Pramāṇa · Search · About · API

Lingapurana 2.12

Liṅgapurāṇa 2.12

Language
Sanskrit

Contents

2.12.1

sanatkumāra uvāca
mūrtayo 'ṣṭhau mamācakṣvaśaṅkarasya mahātmanaḥ /
viśvarūpasya devasya gaṇeśvara mahāmate //

2.12.2

nandikeśvara uvāca
hanta te kathayiṣyāmi mahimānamumāpateḥ /
viśvarūpasya devasya sarojabhavasaṃbhava //

2.12.3

bhūr āpo ḥgnir marud vyoma bhāskaro dīkṣitaḥ śaśī /
bhavasya mūrtayaḥ proktāḥ śivasya parameṣṭhanaḥ //

2.12.4

khātmenduvahnisūryāṃbhodharāḥ pavana ityapi /
tasyāṣṭa mūrtayaḥ proktā devadevasya dhīmataḥ //

2.12.5

agnihotrerpite tena sūryātmani mahātmani /
tadvibhūtistathā sarve devāstṛpyanti sarvadāḥ //

2.12.6

vṛkṣasya mūlasekena yathā śākhopaśākhikāḥ /
tathā tasyārcayā devās tathā syus tadvibhūtayaḥ //

2.12.7

tasya dvādaśadhā bhinnaṃ rūpaṃ sūryātmakaṃ prabhoḥ /
sarvadevātmakaṃ yājyaṃ yajānti munipuṅgavāḥ //

2.12.8

amṛtākhyā kalā tasya sarvasyādityarūpiṇaḥ /
bhūtasaṃjīvanī ceṣṭā lokosmin pīyate sadā //

2.12.9

candrākhyakiraṇāstasya dhūrjaṭerbhāskarātmanaḥ /
oṣadhīnāṃ vivṛddhyarthaṃ himavṛṣṭiṃ vitanvate //

2.12.10

suklākhyāraśmayastasya śaṃbhormārtaṇḍarūpiṇaḥ /
dharmaṃ vitanvate loke sasyapākādikāraṇam //

2.12.11

divākarātmanastasya harikeśāhvayaḥ karaḥ /
nakṣatrapoṣakaścaiva prasiddhaḥ parameṣṭhinaḥ //

2.12.12

viśvakarmāhvayastasya kiraṇo budhapoṣakaḥ /
sarveśvarasya devasya saptasaptisvarūpiṇaḥ //

2.12.13

viśvavyaca iti khyātaḥ kiraṇastasya śūlinaḥ /
śukrapoṣakabhāvena pratītaḥ sūryarūpiṇaḥ //

2.12.14

saṃyadvasurīti khyāto yasya raśmistriśūlinaḥ /
lohitāṅgaṃ prapuṣṇāti sahasrakiraṇātmanaḥ //

2.12.15

arvāvasurīti khyāto raśmistasya pinākinaḥ /
bṛhaspatiṃ prapuṣṇāti sarvadā tapanātmanaḥ //

2.12.16

svarāḍiti samākhyātaḥ śivasyāṃśuḥ śanaiścaram /
haridaśvātmanastasya prapuṣṇāti divāniśam //

2.12.17

sūryātmakasya devasya viśvayonerumāpateḥ /
suṣumṇākhyaḥ sadā raśmiḥ puṣṇāti śiśiradyutim //

2.12.18

saumyānāṃ vasujātānāṃ prakṛtitvamupāgatā /
tasya somāhvayā mūrtiḥ śaṅkarasya jagadguroḥ //

2.12.19

tasya somātmaka rūpa śukratvena vyavasthitam /
śarīrabhājāṃ sarveṣāṃ devasyāntakaśāsinaḥ //

2.12.20

śarīriṇāmaśeṣāṇāṃ manasyeva vyavasthitam /
vapuḥ somātmakaṃ śaṃbhostasya sarvajagadguroḥ //

2.12.21

śaṃbhoḥ ṣoḍaśadhābhinnā sthitāmṛtakalātmanaḥ /
sarvabhūtaśarīreṣu somākhyā mūrtiruttamā //

2.12.22

devānpitṝṃś ca puṣṇāti sudhayāmṛtayā sadā /
mūrtiḥ somāhvayā tasya devadevasya śāsituḥ //

2.12.23

puṣṇātyoṣadhijātāni dehināmātmaśuddhaye /
somāhvayā tanustasya bhavānīmiti nirdiśet //

2.12.24

yajñānāṃ patibhāvena jīvānāṃ tapasāmapi /
prasiddharūpametadvai momātmakamumāpateḥ //

2.12.25

jalānāmoṣadhīnāṃ ca patibhāvena viśrutam /
somātmakaṃ vapustasya śaṃbhorbhagavataḥ prabhoḥ //

2.12.26

devo hiraṇmayo mṛṣṭaḥ parasparavivekinaḥ /
karaṇānāmaśeṣāṇāṃ devatānāṃ nirākṛtiḥ //

2.12.27

jīvatvena sthite tasmiñchive somātmake prabhau /
madhurā vilayaṃ yāti sarvalokaikarakṣiṇī //

2.12.28

yajamānāhvayā mūrtiḥ śaivī havyairaharniśam /
puṣṇāti devatāḥ sarvāḥ kavyaiḥ pitṛgaṇānapi //

2.12.29

yajamānāhvayā yā sā tanuścāhutijā tayā /
vṛṣṭyā bhāvayati spaṣṭaṃ sarvameva parāparam //

2.12.30

antaḥsthaṃ ca bahiḥsthaṃ ca brahmāṇḍānāṃ sthitaṃ jalam /
bhūtānāṃ ca śarīrasthaṃ śaṃbhormūrtirgarīyasī //

2.12.31

nadīnāmamṛtaṃ sākṣānnadānāmapi sarvadā /
samudrāṇāṃ ca sarvatra vyāpī sarvamumāpatiḥ //

2.12.32

saṃjīvinī samastānāṃ bhūtānāmeva pāvinī /
aṃbikā prāṇasaṃsthā yā mūrtilaṃbumayī parā //

2.12.33

antaḥsthaś ca bahiḥsthaś ca brahmāṇḍānāṃ vibhāvasuḥ /
yajñānāṃ ca śarīrasthaḥ śaṃbhormūrtirgarīyasī //

2.12.34

śarīrasthā ca bhūtānāṃ śreyasī mūrtiraiśvarī /
mūrtiḥ pāvaka saṃsthā yā śaṃbhoratyantapūjitā //

2.12.35

bhedā ekonapañcāśadvedavidbhirudāhṛtāḥ /
havyaṃ vahati devānāṃ śaṃbhoryajñātmakaṃ vapuḥ //

2.12.36

kavyaṃ pitṛgaṇānāṃ ca hūyamānaṃ dvijātibhiḥ /
sarvadevamayaṃ śaṃbhoḥ śreṣṭhamagyātmakaṃ vapuḥ //

2.12.37

vadanti vedaśāstrajñā yajanti ca yathāvidhi /
antaḥstho jagadaṇḍānāṃ bahiḥsthaśca samīraṇaḥ //

2.12.38

śarīrasthaśca bhūtānāṃ śaivī mūrtiḥ paṭīyasī /
prāṇādyā nāgakūrmādyā āvahādyāśca vāyavaḥ //

2.12.39

īśānamūrterekasya bhedāḥ sarve prakīrtitāḥ /
antaḥsthaṃ jagadaṇḍānāṃ bahiḥsthaṃ ca viyadvibhoḥ //

2.12.40

śarīrasthaṃ ca bhūtānāṃ śaṃbhomūrtirgarīyasī /
śaṃbhorviśvaṃbharā mūrtiḥ sarvabrahmādhidevatā //

2.12.41

carācarāṇāṃ bhūtānāṃ sarveṣāṃ dhāraṇe matā /
carācarāṇāṃ bhūtānāṃ śarīrāṇi vidurbudhāḥ //

2.12.42

pañcakenesamūrtīnāṃ samārabdhāni sarvathā /
pañcabhūtāni candrārkāvātmeti munipuṅgavāḥ //

2.12.43

mūrtayo 'ṣṭau śivasyāhurdevadevasya dhīmataḥ /
ātmā tasyāṣṭamī mūrtiryajamānāhvayā parā //

2.12.44

carācara śarīreṣu sarveṣveva sthitā tadā /
dīkṣitaṃ brāhmaṇaṃ prāhurātmānaṃ ca munīśvarāḥ //

2.12.45

yajamānāhvayā mūrtiḥ śivasya śivadāyinaḥ /
mūrtayo 'ṣṭau śivasyaitā vandanīyāḥ prayatnataḥ //

2.12.46

śreyo ḥrthibhir narair nityaṃ śreyasāmekahetavaḥ //

2.12.46.p1

iti śrīliṅgamahāpurāṇe uttarabhāge dvādaśo 'dhyāyaḥ

Commentaries (1)