[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 1.9 # Lingapurana 1.9 Liṅgapurāṇa 1.9 - **Language:** Sanskrit ### [1.9.1](https://indike.org/pramana/in.purana.linga.1.9.1) sūta uvāca ālasyaṃ prathamaṃ paścād vyādhipīḍā prajāyate pramādaḥ saṃśayasthāne cittasyehānavasthitiḥ // ### [1.9.2](https://indike.org/pramana/in.purana.linga.1.9.2) aśraddhādarśanaṃ bhrāntir duḥkhaṃ ca trividhaṃ tataḥ daurmanasyamayogyeṣu viṣayeṣu ca yogyatā // ### [1.9.3](https://indike.org/pramana/in.purana.linga.1.9.3) daśadhābhiprajāyante muneryogāntarāyakāḥ ālasyaṃ cāpravṛttiś ca gurutvātkāyacittayoḥ // ### [1.9.4](https://indike.org/pramana/in.purana.linga.1.9.4) vyādhayo dhātuvaiṣamyāt karmajā doṣajās tathā pramādastu samādhestu sādhanānām abhāvanam // ### [1.9.5](https://indike.org/pramana/in.purana.linga.1.9.5) idaṃ vetyubhayaspṛktaṃ vijñānaṃ sthānasaṃśayaḥ anavasthitacittatvam apratiṣṭhā hi yoginaḥ // ### [1.9.6](https://indike.org/pramana/in.purana.linga.1.9.6) labdhāyāmapi bhūmau ca cittasya bhavabandhanāt aśraddhābhāvarahitā vṛttirvai sādhaneṣu ca // ### [1.9.7](https://indike.org/pramana/in.purana.linga.1.9.7) sādhye cittasya hi gurau jñānācāraśivādiṣu viparyayajñānamiti bhrāntidarśanam ucyate // ### [1.9.8](https://indike.org/pramana/in.purana.linga.1.9.8) anātmanyātmavijñānam ajñānāttasya saṃnidhau duḥkhamādhyātmikaṃ proktaṃ tathā caivādhibhautikam // ### [1.9.9](https://indike.org/pramana/in.purana.linga.1.9.9) ādhidaivikamityuktaṃ trividhaṃ sahajaṃ punaḥ icchāvighātātsaṃkṣobhaś cetasastadudāhṛtam // ### [1.9.10](https://indike.org/pramana/in.purana.linga.1.9.10) daurmanasyaṃ niroddhavyaṃ vairāgyeṇa pareṇa tu tamasā rajasā caiva saṃspṛṣṭaṃ durmanaḥ smṛtam // ### [1.9.11](https://indike.org/pramana/in.purana.linga.1.9.11) tadā manasi saṃjātaṃ daurmanasyamiti smṛtam haṭhātsvīkaraṇaṃ kṛtvā yogyāyogyavivekataḥ // ### [1.9.12](https://indike.org/pramana/in.purana.linga.1.9.12) viṣayeṣu vicitreṣu jantorviṣayalolatā antarāyā iti khyātā yogasyaite hi yoginām // ### [1.9.13](https://indike.org/pramana/in.purana.linga.1.9.13) atyantotsāhayuktasya naśyanti na ca saṃśayaḥ pranaṣṭeṣvantarāyeṣu dvijāḥ paścāddhi yoginaḥ // ### [1.9.14](https://indike.org/pramana/in.purana.linga.1.9.14) upasargāḥ pravartante sarve te 'siddhisūcakāḥ pratibhā prathamā siddhir dvitīyā śravaṇā smṛtā // ### [1.9.15](https://indike.org/pramana/in.purana.linga.1.9.15) vārttā tṛtīyā viprendrās turīyā ceha darśanā āsvādā pañcamī proktā vedanā ṣaṣṭhikā smṛtā // ### [1.9.16](https://indike.org/pramana/in.purana.linga.1.9.16) svalpaṣaṭsiddhisaṃtyāgāt siddhidāḥ siddhayo muneḥ pratibhā pratibhāvṛtiḥ pratibhāva iti sthitiḥ // ### [1.9.17](https://indike.org/pramana/in.purana.linga.1.9.17) buddhirvivecanā vedyaṃ budhyate buddhirucyate sūkṣme vyavahite 'tīte viprakṛṣṭe tvanāgate // ### [1.9.18](https://indike.org/pramana/in.purana.linga.1.9.18) sarvatra sarvadā jñānaṃ pratibhānukrameṇa tu śravaṇātsarvaśabdānām aprayatnena yoginaḥ // ### [1.9.19](https://indike.org/pramana/in.purana.linga.1.9.19) hrasvadīrghaplutādīnāṃ guhyānāṃ śravaṇādapi sparśasyādhigamo yas tu vedanā tūpapāditā // ### [1.9.20](https://indike.org/pramana/in.purana.linga.1.9.20) darśanāddivyarūpāṇāṃ darśanaṃ cāprayatnataḥ saṃviddivyarase tasminn āsvādo hyaprayatnataḥ // ### [1.9.21](https://indike.org/pramana/in.purana.linga.1.9.21) vārttā ca divyagandhānāṃ tanmātrā buddhisaṃvidā vindante yoginastasmād ābrahmabhuvanaṃ dvijāḥ // ### [1.9.22](https://indike.org/pramana/in.purana.linga.1.9.22) jagatyasmin hi dehasthaṃ catuḥṣaṣṭiguṇaṃ samam aupasargikam eteṣu guṇeṣu guṇitaṃ dvijāḥ // ### [1.9.23](https://indike.org/pramana/in.purana.linga.1.9.23) saṃtyājyaṃ sarvathā sarvam aupasargikamātmanaḥ paiśāce pārthivaṃ cāpyaṃ rākṣasānāṃ pure dvijāḥ // ### [1.9.24](https://indike.org/pramana/in.purana.linga.1.9.24) yākṣe tu taijasaṃ proktaṃ gāndharve śvasanātmakam aindre vyomātmakaṃ sarvaṃ saumye caiva tu mānasam // ### [1.9.25](https://indike.org/pramana/in.purana.linga.1.9.25) prājāpatye tvahaṅkāraṃ brāhme bodhamanuttamam ādye cāṣṭau dvitīye ca tathā ṣoḍaśarūpakam // ### [1.9.26](https://indike.org/pramana/in.purana.linga.1.9.26) caturviṃśattṛtīye tu dvātriṃśacca caturthake catvāriṃśat pañcame tu bhūtamātrātmakaṃ smṛtam // ### [1.9.27](https://indike.org/pramana/in.purana.linga.1.9.27) gandho rasas tathā rūpaṃ śabdaḥ sparśastathaiva ca pratyekamaṣṭadhā siddhaṃ pañcame tacchatakratoḥ // ### [1.9.28](https://indike.org/pramana/in.purana.linga.1.9.28) tathāṣṭacatvāriṃśac ca ṣaṭpañcāśattathaiva ca catuḥṣaṣṭiguṇaṃ brāhmaṃ labhate dvijasattamāḥ // ### [1.9.29](https://indike.org/pramana/in.purana.linga.1.9.29) aupasargikam ā brahma bhuvaneṣu parityajet lokeṣvālokya yogena yogavitparamaṃ sukham // ### [1.9.30](https://indike.org/pramana/in.purana.linga.1.9.30) sthūlatā hrasvatā bālyaṃ vārdhakyaṃ yauvanaṃ tathā nānājātisvarūpaṃ ca caturbhir dehadhāraṇam // ### [1.9.31](https://indike.org/pramana/in.purana.linga.1.9.31) pārthivāṃśaṃ vinā nityaṃ surabhir gandhasaṃyutaḥ etadaṣṭaguṇaṃ proktam aiśvaryaṃ pārthivaṃ mahat // ### [1.9.32](https://indike.org/pramana/in.purana.linga.1.9.32) jale nivasanaṃ yadvad bhūmyāmiva vinirgamaḥ icchecchaktaḥ svayaṃ pātuṃ samudramapi nāturaḥ // ### [1.9.33](https://indike.org/pramana/in.purana.linga.1.9.33) yatrecchati jagatyasmiṃs tatrāsya jaladarśanam yadyadvastu samādāya bhoktumicchati kāmataḥ // ### [1.9.34](https://indike.org/pramana/in.purana.linga.1.9.34) tattadrasānvitaṃ tasya trayāṇāṃ dehadhāraṇam bhāṇḍaṃ vinātha hastena jalapiṇḍasya dhāraṇam // ### [1.9.35](https://indike.org/pramana/in.purana.linga.1.9.35) avraṇatvaṃ śarīrasya pārthivena samanvitam etat ṣoḍaśakaṃ proktam āpyamaiśvaryamuttamam // ### [1.9.36](https://indike.org/pramana/in.purana.linga.1.9.36) dehādagnivinirmāṇaṃ tattāpabhayavarjitam lokaṃ dagdhamapīhānyad adagdhaṃ svavidhānataḥ // ### [1.9.37](https://indike.org/pramana/in.purana.linga.1.9.37) jalamadhye hutavahaṃ cādhāya parirakṣaṇam agninigrahaṇaṃ haste smṛtimātreṇa cāgamaḥ // ### [1.9.38](https://indike.org/pramana/in.purana.linga.1.9.38) bhasmībhūtavinirmāṇaṃ yathāpūrvaṃ sakāmataḥ dvābhyāṃ rūpaviniṣpattir vinā taistribhir ātmanaḥ // ### [1.9.39](https://indike.org/pramana/in.purana.linga.1.9.39) caturviṃśātmakaṃ hyetat taijasaṃ munipuṅgavāḥ manogatitvaṃ bhūtānām antarnivasanaṃ tathā // ### [1.9.40](https://indike.org/pramana/in.purana.linga.1.9.40) parvatādimahābhāraskandhenodvahanaṃ punaḥ laghutvaṃ ca gurutvaṃ ca pāṇibhyāṃ vāyudhāraṇam // ### [1.9.41](https://indike.org/pramana/in.purana.linga.1.9.41) aṅgulyagranighātena bhūmeḥ sarvatra kaṃpanam ekena dehaniṣpattir vātaiśvaryaṃ smṛtaṃ budhaiḥ // ### [1.9.42](https://indike.org/pramana/in.purana.linga.1.9.42) chāyāvihīnaniṣpattir indriyāṇāṃ ca darśanam ākāśagamanaṃ nityam indriyārthaiḥ samanvitam // ### [1.9.43](https://indike.org/pramana/in.purana.linga.1.9.43) dūre ca śabdagrahaṇaṃ sarvaśabdāvagāhanam tanmātraliṅgagrahaṇaṃ sarvaprāṇinidarśanam // ### [1.9.44](https://indike.org/pramana/in.purana.linga.1.9.44) aindram aiśvaryam ityuktam etairuktaḥ purātanaḥ yathākāmopalabdhiś ca yathākāmavinirgamaḥ // ### [1.9.45](https://indike.org/pramana/in.purana.linga.1.9.45) sarvatrābhibhavaścaiva sarvaguhyanidarśanam kāmānurūpanirmāṇaṃ vaśitvaṃ priyadarśanam // ### [1.9.46](https://indike.org/pramana/in.purana.linga.1.9.46) saṃsāradarśanaṃ caiva mānasaṃ guṇalakṣaṇam chedanaṃ tāḍanaṃ bandhaṃ saṃsāraparivartanam // ### [1.9.47](https://indike.org/pramana/in.purana.linga.1.9.47) sarvabhūtaprasādaś ca mṛtyukālajayas tathā prājāpatyamidaṃ proktam āhaṅkārikamuttamam // ### [1.9.48](https://indike.org/pramana/in.purana.linga.1.9.48) akāraṇajagatsṛṣṭis tathānugraha eva ca pralayaścādhikāraś ca lokavṛttapravartanam // ### [1.9.49](https://indike.org/pramana/in.purana.linga.1.9.49) asādṛśyamidaṃ vyaktaṃ nirmāṇaṃ ca pṛthakpṛthak saṃsārasya ca kartṛtvaṃ brāhmam etad anuttamam // ### [1.9.50](https://indike.org/pramana/in.purana.linga.1.9.50) etāvattattvamityuktaṃ prādhānyaṃ vaiṣṇavaṃ padam brahmaṇā tadguṇaṃ śakyaṃ vettumanyairna śakyate // ### [1.9.51](https://indike.org/pramana/in.purana.linga.1.9.51) vidyate tatparaṃ śaivaṃ viṣṇunā nāvagamyate asaṃkhyeyaguṇaṃ śuddhaṃ ko jānīyācchivātmakam // ### [1.9.52](https://indike.org/pramana/in.purana.linga.1.9.52) vyutthāne siddhayaścaitā hy upasargāś ca kīrtitāḥ niroddhavyāḥ prayatnena vairāgyeṇa pareṇa tu // ### [1.9.53](https://indike.org/pramana/in.purana.linga.1.9.53) nāśātiśayatāṃ jñātvā viṣayeṣu bhayeṣu ca aśraddhayā tyajetsarvaṃ virakta iti kīrtitaḥ // ### [1.9.54](https://indike.org/pramana/in.purana.linga.1.9.54) vaitṛṣṇyaṃ puruṣe khyātaṃ guṇavaitṛṣṇyamucyate vairāgyeṇaiva saṃtyājyāḥ siddhayaścaupasargikāḥ // ### [1.9.55](https://indike.org/pramana/in.purana.linga.1.9.55) aupasargikam ā brahmabhuvaneṣu parityajet nirudhyaiva tyajetsarvaṃ prasīdati maheśvaraḥ // ### [1.9.56](https://indike.org/pramana/in.purana.linga.1.9.56) prasanne vimalā muktir vairāgyeṇa pareṇa vai athavānugrahārthaṃ ca līlārthaṃ vā tadā muniḥ // ### [1.9.57](https://indike.org/pramana/in.purana.linga.1.9.57) anirudhya viceṣṭedyaḥ so 'pyevaṃ hi sukhī bhavet kvacidbhūmiṃ parityajya hy ākāśe krīḍate śriyā // ### [1.9.58](https://indike.org/pramana/in.purana.linga.1.9.58) udgirecca kvacidvedān sūkṣmānarthān samāsataḥ kvacicchrute tadarthena ślokabandhaṃ karoti saḥ // ### [1.9.59](https://indike.org/pramana/in.purana.linga.1.9.59) kvaciddaṇḍakabandhaṃ tu kuryādbandhaṃ sahasraśaḥ mṛgapakṣisamūhasya rutajñānaṃ ca vindati // ### [1.9.60](https://indike.org/pramana/in.purana.linga.1.9.60) brahmādyaṃ sthāvarāntaṃ ca hastāmalakavadbhavet bahunātra kimuktena vijñānāni sahasraśaḥ // ### [1.9.61](https://indike.org/pramana/in.purana.linga.1.9.61) utpadyante muniśreṣṭhā munestasya mahātmanaḥ abhyāsenaiva vijñānaṃ viśuddhaṃ ca sthiraṃ bhavet // ### [1.9.62](https://indike.org/pramana/in.purana.linga.1.9.62) tejorūpāṇi sarvāṇi sarvaṃ paśyati yogavit devabimbānyanekāni vimānāni sahasraśaḥ // ### [1.9.63](https://indike.org/pramana/in.purana.linga.1.9.63) paśyati brahmaviṣṇvindrayamāgnivaruṇādikān grahanakṣatratārāś ca bhuvanāni sahasraśaḥ // ### [1.9.64](https://indike.org/pramana/in.purana.linga.1.9.64) pātālatalasaṃsthāś ca samādhisthaḥ sa paśyati ātmavidyāpradīpena svasthenācalanena tu // ### [1.9.65](https://indike.org/pramana/in.purana.linga.1.9.65) prasādāmṛtapūrṇena sattvapātrasthitena tu tamo nihatya puruṣaḥ paśyati hyātmanīśvaram // ### [1.9.66](https://indike.org/pramana/in.purana.linga.1.9.66) tasya prasādāddharmaś ca aiśvaryaṃ jñānameva ca vairāgyamapavargaś ca nātra kāryā vicāraṇā // ### [1.9.67](https://indike.org/pramana/in.purana.linga.1.9.67) na śakyo vistaro vaktuṃ varṣāṇāmayutairapi yoge pāśupate niṣṭhā sthātavyaṃ ca munīśvarāḥ // ## Commentaries (1) - [Śivatosaṇī Liṅgapurāṇaṭīkā](https://indike.org/pramana/in.purana.linga!ganesa.9.20) — Gaṇeśa Bhaṭṭa, Sanskrit ## Linked texts (3) - [Śivapurāṇa](https://indike.org/pramana/in.purana.siva.7.2.38.5.p12) — Vyāsa, Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.10.1) — Ativīrarāma Pāṇṭiyar 1500, Sanskrit - [Prapañcahṛdaya](https://indike.org/pramana/in.darsana.advaita.prapancahrdaya.3.p19) — Madhusūdana Sarasvatī 1545, Sanskrit --- Source: [https://indike.org/pramana/in.purana.linga.1.9](https://indike.org/pramana/in.purana.linga.1.9) · Pramāṇa