[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 2.10 # Lingapurana 2.10 Liṅgapurāṇa 2.10 - **Language:** Sanskrit ## Contents - [2.10.47](https://indike.org/pramana/in.purana.linga.2.10.47) — 1 part ### [2.10.1](https://indike.org/pramana/in.purana.linga.2.10.1) sanatkumāra uvāca bhūya eva mamācakṣva mahimānamumāpateḥ / bhavabhakta mahāprājña bhagavannandikeśvara // ### [2.10.2](https://indike.org/pramana/in.purana.linga.2.10.2) śailādiruvāca sanatkumāra saṃkṣepāttava vakṣyāmyaśeṣataḥ / mahimānaṃ maheśasya bhavasya parameṣṭhinaḥ // ### [2.10.3](https://indike.org/pramana/in.purana.linga.2.10.3) nāsya prakṛtibandho 'bhūdbuddhibandho na kaścana / na cāhaṅkārabandhaśca manobandhaśca no 'bhavat // ### [2.10.4](https://indike.org/pramana/in.purana.linga.2.10.4) cittabandho na tasyābhūcchrotrabandho na cābhavat / na tvacāṃ cakṣuṣāṃ vāpi bandho jajñe kadācana // ### [2.10.5](https://indike.org/pramana/in.purana.linga.2.10.5) jihvābandho na tasyābhūdghrāṇabandho na kaścana / pādabandhaḥ pāṇibandho vāgbandhaścaiva suvrata // ### [2.10.6](https://indike.org/pramana/in.purana.linga.2.10.6) upasthendriya bandhaśca bhūtatanmātrabandhanam / nityaśuddhasvabhāvena nityabuddho nisargataḥ // ### [2.10.7](https://indike.org/pramana/in.purana.linga.2.10.7) nityamukta iti prokto munibhistattvavedibhiḥ / anādi madhyaniṣṭhasya śivasya parameṣṭhinaḥ // ### [2.10.8](https://indike.org/pramana/in.purana.linga.2.10.8) buddhiṃ sūte niyogena prakṛtiḥ puruṣasya ca / ahaṅkāraṃ prasūte 'syā buddhistasya niyogataḥ // ### [2.10.9](https://indike.org/pramana/in.purana.linga.2.10.9) antaryāmīti deheṣu prasiddhasya svayaṃbhuvaḥ / indriyāṇi daśaikaṃ ca tanmātrāṇi ca śāsanāt // ### [2.10.10](https://indike.org/pramana/in.purana.linga.2.10.10) ahaṅkāro 'tisaṃsūte śivasya parameṣṭhinaḥ / tanmātrāṇi niyogena tasya saṃsuvate prabho // ### [2.10.11](https://indike.org/pramana/in.purana.linga.2.10.11) mahābhūtānyaśeṣeṇa mahādevasya dhīmataḥ / brahmādīnāṃ tṛṇāntaṃ hi dehināṃ dehasaṃgatim // ### [2.10.12](https://indike.org/pramana/in.purana.linga.2.10.12) mahābhūtānyaśeṣāṇi janayanti śivājñayā / adhyavasyati sarvārthānbuddhistasyājñayā vibhoḥ // ### [2.10.13](https://indike.org/pramana/in.purana.linga.2.10.13) antaryāmīti deheṣu prasiddhasya svayaṃbhuvaḥ / svabhāvasiddhamaiśvaryaṃ svabhāvādeva bhūtayaḥ // ### [2.10.14](https://indike.org/pramana/in.purana.linga.2.10.14) tasyājñayā samastārthānahaṅkāro 'timanyate / cittaṃ cetayate cāpi manaḥ saṃkalpayatyapi // ### [2.10.15](https://indike.org/pramana/in.purana.linga.2.10.15) śrotraṃ śṛṇoti tacchaktyā śabdasparśādikaṃ ca yat / śaṃbhorājñabalenaiva bhavasya parameṣṭhinaḥ // ### [2.10.16](https://indike.org/pramana/in.purana.linga.2.10.16) vacanaṃ kurute vākyaṃ nādānādi kadācana / śarīrāṇāmaśeṣāṇāṃ tasya devasya śāsanāt // ### [2.10.17](https://indike.org/pramana/in.purana.linga.2.10.17) karoti pāṇirādānaṃ na gatyādi kadācana / sarveṣāmeva jantūnāṃ niyamādeva vedhasaḥ // ### [2.10.18](https://indike.org/pramana/in.purana.linga.2.10.18) vihāraṃ kurute pādo notsargādi kadācana / samastadehivṛndānāṃ śivasyaiva niyogataḥ // ### [2.10.19](https://indike.org/pramana/in.purana.linga.2.10.19) utsargaṃ kurute pāyurna vadeta kadācana / jantorjātasya sarvasya parameśvaraśāsanāt // ### [2.10.20](https://indike.org/pramana/in.purana.linga.2.10.20) ānandaṃ kurute śaśvadupasthaṃ vacanādvibhoḥ / sarveṣāmeva bhūtānāmīśvarasyaiva śāsanāt // ### [2.10.21](https://indike.org/pramana/in.purana.linga.2.10.21) avakāśamaśeṣāṇāṃ bhūtānāṃ saṃprayacchati / ākāśaṃ sarvadā tasya paramasyaiva śāsanāt // ### [2.10.22](https://indike.org/pramana/in.purana.linga.2.10.22) nirdeśena śivasyaiva bhedaiḥ prāṇādibhirnijaiḥ / bibhartti sarvabhūtānāṃ śarīrāṇi prabhañjanaḥ // ### [2.10.23](https://indike.org/pramana/in.purana.linga.2.10.23) nirdeśāddevadevasya saptaskandhagato marut / lokayātrāṃ vahatyeva bhedaiḥ svairāvahādibhiḥ // ### [2.10.24](https://indike.org/pramana/in.purana.linga.2.10.24) nāgādyaiḥ pañcabhirbhedaiḥ śarīreṣu pravartate / apadeśena devasya paramasya samīraṇaḥ // ### [2.10.25](https://indike.org/pramana/in.purana.linga.2.10.25) havyaṃ vahati devānāṃ kavyaṃ kavyāśināmapi / pākaṃ ca kurute vahniḥ śaṅkarasyaiva śāsanāt // ### [2.10.26](https://indike.org/pramana/in.purana.linga.2.10.26) bhuktamāhārajātaṃ yatpacate dehināṃ tathā / udarasthaḥ sadā vahnirviśveśvaraniyogataḥ // ### [2.10.27](https://indike.org/pramana/in.purana.linga.2.10.27) saṃjīvayantyaśeṣāṇi bhūtānyāpastadājñayā / avilaṅghyā hi sarveṣāmājñā tasya garīyasī // ### [2.10.28](https://indike.org/pramana/in.purana.linga.2.10.28) carācarāṇi bhūtāni bibhartyeva tadājñayā / ājñayā tasya devasya devadevaḥ purandaraḥ // ### [2.10.29](https://indike.org/pramana/in.purana.linga.2.10.29) jīvatāṃ vyādhibhiḥ pīḍāṃ mṛtānāṃ yātanāśataiḥ / viśvaṃbharaḥ sadākālaṃ lokaiḥ sarvairalaṅghyayā // ### [2.10.30](https://indike.org/pramana/in.purana.linga.2.10.30) devānpātya surān hanti trailokyamakhilaṃ sthitaḥ / adhārmikāṇāṃ vai nāśaṃ karoti śivaśāsanāt // ### [2.10.31](https://indike.org/pramana/in.purana.linga.2.10.31) varuṇaḥ salilairlokānsaṃbhāvayati śāsanāt / majjayatyājñayā tasya pāśairbadhnāti cāsurān // ### [2.10.32](https://indike.org/pramana/in.purana.linga.2.10.32) puṇyānurapaṃ sarveṣāṃ prāṇināṃ saṃprayacchati / vittaṃ vitteśvarastasya śāsanātparamoṣṭhinaḥ // ### [2.10.33](https://indike.org/pramana/in.purana.linga.2.10.33) udayāstamaye kurvankurute kālamājñayā / ādityastasya nityasya satyasyaparamātmanaḥ // ### [2.10.34](https://indike.org/pramana/in.purana.linga.2.10.34) puṣpāṇyauṣadhijātāni prahlādayati ca prajāḥ / amṛtāṃśuḥ kalādhāraḥ kālakālasya śāsanāt // ### [2.10.35](https://indike.org/pramana/in.purana.linga.2.10.35) ādityā vasavo rudrā aśvinau marutastathā / anyāśca devatāḥ sarvāstacchāsanavinirmitāḥ // ### [2.10.36](https://indike.org/pramana/in.purana.linga.2.10.36) gandharvā devasaṃvāśca siddhāḥ sādhyāśca cāraṇāḥ / yakṣarakṣaḥpiśācāśca sthitāḥ śāstreṣu vedhasaḥ // ### [2.10.37](https://indike.org/pramana/in.purana.linga.2.10.37) grahanakṣatratārāśca yajñā vedāstapāṃsi ca / ṛṣīṇāṃ ca gaṇāḥ sarve śāsanaṃ tasya dhiṣṭhitāḥ // ### [2.10.38](https://indike.org/pramana/in.purana.linga.2.10.38) kavyāśināṃ gaṇāḥ saptasamudrā girisiṃdhavaḥ / śāsane tasya vartante kānanāni sarāṃsi ca // ### [2.10.39](https://indike.org/pramana/in.purana.linga.2.10.39) kalāḥ kāṣṭhā nimeṣāścamuhūrtā divasāḥ kṣapāḥ / ṛtvabdapakṣamāsāśca niyogāttasya dhiṣṭhitāḥ // ### [2.10.40](https://indike.org/pramana/in.purana.linga.2.10.40) yugamanvantarāṇyasya śaṃbhostiṣṭhanti śāsanāt / parāścaivaparārdhāśca kālabhedāstathāpare // ### [2.10.41](https://indike.org/pramana/in.purana.linga.2.10.41) devānāṃ jātayaścāṣṭau tiraścāṃ pañca jātayaḥ / manuṣyāśca pravartante devadevasya dhīmataḥ // ### [2.10.42](https://indike.org/pramana/in.purana.linga.2.10.42) jātāni bhūtavṛndāni caturdaśasu yoniṣu / sarvalokaniṣaṇṇāni tiṣṭhantyasyaiva śāsanāt // ### [2.10.43](https://indike.org/pramana/in.purana.linga.2.10.43) caturdaśasu lokeṣu sthitā jātāḥ prajāḥ prabhoḥ / sarveśvarasya tasyaiva niyogavaśavartinaḥ // ### [2.10.44](https://indike.org/pramana/in.purana.linga.2.10.44) pātālāni samastāni bhuvanānyasya śāsanāt / brahmāṇḍāni ca śeṣāṇi tathā sāvaraṇāni ca // ### [2.10.45](https://indike.org/pramana/in.purana.linga.2.10.45) vartamānāni sarvāṇi brahmāṇḍāni tadājñayā / vartante sarvabhūtādyaiḥ sametāni samantataḥ // ### [2.10.46](https://indike.org/pramana/in.purana.linga.2.10.46) atītānyapyasaṃkhyāni brahmāṇḍāni tadājñayā / pravṛttāni padārthauṅghaiḥ sahitāni samantataḥ // ### [2.10.47](https://indike.org/pramana/in.purana.linga.2.10.47) brahmāṇḍāni bhaviṣyanti saha vastubhirātmaktaiḥ / kariṣyanti śivasyājñāṃ sarvairāvaraṇaiḥ saha // ### [2.10.47.p1](https://indike.org/pramana/in.purana.linga.2.10.47.p1) iti śrīliṅgamahāpurāṇe uttarabhāge daśamo 'dhyāyaḥ ## Commentaries (1) - [Śivatosaṇī Liṅgapurāṇaṭīkā](https://indike.org/pramana/in.purana.linga!ganesa.142.21) — Gaṇeśa Bhaṭṭa, Sanskrit ## Linked texts (2) - [Śivapurāṇa (complete text)](https://indike.org/pramana/in.purana.siva*complete-2.7.2.2.18) — Sanskrit - [Kūrmapurāṇa](https://indike.org/pramana/in.purana.kurma.2.6.16) — Vyāsa, Sanskrit --- Source: [https://indike.org/pramana/in.purana.linga.2.10](https://indike.org/pramana/in.purana.linga.2.10) · Pramāṇa