Lingapurana 2.10
Liṅgapurāṇa 2.10
- Language
- Sanskrit
Contents
- 2.10.47 — 1 part
2.10.1
sanatkumāra uvāca
bhūya eva mamācakṣva mahimānamumāpateḥ /
bhavabhakta mahāprājña bhagavannandikeśvara //
2.10.2
śailādiruvāca
sanatkumāra saṃkṣepāttava vakṣyāmyaśeṣataḥ /
mahimānaṃ maheśasya bhavasya parameṣṭhinaḥ //
2.10.3
nāsya prakṛtibandho 'bhūdbuddhibandho na kaścana /
na cāhaṅkārabandhaśca manobandhaśca no 'bhavat //
2.10.4
cittabandho na tasyābhūcchrotrabandho na cābhavat /
na tvacāṃ cakṣuṣāṃ vāpi bandho jajñe kadācana //
2.10.5
jihvābandho na tasyābhūdghrāṇabandho na kaścana /
pādabandhaḥ pāṇibandho vāgbandhaścaiva suvrata //
2.10.6
upasthendriya bandhaśca bhūtatanmātrabandhanam /
nityaśuddhasvabhāvena nityabuddho nisargataḥ //
2.10.7
nityamukta iti prokto munibhistattvavedibhiḥ /
anādi madhyaniṣṭhasya śivasya parameṣṭhinaḥ //
2.10.8
buddhiṃ sūte niyogena prakṛtiḥ puruṣasya ca /
ahaṅkāraṃ prasūte 'syā buddhistasya niyogataḥ //
2.10.9
antaryāmīti deheṣu prasiddhasya svayaṃbhuvaḥ /
indriyāṇi daśaikaṃ ca tanmātrāṇi ca śāsanāt //
2.10.10
ahaṅkāro 'tisaṃsūte śivasya parameṣṭhinaḥ /
tanmātrāṇi niyogena tasya saṃsuvate prabho //
2.10.11
mahābhūtānyaśeṣeṇa mahādevasya dhīmataḥ /
brahmādīnāṃ tṛṇāntaṃ hi dehināṃ dehasaṃgatim //
2.10.12
mahābhūtānyaśeṣāṇi janayanti śivājñayā /
adhyavasyati sarvārthānbuddhistasyājñayā vibhoḥ //
2.10.13
antaryāmīti deheṣu prasiddhasya svayaṃbhuvaḥ /
svabhāvasiddhamaiśvaryaṃ svabhāvādeva bhūtayaḥ //
2.10.14
tasyājñayā samastārthānahaṅkāro 'timanyate /
cittaṃ cetayate cāpi manaḥ saṃkalpayatyapi //
2.10.15
śrotraṃ śṛṇoti tacchaktyā śabdasparśādikaṃ ca yat /
śaṃbhorājñabalenaiva bhavasya parameṣṭhinaḥ //
2.10.16
vacanaṃ kurute vākyaṃ nādānādi kadācana /
śarīrāṇāmaśeṣāṇāṃ tasya devasya śāsanāt //
2.10.17
karoti pāṇirādānaṃ na gatyādi kadācana /
sarveṣāmeva jantūnāṃ niyamādeva vedhasaḥ //
2.10.18
vihāraṃ kurute pādo notsargādi kadācana /
samastadehivṛndānāṃ śivasyaiva niyogataḥ //
2.10.19
utsargaṃ kurute pāyurna vadeta kadācana /
jantorjātasya sarvasya parameśvaraśāsanāt //
2.10.20
ānandaṃ kurute śaśvadupasthaṃ vacanādvibhoḥ /
sarveṣāmeva bhūtānāmīśvarasyaiva śāsanāt //
2.10.21
avakāśamaśeṣāṇāṃ bhūtānāṃ saṃprayacchati /
ākāśaṃ sarvadā tasya paramasyaiva śāsanāt //
2.10.22
nirdeśena śivasyaiva bhedaiḥ prāṇādibhirnijaiḥ /
bibhartti sarvabhūtānāṃ śarīrāṇi prabhañjanaḥ //
2.10.23
nirdeśāddevadevasya saptaskandhagato marut /
lokayātrāṃ vahatyeva bhedaiḥ svairāvahādibhiḥ //
2.10.24
nāgādyaiḥ pañcabhirbhedaiḥ śarīreṣu pravartate /
apadeśena devasya paramasya samīraṇaḥ //
2.10.25
havyaṃ vahati devānāṃ kavyaṃ kavyāśināmapi /
pākaṃ ca kurute vahniḥ śaṅkarasyaiva śāsanāt //
2.10.26
bhuktamāhārajātaṃ yatpacate dehināṃ tathā /
udarasthaḥ sadā vahnirviśveśvaraniyogataḥ //
2.10.27
saṃjīvayantyaśeṣāṇi bhūtānyāpastadājñayā /
avilaṅghyā hi sarveṣāmājñā tasya garīyasī //
2.10.28
carācarāṇi bhūtāni bibhartyeva tadājñayā /
ājñayā tasya devasya devadevaḥ purandaraḥ //
2.10.29
jīvatāṃ vyādhibhiḥ pīḍāṃ mṛtānāṃ yātanāśataiḥ /
viśvaṃbharaḥ sadākālaṃ lokaiḥ sarvairalaṅghyayā //
2.10.30
devānpātya surān hanti trailokyamakhilaṃ sthitaḥ /
adhārmikāṇāṃ vai nāśaṃ karoti śivaśāsanāt //
2.10.31
varuṇaḥ salilairlokānsaṃbhāvayati śāsanāt /
majjayatyājñayā tasya pāśairbadhnāti cāsurān //
2.10.32
puṇyānurapaṃ sarveṣāṃ prāṇināṃ saṃprayacchati /
vittaṃ vitteśvarastasya śāsanātparamoṣṭhinaḥ //
2.10.33
udayāstamaye kurvankurute kālamājñayā /
ādityastasya nityasya satyasyaparamātmanaḥ //
2.10.34
puṣpāṇyauṣadhijātāni prahlādayati ca prajāḥ /
amṛtāṃśuḥ kalādhāraḥ kālakālasya śāsanāt //
2.10.35
ādityā vasavo rudrā aśvinau marutastathā /
anyāśca devatāḥ sarvāstacchāsanavinirmitāḥ //
2.10.36
gandharvā devasaṃvāśca siddhāḥ sādhyāśca cāraṇāḥ /
yakṣarakṣaḥpiśācāśca sthitāḥ śāstreṣu vedhasaḥ //
2.10.37
grahanakṣatratārāśca yajñā vedāstapāṃsi ca /
ṛṣīṇāṃ ca gaṇāḥ sarve śāsanaṃ tasya dhiṣṭhitāḥ //
2.10.38
kavyāśināṃ gaṇāḥ saptasamudrā girisiṃdhavaḥ /
śāsane tasya vartante kānanāni sarāṃsi ca //
2.10.39
kalāḥ kāṣṭhā nimeṣāścamuhūrtā divasāḥ kṣapāḥ /
ṛtvabdapakṣamāsāśca niyogāttasya dhiṣṭhitāḥ //
2.10.40
yugamanvantarāṇyasya śaṃbhostiṣṭhanti śāsanāt /
parāścaivaparārdhāśca kālabhedāstathāpare //
2.10.41
devānāṃ jātayaścāṣṭau tiraścāṃ pañca jātayaḥ /
manuṣyāśca pravartante devadevasya dhīmataḥ //
2.10.42
jātāni bhūtavṛndāni caturdaśasu yoniṣu /
sarvalokaniṣaṇṇāni tiṣṭhantyasyaiva śāsanāt //
2.10.43
caturdaśasu lokeṣu sthitā jātāḥ prajāḥ prabhoḥ /
sarveśvarasya tasyaiva niyogavaśavartinaḥ //
2.10.44
pātālāni samastāni bhuvanānyasya śāsanāt /
brahmāṇḍāni ca śeṣāṇi tathā sāvaraṇāni ca //
2.10.45
vartamānāni sarvāṇi brahmāṇḍāni tadājñayā /
vartante sarvabhūtādyaiḥ sametāni samantataḥ //
2.10.46
atītānyapyasaṃkhyāni brahmāṇḍāni tadājñayā /
pravṛttāni padārthauṅghaiḥ sahitāni samantataḥ //
2.10.47
brahmāṇḍāni bhaviṣyanti saha vastubhirātmaktaiḥ /
kariṣyanti śivasyājñāṃ sarvairāvaraṇaiḥ saha //
2.10.47.p1
iti śrīliṅgamahāpurāṇe uttarabhāge daśamo 'dhyāyaḥ
Commentaries (1)
- Śivatosaṇī Liṅgapurāṇaṭīkā — Gaṇeśa Bhaṭṭa, Sanskrit
Linked texts (2)
- Śivapurāṇa (complete text) — Sanskrit
- Kūrmapurāṇa — Vyāsa, Sanskrit