Lingapurana 2.11
Liṅgapurāṇa 2.11
- Language
- Sanskrit
Contents
- 2.11.41 — 1 part
2.11.1
sanatkumāra uvāca
vibhūtīḥ śivayormahyamācakṣva tvaṃ gaṇādhipa /
parāparavidāṃ śreṣṭha parameśvarabhāvita //
2.11.2
nandikeśvara uvāca
hanta te kathayiṣyāmi vibhūtīḥ śivayoraham /
sanatkumāra yogīndra brahmaṇastanayottama //
2.11.3
paramātmā śivaḥ proktaḥ śivāsā ca prakīrtitā /
śivameveśvaraṃ prāhurmāyāṃ gaurīṃ vidurbudhāḥ //
2.11.4
puruṣaṃ śaṅkaraṃ prāhurgaurīṃ ca prakṛtiṃ dvijāḥ /
arthaḥ śaṃbhuḥ śivā vāṇī divaso 'jaḥ śivā niśā //
2.11.5
saptatanturmahādevo rudrāṇī dakṣiṇā smṛtā /
ākāśaṃ śaṅkaro devaḥ pṛthivī śaṅkarapriyā //
2.11.6
samudro bhagavān rudro velā śailendrakanyakā /
vṛkṣaḥ śūlāyudho devaḥ śūlapāṇipriyā latā //
2.11.7
brahmā haropi sāvitrī śaṅkarārdhasarīriṇī /
viṣṇurmaheśvaro lakṣmīrbhavānī parameśvarī //
2.11.8
vajrapāṇirmahādevaḥ śacī śailendrakanyakā /
jātavedāḥ svayaṃ rudraḥ svāhā śarvārdhakāyinī //
2.11.9
yamastriyaṃbako devastātpriyā girikanyakā /
varuṇo bhagavān rudro gaurī sarvārthadāyinī //
2.11.10
bālenduśokharo vāyuḥ śivā śivamanoramā /
candrārdhamauliryakṣendraḥ svayamṛddhiḥ śivā smṛtā //
2.11.11
candrārdhaśekharaścandro rohiṇī rudravallabhā /
saptasaptiḥ śivaḥ kāntā umādevī suvarcalā //
2.11.12
paṇmukhastripuradhvaṃsī devasenā harapriyā /
umā prasūtīrvai jñeyā dakṣo devo maheśvaraḥ //
2.11.13
puruṣākhyo manuḥ śaṃbhuḥ śatarūpā śivapriyā /
vidurbhavānīmākūtiṃ ruciṃ ca parameśvaram //
2.11.14
bhṛgurbhagākṣihā devaḥ khyātistrinayanapriyaḥ /
marīcirbhagavānrudraḥ saṃbhūtirvallabhā vibhoḥ //
2.11.15
vidurbhavānīṃ rucirāṃ kaviṃ ca parameśvaram /
gaṅgādharegirā jñeyaḥ smṛtiḥ sākṣādumā smṛtā //
2.11.16
pulastyaḥ śaśabhṛnmauliḥ prītiḥ kāntā pinākinaḥ /
pulahastripuradhvaṃsī dayā kālaripupriyā //
2.11.17
kraturdakṣakratudhvaṃsī saṃnatirdāyitāvibhoḥ /
trinetro 'trirumā sākṣādanasūyā smṛtā budhaiḥ //
2.11.18
ūrjāmāhurumāṃ vṛddhāṃ vasiṣṭhaṃ ca maheśvaram /
śaṅkaraḥ puruṣāḥ sarve striyaḥ sarvā maheśvarī //
2.11.19
pulliṅgaśabdavācyā ye te ca rudāḥ prakīrtitāḥ /
strīliṅgaśabdavācyā yāḥ sarvā gauryā vibhūtayaḥ //
2.11.20
sarvestrīpuruṣāḥ proktāstayoreva vibhūtayaḥ /
padārthaśaktayo yāyāstā gaurīti vidurbudhāḥ //
2.11.21
sāsā viśveśvarī devī sa ca sarvo maheśvaraḥ /
śaktimantaḥ padārthā ye sa sa sarvo maheśvaraḥ //
2.11.22
aṣṭau prakṛtayo devyā mūrtayaḥ parikīrtitāḥ /
tathā vikṛtayastasyā dehabaddhavibhūtayaḥ //
2.11.23
visphuliṅgā yathā tāvadagnau ca bahudhā smṛtāḥ /
jīvāḥ sarve tathā śarvo dvandvasattvamupāgataḥ //
2.11.24
gaurīrūpāṇi sarvāṇiśarīrāṇi śarīriṇām /
śarīriṇastathā sarve śaṅkarāṃśā vyavasthitāḥ //
2.11.25
śrāvyaṃ sarvamumārūpaṃ śrotā devo maheśvaraḥ /
viṣayitvaṃ vibhurdhatte viṣayātmakatāmumā //
2.11.26
sraṣṭavyaṃ vastujātaṃ tu dhatte śaṅkaravallabhā /
sraṣṭā sa eva viśvātmā bālacandrārdhaśekharaḥ //
2.11.27
dṛśyavastu prajārūpaṃ bibharti bhuvaneśvarī /
draṣṭā viśveśvaro devaḥ śaśikhaṇḍaśikhāmaṇiḥ //
2.11.28
rasajātamumārūpaṃ ghreyajātaṃ ca sarvaśaḥ /
devo rasayitā śaṃbhurghrātā ca bhuvaneśvaraḥ //
2.11.29
mantavyavastutāṃ dhatte mahādevī maheśvarī /
mantā sa eva viśvātmā mahādevo maheśvaraḥ //
2.11.30
boddhavyaṃ vastu rūpaṃ ca bibharti bhavavallabhā /
devaḥ sa eva bhagavān boddhā bālenduśekharaḥ //
2.11.31
pīṭhākṛtirumā devī liṅgarūpaśca śaṅkaraḥ /
pratiṣṭhāpya prayatnena pūjayanti surāsurāḥ //
2.11.32
yeye padārthā liṅgāṅkāstete śarvavibhūtayaḥ /
arthā bhagāṅkitā yeye teta gauryā vibhūtayaḥ //
2.11.33
svargapātālalokāntabrahmāṇḍāvaraṇāṣṭakam /
jñeyaṃ sarvamumārūpaṃ jñātā devo maheśvaraḥ //
2.11.34
bibharti kṣetratāṃ devī tripurāntakavallabhā /
kṣetrajñātvamatho dhatte bhagavānandhakāntakaḥ //
2.11.35
śivaliṅgaṃ samutsṛjya yajante cānyadevatāḥ /
sa nṛpaḥ saha deśena rauravaṃ narakaṃ vrajet //
2.11.36
śivabhakto na yo rājā bhakto 'nyeṣu sureṣu yaḥ /
svapatiṃ yuvatis tyaktvā yathā jāreṣu rājate //
2.11.37
brahmādayaḥ surāḥ sarve rājānaśca maharddhikāḥ /
mānavā munayaścaiva sarve liṅgaṃ yajanti ca //
2.11.38
viṣṇunā rāvaṇaṃ hatvā sasainyaṃ brahmaṇaḥ sutam /
sthāpitaṃ vidhivadbhaktyā liṅgaṃ tīre nadīpateḥ //
2.11.39
kṛtvā pāpasahasrāṇi hatvā vipraśataṃ tathā /
bhāvātsamāśrito rudraṃ mucyate nātra saṃśayaḥ //
2.11.40
sarve liṅgamayā lokāḥ sarve liṅge pratiṣṭhitāḥ /
tasmādabhyarcayelliṅgaṃ yadīcchecchāśvataṃ padam //
2.11.41
sarvākārau sthitāvetau naraiḥ śreyo 'rthibhiḥ śivau /
pūjanīyau namaskāryau cintanīyau ca sarvadā //
2.11.41.p1
iti śrīliṅgamahāpurāṇe uttarabhāge ekādaśo 'dhyāyaḥ
Commentaries (1)
- Śivatosaṇī Liṅgapurāṇaṭīkā — Gaṇeśa Bhaṭṭa, Sanskrit
Linked texts (4)
- Śivapurāṇa (complete text) — Sanskrit
- Prāṇatoṣiṇī — Rāmatoṣaṇa Śarman 1796, Sanskrit
- Tārāsahasranāmavyākhyā Abhidhārthacintāmaṇi — Sanskrit
- Vīraśaivācārapradīpikā — Gurudeva 1575, Sanskrit