[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 2.11 # Lingapurana 2.11 Liṅgapurāṇa 2.11 - **Language:** Sanskrit ## Contents - [2.11.41](https://indike.org/pramana/in.purana.linga.2.11.41) — 1 part ### [2.11.1](https://indike.org/pramana/in.purana.linga.2.11.1) sanatkumāra uvāca vibhūtīḥ śivayormahyamācakṣva tvaṃ gaṇādhipa / parāparavidāṃ śreṣṭha parameśvarabhāvita // ### [2.11.2](https://indike.org/pramana/in.purana.linga.2.11.2) nandikeśvara uvāca hanta te kathayiṣyāmi vibhūtīḥ śivayoraham / sanatkumāra yogīndra brahmaṇastanayottama // ### [2.11.3](https://indike.org/pramana/in.purana.linga.2.11.3) paramātmā śivaḥ proktaḥ śivāsā ca prakīrtitā / śivameveśvaraṃ prāhurmāyāṃ gaurīṃ vidurbudhāḥ // ### [2.11.4](https://indike.org/pramana/in.purana.linga.2.11.4) puruṣaṃ śaṅkaraṃ prāhurgaurīṃ ca prakṛtiṃ dvijāḥ / arthaḥ śaṃbhuḥ śivā vāṇī divaso 'jaḥ śivā niśā // ### [2.11.5](https://indike.org/pramana/in.purana.linga.2.11.5) saptatanturmahādevo rudrāṇī dakṣiṇā smṛtā / ākāśaṃ śaṅkaro devaḥ pṛthivī śaṅkarapriyā // ### [2.11.6](https://indike.org/pramana/in.purana.linga.2.11.6) samudro bhagavān rudro velā śailendrakanyakā / vṛkṣaḥ śūlāyudho devaḥ śūlapāṇipriyā latā // ### [2.11.7](https://indike.org/pramana/in.purana.linga.2.11.7) brahmā haropi sāvitrī śaṅkarārdhasarīriṇī / viṣṇurmaheśvaro lakṣmīrbhavānī parameśvarī // ### [2.11.8](https://indike.org/pramana/in.purana.linga.2.11.8) vajrapāṇirmahādevaḥ śacī śailendrakanyakā / jātavedāḥ svayaṃ rudraḥ svāhā śarvārdhakāyinī // ### [2.11.9](https://indike.org/pramana/in.purana.linga.2.11.9) yamastriyaṃbako devastātpriyā girikanyakā / varuṇo bhagavān rudro gaurī sarvārthadāyinī // ### [2.11.10](https://indike.org/pramana/in.purana.linga.2.11.10) bālenduśokharo vāyuḥ śivā śivamanoramā / candrārdhamauliryakṣendraḥ svayamṛddhiḥ śivā smṛtā // ### [2.11.11](https://indike.org/pramana/in.purana.linga.2.11.11) candrārdhaśekharaścandro rohiṇī rudravallabhā / saptasaptiḥ śivaḥ kāntā umādevī suvarcalā // ### [2.11.12](https://indike.org/pramana/in.purana.linga.2.11.12) paṇmukhastripuradhvaṃsī devasenā harapriyā / umā prasūtīrvai jñeyā dakṣo devo maheśvaraḥ // ### [2.11.13](https://indike.org/pramana/in.purana.linga.2.11.13) puruṣākhyo manuḥ śaṃbhuḥ śatarūpā śivapriyā / vidurbhavānīmākūtiṃ ruciṃ ca parameśvaram // ### [2.11.14](https://indike.org/pramana/in.purana.linga.2.11.14) bhṛgurbhagākṣihā devaḥ khyātistrinayanapriyaḥ / marīcirbhagavānrudraḥ saṃbhūtirvallabhā vibhoḥ // ### [2.11.15](https://indike.org/pramana/in.purana.linga.2.11.15) vidurbhavānīṃ rucirāṃ kaviṃ ca parameśvaram / gaṅgādharegirā jñeyaḥ smṛtiḥ sākṣādumā smṛtā // ### [2.11.16](https://indike.org/pramana/in.purana.linga.2.11.16) pulastyaḥ śaśabhṛnmauliḥ prītiḥ kāntā pinākinaḥ / pulahastripuradhvaṃsī dayā kālaripupriyā // ### [2.11.17](https://indike.org/pramana/in.purana.linga.2.11.17) kraturdakṣakratudhvaṃsī saṃnatirdāyitāvibhoḥ / trinetro 'trirumā sākṣādanasūyā smṛtā budhaiḥ // ### [2.11.18](https://indike.org/pramana/in.purana.linga.2.11.18) ūrjāmāhurumāṃ vṛddhāṃ vasiṣṭhaṃ ca maheśvaram / śaṅkaraḥ puruṣāḥ sarve striyaḥ sarvā maheśvarī // ### [2.11.19](https://indike.org/pramana/in.purana.linga.2.11.19) pulliṅgaśabdavācyā ye te ca rudāḥ prakīrtitāḥ / strīliṅgaśabdavācyā yāḥ sarvā gauryā vibhūtayaḥ // ### [2.11.20](https://indike.org/pramana/in.purana.linga.2.11.20) sarvestrīpuruṣāḥ proktāstayoreva vibhūtayaḥ / padārthaśaktayo yāyāstā gaurīti vidurbudhāḥ // ### [2.11.21](https://indike.org/pramana/in.purana.linga.2.11.21) sāsā viśveśvarī devī sa ca sarvo maheśvaraḥ / śaktimantaḥ padārthā ye sa sa sarvo maheśvaraḥ // ### [2.11.22](https://indike.org/pramana/in.purana.linga.2.11.22) aṣṭau prakṛtayo devyā mūrtayaḥ parikīrtitāḥ / tathā vikṛtayastasyā dehabaddhavibhūtayaḥ // ### [2.11.23](https://indike.org/pramana/in.purana.linga.2.11.23) visphuliṅgā yathā tāvadagnau ca bahudhā smṛtāḥ / jīvāḥ sarve tathā śarvo dvandvasattvamupāgataḥ // ### [2.11.24](https://indike.org/pramana/in.purana.linga.2.11.24) gaurīrūpāṇi sarvāṇiśarīrāṇi śarīriṇām / śarīriṇastathā sarve śaṅkarāṃśā vyavasthitāḥ // ### [2.11.25](https://indike.org/pramana/in.purana.linga.2.11.25) śrāvyaṃ sarvamumārūpaṃ śrotā devo maheśvaraḥ / viṣayitvaṃ vibhurdhatte viṣayātmakatāmumā // ### [2.11.26](https://indike.org/pramana/in.purana.linga.2.11.26) sraṣṭavyaṃ vastujātaṃ tu dhatte śaṅkaravallabhā / sraṣṭā sa eva viśvātmā bālacandrārdhaśekharaḥ // ### [2.11.27](https://indike.org/pramana/in.purana.linga.2.11.27) dṛśyavastu prajārūpaṃ bibharti bhuvaneśvarī / draṣṭā viśveśvaro devaḥ śaśikhaṇḍaśikhāmaṇiḥ // ### [2.11.28](https://indike.org/pramana/in.purana.linga.2.11.28) rasajātamumārūpaṃ ghreyajātaṃ ca sarvaśaḥ / devo rasayitā śaṃbhurghrātā ca bhuvaneśvaraḥ // ### [2.11.29](https://indike.org/pramana/in.purana.linga.2.11.29) mantavyavastutāṃ dhatte mahādevī maheśvarī / mantā sa eva viśvātmā mahādevo maheśvaraḥ // ### [2.11.30](https://indike.org/pramana/in.purana.linga.2.11.30) boddhavyaṃ vastu rūpaṃ ca bibharti bhavavallabhā / devaḥ sa eva bhagavān boddhā bālenduśekharaḥ // ### [2.11.31](https://indike.org/pramana/in.purana.linga.2.11.31) pīṭhākṛtirumā devī liṅgarūpaśca śaṅkaraḥ / pratiṣṭhāpya prayatnena pūjayanti surāsurāḥ // ### [2.11.32](https://indike.org/pramana/in.purana.linga.2.11.32) yeye padārthā liṅgāṅkāstete śarvavibhūtayaḥ / arthā bhagāṅkitā yeye teta gauryā vibhūtayaḥ // ### [2.11.33](https://indike.org/pramana/in.purana.linga.2.11.33) svargapātālalokāntabrahmāṇḍāvaraṇāṣṭakam / jñeyaṃ sarvamumārūpaṃ jñātā devo maheśvaraḥ // ### [2.11.34](https://indike.org/pramana/in.purana.linga.2.11.34) bibharti kṣetratāṃ devī tripurāntakavallabhā / kṣetrajñātvamatho dhatte bhagavānandhakāntakaḥ // ### [2.11.35](https://indike.org/pramana/in.purana.linga.2.11.35) śivaliṅgaṃ samutsṛjya yajante cānyadevatāḥ / sa nṛpaḥ saha deśena rauravaṃ narakaṃ vrajet // ### [2.11.36](https://indike.org/pramana/in.purana.linga.2.11.36) śivabhakto na yo rājā bhakto 'nyeṣu sureṣu yaḥ / svapatiṃ yuvatis tyaktvā yathā jāreṣu rājate // ### [2.11.37](https://indike.org/pramana/in.purana.linga.2.11.37) brahmādayaḥ surāḥ sarve rājānaśca maharddhikāḥ / mānavā munayaścaiva sarve liṅgaṃ yajanti ca // ### [2.11.38](https://indike.org/pramana/in.purana.linga.2.11.38) viṣṇunā rāvaṇaṃ hatvā sasainyaṃ brahmaṇaḥ sutam / sthāpitaṃ vidhivadbhaktyā liṅgaṃ tīre nadīpateḥ // ### [2.11.39](https://indike.org/pramana/in.purana.linga.2.11.39) kṛtvā pāpasahasrāṇi hatvā vipraśataṃ tathā / bhāvātsamāśrito rudraṃ mucyate nātra saṃśayaḥ // ### [2.11.40](https://indike.org/pramana/in.purana.linga.2.11.40) sarve liṅgamayā lokāḥ sarve liṅge pratiṣṭhitāḥ / tasmādabhyarcayelliṅgaṃ yadīcchecchāśvataṃ padam // ### [2.11.41](https://indike.org/pramana/in.purana.linga.2.11.41) sarvākārau sthitāvetau naraiḥ śreyo 'rthibhiḥ śivau / pūjanīyau namaskāryau cintanīyau ca sarvadā // ### [2.11.41.p1](https://indike.org/pramana/in.purana.linga.2.11.41.p1) iti śrīliṅgamahāpurāṇe uttarabhāge ekādaśo 'dhyāyaḥ ## Commentaries (1) - [Śivatosaṇī Liṅgapurāṇaṭīkā](https://indike.org/pramana/in.purana.linga!ganesa.143.27) — Gaṇeśa Bhaṭṭa, Sanskrit ## Linked texts (4) - [Śivapurāṇa (complete text)](https://indike.org/pramana/in.purana.siva*complete-2.7.2.4.39) — Sanskrit - [Prāṇatoṣiṇī](https://indike.org/pramana/in.sampradaya.general.sakta.pranatosini.1.3.141) — Rāmatoṣaṇa Śarman 1796, Sanskrit - [Tārāsahasranāmavyākhyā Abhidhārthacintāmaṇi](https://indike.org/pramana/in.sampradaya.general.sakta.tarasahasranamavyakhyabhidharthacintamani.73) — Sanskrit - [Vīraśaivācārapradīpikā](https://indike.org/pramana/in.sampradaya.saiva.virasaiva.virasaivacarapradipika.511) — Gurudeva 1575, Sanskrit --- Source: [https://indike.org/pramana/in.purana.linga.2.11](https://indike.org/pramana/in.purana.linga.2.11) · Pramāṇa