[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 1.91 # Lingapurana 1.91 Liṅgapurāṇa 1.91 - **Language:** Sanskrit ## Contents - [1.91.76](https://indike.org/pramana/in.purana.linga.1.91.76) — 1 part ### [1.91.1](https://indike.org/pramana/in.purana.linga.1.91.1) sūta uvāca ata ūrdhvaṃ pravakṣyāmi ariṣṭāni nibodhata yena jñānaviśeṣeṇa mṛtyuṃ paśyanti yoginaḥ // ### [1.91.2](https://indike.org/pramana/in.purana.linga.1.91.2) arundhatīṃ dhruvaṃ caiva somachāyāṃ mahāpatham yo na paśyenna jīvetsa naraḥ saṃvatsarātparam // ### [1.91.3](https://indike.org/pramana/in.purana.linga.1.91.3) ariśmavantam ādityaṃ raśmivantaṃ ca pāvakam yaḥ paśyati na jīvedvai māsādekādaśātparam // ### [1.91.4](https://indike.org/pramana/in.purana.linga.1.91.4) vamenmūtraṃ purīṣaṃ ca suvarṇaṃ rajataṃ tathā pratyakṣamathavā svapne daśamāsānna jīvati // ### [1.91.5](https://indike.org/pramana/in.purana.linga.1.91.5) rukmavarṇaṃ drumaṃ paśyed gandharvanagarāṇi ca paśyet pretapiśācāṃś ca navamāsān sa jīvati // ### [1.91.6](https://indike.org/pramana/in.purana.linga.1.91.6) akasmācca bhavetsthūlo hy akasmācca kṛśo bhavet prakṛteś ca nivarteta cāṣṭau māsāṃś ca jīvati // ### [1.91.7](https://indike.org/pramana/in.purana.linga.1.91.7) agrataḥ pṛṣṭhato vāpi khaṇḍaṃ yasya padaṃ bhavet pāṃsuke kardame vāpi saptamāsānsa jīvati // ### [1.91.8](https://indike.org/pramana/in.purana.linga.1.91.8) kākaḥ kapoto gṛdhro vā nilīyedyasya mūrdhani kravyādo vā khago yasya ṣaṇmāsān nātivartate // ### [1.91.9](https://indike.org/pramana/in.purana.linga.1.91.9) gacched vāyasapaṅktībhiḥ pāṃsuvarṣeṇa vā punaḥ svacchāyāṃ vikṛtāṃ paśyec catuḥpañca sa jīvati // ### [1.91.10](https://indike.org/pramana/in.purana.linga.1.91.10) anabhre vidyutaṃ paśyed dakṣiṇāṃ diśamāsthitām udake dhanur aindraṃ vā trīṇi dvau vā sa jīvati // ### [1.91.11](https://indike.org/pramana/in.purana.linga.1.91.11) apsu vā yadi vādarśe yo hyātmānaṃ na paśyati aśiraskaṃ tathā paśyen māsād ūrdhvaṃ na jīvati // ### [1.91.12](https://indike.org/pramana/in.purana.linga.1.91.12) śavagandhi bhavedgātraṃ vasāgandhamathāpi vā mṛtyurhyupāgatastasya ardhamāsānna jīvati // ### [1.91.13](https://indike.org/pramana/in.purana.linga.1.91.13) yasya vai snātamātrasya hṛdayaṃ pariśuṣyati dhūmaṃ vā mastakātpaśyed daśāhānna sa jīvati // ### [1.91.14](https://indike.org/pramana/in.purana.linga.1.91.14) saṃbhinno māruto yasya marmasthānāni kṛntati adbhiḥ spṛṣṭo na hṛṣyeta tasya mṛtyurupasthitaḥ // ### [1.91.15](https://indike.org/pramana/in.purana.linga.1.91.15) ṛkṣavānarayuktena rathenāśāṃ ca dakṣiṇām gāyannṛtyan vrajet svapne vidyānmṛtyurupasthitaḥ // ### [1.91.16](https://indike.org/pramana/in.purana.linga.1.91.16) kṛṣṇāṃbaradharā śyāmā gāyantī vāpyathāṅganā yaṃ nayeddakṣiṇāmāśāṃ svapne so 'pi na jīvati // ### [1.91.17](https://indike.org/pramana/in.purana.linga.1.91.17) chidraṃ vā svasya kaṇṭhasya svapne yo vīkṣate naraḥ nagnaṃ vā śramaṇaṃ dṛṣṭvā vidyānmṛtyumupasthitam // ### [1.91.18](https://indike.org/pramana/in.purana.linga.1.91.18) ā mastakatalādyas tu nimajjetpaṅkasāgare dṛṣṭvā tu tādṛśaṃ svapnaṃ sadya eva na jīvati // ### [1.91.19](https://indike.org/pramana/in.purana.linga.1.91.19) bhasmāṅgārāṃś ca keśāṃś ca nadīṃ śuṣkāṃ bhujaṅgamān paśyedyo daśarātraṃ tu na sa jīvati tādṛśaḥ // ### [1.91.20](https://indike.org/pramana/in.purana.linga.1.91.20) kṛṣṇaiś ca vikaṭaiścaiva puruṣairudyatāyudhaiḥ pāṣāṇaistāḍyate svapne yaḥ sadyo na sa jīvati // ### [1.91.21](https://indike.org/pramana/in.purana.linga.1.91.21) sūryodaye pratyuṣasi pratyakṣaṃ yasya vai śivāḥ krośantyabhimukhaṃ pretya sa gatāyurbhavennaraḥ // ### [1.91.22](https://indike.org/pramana/in.purana.linga.1.91.22) yasya vā snātamātrasya hṛdayaṃ pīḍyate bhṛśam jāyate dantaharṣaś ca taṃ gatāyuṣamādiśet // ### [1.91.23](https://indike.org/pramana/in.purana.linga.1.91.23) bhūyobhūyastrasedyastu rātrau vā yadi vā divā dīpagandhaṃ ca nāghrāti vidyānmṛtyum upasthitam // ### [1.91.24](https://indike.org/pramana/in.purana.linga.1.91.24) rātrau cendradhanuḥ paśyed divā nakṣatramaṇḍalam paranetreṣu cātmānaṃ na paśyenna sa jīvati // ### [1.91.25](https://indike.org/pramana/in.purana.linga.1.91.25) netramekaṃ sravedyasya karṇau sthānācca bhraśyataḥ vakrā ca nāsā bhavati vijñeyo gatajīvitaḥ // ### [1.91.26](https://indike.org/pramana/in.purana.linga.1.91.26) yasya kṛṣṇā kharā jihvā padmābhāsaṃ ca vai mukham gaṇḍe vā piṇḍikārakte tasya mṛtyurupasthitaḥ // ### [1.91.27](https://indike.org/pramana/in.purana.linga.1.91.27) muktakeśo hasaṃścaiva gāyannṛtyaṃś ca yo naraḥ yāmyāmabhimukhaṃ gacchet tadantaṃ tasya jīvitam // ### [1.91.28](https://indike.org/pramana/in.purana.linga.1.91.28) yasya śvetaghanābhāsā śvetasarṣapasaṃnibhā śvetā ca mūrtirhyasakṛt tasya mṛtyurupasthitaḥ // ### [1.91.29](https://indike.org/pramana/in.purana.linga.1.91.29) uṣṭrā vā rāsabhā vābhiyuktāḥ svapne rathe śubhāḥ yasya so 'pi na jīvettu dakṣiṇābhimukho gataḥ // ### [1.91.30](https://indike.org/pramana/in.purana.linga.1.91.30) dve vātha parame 'riṣṭe ekībhūtaḥ paraṃ bhavet ghoṣaṃ na śṛṇuyātkarṇe jyotir netre na paśyati // ### [1.91.31](https://indike.org/pramana/in.purana.linga.1.91.31) śvabhre yo nipatetsvapne dvāraṃ cāpi pidhīyate na cottiṣṭhati yaḥ śvabhrāt tadantaṃ tasya jīvitam // ### [1.91.32](https://indike.org/pramana/in.purana.linga.1.91.32) mukhasya śoṣaḥ suṣirā ca nābhiratyuṣṇamūtro viṣamastha eva // ### [1.91.33](https://indike.org/pramana/in.purana.linga.1.91.33) divā vā yadi vā rātrau pratyakṣaṃ yo nihanyate hantāraṃ na ca paśyecca sa gatāyurna jīvati // ### [1.91.34](https://indike.org/pramana/in.purana.linga.1.91.34) agnipraveśaṃ kurute svapnānte yastu mānavaḥ smṛtiṃ nopalabheccāpi tadantaṃ tasya jīvitam // ### [1.91.35](https://indike.org/pramana/in.purana.linga.1.91.35) yastu prāvaraṇaṃ śuklaṃ svakaṃ paśyati mānavaḥ kṛṣṇaṃ raktamapi svapne tasya mṛtyurupasthitaḥ // ### [1.91.36](https://indike.org/pramana/in.purana.linga.1.91.36) ariṣṭe sūcite dehe tasminkāla upasthite tyaktvā khedaṃ viṣādaṃ ca upekṣed buddhimān naraḥ // ### [1.91.37](https://indike.org/pramana/in.purana.linga.1.91.37) prācīṃ vā yadi vodīcīṃ diśaṃ niṣkramya vai śuciḥ same 'tisthāvare deśe vivikte jantuvarjite // ### [1.91.38](https://indike.org/pramana/in.purana.linga.1.91.38) udaṅmukhaḥ prāṅmukho vā svasthaś cācānta eva ca svastikenopaviṣṭastu namaskṛtvā maheśvaram // ### [1.91.39](https://indike.org/pramana/in.purana.linga.1.91.39) samakāyaśirogrīvo dhārayan nāvalokayet yathā dīpo nivātastho neṅgate sopamā smṛtā // ### [1.91.40](https://indike.org/pramana/in.purana.linga.1.91.40) prāgudakpravaṇe deśe tathā yuñjīta śāstravit kāmaṃ vitarkaṃ prītiṃ ca sukhaduḥkhe ubhe tathā // ### [1.91.41](https://indike.org/pramana/in.purana.linga.1.91.41) nigṛhya manasā sarvaṃ śuklaṃ dhyānam anusmaret ghrāṇe ca rasane nityaṃ cakṣuṣī sparśane tathā // ### [1.91.42](https://indike.org/pramana/in.purana.linga.1.91.42) śrotre manasi buddhau ca tatra vakṣasi dhārayet kālakarmāṇi vijñāya samūheṣveva nityaśaḥ // ### [1.91.43](https://indike.org/pramana/in.purana.linga.1.91.43) dvādaśādhyātmamityevaṃ yogadhāraṇamucyate śatamardhaśataṃ vāpi dhāraṇāṃ mūrdhni dhārayet // ### [1.91.44](https://indike.org/pramana/in.purana.linga.1.91.44) khinnasya dhāraṇāyogād vāyurūrdhvaṃ pravartate tataścāpūrayed deham oṅkāreṇa samanvitaḥ // ### [1.91.45](https://indike.org/pramana/in.purana.linga.1.91.45) tathauṃkāramayo yogī akṣare tvakṣarī bhavet ata ūrdhvaṃ pravakṣyāmi oṅkāraprāptilakṣaṇam // ### [1.91.46](https://indike.org/pramana/in.purana.linga.1.91.46) eṣa trimātro vijñeyo vyañjanaṃ cātra ceśvaraḥ prathamā vidyutī mātrā dvitīyā tāmasī smṛtā // ### [1.91.47](https://indike.org/pramana/in.purana.linga.1.91.47) tṛtīyāṃ nirguṇāṃ caiva mātrāmakṣaragāminīm gāndhārī caiva vijñeyā gāndhārasvarasaṃbhavā // ### [1.91.48](https://indike.org/pramana/in.purana.linga.1.91.48) pipīlikāgatisparśā prayuktā mūrdhni lakṣyate yathā prayukta oṅkāraḥ pratiniryāti mūrdhani // ### [1.91.49](https://indike.org/pramana/in.purana.linga.1.91.49) tathauṃkāramayo yogī tv akṣarī tvakṣarī bhavet praṇavo dhanuḥ śaro hyātmā brahmalakṣaṇamucyate // ### [1.91.50](https://indike.org/pramana/in.purana.linga.1.91.50) apramattena veddhavyaṃ śaravat tanmayo bhavet omityekākṣaraṃ hyetad guhāyāṃ nihitaṃ padam // ### [1.91.51](https://indike.org/pramana/in.purana.linga.1.91.51) omityetattrayo lokās trayo vedāstrayo 'gnayaḥ viṣṇukramāstrayastvete ṛksāmāni yajūṃṣi ca // ### [1.91.52](https://indike.org/pramana/in.purana.linga.1.91.52) mātrā cārdhaṃ ca tisrastu vijñeyāḥ paramārthataḥ tatprayuktastu yo yogī tasya sālokyamāpnuyāt // ### [1.91.53](https://indike.org/pramana/in.purana.linga.1.91.53) akāro hyakṣaro jñeya ukāraḥ sahitaḥ smṛtaḥ makārasahitauṃkāras trimātra iti saṃjñitaḥ // ### [1.91.54](https://indike.org/pramana/in.purana.linga.1.91.54) akāras tveṣa bhūrloka ukāro bhuva ucyate savyañjano makārastu svarloka iti gīyate // ### [1.91.55](https://indike.org/pramana/in.purana.linga.1.91.55) oṅkārastu trayo lokāḥ śirastasya triviṣṭapam bhuvanāṅgaṃ ca tatsarvaṃ brāhmaṃ tatpadamucyate // ### [1.91.56](https://indike.org/pramana/in.purana.linga.1.91.56) mātrāpādo rudraloko hy amātraṃ tu śivaṃ padam evaṃ jñānaviśeṣeṇa tatpadaṃ samupāsyate // ### [1.91.57](https://indike.org/pramana/in.purana.linga.1.91.57) tasmāddhyānaratirnityam amātraṃ hi tadakṣaram upāsyaṃ hi prayatnena śāśvataṃ sukhamicchatā // ### [1.91.58](https://indike.org/pramana/in.purana.linga.1.91.58) hrasvā tu prathamā mātrā tato dīrghā tvanantaram tataḥ plutavatī caiva tṛtīyā copadiśyate // ### [1.91.59](https://indike.org/pramana/in.purana.linga.1.91.59) etāstu mātrā vijñeyā yathāvadanupūrvaśaḥ yāvadeva tu śakyante dhāryante tāvadeva hi // ### [1.91.60](https://indike.org/pramana/in.purana.linga.1.91.60) indriyāṇi mano buddhiṃ dhyāyannātmani yaḥ sadā ardhaṃ tanmātram api cec chṛṇu yat phalamāpnuyāt // ### [1.91.61](https://indike.org/pramana/in.purana.linga.1.91.61) māse māse 'śvamedhena yo yajeta śataṃ samāḥ tena yatprāpyate puṇyaṃ mātrayā tadavāpnuyāt // ### [1.91.62](https://indike.org/pramana/in.purana.linga.1.91.62) na tathā tapasogreṇa na yajñairbhūridakṣiṇaiḥ yatphalaṃ prāpyate samyaṅ mātrayā tadavāpnuyāt // ### [1.91.63](https://indike.org/pramana/in.purana.linga.1.91.63) tatra caiṣā tu yā mātrā plutā nāmopadiśyate eṣā eva bhavetkāryā gṛhasthānāṃ tu yoginām // ### [1.91.64](https://indike.org/pramana/in.purana.linga.1.91.64) eṣāṃ caiva viśeṣeṇa aiśvarye hyaṣṭalakṣaṇe aṇimādye tu vijñeyā tasmādyuñjīta tāṃ dvijāḥ // ### [1.91.65](https://indike.org/pramana/in.purana.linga.1.91.65) evaṃ hi yogasaṃyuktaḥ śucir dānto jitendriyaḥ ātmānaṃ vidyate yastu sa sarvaṃ vindate dvijāḥ // ### [1.91.66](https://indike.org/pramana/in.purana.linga.1.91.66) tasmātpāśupatairyogair ātmānaṃ cintayedbudhaḥ ātmānaṃ jānate ye tu śucayaste na saṃśayaḥ // ### [1.91.67](https://indike.org/pramana/in.purana.linga.1.91.67) ṛco yajūṃṣi sāmāni vedopaniṣadas tathā yogajñānādavāpnoti brāhmaṇo 'dhyātmacintakaḥ // ### [1.91.68](https://indike.org/pramana/in.purana.linga.1.91.68) sarvadevamayo bhūtvā abhūtaḥ sa tu jāyate yonisaṃkramaṇaṃ tyaktvā yāti vai śāśvataṃ padam // ### [1.91.69](https://indike.org/pramana/in.purana.linga.1.91.69) yathā vṛkṣāt phalaṃ pakvaṃ pavanena samīritam namaskāreṇa rudrasya tathā pāpaṃ praṇaśyati // ### [1.91.70](https://indike.org/pramana/in.purana.linga.1.91.70) yatra rudranamaskāraḥ sarvakarmaphalo dhruvaḥ anyadevanamaskārān na tatphalamavāpnuyāt // ### [1.91.71](https://indike.org/pramana/in.purana.linga.1.91.71) tasmāttriḥpravaṇaṃ yogī upāsīta maheśvaram daśavistārakaṃ brahma tathā ca brahmavistaraiḥ // ### [1.91.72](https://indike.org/pramana/in.purana.linga.1.91.72) evaṃ dhyānasamāyuktaḥ svadehaṃ yaḥ parityajet sa yāti śivasāyujyaṃ samuddhṛtya kulatrayam // ### [1.91.73](https://indike.org/pramana/in.purana.linga.1.91.73) athavāriṣṭamālokya maraṇe samupasthite avimukteśvaraṃ gatvā vārāṇasyāṃ tu śodhanam // ### [1.91.74](https://indike.org/pramana/in.purana.linga.1.91.74) yena kenāpi vā dehaṃ saṃtyajen mucyate naraḥ śrīparvate vā viprendrāḥ saṃtyajetsvatanuṃ naraḥ // ### [1.91.75](https://indike.org/pramana/in.purana.linga.1.91.75) sa yāti śivasāyujyaṃ nātra kāryā vicāraṇā avimuktaṃ paraṃ kṣetraṃ jantūnāṃ muktidaṃ sadā // ### [1.91.76](https://indike.org/pramana/in.purana.linga.1.91.76) seveta satataṃ dhīmān viśeṣānmaraṇāntike // ### [1.91.76.p1](https://indike.org/pramana/in.purana.linga.1.91.76.p1) iti śrīliṅgamahāpurāṇe pūrvabhāge ariṣṭakathanaṃ nāma ekanavatitamo 'dhyāyaḥ ## Commentaries (1) - [Śivatosaṇī Liṅgapurāṇaṭīkā](https://indike.org/pramana/in.purana.linga!ganesa.110.59) — Gaṇeśa Bhaṭṭa, Sanskrit ## Linked texts (3) - [Yogacintāmaṇi (Śivānanda Sarasvatī)](https://indike.org/pramana/in.darsana.yoga.yogacintamani-sivananda-sarasvati.3.2235) — Śivānanda Sarasvatī 1650, Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.105.1) — Ativīrarāma Pāṇṭiyar 1500, Sanskrit - [Kṛtyakalpataru](https://indike.org/pramana/in.niti.dharma.nibandha.mahanibandha.krtyakalpataru.27.p461) — Lakṣmīdhara Bhaṭṭa, Sanskrit --- Source: [https://indike.org/pramana/in.purana.linga.1.91](https://indike.org/pramana/in.purana.linga.1.91) · Pramāṇa