[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 1.90 # Lingapurana 1.90 Liṅgapurāṇa 1.90 - **Language:** Sanskrit ## Contents - [1.90.24](https://indike.org/pramana/in.purana.linga.1.90.24) — 1 part ### [1.90.1](https://indike.org/pramana/in.purana.linga.1.90.1) sūta uvāca ata ūrdhvaṃ pravakṣyāmi yatīnāmiha niścitam prāyaścittaṃ śivaproktaṃ yatīnāṃ pāpaśodhanam // ### [1.90.2](https://indike.org/pramana/in.purana.linga.1.90.2) pāpaṃ hi trividhaṃ jñeyaṃ vāṅmanaḥkāyasaṃbhavam satataṃ hi divā rātrau yenedaṃ veṣṭyate jagat // ### [1.90.3](https://indike.org/pramana/in.purana.linga.1.90.3) tatkarmaṇā vināpyeṣa tiṣṭhatīti parā śrutiḥ kṣaṇamevaṃ prayojyaṃ tu āyuṣyaṃ tu vidhāraṇam // ### [1.90.4](https://indike.org/pramana/in.purana.linga.1.90.4) bhavedyogo 'pramattasya yogo hi paramaṃ balam na hi yogātparaṃ kiṃcin narāṇāṃ dṛśyate śubham // ### [1.90.5](https://indike.org/pramana/in.purana.linga.1.90.5) tasmād yogaṃ praśaṃsanti dharmayuktā manīṣiṇaḥ avidyāṃ vidyayā jitvā prāpyaiśvaryamanuttamam // ### [1.90.6](https://indike.org/pramana/in.purana.linga.1.90.6) dṛṣṭvā parāvaraṃ dhīrāḥ paraṃ gacchanti tatpadam vratāni yāni bhikṣūṇāṃ tathaivopavratāni ca // ### [1.90.7](https://indike.org/pramana/in.purana.linga.1.90.7) ekaikātikrame teṣāṃ prāyaścittaṃ vidhīyate upetya tu striyaṃ kāmāt prāyaścittaṃ vinirdiśet // ### [1.90.8](https://indike.org/pramana/in.purana.linga.1.90.8) prāṇāyāmasamāyuktaṃ caretsāṃtapanaṃ vratam tataścarati nirdeśāt kṛcchraṃ cānte samāhitaḥ // ### [1.90.9](https://indike.org/pramana/in.purana.linga.1.90.9) punar āśramam āgatya caredbhikṣuratandritaḥ na dharmayuktamanṛtaṃ hinastīti manīṣiṇaḥ // ### [1.90.10](https://indike.org/pramana/in.purana.linga.1.90.10) tathāpi na ca kartavyaṃ prasaṃgo hyeṣa dāruṇaḥ ahorātropavāsaś ca prāṇāyāmaśataṃ tathā // ### [1.90.11](https://indike.org/pramana/in.purana.linga.1.90.11) asadvādo na kartavyo yatinā dharmalipsunā paramāpadgatenāpi na kāryaṃ steyamapyuta // ### [1.90.12](https://indike.org/pramana/in.purana.linga.1.90.12) steyādabhyadhikaḥ kaścin nāstyadharma iti śrutiḥ hiṃsā hyeṣā parā sṛṣṭā stainyaṃ vai kathitaṃ tathā // ### [1.90.13](https://indike.org/pramana/in.purana.linga.1.90.13) yadetaddraviṇaṃ nāma prāṇā hyete bahiścarāḥ sa tasya harate prāṇān yo yasya harate dhanam // ### [1.90.14](https://indike.org/pramana/in.purana.linga.1.90.14) evaṃ kṛtvā suduṣṭātmā bhinnavṛtto vratāccyutaḥ bhūyo nirvedamāpannaś careccāndrāyaṇaṃ vratam // ### [1.90.15](https://indike.org/pramana/in.purana.linga.1.90.15) vidhinā śāstradṛṣṭena saṃvatsaramiti śrutiḥ tataḥ saṃvatsarasyānte bhūyaḥ prakṣīṇakalmaṣaḥ punarnirvedamāpannaś caredbhikṣuratandritaḥ // ### [1.90.16](https://indike.org/pramana/in.purana.linga.1.90.16) ahiṃsā sarvabhūtānāṃ karmaṇā manasā girā akāmādapi hiṃseta yadi bhikṣuḥ paśūn kṛmīn // ### [1.90.17](https://indike.org/pramana/in.purana.linga.1.90.17) kṛcchrātikṛcchraṃ kurvīta cāndrāyaṇamathāpi vā skandedindriyadaurbalyāt striyaṃ dṛṣṭvā yatiryadi // ### [1.90.18](https://indike.org/pramana/in.purana.linga.1.90.18) tena dhārayitavyā vai prāṇāyāmāstu ṣoḍaśa divā skannasya viprasya prāyaścittaṃ vidhīyate // ### [1.90.19](https://indike.org/pramana/in.purana.linga.1.90.19) trirātramupavāsāś ca prāṇāyāmaśataṃ tathā rātrau skannaḥ śuciḥ snātvā dvādaśaiva tu dhāraṇā // ### [1.90.20](https://indike.org/pramana/in.purana.linga.1.90.20) prāṇāyāmena śuddhātmā virajā jāyate dvijāḥ ekānnaṃ madhumāṃsaṃ vā aśṛtānnaṃ tathaiva ca // ### [1.90.21](https://indike.org/pramana/in.purana.linga.1.90.21) abhojyāni yatīnāṃ tu pratyakṣalavaṇāni ca ekaikātikramātteṣāṃ prāyaścittaṃ vidhīyate // ### [1.90.22](https://indike.org/pramana/in.purana.linga.1.90.22) prājāpatyena kṛcchreṇa tataḥ pāpātpramucyate vyatikramāś ca ye kecid vāṅmanaḥkāyasaṃbhavāḥ // ### [1.90.23](https://indike.org/pramana/in.purana.linga.1.90.23) sadbhiḥ saha viniścitya yadbrūyustatsamācaret // ### [1.90.24](https://indike.org/pramana/in.purana.linga.1.90.24) careddhi śuddhaḥ samaloṣṭakāñcanaḥ samastabhūteṣu ca satsamāhitaḥ sthānaṃ dhruvaṃ śāśvatamavyayaṃ tu paraṃ hi gatvā na punarhi jāyate // ### [1.90.24.p1](https://indike.org/pramana/in.purana.linga.1.90.24.p1) iti śrīliṅgamahāpurāṇe pūrvabhāge yatiprāyaścittaṃ nāma navatitamo 'dhyāyaḥ ## Linked texts (2) - [Padmapurāṇa](https://indike.org/pramana/in.purana.padma.3.60.24) — Vyāsa, Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.104.1) — Ativīrarāma Pāṇṭiyar 1500, Sanskrit --- Source: [https://indike.org/pramana/in.purana.linga.1.90](https://indike.org/pramana/in.purana.linga.1.90) · Pramāṇa