/in.purana.linga.1.8.19) medhyā svanārī sambhogaṃ kṛtvā snānaṃ samācaret evaṃ gṛhastho yuktātmā brahmacārī na saṃśayaḥ // ### [1.8.20](https://indike.org/pramana/in.purana.linga.1.8.20) ahiṃsāpyevamevaiṣā dvijagurvagnipūjane vidhinā yādṛśī hiṃsā sā tvahiṃsā iti smṛtā // ### [1.8.21](https://indike.org/pramana/in.purana.linga.1.8.21) striyaḥ sadā parityājyāḥ saṅgaṃ naiva ca kārayet kuṇapeṣu yathā cittaṃ tathā kuryādvicakṣaṇaḥ // ### [1.8.22](https://indike.org/pramana/in.purana.linga.1.8.22) viṇmūtrotsargakāleṣu bahirbhūmau yathā matiḥ tathā kāryā ratau cāpi svadāre cānyataḥ kutaḥ // ### [1.8.23](https://indike.org/pramana/in.purana.linga.1.8.23) aṅgārasadṛśī nārī ghṛtakumbhasamaḥ pumān tasmānnārīṣu saṃsargaṃ dūrataḥ parivarjayet // ### [1.8.24](https://indike.org/pramana/in.purana.linga.1.8.24) bhogena tṛptirnaivāsti viṣayāṇāṃ vicārataḥ tasmādvirāgaḥ kartavyo manasā karmaṇā girā // ### [1.8.25](https://indike.org/pramana/in.purana.linga.1.8.25) na jātu kāmaḥ kāmānām upabhogena śāmyati haviṣā kṛṣṇavartmeva bhūya evābhivardhate // ### [1.8.26](https://indike.org/pramana/in.purana.linga.1.8.26) tasmāttyāgaḥ sadā kāryas tv amṛtatvāya yoginā avirakto yato martyo nānāyoniṣu vartate // ### [1.8.27](https://indike.org/pramana/in.purana.linga.1.8.27) tyāgenaivāmṛtatvaṃ hi śrutismṛtividāṃ varāḥ karmaṇā prajayā nāsti dravyeṇa dvijasattamāḥ // ### [1.8.28](https://indike.org/pramana/in.purana.linga.1.8.28) tasmādvirāgaḥ kartavyo manovākkāyakarmaṇā ṛtau ṛtau nivṛttistu brahmacaryamiti smṛtam // ### [1.8.29](https://indike.org/pramana/in.purana.linga.1.8.29) yamāḥ saṃkṣepataḥ proktā niyamāṃś ca vadāmi vaḥ śaucamijyā tapo dānaṃ svādhyāyopasthanigrahaḥ // ### [1.8.30](https://indike.org/pramana/in.purana.linga.1.8.30) vratopavāsamaunaṃ ca snānaṃ ca niyamā daśa niyamaḥ syādanīhā ca śaucaṃ tuṣṭistapas tathā // ### [1.8.31](https://indike.org/pramana/in.purana.linga.1.8.31) japaḥ śivapraṇīdhānaṃ padmakādyaṃ tathāsanam bāhyamābhyantaraṃ proktaṃ śaucamābhyantaraṃ varam // ### [1.8.32](https://indike.org/pramana/in.purana.linga.1.8.32) bāhyaśaucena yuktaḥ saṃs tathā cābhyantaraṃ caret āgneyaṃ vāruṇaṃ brāhmaṃ kartavyaṃ śivapūjakaiḥ // ### [1.8.33](https://indike.org/pramana/in.purana.linga.1.8.33) snānaṃ vidhānataḥ samyak paścād ābhyantaraṃ caret ā dehāntaṃ mṛdālipya tīrthatoyeṣu sarvadā // ### [1.8.34](https://indike.org/pramana/in.purana.linga.1.8.34) avagāhyāpi malino hy antaḥ śaucavivarjitaḥ śaivalā jhaṣakā matsyāḥ sattvā matsyopajīvinaḥ // ### [1.8.35](https://indike.org/pramana/in.purana.linga.1.8.35) sadāvagāhya salile viśuddhāḥ kiṃ dvijottamāḥ tasmādābhyantaraṃ śaucaṃ sadā kāryaṃ vidhānataḥ // ### [1.8.36](https://indike.org/pramana/in.purana.linga.1.8.36) ātmajñānāmbhasi snātvā sakṛdālipya bhāvataḥ suvairāgyamṛdā śuddhaḥ śaucamevaṃ prakīrtitam // ### [1.8.37](https://indike.org/pramana/in.purana.linga.1.8.37) śuddhasya siddhayo dṛṣṭā naivāśuddhasya siddhayaḥ nyāyenāgatayā vṛttyā saṃtuṣṭo yastu suvrataḥ // ### [1.8.38](https://indike.org/pramana/in.purana.linga.1.8.38) saṃtoṣastasya satatam atītārthasya cāsmṛtiḥ cāndrāyaṇādinipuṇas tapāṃsi suśubhāni ca // ### [1.8.39](https://indike.org/pramana/in.purana.linga.1.8.39) svādhyāyastu japaḥ proktaḥ praṇavasya tridhā smṛtaḥ vācikaścādhamo mukhya upāṃśuścottamottamaḥ // ### [1.8.40](https://indike.org/pramana/in.purana.linga.1.8.40) mānaso vistareṇaiva kalpe pañcākṣare smṛtaḥ tathā śivapraṇīdhānaṃ manovākkāyakarmaṇā // ### [1.8.41](https://indike.org/pramana/in.purana.linga.1.8.41) śivajñānaṃ gurorbhaktir acalā supratiṣṭhitā nigraho hyapahṛtyāśu prasaktānīndriyāṇi ca // ### [1.8.42](https://indike.org/pramana/in.purana.linga.1.8.42) viṣayeṣu samāsena pratyāhāraḥ prakīrtitaḥ cittasya dhāraṇā proktā sthānabandhaḥ samāsataḥ // ### [1.8.43](https://indike.org/pramana/in.purana.linga.1.8.43) tasyāḥ svāsthyena dhyānaṃ ca samādhiś ca vicārataḥ tatraikacittatā dhyānaṃ pratyayāntaravarjitam // ### [1.8.44](https://indike.org/pramana/in.purana.linga.1.8.44) cidbhāsamarthamātrasya dehaśūnyamiva sthitam samādhiḥ sarvahetuś ca prāṇāyāma iti smṛtaḥ // ### [1.8.45](https://indike.org/pramana/in.purana.linga.1.8.45) prāṇaḥ svadehajo vāyur yamastasya nirodhanam tridhā dvijairyamaḥ prokto mando madhyottamas tathā // ### [1.8.46](https://indike.org/pramana/in.purana.linga.1.8.46) prāṇāpānanirodhastu prāṇāyāmaḥ prakīrtitaḥ prāṇāyāmasya mānaṃ tu mātrādvādaśakaṃ smṛtam // ### [1.8.47](https://indike.org/pramana/in.purana.linga.1.8.47) nīco dvādaśamātrastu uddhāto dvādaśaḥ smṛtaḥ madhyamas tu dviruddhātaś caturviṃśatimātrakaḥ // ### [1.8.48](https://indike.org/pramana/in.purana.linga.1.8.48) mukhyastu yastriruddhātaḥ ṣaṭtriṃśanmātra ucyate prasvedakampanotthānajanakaśca yathākramam // ### [1.8.49](https://indike.org/pramana/in.purana.linga.1.8.49) ānandodbhavayogārthaṃ nidrāghūrṇistathaiva ca romāñcadhvanisaṃviddhasvāṅgamoṭanakampanam // ### [1.8.50](https://indike.org/pramana/in.purana.linga.1.8.50) bhramaṇaṃ svedajanyā sā saṃvinmūrchā bhavedyadā tadottamottamaḥ proktaḥ prāṇāyāmaḥ suśobhanaḥ // ### [1.8.51](https://indike.org/pramana/in.purana.linga.1.8.51) sagarbho 'garbha ityuktaḥ sajapo vijapaḥ kramāt ibho vā śarabho vāpi durādharṣo 'tha kesarī // ### [1.8.52](https://indike.org/pramana/in.purana.linga.1.8.52) gṛhīto damyamānastu yathāsvasthastu jāyate tathā samīraṇo 'svastho durādharṣaś ca yoginām // ### [1.8.53](https://indike.org/pramana/in.purana.linga.1.8.53) nyāyataḥ sevyamānastu sa evaṃ svasthatāṃ vrajet yathaiva mṛgarāṅnāgaḥ śarabho vāpi durmadaḥ // ### [1.8.54](https://indike.org/pramana/in.purana.linga.1.8.54) kālāntaravaśādyogād damyate paramādarāt tathā paricayātsvāsthyaṃ samatvaṃ cādhigacchati // ### [1.8.55](https://indike.org/pramana/in.purana.linga.1.8.55) yogādabhyasate yastu vyasanaṃ naiva jāyate evamabhyasyamānastu muneḥ prāṇo vinirdahet // ### [1.8.56](https://indike.org/pramana/in.purana.linga.1.8.56) manovākkāyajān doṣān karturdehaṃ ca rakṣati saṃyuktasya tathā samyak prāṇāyāmena dhīmataḥ // ### [1.8.57](https://indike.org/pramana/in.purana.linga.1.8.57) doṣāttasmācca naśyanti niśvāsastena jīryate prāṇāyāmena sidhyanti divyāḥ śāntyādayaḥ kramāt // ### [1.8.58](https://indike.org/pramana/in.purana.linga.1.8.58) śāntiḥ praśāntirdīptiś ca prasādaś ca tathā kramāt ādau catuṣṭayasyeha proktā śāntiriha dvijāḥ // ### [1.8.59](https://indike.org/pramana/in.purana.linga.1.8.59) sahajāgantukānāṃ ca pāpānāṃ śāntir ucyate praśāntiḥ saṃyamaḥ samyag vacasāmiti saṃsmṛtā // ### [1.8.60](https://indike.org/pramana/in.purana.linga.1.8.60) prakāśo dīptirityuktaḥ sarvataḥ sarvadā dvijāḥ sarvendriyaprasādastu buddhervai marutāmapi // ### [1.8.61](https://indike.org/pramana/in.purana.linga.1.8.61) prasāda iti samproktaḥ svānte tviha catuṣṭaye prāṇo 'pānaḥ samānaś ca udāno vyāna eva ca // ### [1.8.62](https://indike.org/pramana/in.purana.linga.1.8.62) nāgaḥ kūrmastu kṛkalo devadatto dhanaṃjayaḥ eteṣāṃ yaḥ prasādastu marutāmiti saṃsmṛtaḥ // ### [1.8.63](https://indike.org/pramana/in.purana.linga.1.8.63) prayāṇaṃ kurute tasmād vāyuḥ prāṇa iti smṛtaḥ apānayatyapānastu āhārādīn krameṇa ca // ### [1.8.64](https://indike.org/pramana/in.purana.linga.1.8.64) vyāno vyānāmayatyaṅgaṃ vyādhyādīnāṃ prakopakaḥ udvejayati marmāṇi udāno 'yaṃ prakīrtitaḥ // ### [1.8.65](https://indike.org/pramana/in.purana.linga.1.8.65) samaṃ nayati gātrāṇi samānaḥ pañca vāyavaḥ udgāre nāga ākhyātaḥ kūrma unmīlane tu saḥ // ### [1.8.66](https://indike.org/pramana/in.purana.linga.1.8.66) kṛkalaḥ kṣutakāyaiva devadatto vijṛmbhaṇe dhanaṃjayo mahāghoṣaḥ sarvagaḥ sa mṛte 'pi hi // ### [1.8.67](https://indike.org/pramana/in.purana.linga.1.8.67) iti yo daśavāyūnāṃ prāṇāyāmena sidhyati prasādo 'sya turīyā tu saṃjñā viprāścatuṣṭaye // ### [1.8.68](https://indike.org/pramana/in.purana.linga.1.8.68) visvarastu mahān prajño mano brahmā citiḥ smṛtiḥ khyātiḥ saṃvittataḥ paścād īśvaro matireva ca // ### [1.8.69](https://indike.org/pramana/in.purana.linga.1.8.69) buddheretāḥ dvijāḥ saṃjñā mahataḥ parikīrtitāḥ asyā buddheḥ prasādastu prāṇāyāmena sidhyati // ### [1.8.70](https://indike.org/pramana/in.purana.linga.1.8.70) visvaro visvarībhāvo dvaṃdvānāṃ munisattamāḥ agrajaḥ sarvatattvānāṃ mahānyaḥ parimāṇataḥ // ### [1.8.71](https://indike.org/pramana/in.purana.linga.1.8.71) yatpramāṇaguhā prajñā manastu manute yataḥ bṛhattvād bṛṃhaṇatvācca brahmā brahmavidāṃvarāḥ // ### [1.8.72](https://indike.org/pramana/in.purana.linga.1.8.72) sarvakarmāṇi bhogārthaṃ yaccinoti citiḥ smṛtā smarate yatsmṛtiḥ sarvaṃ saṃvidvai vindate yataḥ // ### [1.8.73](https://indike.org/pramana/in.purana.linga.1.8.73) khyāyate yattviti khyātir jñānādibhir anekaśaḥ sarvatattvādhipaḥ sarvaṃ vijānāti yadīśvaraḥ // ### [1.8.74](https://indike.org/pramana/in.purana.linga.1.8.74) manute manyate yasmān matirmatimatāṃvarāḥ arthaṃ bodhayate yacca budhyate buddhirucyate // ### [1.8.75](https://indike.org/pramana/in.purana.linga.1.8.75) asyā buddheḥ prasādastu prāṇāyāmena sidhyati doṣānvinirdahetsarvān prāṇāyāmādasau yamī // ### [1.8.76](https://indike.org/pramana/in.purana.linga.1.8.76) pātakaṃ dhāraṇābhistu pratyāhāreṇa nirdahet viṣayānviṣavaddhyātvā dhyānenānīśvarān guṇān // ### [1.8.77](https://indike.org/pramana/in.purana.linga.1.8.77) samādhinā yatiśreṣṭhāḥ prajñāvṛddhiṃ vivardhayet sthānaṃ labdhvaiva kurvīta yogāṣṭāṅgāni vai kramāt // ### [1.8.78](https://indike.org/pramana/in.purana.linga.1.8.78) labdhvāsanāni vidhivad yogasiddhyartham ātmavit ādeśakāle yogasya darśanaṃ hi na vidyate // ### [1.8.79](https://indike.org/pramana/in.purana.linga.1.8.79) agnyabhyāse jale vāpi śuṣkaparṇacaye tathā jantuvyāpte śmaśāne ca jīrṇagoṣṭhe catuṣpathe // ### [1.8.80](https://indike.org/pramana/in.purana.linga.1.8.80) saśabde sabhaye vāpi caityavalmīkasaṃcaye aśubhe durjanākrānte maśakādisamanvite // ### [1.8.81](https://indike.org/pramana/in.purana.linga.1.8.81) nācareddehabādhāyāṃ daurmanasyādisambhave sugupte tu śubhe ramye guhāyāṃ parvatasya tu // ### [1.8.82](https://indike.org/pramana/in.purana.linga.1.8.82) bhavakṣetre sugupte vā bhavārāme vane 'pi vā gṛhe tu suśubhe deśe vijane jantuvarjite // ### [1.8.83](https://indike.org/pramana/in.purana.linga.1.8.83) atyantanirmale samyak supralipte vicitrite darpaṇodarasaṃkāśe kṛṣṇāgarusudhūpite // ### [1.8.84](https://indike.org/pramana/in.purana.linga.1.8.84) nānāpuṣpasamākīrṇe vitānopari śobhite phalapallavamūlāḍhye kuśapuṣpasamanvite // ### [1.8.85](https://indike.org/pramana/in.purana.linga.1.8.85) samāsanastho yogāṅgāny abhyaseddhṛṣitaḥ svayam praṇipatya guruṃ paścād bhavaṃ devīṃ vināyakam // ### [1.8.86](https://indike.org/pramana/in.purana.linga.1.8.86) yogīśvarān saśiṣyāṃś ca yogaṃ yuñjīta yogavit āsanaṃ svastikaṃ baddhvā padmamardhāsanaṃ tu vā // ### [1.8.87](https://indike.org/pramana/in.purana.linga.1.8.87) samajānus tathā dhīmān ekajānurathāpivā samaṃ dṛḍhāsano bhūtvā saṃhṛtya caraṇāvubhau // ### [1.8.88](https://indike.org/pramana/in.purana.linga.1.8.88) saṃvṛtāsyopabaddhākṣa uro viṣṭabhya cāgrataḥ pārṣṇibhyāṃ vṛṣaṇau rakṣaṃs tathā prajananaṃ punaḥ // ### [1.8.89](https://indike.org/pramana/in.purana.linga.1.8.89) kiṃcidunnāmitaśira dantairdantānna saṃspṛśet samprekṣya nāsikāgraṃ svaṃ diśaścānavalokayan // ### [1.8.90](https://indike.org/pramana/in.purana.linga.1.8.90) tamaḥ pracchādya rajasā rajaḥ sattvena chādayet tataḥ sattvasthito bhūtvā śivadhyānaṃ samabhyaset // ### [1.8.91](https://indike.org/pramana/in.purana.linga.1.8.91) oṃkāravācyaṃ paramaṃ śuddhaṃ dīpaśikhākṛtim dhyāyedvai puṇḍarīkasya karṇikāyāṃ samāhitaḥ // ### [1.8.92](https://indike.org/pramana/in.purana.linga.1.8.92) nābheradhastādvā vidvān dhyātvā kamalamuttamam tryaṅgule cāṣṭakoṇaṃ vā pañcakoṇamathāpi vā // ### [1.8.93](https://indike.org/pramana/in.purana.linga.1.8.93) trikoṇaṃ ca tathāgneyaṃ saumyaṃ sauraṃ svaśaktibhiḥ sauraṃ saumya tathāgneyam atha vānukrameṇa tu // ### [1.8.94](https://indike.org/pramana/in.purana.linga.1.8.94) āgneyaṃ ca tataḥ sauraṃ saumyamevaṃ vidhānataḥ agneradhaḥ prakalpyaivaṃ dharmādīnāṃ catuṣṭayam // ### [1.8.95](https://indike.org/pramana/in.purana.linga.1.8.95) guṇatrayaṃ krameṇaiva maṇḍalopari bhāvayet sattvasthaṃ cintayedrudraṃ svaśaktyā parimaṇḍitam // ### [1.8.96](https://indike.org/pramana/in.purana.linga.1.8.96) nābhau vātha gale vāpi bhrūmadhye vā yathāvidhi lalāṭaphalikāyāṃ vā mūrdhni dhyānaṃ samācaret // ### [1.8.97](https://indike.org/pramana/in.purana.linga.1.8.97) dvidale ṣoḍaśāre vā dvādaśāre krameṇa tu daśāre vā ṣaḍasre vā caturasre smarecchivam // ### [1.8.98](https://indike.org/pramana/in.purana.linga.1.8.98) kanakābhe tathāgārasaṃnibhe susite 'pi vā dvādaśādityasaṃkāśe candrabimbasame 'pi vā // ### [1.8.99](https://indike.org/pramana/in.purana.linga.1.8.99) vidyutkoṭinibhe sthāne cintayetparameśvaram agnivarṇe 'thavā vidyud valayābhe samāhitaḥ // ### [1.8.100](https://indike.org/pramana/in.purana.linga.1.8.100) vajrakoṭiprabhe sthāne padmarāganibhe 'pi vā nīlalohitabimbe vā yogī dhyānaṃ samabhyaset // ### [1.8.101](https://indike.org/pramana/in.purana.linga.1.8.101) maheśvaraṃ hṛdi dhyāyen nābhipadme sadāśivam candracūḍaṃ lalāṭe tu bhrūmadhye śaṃkaraṃ svayam // ### [1.8.102](https://indike.org/pramana/in.purana.linga.1.8.102) divye ca śāśvatasthāne śivadhyānaṃ samabhyaset nirmalaṃ niṣkalaṃ brahma suśāntaṃ jñānarūpiṇam // ### [1.8.103](https://indike.org/pramana/in.purana.linga.1.8.103) alakṣaṇamanirdeśyam aṇoralpataraṃ śubham nirālambam atarkyaṃ ca vināśotpattivarjitam // ### [1.8.104](https://indike.org/pramana/in.purana.linga.1.8.104) kaivalyaṃ caiva nirvāṇaṃ niḥśreyasam anuttamam amṛtaṃ cākṣaraṃ brahma hy apunarbhavam adbhutam // ### [1.8.105](https://indike.org/pramana/in.purana.linga.1.8.105) mahānandaṃ parānandaṃ yogānandamanāmayam heyopādeyarahitaṃ sūkṣmātsūkṣmataraṃ śivam // ### [1.8.106](https://indike.org/pramana/in.purana.linga.1.8.106) svayaṃvedyamavedyaṃ tac chivaṃ jñānamayaṃ param atīndriyam anābhāsaṃ paraṃ tattvaṃ parātparam // ### [1.8.107](https://indike.org/pramana/in.purana.linga.1.8.107) sarvopādhivinirmuktaṃ dhyānagamyaṃ vicārataḥ advayaṃ tamasaścaiva parastātsaṃsthitaṃ param // ### [1.8.108](https://indike.org/pramana/in.purana.linga.1.8.108) manasyevaṃ mahādevaṃ hṛtpadme vāpi cintayet nābhau sadāśivaṃ cāpi sarvadevātmakaṃ vibhum // ### [1.8.109](https://indike.org/pramana/in.purana.linga.1.8.109) dehamadhye śivaṃ devaṃ śuddhajñānamayaṃ vibhum kanyasenaiva mārgeṇa codghātenāpi śaṃkaram // ### [1.8.110](https://indike.org/pramana/in.purana.linga.1.8.110) kramaśaḥ kanyasenaiva madhyamenāpi suvrataḥ uttamenāpi vai vidvān kumbhakena samabhyaset // ### [1.8.111](https://indike.org/pramana/in.purana.linga.1.8.111) dvātriṃśad recayeddhīmān hṛdi nābhau samāhitaḥ recakaṃ pūrakaṃ tyaktvā kumbhakaṃ ca dvijottamāḥ // ### [1.8.112](https://indike.org/pramana/in.purana.linga.1.8.112) sākṣātsamarasenaiva dehamadhye smarecchivam ekībhāvaṃ sametyaivaṃ tatra yadrasasambhavam // ### [1.8.113](https://indike.org/pramana/in.purana.linga.1.8.113) ānandaṃ brahmaṇo vidvān sākṣātsamarase sthitaḥ dhāraṇā dvādaśāyāmā dhyānaṃ dvādaśa dhāraṇam // ### [1.8.114](https://indike.org/pramana/in.purana.linga.1.8.114) dhyānaṃ dvādaśakaṃ yāvat samādhir abhidhīyate athavā jñānināṃ viprāḥ samparkādeva jāyate // ### [1.8.115](https://indike.org/pramana/in.purana.linga.1.8.115) prayatnādvā tayostulyaṃ cirādvā hyacirāddvijāḥ yogāntarāyās tasyātha jāyante yuñjataḥ punaḥ // ### [1.8.116](https://indike.org/pramana/in.purana.linga.1.8.116) naśyanty abhyāsatas te 'pi praṇidhānena vai guroḥ // ## Commentaries (1) - [Śivatosaṇī Liṅgapurāṇaṭīkā](https://indike.org/pramana/in.purana.linga!ganesa.8.1) — Gaṇeśa Bhaṭṭa, Sanskrit ## Linked texts (7) - [Śivapurāṇa](https://indike.org/pramana/in.purana.siva.7.2.37.38) — Vyāsa, Sanskrit - [Acintyaviśvasādākhyatantra](https://indike.org/pramana/in.sampradaya.saiva.agama.siva.acintyavisvasadakhyatantra.8.1565) — Sanskrit - [Yogacintāmaṇi (Śivānanda Sarasvatī)](https://indike.org/pramana/in.darsana.yoga.yogacintamani-sivananda-sarasvati.3.106) — Śivānanda Sarasvatī 1650, Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.9.1) — Ativīrarāma Pāṇṭiyar 1500, Sanskrit - [Smṛtīnāṃ Samuccayaḥ](https://indike.org/pramana/in.niti.dharma.upasmrti.smrtisamuccaya.2.49) — Sanskrit - [Kṛtyakalpataru](https://indike.org/pramana/in.niti.dharma.nibandha.mahanibandha.krtyakalpataru.27.p100) — Lakṣmīdhara Bhaṭṭa, Sanskrit - [Prapañcahṛdaya](https://indike.org/pramana/in.darsana.advaita.prapancahrdaya.3.p16) — Madhusūdana Sarasvatī 1545, Sanskrit --- Source: [https://indike.org/pramana/in.purana.linga.1.8](https://indike.org/pramana/in.purana.linga.1.8) · Pramāṇa